Mukanda Wakatumina Paulo Bena Filipoi

JS Robertson

 

Table des matières :

1        Meyi a kumpala

2        Nshapita 1 — Kudi meme ewu kuikala ne muoyo nKilisto

3        Nshapita 2 — Kilisto Yesu, tshilejilu tshietu

4        Nshapita 3 — Kumanya Kilisto ne bukole bua dibika diende

5        Nshapita 4 — Kilisto: Mukuatshishi wa Bantu Bende

 

 

1        Meyi a kumpala

 Mikanda ya mupostolo Paulo mifunda kudi bena ekeleziya idi itupesha diyisha bua kujadika muena kuitabuja mu njila wa ditabuja ne bua kumulombola mu malu a Nzambi. Mukanda wakatumina Paulo Bena Lomo udi ujadika muena Kilisto pa bishimikidi binene bia mu Lumu Luimpe. Mikanda mifunda kudi Bena Kolinto idi ituyisha bu mutudi ne bua kuenza mu ekeleziya ya kaba kamue. Efeso ne Kolosai idi ituleja disua dia Nzambi, "udi wenzeja malu onso bu mudi kudijingulula kua disua diende" (Efeso 1:11). Idi ituyisha bualu bua Kilisto ne Ekeleziya. Mukanda wa Efeso udi uleja muena Kilisto bu mushikikibue ne Kilisto pamue mu miaba ya mu diulu (Efeso 2:5,6). Kadi mukanda wa Paulo mutumina Bena Filipoi udi mukanda wa mushindu mukuabo, udi uleja muena Kilisto bu mudiye upitshila mu buloba ebu mu njila wa ditabuja. Udi upua malu a kunyima muoyo, udi uya kumpala mu bukole bua Nyuma Muimpe, mu njila udi umufikisha kudi Kilisto Yesu mu butumbi bua Nzambi.

    Musoko wa Filipoi wakadi nkolonyi wa Bena Lomo mu province wa Makedonia, mu buloba bua Bena Gelika. Filipoi udi mutedibua bua musangu wa kumpala mu Bienzedi 16:9-40. Ekeleziya wa kumpala mu Europe wakadi kuakua, kunyima kua luendu lua Paulo ku musoko awu ne Lumu Luimpe.

 Paulo wakafundila Bena Filipoi bua kubela tuasakidila bua buobumue buabo nende mu mudimu wa Lumu Luimpe, bua mapa abo, ne bua kusengelela bana babo bakaji babidi, bakadi batandangana, bua kuikalabo ne meji amue mu Mukelenge (4:2). Mukanda wende udi "mukanda wa kusakidila" (4:15,16), kadi wakadi mufunda bua bualu buetu lelu kabidi.

 Dina dia Mukelenge, "Kilisto", didi ditedibua misangu ya bungi mu mukanda ewu mukese - Mukelenge biende udi mukumbane bua dikengela dionso dia bantu bende mu njila wa muoyo. Miaku, "disanka", ne "onso" idi miaku mikole mu mukanda, kadi miaku, "bubi" ne "malu mabi", kayena mitedibue musangu umue.

 

 

 

2        Nshapita 1 — Kudi meme ewu kuikala ne muoyo nKilisto

Paulo ne Timote, bapika ba Kilisto Yesu, kudi basanto bonso ba mu Kilisto Yesu badi ku Filipoi, ne bakulu batangidi ne balami; ngasa kunudi ne ditalala bia kudi Nzambi Tatu wetu ne kudi Mukelenge Yesu Kilisto. 1:1,2

 Paulo, bu muakadi tshilele tshiende pakafundileye bena ekeleziya mikanda, udi ujingila bena kuitabuja ba mu Filipoi ngasa ne ditalala bia kudi Nzambi Tatu ne kudi Mukelenge Yesu Kilisto. Ngasa ne ditalala bidi biamba bualu bua dinanga dionso dia Nzambi Tatu, ne dia Mukelenge Yesu Kilisto bua bantu bende. Ngasa udi wamba bua buimpe, dinanga, ne luse bia Nzambi (Tito 3:4,5). Ditalala didi dituvuluija bua meyi a Mukelenge Yesu kudi bantu bende ne, "Ndi nushila ditalala, ndi nupa ditalala dianyi; tshiena nupadi bu mudi ba pa buloba banupadi. Mitshima yenu kayizakadi, kayitshinyi" (Yone 14:27).

    Paulo kena ufundila Bena Filipoi bu mupostolo, kadi mu dina dia Timote ne mu dina diende, bu "bapika ba Kilisto Yesu". Paulo wakafundila Bena Lomo, bilondeshile pa bukokeshi buende bu mupostolo (bu mutumibue wa Mukelenge), bua kujadika bishimikidi bia Lumu Luimpe. Wakafundila Bena Kolinto kabidi, bu mupostolo wa Yesu Kilisto, bualu bua malu akadi mabuelakane mu ekeleziya, kadi Bena Filipoi bakadi baya kumpala mu luendu lua ditabuja, nunku Paulo kakadi ne bualu bua kujadika bukokeshi buende bu mutumibue wa Mukelenge.

 Paulo wakafundila mukanda wende kudi "basanto bonso", "bakulu batangidi" ne "balami". Muaku, "musanto", udi wamba bua muntu "mutapuluke bua bualu bua Nzambi". Nzambi udi utangila muena kuitabuja yonso bu muntu "mu Kilisto" ne mutapuluke kudi ba pa buloba bua bualu buende. Kunshikidilu kua mukanda wende Paulo udi wamba ne, "Nuele basanto bonso ba mu Kilisto Yesu muoyo", buena kuamba ne, Nuele bena kuitabuja bonso muoyo (4:21). Basanto badi bobo bakitabuja Lumu Luimpe lua Mukelenge wetu Yesu Kilisto.

 Mu Dipungila Dipia-dipia, "mukulu", "mukulu-mutangidi" ne "batangidiki",  badi  bafuma ku  muaku  umue  mu  Buena Gelika,  “episkopos”. Tudi ne tshilejilu mu mukanda wa Bienzedi. Paulo "wakatuma diyi ku Efeso, wakabikila bakulu ba ekeleziya", wakabambila ne, "Tshiakatshina bua kunuambila malu onso adi Nzambi musue. Nuditangile bienu bimpe, ne tshisumbu tshionso tshiakanutekelabo batangidi kudi Nyuma Muimpe, nudishe ekeleziya wa Mukelenge wakasumbeye ku mashi ende". Paulo wakabikila "bakulu ba ekeleziya" - katuena tubala bua bukokeshi bua ekeleziya wa kaba kamue mu bianza bia muntu umue nkayende mu Dipungila Dipia-dipia.

Muaku, "mulami", udi "diakonos" mu buena Gelika, udi muaku wa mu Dipungila Dipia-dipia udi wamba bualu bua muntu udi ukuatshisha ekeleziya. Balume muanda mutekete, bakadi batangila ku makengela a bakaji ba mu lufuila, mu Bienzedi 6:3 bakenza mudimu wa "diakonos". Tudi tubala bualu bua "Foibe, muanetu mukaji wa mu Kilisto, udi mulami wa ekeleziya udi ku Kenekelea" (Lomo 16:1). Yeye wakadi muena mudimu (diakonos) wa ekeleziya, anyi "servante de l'assemblée", kadi Mukanda wa Nzambi kena utela mushindu wa mudimu wende nansha. "Diakonia", mu Buena Gelika, udi mudimu wa "diakonos". Mukanda wa Nzambi udi wamba ne, "Mishindu ya midimu (diakonia) idiku" (1 Kolinto 12:5). Mishindu ya kuenzela Mukelenge mudimu idi ya bungi ne mishilangane. Bakuabo badi mua kuikala balami ba bintu anyi bakuatshishi ba bapele ne bakengi, anyi badi mua kuenza mudimu wa mushindu mukuabo bua kukuatshisha nawu bena ekeleziya.

 

Ndi nsakidila Nzambi wanyi bua dinuvuluka dianyi dionso; ntu nganulombela Nzambi ne disanka misangu yonso mu disengelela dianyi dionso bua bualu buenu bualu bua buobumue buenu nanyi mu kutangalaja kua lumu luimpe ku dituku dia kumudilu dinuakalumvua too ne katataka. 1:3-5

    Mu Filipoi Paulo ne Sila bakakenga mene mene bualu bua lukuna lua bena musoko, bakabakuma ne bakababueja mu buloko (Bienzedi 16:19-23), kadi Paulo wakadi ne tshivulukidi tshimpe tshia bena kuitabuja bakadiku. Mu Filipoi Nzambi wakabulula mutshima wa Ludia bua kuitabuja Lumu Luimpe, ne ba mu nzubu wende kabidi.  Ludia wakaleja Paulo luse lua bungi.  Muomumue, mulami wa nzubu wa lukanu wakabuvua  pa mibundabunda yabo, wakabalongoluela  mesa, pakitabujeye Lumu Luimpe ne ba nzubu bende (Bienzedi 16:15,33,34).

     Bena Filipoi kabakapua Paulo ne Sila muoyo pakumukabo ku luseke luabo, kadi bakatumina Paulo bintu biwakadiye nabi bualu misangu ne misangu. Malu aa akasankisha mutshima wende, kembualu anu bua dinanga diakalejabo kudiye, kadi bualu bua buobumue buabo nende mu mudimu wa Lumu Luimpe.

 

Ndi mumanye bualu ebu mene ne, Yeye nguakabanga mudimu muimpe munda muenu neaujikije too ne palua dituku dia Yesu Kilisto; bu mudibi bimpe bua meme kuikala ne meji aa munda muanyi bua bualu buenu, bualu bua ndi nenu mu mutshima wanyi; bualu bua mu nkanu yanyi ne mu kuvidila ne mu kujadika kua lumu luimpe, buonso buenu nudi bangatshi nanyi ba ngasa. Nzambi udi mumanyi wanyi bu mundi nujinga ne dinanga didi munda mua Kilisto Yesu. 1:6-8

 Pakafundila Paulo mukanda wende kudi Bena Filipoi wakadi mu Lomo, musuika ne nkanu, kadi kakadi mua kupua balunda bende muoyo, wakadi nabo mu mutshima wende. Paulo wakalonda luidi lua Mfumu wende. "Yesu … mumane kusua bende mene bakadi pa buloba, wakabasua too ne kunshikidilu" (Yone 13:1).

    Buobumue bua Bena Filipoi ne Paulo, mu makenga a Lumu Luimpe ne mu kupa kua bintu bua mudimu wa Lumu Luimpe (1:5), biakaleja ne Nzambi wakadi muenza mudimu mu mitshima yabo. Nunku Paulo udi ujadika bualu ne, "Yeye nguakabanga mudimu muimpe munda muenu neaujikije too ne palua dituku dia Yesu Kilisto". Mu "dituku dia Mukelenge wetu Yesu Kilisto", bantu bende nebikale nende, nansha umue newikale mujimine. Mukelenge Yesu wakela meji bualu bua dituku adi pakalombeye Tatu wende ne, "Tatu, ndi musue bawakumpa bikale kundi bua kutangilabo butumbi buwakumpa, bualu bua wewe wakansua meme diambedi kabayi banze kufuka buloba" (Yone 17:24).

    Paulo udi utangila kumpala kabidi ku dituku didi ditedibue mu Filipoi 2:16, bualu bua wakamanya ne, Nemmone mamuma a mudimu wanyi mu Lumu Luimpe, nengikale ne disanka (1 Kolinto 1:8.  2 Kolinto 1:14).

 

Ndi ndomba bualu ebu ne, Luse luenu lutambe kudiundadiunda mu dimanya ne mu dijungulula dia malu onso; bua nuenu numanye mua kujadika malu adi makane; ne bua nuenu nuikale ne mitshima mitoke, kanuyi balenduishi ba bakuabo, too ne palua dituku dia Kilisto; ne bua nuenu nuujibue tente ne mamuma a buakane adi afuma kudi Yesu Kilisto bua butumbi ne kutumbishibua bia Nzambi. 1:9-11

 

     Bena Filipoi bakadi bena dinanga, kadi Paulo udi ujinga kumona dinanga diabo ditambe kudiundadiunda. Wakamanya ne, Muntu udi unanga Mukelenge ne bantu bende neadiundadiunde mu dimanya ne mu dijingulula dia malu a Kilisto. Udi musue kutangila bantu ba Nzambi kudiundadiunda mu dimanya ne mu dijingulula dia malu a Nzambi bua:

 

1) "Nuenu numanye mua kujadika malu adi makane". Paulo udi musue Bena Filipoi bua kujingulula malu a nyuma ne pakenzabo nunku, bua kujadika malu adi matamba makane mu mitshima yabo.

2) "Bua nuenu bikale ne mitshima mitoke". Lupetu lua kujadika kua malu adi makane mu mutshima ludi mutshima mutoke.

3) "Kanuyi balenduishi ba bakuabo". Muntu udi ne mutshima mutoke kena mulenduishi wa bakuabo. Mukanda wa Nzambi udi wamba ne, "Kanuikadi balenduishi anyi kudi Bena Yuda anyi kudi Bena Gelika anyi kudi ekeleziya wa Nzambi" (1 Kolinto 10:32). Paulo udi musue kumona bena kuitabuja ne mitshima mitoke ne kabayi balenduishi ba bakuabo "bua dituku dia Kilisto" - too ne palua Mukelenge.

4) "Bua nuenu nuujibue tente ne mamuma a buakane". Malu aa adi bua butumbi bua Nzambi, ne adi amutumbisha. Pakadi Mukelenge Yesu ne bayidi bende Yeye wakabambila bualu bua "mamuma", "mamuma makuabo", ne "mamuma a bungi".   Wakamba ne, "Tatu wanyi udi utumbishibua mu bualu ebu ne, Nudi nukuama mamuma a bungi; nunku nenuikale bayidi banyi" (Yone 15:1-8).

 

Bana betu ba mu Kilisto, ndi musue nuenu numanye ne, Malu akunkuata akuandamuka bua kudiundisha lumu luimpe. 1:12

 Malu akakuata Paulo akadi malu makole. Basalayi ba Bena Lomo bakamulama bu muena buloko, kembualu bua malu mabi akenzeye kadi bualu bua ditabuja diende dia mu Kilisto. Musangu mukuabo balunda bende bakuabo bakela meji ne mudimu wende wa mu Lumu Luimpe wakajika, kadi Paulo wakamanyisha Bena Filipoi  ne, "Bua malu aa mene mudimu wa Lumu Luimpe udi uya kumpala". Bena lukuna ba Lumu Luimpe badi mua kuteka bena mudimu ba Nzambi mu buloko, kadi kabena bamanye mua kujikija kutangalaja kua Diyi dia Nzambi. Mukanda wa Nzambi udi wamba ne, "Bu mudi mvula uloka, ne bu mudi neige ifuma mu diulu, ne kayena ipinganamu kabidi kayiyi mianze kumiamina mayi pa buloba … nunku diyi didi dipatuka mukana wanyi nedikale muomumue; kadiena dipingana kundi patupu, kadiyi dianze kuenza muanda undi musue dienze, kadiyi dianze kujikija muanda unakaditumina" (Yeshaya 55:10,11).

 

Nunku nkanu yanyi bua Kilisto yakamanyibua munkatshi mua masalayi onso a mu nzubu wa lukanu ne munkatshi mua bantu bonso bakuabo kabidi. Ne batambe bungi ba munkatshi mua bana betu ba mu Mukelenge bakakolesha mitshima yabo bualu bua nkanu yanyi, badi bamba diyi dia Nzambi ne dikima ditambe, kabayi batshina. 1:13-14

 Bena lukuna lua Lumu Luimpe bakela meji bua kulujimija, kadi basalayi ba Bena Lomo ba bungi bakumvua bualu bua Mukelenge Yesu. Mu nzubu wa mfumu munene wa Bena Lomo muakadi balondi ba Mukelenge Yesu (4:22). Munkatshi mua bantu bakuabo bakumvua Lumu Luimpe kudi Paulo wakadi Onesimo, mupika wa Filemona. Onesimo wakanyema ku Lomo, wakamonangana ne Paulo ne wakitabuja Lumu Luimpe. Paulo wakamupingaja kudi mfumu wende, kayi bu mupika kadi bu "muanenu munanga wa mu Kilisto" (Filemo mvese 16). Nzambi wakasankisha bantu ba bungi mu nzubu wa lukanu bualu bua Paulo.  Diyi dia Nzambi didi diamba ne, "Bikala Nzambi netu, nganyi udi mumanye mua kutupumbisha?" (Lomo 8:31).

 

Bulelela, bakuabo badi bamba Kilisto bualu bua mukawu ne kutandangana; ne bakuabo kabidi badi bamuamba bualu bua disanka dimpe; aba badi bamuamba bua luse, bamanye ne ndi mutekibue bua kuvidila kua lumu luimpe; kadi bakuabo badi bamba Kilisto bua ditapuluka, kabayi ne mitshima mitoke, bela meji bua kunjudila makenga mu nkanu yanyi. 1:15-17

 Bakuabo bakadiku bakadi bambila Lumu Luimpe ne mitshima mibi. Bakadi bena mukawu, bakajinga bua kuditumbisha pakadi Paulo mu buloko, kadi yeye biende wakadi usanka bua kushiya malu onso mu bianza bia Nzambi.

    Paulo wakafundila bena ekeleziya ba mu Kolinto ne, "Patshidi mukawu ne kutandangana munkatshi muenu, kanuena nulonda malu a mubidi, anyi? Kanuena nuenda bu mudi tshilele tshia bantu, anyi?" (1 Kolinto 3:3). Kutandangana ne matapuluka munkatshi mua bantu ba Nzambi kabiena bifuma kudi Nyuma Muimpe nansha. "Mupika wa Mukelenge kena ne bua kutandangana, kadi ikale biende ne kalolo kudi bantu bonso" (2 Timote 2:24).

    Butudi nabu mbua kudimuka, katuponyi mu mateyi a Satana bu bobo "badi badikebela malu abo" (2:21), anyi bu bobo "badi belangana meji a malu a pa buloba" (3:19).

 

Nunku tshinyi? Anu bualu ebu ne, Mu tshiambilu tshionso, bikalatshi mu lubombo anyi mu bushuwa, Kilisto udi wambibua; ne mu bualu ebu ndi nsanka, E, bulelela, nensankemu kabidi. 1:18

    Paulo kakela meji bua bualu buende, yeye wakadi usanka bualu bua Kilisto udi wambibua.  Bantu bakuabo badi mua kudikebela malu abo, Paulo wakakeba malu a Mukelenge wende, kakadikebela butumbi kudi bantu, yeye wakasua kusankisha Mfumu wende. Wakaya mu bukole bua Mukelenge, disanka dia Mukelenge diakadi bukole buende.

 

Bua ndi mumanye ne bualu ebu nebuandamuke bu lupandu luanyi bualu bua disengelela dienu ne bua dikumbaja dia Nyuma wa Yesu Kilisto. Mbu mudi dialamina dianyi dikole ne ditekemena dianyi ne, tshiena nfuishibua bundu nansha mu bualu bumue; kadi bu munakamana kuenza misangu yonso ne dikima dionso, nunku katataka Kilisto neatumbishibue mu mubidi wanyi, nansha buikala ku muoyo wawu, nansha buikala ku lufu luawu. 1:19,20

    Pakafunda Paulo bualu bua "lupandu luanyi" mu mvese 19, yeye kakadi wela meji bualu bua lupandu lua muoyo wende (son âme,  tangila  kabidi  muinshi  mua  2:12,13 bualu  bua  lupandu), muena Kilisto wa bushuwa kena mua kuikala mujimine nansha (Yone 10:28). Paulo wakamanya, bualu bua disengelela dia bena kuitabuja ne diambuluisha dia Nyuma Muimpe ne, Tshiena nfuishibua bundu, nansha mu bualu bumue, ne Kilisto neatumbishibue. Dijinga diende mene diakadi bua kutumbisha Kilisto mu mubidi wende, mu muoyo anyi mu lufu. Mukanda wa Nzambi udi wamba ne, "Kanuena bena mioyo yenu. Bualu bua nuakasumbibua ku mushinga mukole; nunku nutumbishe Nzambi mu mubidi wenu" (1 Kolinto 6:19,20).

    Paulo wakabala milombu ya bantu ba Nzambi ya mushinga mutambe bunene. Mu mukanda muende muibidi, mufunda kudi Bena Tesalonike, wakamba ne, Tshiashadidi mpindiewu, bana betu, nutulombele Nzambi, bua diyi dia Mukelenge diendakane ne ditumbishibue" (2 Tesalonike 3:1). Yakobo wakafunda ne, "Disengelela dia muntu muakane didi ne bukole bua bungi mu kuenza kuadi" (Yakobo 5:16). Tuele meji bualu bua bukole bua disengelela dia tshisumbu tshia bena Kilisto badi basangisha popamue nangananga bua kutendelela ne kulomba Nzambi!

 

Bualu bua kudi meme ewu kuikala ne muoyo nKilisto, ne kufua kudi kupita mushinga muimpe. Bingikala ne bualu bua kuikala ne muoyo mu mubidi, ne bikala bualu ebu mamuma a mudimu wanyi, tshiena mumanye bualu bunasungula. Kadi ndi mujikila pankatshi pa malu aa abidi: ndi njinga bua kuumuka panu bua kuikala ne Kilisto; bua bualu ebu budi butamba buimpe; kadi kushala mu mubidi mbualu bunudi nutamba kukengela. 1:21-24

 Muena kuitabuja yonso udi mua kuamba ne, Kilisto udi muoyo wanyi, kadi mbualu bukuabo bua kuamba ne, "Kuikala ne muoyo nKilisto"! Paulo wakadi mua kuamba meyi aa mu bushuwa.

 Meyi a Paulo ne, "Bua kuikala ne Kilisto … budi butamba buimpe", adi atamba kusamba mitshima ya bena kuitabuja badi banyingalala bua lufu lua bananga babo. Pakatangila munyengi, wakamba kufua, mu ditabuja kudi Mukelenge Yesu, umuambila ne, "Pawabuela mu bukelenge buebe, umvuluke", Mukelenge wakamuambila ne,  "Bulelela,  ndi nkuambila ne,  Lelu wewe newikale nanyi mu Paladiso" (Luka 23:42,43). Muena kuitabuja, pafueye, udi uya bua kuikala ne Kilisto, bidi bitamba buimpe. Udi usanka, muoyo wende udi ne Mukelenge, udi windila mubidi wende mupia-mupia, mufuanangane ne wa Kilisto, udiye upeta palua Mukelenge bua kuangata bantu bende (1 Tesalonike 4:13-18). "Kabuena buanze kumanyibua mutuikala. Tudi bamanye ne, Biamueneshibueye, netuikale bafuanangane nende; bualu bua netumumone bu mudiye" (1 Yone 3:2).  Bua muntu udi witabuja Yesu,  Kuumuka ku mubidi kudi kuikala kua Mukelenge (2 Kolinto 5:8).

 

Bualu bua ndi ngitabujijibua bualu ebu, ndi mumanye ne nenshaleku mu mubidi, E, bulelela, nenshale nenu bonso bua kudiunda kuenu ne kusanka kuenu bia mu ditabuja; bua ditumbisha dienu dikumbane mu Kilisto Yesu mu bualu buanyi bua dikala dianyi nenu tshiakabidi. 1:25,26

    Paulo wakela meji bua yeye biende ne, Kuumuka ku mubidi bua kuikala ne Kilisto, mbualu budi butamba buimpe; kadi wakamanya ne, Bena Kilisto badi nanyi bualu bua kukolesha mitshima yabo mu malu a Nzambi. Wakajinga kabidi bua kumonangana ne Bena Filipoi ne kuikala nabo tshiakabidi. Nansha Paulo wakadi mu bianza bia mukelenge munene wa Bena Lomo, muntu wa luonji wakadi ne bukole bua muoyo anyi bua lufu bia bantu muinshi mua bukokeshi buende, Paulo wakamanya bimpe ne, Tshiena muanji kujikija mudimu wanyi, wakasomba talala, bu muntu kayi ne bualu. Bidimu bikuabo biakapita, Paulo wakadi mu nzubu wa lukanu kabidi, kadi musangu ewu wakamanya ne, Tshikondo tshia tshimuangi tshianyi tshiafiki. Mudimu wanyi udi mujike (2 Timote 4:6).

 

Anu bualu ebu, bikadilu bienu bikale biakanangane ne lumu luimpe lua Kilisto; bua binalua kunumona anyi bingikala kukuabo, ngumvue bianyi lumu lua malu enu ne, Badi bajalama mu nyuma umue, ne badi batshinta popamue ne mutshima umue bua ditabuja dia lumu luimpe. 1:27

 Bikala tudi tudikonka ne, Tshiakadilu tshianyi tshidi tshikumbane ne Lumu Luimpe lua Kilisto, anyi? Tudi tumona ne dikonka  didi  dikole !  Tudi  tupanga  mu  bualu ebu  misangu  bungi  munyi?  Netuikale  ne  bukole  bua  kuenda  mu  njila  udi usankisha Nzambi anu bu mutudi tuenda ne Mukelenge mu munya wa Diyi diende, mu ditumikila ne mu ditabuja. Mbualu butekete bua kunyingalaja Nyuma Muimpe wa Nzambi, udi kabidi Nyuma udi utupesha bukole ne udi utukuatshisha mu njila wa ditabuja. Mbualu butekete bua malu a mubidi, anyi malu a ba pa buloba, bua kutupumbisha, kadi Mukanda wa Nzambi udi wamba ne, "Endayi mu Nyuma Muimpe, nunku kanuena nulonda lukuka lua mubidi" (Galatia 5:16).

 Paulo wakamanya ne, Bikala bena ekeleziya kabena benda mu nyuma umue, malu mabuelakane neabuele munkatshi muabo, nebapone mu mateyi a Satana, muena lukuna wa Nzambi ne wa bantu ba Nzambi. Paulo wakasua kumona Bena Filipoi bimana bakandamana. Ke anu mu nyuma umue kadi yeye wakasua kubamona batshinta popamue ne mutshima umue bua ditabuja dia Lumu Luimpe. Yuda wakadimuja bena kuitabuja ne, "Bualu buakunkuata kunufundila bua kukolesha mitshima yenu, bua nuenu nutshinte bikole bua ditabuja diakapabo basanto musangu umue tshiendelele.  Bualu  bua  bantu  bakuabo  bakabombelela munkatshi muenu mu musokoko" (Yuda 3,4). Bantu aba bakadi bena lukuna ba Lumu Luimpe!

 

Ne kabena batshinyishibua nansha ku bualu bumue kudi bena lukuna. Bualu ebu budi tshilejilu tshia dibutuka diabo, kadi ntshia lupandu kunudi, ne luolu ludi lufuma kudi Nzambi; bualu bua nuakapebua ngasa bua bualu bua Kilisto, kena anu bua kumuitabuja, kadi bua kukenga bua bualu buende kabidi; nudi ne diluangana diodiumue dinuakatangila munda muanyi, ne dinudi numvua katataka ne didi munda muanyi. 1:28-30

 Mukelenge Yesu wakamba ne, "Bikala ba pa buloba nenu lukuna, nudi bamanye ne, Bakadi nanyi lukuna diambedi. Bu nuenu bikale ba pa buloba, ba pa buloba bakadi kusua bantu babo; kadi bualu bua nuenu kanuena ba pa buloba, nakusungulula mu ba pa buloba, nunku ba pa buloba badi nenu lukuna" (Yone 15:18,19). Paulo wakajingulula ne, Bikala Bena Filipoi bakenga bualu bua Lumu Luimpe (bu muakadiye ukenga mu Lomo) mbidi tshimanyinu ne,  Ditabuja  diabo didi dilelela.  Bikalabo  bakenga  bualu bua Kilisto, malu aa neikale bua lupandu luabo ku budimu bua Satana bua kubasesuisha ku bushuwa bua Lumu Luimpe. Paulo udi ubala makenga bualu bua Kilisto, mu dituku dia bupidia buende, bu bualu bua disanka. Wakamanya ne, Badi bakenga nende katataka nebakokeshe nende kabidi mu dituku dia bukole buende. "Bituakenga nende, mbua tuetu tutumbishibue nende" (Lomo 8:17).

    Paulo wakamona bienzedi bia bena lukuna ba bantu ba Nzambi bu tshilejilu tshia dibutuka diabo. Mukanda wa Nzambi udi wamba ne, "Nzambi kena usekibua; bualu bua tshintu tshionso tshidi muntu ukuna, ntshiotshio tshiapuoleye" (Galatia 6:7).

 

3        Nshapita 2 — Kilisto Yesu, tshilejilu tshietu

Nunku bikalaku ditendekena dia mu Kilisto, bikalaku disengelela dia mu dinanga, bikalaku buobumue bua Nyuma, bikalaku mitshima ya luse ne malu a dinanga, nunvudishile disanka dianyi, bua nuenu nuele meji muomumue, nuikale bienu ne dinanga diodiumue ne mutshima muomumue ne meji amue. 2:1,2

    Bena Filipoi bakadi bakenga bua ditabuja diabo pakafundila Paulo mukanda wende kudibo (1:29,30). Katataka udi musue kukolesha mitshima yabo mu malu a Nzambi. Muaku "bikalaku" mu 2:1 kawena "bikalaku" wa mpata nansha, malu onso atedibua kudi Paulo mu 2:1,2 akadiku mu ekeleziya wa mu Filipoi, tudi mua kuteka miaku "bualu bua" mu muaba wa "bikala". Paulo wakadi usanka bualu bua ditendekena dia mu Kilisto diakadiku, ("ditendekena" didi difunda "disamba" mu traductions mikuabo), wakadi usanka bualu bua buobumue bua Nyuma Muimpe buakadiku. Bena Filipoi bakadi bena luse ne bakadi banangangana, kadi udi musue buonso buabo kukumbaja disanka diende. Udi ubasengelela ne:

1)  Nuele meji muomumue.

2)  Nuikale ne dinanga diodiumue.

3)  Nuikale ne mutshima muomumue.

4)  Nuikale ne meji amue.

 

 Paulo wakamanya ne, Bikala Bena Filipoi kabena batshinta popamue ne mutshima umue bua ditabuja dia lumu Luimpe, malu mabuelakane neabuele munkatshi muabo bua kunyanga bumanyishi buabo ne mudimu wabo wa mu Lumu Luimpe.

 

Kanuenji muanda bua ditapuluka anyi bua kuditumbisha kua patupu; kadi mu mitshima mipuekela muntu ne muntu abale mukuabo bu muntu udi umutamba yeye buimpe. Muntu ne muntu katangidi malu ende nkayawu, kadi muntu ne muntu atangile kabidi malu a bakuabo. 2:3,4

 Matapuluka mu ekeleziya adi anyanga bumanyishi bua ekeleziya ne adi apumbisha mudimu wa Nzambi. Paulo wakabikila Bena Kolinto "bana batekete ba mu Kilisto", bualu bua kutapuluka kuabo. Wakabambila ne, "Kanuena nulonda malu a mubidi, anyi? Kanuena nuenda bu mudi tshilele tshia bantu, anyi? Bua pamba mukuabo ne, "Meme ndi wa Paulo; ne mukuabo ne, Meme ndi wa Apolo; kanuena bu bantu, anyi"?  Paulo wakababela bikole be ne, "Nunku Apolo udi bu tshinyi? Paulo udi bu tshinyi? Badi bakuatshi ba mudimu ne nuenu nuakitabuja bua bualu buabo, bu muakabapa Mukelenge bukole muntu ne muntu" (1 Kolinto 3:1-5). Matapuluka adi avuija bundu mu Ekeleziya wa Nzambi. Misangu ya bungi matapuluka adi afuma ku kudisua. Mupostolo Yone wakadimuja Gayo bua Diotelefe ne, "Udi musue kuikala kumpala munkatshi muabo (mua bena ekeleziya), kena utuitabuja" (3 Yone 9). Bualu ebu budi njiwu lelu! Kadi bikala muntu ne muntu abala mukuabo udi utamba yeye buimpe, bidi bualu bua disanka ne bua ditalala munkatshi mua bantu ba Nzambi mu ekeleziya.

 Njiwu mukuabo wakadiku. Paulo wakafunda ne, "Buonso buabo badikebela malu abo, kabena bakeba malu a Yesu Kilisto" (2:21). Nunku Paulo wakasengelela Bena Filipoi bua kutangila malu a bakuabo (2:4). Kembu badibueji mu malu a bakuabo ne mitshima mibi, kadi bua kubenzeja malu mimpe. "Butudi nabu, tuetu bantu bakole, mbua kutuala matekete a badi batekete, kembua kudisankisha nkayetu" (Lomo 15:1). "Kanupu muoyo bua kuenzelangana bimpe ne bua kukuatshishangana; bua Nzambi udi usanka ne milambu ya nunku" (Ebelu 13:16).

 

 

Nuikale ne meji aa munda muenu akadi kabidi munda mua Kilisto Yesu. Yeye wakadi muikale ne Bunzambi mene, kadi kakabala buobumue buende ne Nzambi bu tshintu tshia kulaminyina bikole; kadi yeye wakadiumushila bimanyinu bia butumbi buende, pakangateye mubidi wa mupika, pakalueye mu tshifuanyikiji tshia muntu. Ne pakamuenekeye mu tshifuanyikiji tshia muntu, yeye wakadipuekesha, wakalua mutumikidi too ne ku lufu, ku lufu mene lua pa mutshi mutshiamakane. 2:5-8

 Paulo wakamanya bimpe ne, Malu a mubidi (bu kudisua ne kuditumbisha) adi apumbisha mudimu wa Nyuma Muimpe mu ekeleziya, kadi wakamanya kabidi ne, Bikala bena ekeleziya balonda luidi lua Mukelenge Yesu mbualu bukuabo. Wakabapa Kilisto Yesu bu tshilejilu tshiabo.

 

    Mu mvese 5-8 Paulo udi wamba bua makasa muanda mutekete a Mukelenge Yesu Kilisto adi apueka:

1)  Kilisto Yesu kakabala buobumue buende ne Nzambi bu tshintu

     tshia kulaminyina bikole.

2)  Yeye wakadiumushila bimanyinu bia butumbi buende.

3)  Wakangata mubidi wa mupika.

4)  Wakalua mu tshifuanyikiji tshia muntu.

5)  Wakadipuekesha.

6)  Wakalua mutumikidi too ne ku lufu.

7)  Ku lufu mene lua pa mutshi mutshiamakane.

 

Lumu Luimpe lua Yone ludi lutuleja Bunzambi bua Mukelenge wetu Yesu Kilisto, (Yone 1:1-5), kadi pakalueye munkatshi mua bantu yeye kakalua mu dikenka dia butumbi buende nansha. Mukelenge wa butumbi, wakangata mubidi wa mupika pakalueye mu tshifuanyikiji tshia muntu. Wakadipuekesha, kakalueye munkatshi mua bantu banene ba pa buloba. Malia wakaladika muana Yesu "mu tshidilu tshia nyama" (Luka 2:7).

    Bantu banene ba pa buloba kabakamumanya, bualu bua nzambi wa tshikondo etshi, Satana, wakafofomisha mesu abo. Bakokeshi ba pa buloba kabakamanya Nzambi anyi mushindu wende bua kutusungila ku malu mabi etu. Kabakamanya meji a Nzambi, “bua bu bobo baamanye, kabakadi kushipa  Mukelenge wa butumbi ku mutshi mutshiamakane" (1 Kolinto 2:8,9).

 Mukelenge Yesu Kilisto wakamanya malu onso akadi kumpala kuende pakalueye bua kutufuila. Yeye wakambila bayidi bende ne, "Budi Muana wa muntu nabu mbua kukengeshibua makenga a bungi … ne bua kushipibua" (Luka 9:22). Mukelenge Yesu Kilisto, Mukelenge wa muoyo, "wakalua mutumikidi too ne ku lufu, ku lufu mene lua pa mutshi mutshiamakane". Yeye "wakakankamana pakakengeye ku mutshi mutshiamakane, wakalengulula bundu” bua kutufikisha kudi Nzambi ne bua kuikaleye ne tshisumbu tshia bantu bua bualu buende. Mbidi bimpe patuikala mua kuamba ne mupostolo Paulo ne, "Muana wa Nzambi, wakannanga, wakadifila bua bualu buanyi" (Ebelu 12:2. Galatia. 2:20).

 

Ne bua bualu ebu Nzambi wakamubandisha kulu kule, wakamupa dina didi pamutu pa dina dionso; ne bua mu dina dia Yesu binu bionso  bitue  panshi,  ne  bia  bintu  bia  mu  diulu  ne  bintu  bia pa buloba ne bintu bia muinshi mua buloba, ne bua ndimi yonso yambe patoke ne Yesu Kilisto udi Mukelenge, too ne ku butumbi bua Nzambi Tatu. 2:9-11

 Bu mudi makasa muanda mutekete adi apueka mu mvese 6-8, nunku mu mvese 9-11 makasa muanda mutekete adi abanda:

1)  Nzambi wakabandisha Mukelenge Yesu kulu kule.

2)  Nzambi wakamupa dina didi pamutu pa dina dionso.

3)  Mu dina dia Yesu binu bionso bitue panshi.

4)  Ne bintu bia mu diulu.

5)  Ne bintu bia pa buloba.

6)  Ne bintu bia muinshi mua buloba.

7)  Ndimi yonso neyambe patoke ne Yesu Kilisto udi  Mukelenge.

Mbidi bimpe ne biakane bua Nzambi kubandisha Mukelenge Yesu ku muaba mutambe bunene. Nzambi wakashikika Kilisto ku tshianza tshiende tshia bukole … "kule ku mutu kua bumfumu buonso ne bukokeshi buonso ne bukole buonso ne bukelenge buonso ne dina dionso ditedibua, kenganu mu tshikondo etshi kadi mu tshikondo tshilualua kabidi"  (Efeso 1:20,21).

     Katataka Mukelenge udi ushikama pa nkuasa wa butumbi wa Tatu wende, utshidi mupidibua kudi ba pa buloba, kadi Nzambi neamuvuije Mukelenge udi mupite bakelenge ba pa buloba kutumba, Yeye muine neashikame mu nkuasa wende wa butumbi (Matayo 25:31). Mukelenge Yesu Kilisto neakokeshe mu buloba buakamupatula. "Yeye neikale ne bukokeshi ku mayi manene too ne ku mayi manene makuabo … too ne kunfudilu kua buloba. E, bakelenge bonso bamukukuile, ba mu bisamba bionso bia bantu bamukuatshile mudimu. Dina diende nedishaleku tshiendelele! … bantu nebadivudishile disanka mu bualu buende … Dina diende dia butumbi divudishibue disanka tshiendelele; buloba bujima buujibue tente ne butumbi buende. Amen ne Amen" (Musambu 72:8,11,17-19. Tangila Yeshaya 9:6,7. Matayo 28:18. 1 Kolinto 15:25).

    Bikala bantu bapidia kutua binu biabo panshi kumpala kua Mukelenge Yesu bu Musungidi ne Mfumu mu tshikondo tshia ngasa wende ne tshia Lumu Luimpe, nebatue binu biabo panshi kumpala kuende  bu  Mulumbuluishi  wabo  mu  dituku  dia  bukole  buende ne bua tshiji tshiende. "Monayi, katataka ntshikondo tshimpe, monayi, katataka ndituku dia lupandu" (2 Kolinto 6:2).

 

Nunku bananga banyi, bu munuakatumikila misangu yonso, kembua kuikala kuanyi munkatshi muenu nkayaku, kadi mpindiewu nudi nutamba kuenza nunku pandi tshiyiku, nudienzeje bua kujikija lupandu luenu ne ditshina ne dizakala, bualu bua Nzambi ngudi wenzeja munda muenu bua kusua ne bua kuenza kabidi bualu bua disua diende dimpe. 2:12,13

 Paulo udi musue bena Kilisto bananukile kuenza biakane, batambe kutumikila diyisha diende pakadiye kayi muikale nabo. Nzambi wakadi wenzeja munda muabo ne Paulo udi musue kumona mudimu ewu uya kumpala.

 Lupandu ludi luambibua mu Mukanda wa Nzambi mu mishindu mishilangane:

1)   Nzambi wakatusungila (2 Timote 1:9). Muntu udi upeta lupa  ndu pitabujeye dipa dia Nzambi, didi  muoyo  wa  tshiendelele mu Kilisto. Paulo  wakayisha Bena Yuda ne Bena Gelika "bua kukudimunabo  mitshima  kudi  Nzambi  ne  bua  kuitabujabo Mukelenge wetu Yesu Kilisto" (Bienzedi 20:21). "Bualu bua nudi basungidibue ku ngasa bua ditabuja; ne diodi kadiena difuma kunudi, ndipa dia Nzambi; kadiena difuma ku midimu, bua muntu kaditumbishi" (Efeso 2:8,9).

2)   Nzambi udi utusungila. Nzambi udi utusungila ku dituku ku dituku ku bukole bua bubi bu mutudi tuenda nende mu munya wa Diyi diende ne mu ditumikila kudiye. Paulo wakasengelela Bena Filipoi ne, "Nudienzeje bua kujikija lupandu luenu ne ditshina ne dizakala" (2:12). Udi mumanye ne, Nzambi udi wenzeja mu mitshima yabo, katataka udi musue kumona mamuma a lupandu mu mioyo ya Bena Filipoi.

3)  Nzambi neatusungile. Paulo wakafundila Bena Lomo ne, "Diba diakumana kufika bua nuenu kubishibua ku tulu; bua katataka lupandu luetu ludi lutamba dituku dituakadianjila kuitabuja kuikala pa buipi" (Lomo 13:11). Paulo udi wela meji wa dituku adi palua Mukelenge Yesu bua kuangata bantu bende. Dituku edi kadiena dianze kufika. Nunku tudi mua kuamba ne, Nzambi neatusungile.

 

Nuenze malu onso kanuyi ne ditontolola ne dielangana dia mpata; bua nuenu nulue bantu badi kabayi ne bualu ne badi ne mitshima mitoke, bu bana ba Nzambi badi kabayi ne tshilema munkatshi mua bena tshikondo tshikonyangala ne tshia tshishiku; banudi numueneka munkatshi muabo bu minda ya pa buloba. 2:14,15

     Bubi bunene bua Bena Isalele buakadi kutontolola kuabo. Paulo wakabela Bena Kolinto ne, "Lekelayi kutontolola, bu muakatontolola bakuabo babo, bakashipibua kudi mushipi" (1 Kolinto 10:10. Nomba 16:41-50). Nzambi kena witabuja bantu bende bikale bena kutontolola, kutua mikemu mbualu bukuabo! Mukelenge Yesu wakapumuna mundamunda bualu bua bupidia bua bantu, wakatua mikemu pakatangileye kanyinganyinga ka bantu bende, kadi meyi a kutontolola kakapatuka mukana muende nansha. Mishiku ya Mukelenge yakamba anu meyi mimpe ne meyi makane.

     Bikala  bena  Kilisto  ne  meji  mafuanangane  ne  akadi  nawu Kilisto,  kabena balenduishi ba bakuabo, anyi kudi bena  ekeliziya, anyi kudi bobo badi pambelo pa ekeleziya. Bu mudi muinda utamba kutema mu midima mikole nebateme kabidi. Mukelenge Yesu wakamba ne, "Munya wenu uteme ku mesu kua bantu, bamone midimu yenu mimpe, batumbishe kabidi Tatu wenu udi mu diulu" (Matayo 5:16).

 

Nuboluele diyi dia muoyo; bua meme kuikala ne bua mua kutumbila nabu mu dituku dia Kilisto ne, Tshiakidikisha lubilu tshianana ne tshiakenza mudimu wanyi patupu. 2:16

 Mu mvese 16 Paulo udi musue Bena Filipoi kuleja ba pa buloba njila wa muoyo. Bantu bakuabo bitabuja pumvuabo kuambila kua Lumu Luimpe ku mishiku ya bena Kilisto, kadi bakuabo bitabuja pakatangilabo bienzedi biabo bidi bitumbisha Mukelenge. Bantu ba bungi badi  batangilatangila kudi bena Kilisto bua kumanye ne,  Badi bantu ba mushindu kayi? Bikala bienzedi biabo kabiena biumvuangana ne Lumu Luimpe badi babajiana ku lukasa. Muambi mukuabo wakimana kumpala kua tshisumbu tshia bantu mu musoko mukuabo bua kuambila kua Lumu Luimpe, kadi umue wa bobo bakadiku bakamujiana, kakadi muanji kumufuta bua bisabata biakadiye biluata nabi! Paulo, ne bambi bakadi nende, bakadi benji ba diyi diakumvua bantu kudibo.

    Paulo udi utangila kumpala too ne ku dituku dia Kilisto, didi dituku dia difutu dia bantu ba Nzambi. Kena musue kuya kua Nzambi ne bianza patupu, udi ujinga bikole be kumona mamuma a mudimu wende mu dituku diadia, ne bua kumanya ne, Mudimu wanyi wonso ne makenga anyi onso kabiakadi tshianana.

 

E, bulelela, binapongolodibua pa mulambu ne pa ditendelela dia ditabuja dienu, ndi nsanka bianyi, ne ndi nsanka ne buonso buenu; muomumue nuenu nusanke bienu, nusanke nanyi kabidi. 2:17,18

 Paulo wakatshidi muena buloko, musuike ne nkanu, pakafundileye Bena Filipoi mukanda wende. Utshidi ne ditekemena ne, Bena Lomo nebakose tshilumbu tshianyi bimpe, kadi udi mumanye ne, Badi mua kunshipa. Bikala bualu budi nunku udi usanka bua kulonda mu makasa a Yeye "wakapumuna mashi a muoyo wende too ne ku lufu" (Yeshaya 53:12). Udi usanka bua kushiya  malu  onso  mu  bianza  bia Nzambi. Paulo wakasua kutumbisha Mfumu wende mu muoyo anyi mu lufu. Wakamanya ne, Mukelenge udi nanyi, ditalala diakadi munda mua mutshima wende.

 

Ndi ntekemena mu Mukelenge Yesu bua kunutumina Timote tshitupa tshipi bua meme kuikala ne busambi buimpe panamanya malu enu. Bua tshiena ne mukuabo udi ne mutshima bu wende wadieleja meji bulelela bua malu enu. 2:19,20.

    Munshapita 2 tudi ne bilejilu bia bantu banayi bakadi ba kueyemenyibua:

1)  Mukelenge Yesu Kilisto, wakalua mutumikidi too ne ku lufu, ku lufu mene lua pa mutshi mutshiamakane.

2)  Paulo wakalonda mu makasa a Mfumu wende. Wakadi muntu wa kueyemena too ne ku dituku Bena Lomo bakamushipa bu muntu mubi.

3) Timote, pakatshidiye nsongalume, wakadi ne lumu luimpe lumanyibua kudi bena kuitabuja (Bienzedi 16:1,2).

4)  Epafodito, wakadi pepi ne lufu bua mudimu wa Lumu Luimpe.

 

Bualu bua buonso buabo badi  badikebela  malu  abo,  kabena  bakeba malu a Yesu Kilisto. Kadi nudi bamanye bujalami buende  (bua Timote) ne, bu mudi muana ne tatu wende, nunku yeye wakakuata nanyi mudimu wa mu lumu luimpe. Nunku ndi ntekemena kumutuma yeye ku tshikondo tshindi ntangila muyaya malu anyi. Kadi ndi ne ditekemena mu Mukelenge kabidi ne meme nkayanyi nendue tshitupa tshipi. 2:21-24

 Bidi bimueneka ne Timote wakumvua Lumu Luimpe kudi Paulo mu luendu luende wa kumpala ku Luseta. Pakapingana Paulo ku musoko ewu, wakamusangana kabidi. Wakadi nsongalume ne lumu luimpe lumanyibua kudi bana babo ba mu Kilisto (Bienzedi 14:6,7. 16:1,2). Paulo wakasua aye nende mu ngendu yende ne Lumu Luimpe - disungula dimpe. Paulo wakamubikila ne, "Muana wanyi munanga ne wa kueyemena mu Mukelenge" (1 Kolinto 4:17). Timote kakasua bua kuditeka kumpala kua bantu. Paulo wakafunda Bena Kolinto ne, "Bialua Timote kunudi, nuamanya bua yeye kuikala nenu kayi ne ditshina, bualu bua yeye udi wenzela Mukelenge mudimu bu mundi ngenza; nunku muntu kamupetudi nansha" (1 Kolinto 16:10,11).

    Muntu ne expérience wa bungi mu malu a Nzambi udi mua kukuatshisha nsongalume, bu muakenza Paulo ne Timote. Kunyima Timote wakalonda mu makasa a Paulo, bu muakalonda Paulo mu makasa a Mfumu wende. Timote wakalua mukuatshishi wa bantu bakuabo ba bungi. Paulo wakamuambila ne, "Malu awakumvua kundi munkatshi mua bamanyi ba bungi, malu aa wafile kudi bantu badi mua kueyemenyibua, balua kukumbana mua kuyisha bakuabo kabidi" (2 Timote 2:2). Mbidi nunku mudimu wa Nzambi udi uya kumpala.

 

Kadi nakuelangana meji ne, Bualu buakunkuata bua kunutumina Epafodito, muanetu wa mu Kilisto ne muena mudimu nanyi ne disalayi nanyi ne musheshe wenu ne mukuatshishi wanyi ne bintu bindi nkengela. Bualu bua yeye wakanujinga buonso buenu, ne wakabungama bikole bua nuenu nuakumvua lumu ne, Yeye udi usama. 2:25,26

 Paulo udi utela malu itanu bualu bua Epafodito:

1)  Muanetu wa mu Kilisto. Udi  ubikila  Epafodito  ne, "Mon frère”.

2)  Muena mudimu nanyi. Mbidi bitamba buimpe ne bia disanka bikala bena mudimu ba Nzambi bamuenzela mudimu bu Paulo,  Epafodito  ne  Timote,  popamue  ne  mutshima  umue.

3)  Disalayi nanyi. Paulo udi wela meji wa "mvita mimpe ya ditabuja". Luendu  lua  muena  kuitabuja,  bu  mudiye  upitshila      buloba  ebu,  kaluena  lutekete  nansha,  bena  lukuna  badiku. Kadi Mukanda wa Nzambi udi utuleja bu mutudi mua kuya kumpala mu ditalala katuyi ne ditshina (Efeso 6:10-20).

4)  Musheshe wenu. Bena Filipoi bakasungula muanabo Epafodito bua kutuala mapa abo bua kukuatshisha nawu Paulo. Dikuatshisha diakafuma kudibo diakadi bu, "mupuya wa dipembu dimpe, mulambu muitabujibue, udi usankisha Nzambi" (4:18).

5)  Mukuatshishi wanyi. Paulo wakadi usanka bua dikuatshisha dia mulunda wende Epafodito, “mukuatshishi wanyi ne bintu bindi nkengela”.

 

    Bena Filipoi bakunvua lumu ne, Epafodito wakadi usama. Yeye wakadi usama mene mene, kadi wakadi ne dibungama, kembualu bua disama diende kadi bualu bua bena ekeleziya bakadi banyingalala munda bua bualu buende. Paulo, pakafundileye Bena Kolinto bualu bua Ekeleziya wa Nzambi bu mubidi, wakabafundila ne,  “Bikala tshitupa tshimue ne dikenga, bitupa bionso bidi bikenga natshi; ne bikala  tshitupa tshimue tshitumbishibua, bitupa bionso bidi bisanka natshi” (1 Kolinto 12:26).

 

Ne bulelela, yeye wakadi usama, pepi ne lufu; kadi Nzambi wakamufua luse, kakamufuilalu yeye nkayende kadi wakamfuilalu meme kabidi, bua meme tshikadi ne kanyinganyinga pamutu pa kanyinganyinga. Nunku nakumutuma ne disuminyina ditambe, bua nuenu nusanke panuamonangana nende kabidi, ne bua meme ngikale ne kanyinganyinga kakepe. Nunku numusankidile mu Mukelenge ne disanka dionso; ne nutumbishe bantu badi nunku; bualu bua yeye wakalua pabuipi ne lufu bualu bua mudimu wa Kilisto, yeye wakapana muoyo wende ku lufu bua kunkumbajila bintu biakadi bishala ku dikuatshisha dienu kundi. 2:27-30

 Epafodito wakadi pepi ne lufu bua mudimu wa Lumu Luimpe, ne bua dijinga diende bua kukuatshisha Paulo, kadi Nzambi wakamufuila luse. Musangu awu Nzambi wakondapa muena mudimu wende, kadi  misangu  mikuabo  Nzambi  udi  wangata  bena mudimu bende kuende bua kuikisha ku midimu yabo. Bikala bualu budi nunku, Nzambi udi ubikila bakuabo bua kulonda mu makasa abo, nunku mudimu wa Nzambi udi uya kumpala.

 Nzambi wetu udi Nzambi wa kusamba kuonso, kena witabuja binsonshi bia ku mesu bia bantu bende bimata panshi tshianana. Muena kuitabuja udi mua kuamba ne, Bikondo bianyi bidi mu bianza biebe Nzambi Tatu wanyi, mbidi bimpe nunku.

 Paulo wakatuma mulunda wende, Epafodito, kudi Bena Filipoi, utshidi uteka malu a bakuabo kumpala kua malu ende mene. Udi uvuluija Bena Filipoi bua kunemeka bantu badi bu Epafodito, muntu wakalua pepi ne lufu bualu bua mudimu wa Kilisto.

 

4        Nshapita 3 — Kumanya Kilisto ne bukole bua dibika diende

Tshiashadidi mpindiewu, bana betu, nusanke mu Mukelenge. Kunufundila malu momumue kakuena kuntonda, kadi kudi kunukuatshisha nuenu. Nudimuke kudi mbua, nudimuke kudi benji babi ba mudimu, nudimuke kudi baditapi ba mubidi. 3:1,2

     Paulo wakadi muena disanka, bu muakadi Habakuka (Habakuka 3:17-19). Pakadiye mu nzubu wa lukanu wakimbila Nzambi musambu ne Sila. Mpindiewu kabidi, udi muena lukanu kadi udi ukolesha mitshima ya bakuabo bua kuikalabo bena disanka. Paulo wakamanya ne, Mukelenge udi nanyi,  mu matuku mimpe ne mu matuku a makenga (2 Kolinto 6:10.7:4). Kadi udi ne bujitu pambidi pende: bakuabo bakadiku bakadi "bena lukuna lua mutshi mutshiamakane wa Kilisto" (3:18). Nunku udi uvuluija Bena Filipoi bualu bua bantu aba kabidi.

1) "Nudimuke bualu bua mbua". Mbua idi yamba bua bantu ba bienzedi bibi bitambe badi balonda nkuka ya mubidi. Kabena ne bundu (Matayo 7:6. 2 Petelo 2:22).

2) "Nudimuke kudi benji babi ba mudimu".  Benji babi ba mudimu badi basokoka malu mabi abo. Yuda wakafunda bualu bua bantu ba nunku ne, "Bantu bakuabo bakabombelela munkatshi muenu mu musokoko … bandamuna ngasa wa Nzambi wetu ku malu a masandi, badi babenga Mfumu wetu umue umuepele, udi kabidi Mukelenge wetu, Yesu Kilisto" (Yuda mvese 4).

3) "Nudimuke kudi batapi ba mubidi". Paulo udi wela meji bua bobo bakadi benzeja bantu bakuabo, kabakadi Bena Yuda, bua kulonda mikenji ya Mose. Bantu ba mushindu ewu bakadi bayisha Bena Kilisto mu Bienzedi 15:1 ne, "Binuikala kanuyi batengula bu mu tshilele tshia Mose, kanuena bamanye mua kusungidibua". Bakadi bayisha "lumu lukuabo ludi kaluyi lumu luimpe" (Galatia 1:6,7). Tunkanunuina tuabo tudiku lelu!

 

Bualu bua tuetu tudi batengula badi batendelela ku Nyuma wa Nzambi ne badi batumbila mu Kilisto Yesu, ne badi kabayi ne dieyemena dia malu a mubidi. 3:3

    Ditengula diakadi tshimanyinu tshia dipungila dia Nzambi ne bantu bende ba kale, Bena Isalele. Mu matuku a Paulo, Bena Isalele ba bungi bakadibala bu bantu ba Nzambi mene, bu muakenza Paulo diambedi yeye kayi muanji kukudimuna mutshima wende. Bakadi batengudibue ne bakalonda mikenji ya Mose, kadi Nzambi udi utangila muntu musokoma wa mu mutshima. Katataka Paulo udi ujadika ne, Bantu balelela ba Nzambi badi:

1) "Batendelela ku Nyuma wa Nzambi". Muena Kilisto udi mumanye mua kutendelela Nzambi kudi Nyuma wa Nzambi bualu bua udi ne Nyuma wa Nzambi munda muende (Efeso 1:13. 1 Kolinto 3:16). Mukelenge Yesu wakamba, bualu bua Nyuma Muimpe ne, "Neantumbishe meme; bualu bua neangate malu anyi, neanuambilewu" (Yone 16:14). Bantu badi kabayi bena kuitabuja kabena bamanye mua kutendelela Nzambi "mu nyuma ne bulelela" (Yone 4:24).

2) "Batumbila mu Kilisto Yesu". "Kakuikadi wa mu mubidi udi mua kutumba ku mesu kua Nzambi. Kadi bua bualu buende nuenu nudi mu Kilisto Yesu, wakavuijibua meji a kudi Nzambi kutudi: ne buakane ne bujidibu ne bupikudibu. Bualu bua mbu muakafundabo ne, Muntu udi utumba, atumbile mu Mukelenge" (1 Kolinto 1:29-31).

3) "Badi kabayi ne dieyemena dia malu a mubidi". Muntu udi ulonda malu a Nyuma kena ulonda malu a mubidi. "Endayi mu Nyuma Muimpe, nunku kanuena nulonda lukuka lua mubidi. Bualu bua dijinga dia malu a mubidi didi difuilangana ne dijinga dia malu a Nyuma, ne dijinga dia malu a Nyuma didi difuilangana ne dijinga dia malu a mubidi; bua malu aa adi mimanyinangane, bua nuenu kanuenji malu anudi basue kuenza" (Galatia 5:16,17).

 

Nansha meme nkayanyi ngeyemena malu mene a mubidi. Bikala muntu mukuabo wela meji bua kuikala ne dieyemena dia malu a mubidi, meme ndi mua kumutamba kuikala nadi. Bakantengula dituku dia muanda mukulu; nakadi Muena Isalele, wa tshisamba tshia Benyamina, Muena Ebelu wa Bena Ebelu; mu bualu bua mikenji nakadi Mufalese; mu bualu bua lukunukunu nakadi nkengesha bena ekeleziya; ne mu bualu bua buakane bua mu mikenji, nakalua muntu udi kayi ne bualu. 3:4-6

 Bu muntu wa pa buloba, Paulo wakadi mua kuditumbisha mene. Nansha muntu umue wakadi mua kumupetula bualu bua diku diende anyi bualu bua tshiota tshiende. Tshisamba tshia Benyamina tshiakadi tshisamba tshia dina dimpe, pakatomboka bisamba bikuabo, tshisamba tshia Benyamina tshiakashala tshia kueyemena kudi mukelenge Davidi. Paulo wakadi Muena Ebelu wa Bena Ebelu. Bafalese kabakadi mua kumubandisha tshilumbu bua mikenji ya Mose anyi bua mikenji yabo. Paulo wakadi Mufalese, ne muana wa Mufalese. Wakadi ne lukunukunu lukole bua kulama bilele bia bankambua bende. Nganyi wakadi mua kumubandisha tshilumbu! Kadi kunyima kua kukudimuna kua mutshima wende, wakadibala bu muntu wakadi mutambe mubi, wakanyingalala bualu bua mu lukunukunu luende yeye wakakengesha Ekeleziya wa Nzambi (Galatia 1:13,14. 1 Timote 1:15).

 

Kadi malu akadi a mushinga muimpe kundi, nguowu awu nakabala bu tshintu tshijimina bua Kilisto. 3:7

    Paulo wakadi muena Taso, "musoko udi kawi wa patupu" (Bienzedi 21:39). Yeye wakakolela ku makasa a Gamaliele, muyishi munene wa mu Isalele (Bienzedi 22:3). Pamutu pa malu aa, wakadi kabidi, citoyen wa Lomo, kadi udi ubala malu aa, ne malu a "butumbi" buende mu mvese 5 ne 6, bu bintu bia patupu bua Kilisto, bintu bia kuela ku diala bua kupeta Kilisto. Wakabala bintu bionso biakadi bia mushinga ku mesu kua bantu, lungenyi luende lunene bilondeshile pa lungenyi lua ba pa buloba, ne muaba munkatshi mua banene ba pa buloba, bu bintu bia patupu bualu bua Kilisto.

 

Ebulelela mene, ndi mbala bintu bionso bu tshintu tshijimina bualu bua bulengele butambe bua kumanya kua Kilisto Yesu, Mukelenge wanyi; unakajimijila bintu bionso bua bualu buende, ne ndi mbibala bu bintu bia kuela ku diala bua meme mpete Kilisto, ne bua kunsanganabo munda muende, tshiyi ne buakane buanyi budi bufume ku mikenji, kadi ngikale ne buobu abu budi bua ditabuja dia mu Kilisto, buakane mene budi bufuma kudi Nzambi pangitabuja. 3:8,9

Paulo wakasangana ne Mukelenge pakadiye uya mu njila, pepi ne Damaseke, bua kukengesha bena Kilisto. Ku dituku adi yeye

wakadi muntu wa mushindu mukuabo, wakadi muntu mupiamupia mu Kilisto. Mukanda wa Nzambi udi wamba ne, "Bikala muntu mu Kilisto, yeye udi mufukibue mupia-mupia; malu makulukulu akaya, monayi, akalua mapia-mapia" (2 Kolinto. 5:17). Paulo kakadi kabidi mukengeshi wa bantu ba Nzambi, kadi wakalua mupika wa Kilisto. Ku dituku adi, too ne ku dibikila diende kua Nzambi, Paulo wakadifila kudi Mukelenge Yesu ne mutshima wende mujima, yeye wakamubikila ne, "Mukelenge wanyi". Mbidi bimpe patuikala mua kumubikila nunku!

    Paulo wakamanya bimpe ne, Buakane buanyi budi bu "tshivualu tshidi tshinyanguke", (Yeshaya 64:6), kadi udi mua kuamba mu meyi a muprofete Yeshaya ne, "Nentambe kusanka mu Yehowa, mutshima wanyi neutambe kusanka mu Nzambi wanyi; bualu bua yeye wakunduatshisha bivualu bia lupandu, wakumbuikila ne tshikowelu tshia buakane" (Yeshaya 61:10). Buakane budi bufuma kudi mikenji ya Mose kabuena mua kubingisha nansha muntu umue, kadi Mukelenge wetu "wakafidibua ku lufu bua malu mabi etu, wakabishibua bua dibingisha dietu" (Lomo 4:24). Nzambi nealumbuluishe ba pa buloba mu buakane kudi Kilisto (Bienzedi 17:30,31). Kadi muntu mu Kilisto "kena ulua mu tshilumbu" (Yone 5:24).

    Dijinga dinene dia Paulo diakadi "bua meme mpete Kilisto ne bua kunsanganabo munda muende". Pakadiye pepi ne lufu, wakafundila Timote ne, "Tshidi kumpala mpindiewu ntshifulu tshia butumbi tshia buakane bua Nzambi tshintekela, tshialua Mukelenge mulumbuludi muakane kumpa dituku diadia; kena utshimpa anu meme, kadi neatshipe bonso kabidi badi basue dimueneka diende" (2 Timote 4:8). Petelo wakamba bualu bua "tshifulu tshia butumbi tshidi katshiyi tshifubidila" (1 Petelo 5:4). Yone wakafunda bualu bua "tshifulu tshia butumbi tshia muoyo" (Buakabuluibua 2:10). Bualu bunene bua Paulo kabuakadi tshifulu tshia butumbi kadi Kilisto nkayende - udi musue kuikala nende.

 

Mbua meme kumumanya yeye, ne bukole bua dibika diende ku lufu,  ne  buobumue  nende  mu makenga ende,  muikale mufuanyikijibue nende mu lufu luende; binamanya mua kufika ku dibika dia munkatshi mua bafue. Kembua nakamana kupeta bualu ebu, anyi bua nakumana kuakajibua; kadi ndi ntshinta bikole, binamanya mua kukuata bualu buakunkuatshilabo kabidi kudi Kilisto Yesu bualu buabu. 3:10-12

    Paulo udi musue kumanya Kilisto ne bukole bua dibika diende. Muntu udi mua kumanya diyisha bualu bua Kilisto mutu muende kadi kumanya Kilisto mbualu bua mutshima ne bua dinanga. Paulo wakafundila Bena Efeso bualu bua bunene bupite bua bukole bua Nzambi wa Mukelenge wetu Yesu Kilisto, Tatu wa butumbi, "kutudi tuetu badi bamuitabuja. Wakatuleja bu mudi kuenzeja kua bukole buende bunene buakenzeye mu Kilisto Yesu pakamubisheye ku bafue ne pakamushikikeye ku tshianza tshiende tshia bukole mu miaba ya mu diulu" (Efeso 1:19,20). Paulo udi musue kumanya bukole ebu mu muoyo wende. Udi musue kumanya kabidi, buobumue ne Kilisto mu makenga ende.

    Mukelenge wakambila bayidi bende ne, "Bikala ba pa buloba nenu lukuna, nudi bamanye ne, Bakadi nanyi lukuna diambedi … nuvuluke diyi dinakunuambila ne, Mupika kena mutambe mfumu wende. Biankengeshabo, nebanukengeshe kabidi; bienzabo diyi dianyi, nebenze diyi dienu kabidi (Yone 15:18-20).

    Paulo udi usanka bua kukenga bua Mfumu wende. Udi ubala makenga a mu tshikondo etshi ne, "Kaena makumbane bua kuelekejibua ne butumbi budi buamba kumueneshibua kutudi" (Lomo 8:17,18). Udi musue kuikala mufuanyikijibue ne Kilisto mu lufu luende. Wakafunda ne, "Misangu yonso tudi tutuala dishipibua dia Yesu mu mibidi yetu, bua muoyo wa Yesu umueneshibue kabidi mu mibidi yetu" (2 Kolinto 4:10).

    Mukanda wa Nzambi udi wamba ne, "Kanudifuanyikiji ku malu a mu tshikondo etshi, kadi nuandamuke ku dikudimuna dia meji enu bu meji mapia-mapia bua nuenu nujingulule mudi disua dia Nzambi didi dimpe, didi dimusankisha, ne didi diakane tshishiki" (Lomo 12:2). Nzambi udi musue tshisumbu tshia bantu "bua kuikilabo bafuanyikishibue ku tshifuanyikiji tshia Muana wende, bua yeye ikale muanabute munkatshi mua bana babo ba bungi" (Lomo 8:29).

    Mu mvese 11 ne 12 Paulo udi wela meji bualu bua kubika kulufu. Kena ne mpata too, udi utshinta bua kufika kundekelu kua luendu luende bimpe, bu muntu mutambibue mu Kilisto. Utshidi  utangila kumpala, kena muanji kupeta dijinga dia mutshima wende, bua kuikala ne Kilisto ne mufuanangane nende, utshidi mu mubidi, kadi udi udikolesha, udi uya kumpala mu bukole ne mu disanka bia Mukelenge.

    Paulo wakasonsola bakuabo ne, "Kanuena bamanye, anyi, ne, Bantu badi balumbila lubilu mu tshilumbilu badi balumbila bonso, kadi umue wabo udi wangata bukenji? (le prix, anyi disanka). Lumbilayi bienu nunku, bua nuenu nuangate bukenji" (1 Kolinto 9:24). Pakafikeye kunshikidilu kua luendu luende pa buloba, wakadi mua kuamba ne, "Nakuluangana mvita mimpe, nakujikija tshidikijilu tshia lubilu, nakulamata ditabuja" (2 Timote 4:7,8).

 

Bana betu, tshiena ndibala bu muntu wakamana kubukuata; kadi ndi ngenza bualu bumue: Pandi mpua muoyo bua malu a kunyima, pandi ndobelela ku malu adi kumpala, ndi ntshinta bua kufika ku ndekelu wa njila bua kuangata bukenji bua dibikila dia mulu dia Nzambi mu Kilisto Yesu. 3:13,14

 Paulo udi wenza "bualu bumue", udi udikolesha bua kupeta bidi kumpala kuende, kena uvuluka malu a kunyima. Muntu udi ulumbila lubilu kena utangila kunyima kuende nansha, bakuabo nebamupiteye! Satana udi mua kutupumbisha mu luendu lua ditabuja bituela meji a malu a kunyima - musangu mukuabo bua mapanga etu! Kadi tuye kumpala batangila kudi Yesu, tuye kumpala mu bukole buende. "Tumushayi bujitu buonso, ne malu mabi adi bualu butekete bua kutulenduisha, tuidikishe ne kutantamana tshidikijilu tshietu tshia lubilu tshidi tshitekibua kumpala kuetu, batangila kudi Yesu, mubangi ne mujikije wa ditabuja dietu" (Ebelu 12:1,2). Bikala muntu utu utangila kunyima mu luendu lua ditabuja yeye neapingane kunyima! (Luka 9:62. 17:32).

    "Malu adi kumpala" a mu mvese 13 ne 14 kaena malu a bilota bia patupu, anyi malu adi mu meji a bantu, kadi adi malu malelela, adi ne bishimikidi biawu mu milayi ya Nzambi. Nunku Paulo udi udikolesha  bua  kufika  ku ndekelu wa njila bimpe, udi unyemena ku  kipatshila  kiende  bua  kupeta  difutu  dia  dibikila dia mulu dia Nzambi mu Kilisto Yesu,  didi  dibikila  dia  mu  diulu  (Ebelu 3:1). Diyi dia Nzambi kudi Bena Isalele mu tshikondo tshikole tshiakadi ne, "Baye kumpala".  Tuye bietu kumpala! Nzambi wetu udi wa kueyemena (Ekesode 14:15. 1 Kolinto 1:9).

 

Nunku buonso buetu bakamana kukola mu bualu bua Nzambi tuikale ne meji momumue; ne binuikala ne meji makuabo mu bualu bukuabo, Nzambi neanubuluile bualu ebu kabidi; kadi kutuakamana kufika, tuende bietu mu njila muomumue. 3:15,16

    Ku musangu ku musangu matandangana ne matapuluka bidi bimueneka munkatshi mua bantu ba Nzambi bualu bua bena ekeleziya kabena ne meji momumue. Bikala bantu ba Nzambi balonda luidi lua Kilisto, "wakadipuekesha" (2:8), malu aa, adi anyanga bumanyishi bua Ekeleziya wa Nzambi, kaena amueneka. Bituikala ne meji awu akadi munda mua Kilisto Yesu munda muetu, neatulame ku kudisua, netuikale ne meji momumue, netuende mu njila muomumue.

 Paulo wakamanya ne, Kuenda kua bantu ba Nzambi kudi bualu bunene. Wakasengelela Bena Efeso ne, "Ndi nusengelela ne, Endayi bakanangane ne dibikila diakanubikilabo nadi, mu kudipuekesha kuonso, mu kalolo, mu lutulu ne mu kuikalangana ne dinanga" (Efeso 4:1-3). Bikala bena ekeleziya kabiena benda mu njila muomumue, bumanyishi buabo budi butekete.

 Mukanda wa Nzambi kena witabuja bena ekeleziya bua kuenda mu buobumue ne bobo badi balamata ku mayisha mabi bualu bua Kilisto, anyi bua kuikala ne buobumue ne malu mabi. Tudi ne luidi lua Kilisto, butudi ne bua kulonda mu makasa ende, nansha makasa etu adi matekete (1 Petelo 2:21).

 

Bana betu, nulue bienu bangidikiji banyi popamue; nutangile bantu badi benda nunku bu munudi netu bu tshidikijilu. Bualu bua ba bungi badi benda, banakanuambila malu abo misangu ya bungi, ne bandi nuambila katataka ne binsonji ku mesu ne, Badi bena lukuna lua mutshi mutshiamakane wa Kilisto; kunshikidilu kuabo didi dibutuka, nzambi wabo ndifu diabo, butumbi buabo budi mu bundu buabo; badi belangana meji a malu a pa buloba. 3:17-19

Mu matuku a Paulo, bakuabo bakadi bena lukuna lua mutshi  mutshiamakane wa Kilisto. Mu matuku etu bantu ba mushindu wabo badi bavulangana mene mene. Bakuabo badi bakeba makuta, bakuabo badi bakeba butumbi ku mesu kua bantu, bakuabo badi baprofete ba mashimi. Mukelenge Yesu wakadimuja balondi bende ne, "Nuende badimuke kudi baprofete badi ne mashimi, batu balua kunudi baluate biseba bia mikoko, kadi munda muabo mudi nkashama idi ne luonji. Nenubajingulule ku mamuma abo" (Matayo 7:15,16). Muntu udi mumanyibua kudi kuenda kuende. Paulo wakadimuja bakulu ba mu Efeso ne, "Ndi mumanye ne, Panumuka bianyi, nkashama idi ne luonji neilue munkatshi muenu, neyone tshisumbu tshia mikoko; bantu nebabike munkatshi muenu mene, bambila bantu malu adi kayi malelela bua kukokabo bayidi kunyima kuabo" (Bienzedi 20:29, 30). Paulo biende wakadi tshidikijilu tshia muena mudimu muimpe wa Nzambi. Wakafundila Bena Kolinto ne, "Nuikale bidikiji banyi, bu mundi meme kabidi muidikiji wa Kilisto" (1 Kolinto 11:1).

 

Bualu bua kuetu mene kudi mu diulu, kutudi tuindila kabidi Musungidi, Mukelenge Yesu Kilisto; yeye neakudimune mibidi ya bupuekele buetu bua kufuananganayi ne mubidi wende wa butumbi, bu mudi kuenza kuende kudiye mumanye mua kuvuija naku bintu bionso kunyima kuende. 3:20,21

 Abalahama ne bena kuitabuja bakuabo ba kale bakatekemena "musoko udi ne bishimikidi, mulongolodi wawu ne muibaki wawu nNzambi". Bantu aba bakamana kutangila musoko wa Nzambi pa bule "bamane kuitabuja ne, Tudi benyi ne bena luendu pa buloba ebu … nunku Nzambi kena ufua bundu bua bualu buabo bua kumubikilabo Nzambi wabo, bualu bua wakabalongoluela musoko" (Ebelu 11:9-16).

 "Tangilayi mushindu wa dinanga diakutupa Tatu bua tuetu tubikidibue ne, Bana ba Nzambi; ne tudi nunku. Bua bualu ebu ba pa buloba kabena batumanye, bualu bua kabakamumanya. Bananga, katataka tudi bana ba Nzambi; kadi kabuena buanze kumanyibua mutuikala. Tudi bamanye ne, Biamueneshibueye, netuikale bafuanangane nende; bualu bua netumumone bu mudiye.

Muntu yonso udi ne ditekemena edi kudiye udi udilengesha bu mudiye mulengele" (1 Yone 3:1-3). Bualu bua tudi ba mu tshiota tshia Nzambi butudi nabu mbua kuikala bantu ba mushindu kayi mu bienzedi bia tshijila ne bia Nzambi?

 

 

5        Nshapita 4 — Kilisto: Mukuatshishi wa Bantu Bende

Nunku bana betu bananga ne bajingibua, disanka dianyi ne tshifulu tshianyi tshia butumbi, nuimane bajalame mu Mukelenge, bananga banyi. 4:1

 Muaku, "nunku", udi musuika ne mvese ya kunshikidilu ya mu nshapita isatu! "Kuetu mene kudi mu diulu, kutudi tuindila kabidi Musungidi, Mukelenge Yesu Kilisto; yeye neakudimune mibidi ya bupuekele buetu bua kufuananganayi ne mubidi wende wa butumbi … nunku bana betu bananga ne bajingibua … nuimane bajalame mu Mukelenge".

 Tudi ne tshilejilu tshimpe tshia muntu udi wimana mujalame mu 2 Samuele 23:11,12. Bena Peleshete, bakadi tshifuanyikiji tshia "bena lukuna lua mutshi mutshiamakane wa Kilisto", (3:18), bakadisangisha mu tshisumbu mu budimi bua nkunde, bantu ba Nzambi bakanyema kumpala kuabo, kadi Shama, umue wa bena bukitu ba mukelenge Davidi, "wakimana munkatshi mua budimi, wakabasungila, wakashipa Bena Peleshete; Yehowa wakabavuija lupandu lunene". Diyi dia Paulo kudi Bena Filipoi ne, "Nuimane bajalame", didi bu diyi dia kapitene ka masalayi kudi bantu muinshi mua bukokeshi buende, palua bena lukuna babo bua kuluangana nabo mvita. Diyi bua bualu buetu lelu ditshidi ne, "Nuimane bajalame mu Mukelenge". "Nutshinte bikole bua ditabuja diakapabo basanto musangu umue tshiendelele … mu nyuma umue … ne mutshima umue bua ditabuja dia lumu luimpe" (Yuda 3,4. Filipoi 1:27).

 

Ndi nsengelela Ewodia ne ndi nsengelela Suntuke bua kuikalabo ne meji amue mu Mukelenge. 4:2

     Ekeleziya wa ku Filipoi kakashala kayi ne mateta nansha. Bakaji babidi, bakadi bakuatshishi ne Paulo mu mudimu wa Lumu Luimpe, bakadi batandangana. Musangu mukuabo Ewodia ne Suntuke bakadi munkatshi mua bakaji bakadisangisha ku muelelu wa musulu bua kulombela Nzambi, pakaya Paulo ku Filipoi musangu wa kumpala (Bienzedi 16:13). Paulo kena ubabandisha tshilumbu, udi ubasengelela  ne  meyi  mimpe  bua kumvuangana bua kuikala ne meji amue mu Mukelenge. Bikala meji akadi munda mua Kilisto munda muabo, matandangana abo neajimine, nebikale ne "meji amue" mu Mukelenge. "Kudisua kudi kupatula anu matandu, kadi badi bitabuja meyi a lungenyi badi ne meji" (Nsumuinu 13:10). Mukanda wa Nzambi udi wamba ne, “Nuikalangane ne ditalala munkatshi muenu” (1 Tesalonike 5:13).

 

E, ndi ndomba wewe kabidi, muena nanyi ku mutshi wa tshikokedi wa bushuwa, bua wewe ukuatshishangane ne bakaji aba, bualu bua bobo bakenza nanyi mudimu wa lumu luimpe, ne Kulemento kabidi ne bakuabo benji nanyi ba mudimu, badi ne mena abo mafunda mu mukanda wa muoyo. 4:3

 Nganyi udi "muena nanyi ku mutshi wa tshikokedi wa bushua"? Bakuabo badi bela meji ne wakadi Epafodito, yeye wakadi pepi ne kupingana ne mukanda wa Paulo kudi Bena Filipoi, wakadi muntu mukumbane bua kukuatshisha bakaji aba babidi bakadi batandangana, kadi dina dia muntu kadiena ditedibua nansha.

 Paulo udi utela dina dia Kulemento (katuena tusangana dina diende kukuabo mu Mukanda wa Nzambi), kadi kena utela mena a "bakuabo", bakadi benji nende ba mudimu, mena abo adi mafunda mu mukanda wa muoyo. Mena a bena kuitabuja bonso adi mafunda mu mukanda wa muoyo, badi bantu ba mu diulu (Luka 10:20. Filipoi 3:20).

 Nzambi utu utangila mudimu wa bena mudimu bende. Bikala muntu upesha mukuabo mayi a kunua bualu bua Kilisto "kena upanga kuangata difutu diende" (Mako 9:41). Mulayi wa Mukelenge udi ne, "Tangila, ndi ndua lubilu; ne difutu dianyi didi nanyi, dia kupingajila kudi muntu ne muntu, bu mudi mudimu wende" (Buakabuluibua 22:12). Nebangate "difutu  dia bupianyi" bualu bua badi benzela Mukelenge Kilisto mudimu (Kolosai 3:23,24).

Paulo  wakabala mudimu wa bakaji bakenza mudimu nende mu Lumu Luimpe wa mushinga mutamba munene mu nshapita wetu ne kukuabo bu mu Lomo nshapita 16. Kadi kakitabuja mukaji bua kuyisha, anyi bua kuikala ne bukokeshi pamutu pa mulume mu ekeleziya (1 Timote 2:11,12). Mufundi mukuabo wakamba ne, "Bobo badi bangata muaba munkatshi mua bantu (une place publique) mu Ekeleziya badi bangata muaba bu balombodi mu ekeleziya, anyi mu kulomba kua Nzambi, anyi mu kutumbisha kua Nzambi, anyi mu kuyisha kua Diyi dia Nzambi, ne muaba ewu wa bulombodi kawena mupeshibue bakaji. Muaba wa bakaji mu Ekeleziya kawena ewu wa bulombodi". Kadi Nzambi wakapesha mukaji muaba wa mushinga mukole mene mu diku, ne munkatshi mua bantu. Bakaji ba kueyemenyibua badi bu makunji mu ekeleziya.

 

Nusanke mu Mukelenge misangu yonso, nengambe tshiakabidi ne, Nusanke. 4:4

 Mu nshapita 3:1 Paulo wakafundila Bena Filipoi ne, "Nusanke mu Mukelenge", katataka udi wamba ne, "Nusanke mu Mukelenge misangu yonso, nengambe tshiakabidi ne, Nusanke". Muaku "disanka", didi muaku wa mushinga mukole mu mukanda wa Paulo kudi Bena Filipoi. Udi bu nsapi bua kunzulula nawu mukanda mujima. Disanka edi didi difuma kudi Mukelenge Yesu, wakamba ne, "Ndi nupa ditalala dianyi" (Yone 14:27). Muena kuitabuja udi uya kumpala mu njila wa ditabuja udi mua kuamba ne, Disanka dia Mukelenge mbukole buanyi. (Tangila Nehemiya 8:10).

 Mbualu bukole bua kusanka mu Mukelenge "misangu yonso", kadi Paulo wakadi muenji wa diyi diwakayisha. Pakadiye ne Sila bakumibue ne nkodi mikumu ya bungi kudi bamfumu ba musoko wa Filipoi, babuejibue mu nzubu wa lukanu ne makasa abo mu miomba, bakatshidi mua kuimbila Nzambi misambu. "Pakalua bu mundankulu, Paulo ne Sila bakadi batendelela, bakadi bimbila Nzambi misambu, bena lukanu bakadi bateleja" (Bienzedi 16:25). Bakamanye ne, Mukelenge udi wa kueyemenyibua, kena utushiya nkayetu nansha. Katataka Paulo udi mumanye mua kukolesha mitshima ya bakuabo ne kubasamba ne busambi budiye nkayende usambibua kudi Nzambi (2 Kolinto 1:3,4).

 

Bupole buenu bumanyishibue kudi bantu bonso. Mukelenge udi pabuipi.  4:5

     Paulo wakafundila Tito bualu bua malu makuabo adi Nzambi musue bantu bende benze, wakamba ne, "Bikale balongolodibue bua mudimu muimpe wonso; kabakudi meyi mabi bua muntu; kabikadi ne kutandangana; bikale ne bupole, baleje bantu bonso kalolo konso" (Tito 3:1,2). Mukelenge Yesu nkayende wakadi muena bupole ne wa kalolo (Matayo 11:29). Tulonde bietu mu makasa a Mfumuetu.

1)  Mukelenge udi pabuipi ne bantu bende: "Yehowa udi pabuipi ne bantu  badi  ne  mitshima  idi  itamba  kunyingalala, udi usungila badi ne mitshima ya majiya. Makenga a muntu muakane adi a bungi; kadi Yehowa udi umusungila ku buonso buawu" (Misambu 34:18,19). Mukelenge Yesu wakamba ne, "Monayi, ndi nenu matuku onso too ne kunshikidilu kua tshikondo etshi" (Matayo 28:20). Utshidi wamba ne, "Kutshinyi … bualu bua meme ndi nebe" (Bienzedi 18:9,10).

2)  Dilua dia Mukelenge didi pabuipi. "Nuikale ne lutulu kabidi, nujadike mitshima yenu, bualu bua dimueneka dia Mukelenge diakulua pabuipi. Palepa musangu muipi, Yeye udi ulua nealue, kena unenga" (Yakobo 5:8. Ebelu 10:37). Mulayi wa Mukelenge bua kupingana ku lukasa bua kuangata bantu bende wakadi ditekemena dia bena kuitabuja ku tshikondo tshia bapostolo too ne katataka.

 

Lusumuinu lua mishikankunde mipote ludi lutuyisha ne, Palua Mukelenge bua kuangata bantu bende, anu bobo badi bena kuitabuja ba bushuwa nebabuele mu disanka dia Mukelenge wabo, buena kuamba ne, Anu bobo bakamuitabuja mu mitshima yabo. Mishikankunde yakadi ne meji, yakadi ne manyi mu minda yabo. Manyi adi atuambila bualu bua Nyuma Muimpe wa Nzambi. Muena kuitabuja yonso wa bushuwa udi ne tshimanyishilu tshia Nyuma Muimpe, kena mumanye mua kujimina nansha (Efeso 1:13,14. Yone 10:27,28). "Mukelenge udi mumanye badi bende" (2 Timote 2:19).

 

Lekelayi kuditatshisha ku bualu bumue; kadi mu malu onso ku ditendelela ne ku disengelela numanyishe Nzambi bua milombu yenu ne disakidila. Ne ditalala dia Nzambi didi ditamba dijingulula dionso dia bantu, nedilame mitshima yenu ne meji enu mu Kilisto Yesu. 4:6,7

 Mukelenge kena musue bantu bende kuditatshisha mundamunda, kadi bua kuikala bena milombu. "Nutendelele Nzambi misangu yonso ne kulomba kuonso ne disengelela dionso mu Nyuma Muimpe … katuena bamanye mua kulomba Nzambi bu mutudi nabu mbua kumulomba, kadi Nyuma muine udi utuakuila ne mikemu idi kayi mua kuambibua. Nzambi, udi ukeba mu mitshima ya bantu, udi mumanye meji a Nyuma ne, Udi wakuila basanto bu mudi Nzambi musue. Tudi bamanye kabidi ne, " “Malu onso adi akuatshishangana  bua  kuvuija  diakalengele  kudi  bantu  badi bananga Nzambi, kudi badi babikidibue bu mudi disungula diende" (Efeso 6:18. Lomo 8:26-28).

 Mukelenge Davidi wakadi muena milombu kadi wakamanya kabidi ne, "Bu meme mulame malu mabi mu mutshima wanyi, Mukelenge kakadi kungumvuila" (Musambu 66:18).

 Nzambi udi musue bantu bende kuikala bena disakidila. Tshilema tshinene tshia bantu babi ba kale tshiakadi ne, "Pakamanyabo Nzambi, kabakamutumbisha bu Nzambi, kabakamusakidila; kadi meji abo akalua a patupu" (Lomo 1:21). Tshimanyishilu tshia matuku a kunshikidilu tshidi ne, "Bantu badi kabayi ne kusakidila, kabayi ne tshijila" (2 Timote 3:2). Mukanda wa Nzambi udi wamba ne, "Mu malu onso nusakidile Nzambi, bua edi ndisua dia Nzambi mu Kilisto Yesu bua bualu buenu" (1 Tesalonike 5:18). Nunku ditalala dia Nzambi nedilame mitshima yetu ne meji etu mu Kilisto Yesu.

 

Bana betu, tshiashadidi mpindiewu, ne, Malu onso adi malelela, ne malu onso adi a buneme, ne malu onso adi makane, ne malu onso adi a butoke bua mutshima, ne malu onso adi malengele a dinanga, ne malu onso adi ne lumu luimpe;  bikalaku buimpe ne bikalaku butumbi, nuelangane meji a malu aa. 4:8

 Mukanda wa Nzambi udi wamba ne, "Bu mudi muntu welangana meji munda muende, ke mudiye" (Nsumuinu 23:7). Muntu udi welangana meji a malu malelela, ne a malu makane, ne a malu a butoke bua mutshima,  udi  wenda mu njila muimpe udi usankisha Nzambi. Malu aa neamulame ku mateyi a Satana ne ku "lukuka lua mubidi", neamulame ku bukoya bua tshikondo etshi.

 

Malu aa kabidi anuakayila ne anuakangata ne anuakumvua ne anuakatangila kundi, nuikale nuenze malu aa; ne Nzambi wa ditalala neikale nenu. 4:9

 Paulo kakasua Bena Filipoi anu bua kumvua diyisha diende ne kumanya mushindu wa muoyo wende, kadi udi musue buonso buabo kuikala benji ba diyi. Nzambi wa ditalala udi muenji wa Diyi diende (Mu 2 Kolinto 13:11 Nzambi udi mubikidibue Nzambi wa dinanga ne ditalala). Ditalala ne Nzambi didi difuma ku mudimu wa bupikudi wa Mukelenge wetu Yesu Kilisto, wakavuija ditalala ku "mashi a ku mutshi wende mutshiamakane" (Kolosai 1:20). "Nunku bualu bua tuakabingishibua ku ditabuja, tuikale ne ditalala ne Nzambi bua Mukelenge wetu Yesu Kilisto" (Lomo 5:1). Bobo badi bitabuja Mukelenge Yesu badi mua kuamba ne, "Yeye udi ditalala dietu" (Efeso 2:14). Kadi ditalala dia Nzambi (mvese 7) didi bualu bukuabo, didi difuma ku kushiya kua malu onso a ku dituku ku dituku mu bianza biende, malu mimpe ne malu adi atutatshisha kabidi. "Wewe udi ulama muntu udi ne mutshima wende mujalame bua yeye ikale ne ditalala dia tshishiki, bualu bua yeye udi ukueyemena" (Yeshaya 26:3).

 

Nakusanka bikole mu Mukelenge bua mpindiewu, musangu walepi, nuakasanguluja meji enu a bualu buanyi; bulelela, nuakadi nuela meji a bualu buanyi, kadi kanuakadi ne tshikondo tshimpe. Tshiena ngakula bua dikengela dia bintu; bualu bua nakuyila mua kuikala ne mutshima mupole mu malu onso andi nawu. 4:10,11

 Paulo kakateka mutshima wende kudi bintu. Wakamanya ne, "Lukuka lua biuma ludi muji wa malu mabi a mishindu yonso; bidi bantu bakuabo badikebela ne bakasesuishibua mu njila wa ditabuja, bakadisunsula mubidi wonso ne tunyinganyinga tua bungi" (1 Timote 6:10). Mukanda wa Nzambi udi wamba ne, "Mioyo yenu kayikadi ne lukuka lua biuma, nuikale ne disanka ne

bintu binudi nabi, bualu bua Nzambi muine wakuamba ne, Tshiena nkulekela, nansha kakese, tshiena nkushiya tshianana.

Nunku, tudi tuamba ne dikima ne, Mukelenge udi mukuatshishi wanyi; tshiena ntshina; muntu neangenzele tshinyi?" (Ebelu 13:5).

 Paulo wakamana kuyila mua kuikala ne mutshima mupole mu malu onso awudi nawu, tuetu kabidi butudi nabu mbua kuyila malesona a bungi mu njila wa ditabuja. Malesona makuabo kaena matekete bua kuyila. "Makenga onso, patshidiuku, kaena amueneka kutudi bu disanka, kadi adi anu bu kanyinganyinga; kadi kunyima adi akuamisha bantu badi benzejibua kudiwu mamuma a ditalala, mamuma a buakane mene" (Ebelu 12:11).

 

Ndi mumanye mua kupuekeshibua, ndi mumanye mua kuikala ne bintu bitamba; mu bualu buonso ne mu mianda yonso nakumana kuyila bualu busokoka bua kuikala ne difu diukute, ne mua kuikala ne nzala, ne mua kuikala ne bintu bitambe bungi, ne bua kuikala ne bintu bitambe kukepa. Ndi mumanye mua kuenza malu onso mu Mukelenge udi unkolesha. 4:12,13

    Paulo utshidi ulonda mu makasa a Mfumu wende, kena utontolola nansha. Mukelenge Yesu, pakapitshileye mu buloba buetu bu Muana wa muntu, wakamanya makenga. Ba pa buloba kabakadi ne muaba bua kumupa mu nzubu yabo anyi mu mitshima yabo. Mu buana buende, mamuende Malia wakaladika Mukelenge mu tshidilu tshia nyama, "bualu bua mu nzubu wa tshilala benyi kamuakadi muaba" (Luka 2:7). Pakakoleye, Mukelenge wakambila muntu mukuabo wakasua kumulonda ne, "Mibuabua idi ne mena ayi, nyunyu ya mulu idi ne masua ayi; kadi Muana wa muntu kena ne pa kuladika mutu wende" (Matayo 8:20). Kadi bakuabo bakadiku bakadi ne muaba bua bualu buende. Mata "wakamubueja mu nzubu wende. Wakadi ne muakunyi wende mukaji, dina diende Malia, yeye wakadi mushikame ku makasa a Mukelenge, uteleja diyi diende" (Luka 10:38,39). Mu Betania, bakamulambishila bidia bia butuku mu nzubu wa Simona muena nsudi (Mako 14:3. Yone 12:2).

 

Kadi nuenu nuakenza bimpe panuakadi nanyi ne buobumue mu dikenga dianyi. Nuenu mene, Bena Filipoi, nudi bamanye kabidi ne, Ku tshibangidilu tshia kuamba kuanyi kua lumu luimpe, panakumuka   ku  Makedonia,   kakuakadi   ekeleziya   mukuabo wakadi ne buobumue nanyi mu bualu bua kupa ne kuangata kua bintu, anu nuenu nkayenu. Bualu bua panakadi mu Tesalonike, nuakantumina bintu binakadi nabi bualu misangu ne misangu. Kembua ndi nkeba kupa kuenu, kadi ndi nkeba mamuma adi avulangana ku dibadibua dienu. 4:14-17

    Paulo wakamanya mua kuenza malu onso mu bukole bua Mukelenge wakamukolesha, kadi wakadi ne disanka bualu bua buobumue bua Bena Filipoi mu makenga ende bua mudimu wa Lumu Luimpe. Bobo badi bakuatshisha bena mudimu badi badifila ku mudimu wa Mukelenge ne bintu bidibo nabi bualu, kabena bapanga bua kupeta difutu diabo, mpindiewu mu buloba ebu, ne palua Mukelenge bua kufuta bena mudimu bende. Badi benji ba mudimu popamue.

    Bena Filipoi bakatamba kukolesha mutshima wa Paulo pakadiye muena buloko. Bakadianjila kudifila kudi Mukelenge, kunyima bakadifila ku mudimu wa Mukelenge, ne ku dikuatshisha dia muena mudimu wende wakalua ne Lumu Luimpe kudibo. Paulo wakafundila  bena  Kilisto  ba  mu  Kolinto  bua  bualu  buabo  ne, "Mu kuteta kua bungi kua mu makenga, dikumbana dia disanka diabo ne bupele buabo bua bungi biakavudija bubanji bua kupa kuabo. Bakafila bintu bu muakadi bukole buabo, ndi mumanyi wa bualu ne, too ne pakapitabo bukole buabo; bakabifila bu muakasua mitshima yabo" (2 Kolinto 8:2-3). Paulo wakamanya bimpe ne, Panshi pa buloba, bishi ne dimoma bidi bibipisha bintu ne bibi badi babumbula nzubu bua kuiba, bu muakamba Mukelenge, kadi Bena Filipoi bakadi babutshila bintu mu diulu (Matayo 6:19,20). Mamuma akadi avulangana ku dibadibua diabo. "Nzambi kena upanga buakane bua kupueye muoyo wa mudimu wenu ne wa dinanga dinuakaleja bua dina diende, panuakakuatshila basanto mudimu ne panutshidi nubakuatshishawu" (Ebelu 6:10).

 

Kadi ndi ne bintu bionso ne bitamba; nakukuta bualu bua nakangata bintu kudi Epafodito biakafuma kunudi, mupuya wa dipembu dimpe, mulambu muitabujibue, udi usankisha Nzambi. Ne Nzambi wanyi neanukumbajile bintu bionso binudi nabi bualu bu mudi bubanji buende bua mu butumbi mu Kilisto Yesu. 4:18,19

     Milambu ya mu Dipungila Dikulukulu idi yamba bua Kilisto, "wakadifila bua bualu buetu bu mulambu ne tshintu tshishipa bua kuikaleye mupuya wa dipembu dimpe kudi Nzambi" (Efeso 5:2). Tudi tubala bualu bua milambu mikuabo kabidi mu Dipungila Dipia-dipia, bu dipa dia Bena Filipoi mutumibue bua kukuatshisha nadi Paulo. "Kanupu muoyo bua kuenzelangana bimpe ne bua kukuatshishangana; bua Nzambi udi usanka ne milambu ya nunku" (Ebelu 13:16). "Nunku, bana betu, ndi nusengelela, bua luse lua Nzambi, bua nufile mibidi yenu bu mulambu udi ne muoyo, wa tshijila, udi usankisha Nzambi bimpe; bualu ebu budi kutendelela kuenu kudi ne meji" (Lomo 12:1). Tudi tubala mu mukanda wa Ebelu ne, "Nunku bua bualu buende (bualu bua Yesu), tufilafile kudi Nzambi mulambu wa kumutumbisha nawu, udi biawu mamuma a mishiku idi ijukula ditabuja dia dina diende" (Ebelu 13:15).

     Paulo wakamanya Nzambi bu, "Nzambi wanyi". Ku tshikondo tshia kukudimuna kua mutshima wende, mu njila wa ku Damaseke, Paulo wakenda nende. Nzambi wakamukumbajile bintu bionso bikadiye nabi bualu, katataka yeye kena ne mpata ne, Nzambi wanyi  neakumbaje  bena  Kilisto  ba  mu  Filipoi  bintu  bionso bidibo nabi bualu kabidi. Kupa kua Nzambi kudi "bu mudi bubanji buende bua mu butumbi mu Kilisto Yesu".  Masanka onso a bena Kilisto adi "mu Kilisto", mu Kilisto mubishibue ne mutumbishibue mu diulu. "Nunku, tusemene ne dikima pepi ne nkuasa wa butumbi wa ngasa, bua tuetu tupete luse ne bua tusangane ngasa bua kutukuatshisha mu tshikondo tshia dikengela dietu" (Ebelu 4:16).

 

Butumbi buikale kudi Nzambi wetu Tatu ku bikondo ne ku bikondo. Amen. 4:20

 Paulo utshidi utumbisha Nzambi Tatu. Nzambi wakamba ne, "Udi ufila disakidila bu mulambu wende udi untumbisha" (Musambu 50:23). Mbidi bimpe kutumbisha Nzambi. "Bualu bua bintu  bionso  biakafuma  kudiye,  bidiku  bua  bualu  buende,  bidi

bikala anu kudiye. Butumbi buikale kudiye tshiendelele! Amen" (Lomo 11:36).

 

Nuele  basanto  bonso  ba  mu Kilisto Yesu muoyo.  Bana betu ba mu Kilisto badi nanyi badi banuela muoyo. Basanto bonso badi banuela muoyo, ne ba mu nzubu wa Kaisa badi batamba kusua kunuela muoyo.  4:21-22

Bidi bimpe bitambe pikala bena ekeleziya bafundangana bana babo ba mu Kilisto mukanda bua kubatumina muoyo wa disanka mu Mukelenge. Paulo wakela "basanto bonso" ba mu Filipoi muoyo kudi "basanto bonso" bakadi nende mu Lomo. Bidi nunku bena Kilisto badi bakolesha "mionshi ya dinanga", idi isuika bantu ba Nzambi popamue. Nansha mu nzubu wa Kaisa, mukelenge munene wa Bena Lomo, bena Kilisto bakadiku. Bena lukuna badi mua kuela bantu ba Mukelenge mu nzubu wa lukanu kadi kabena mua kupumbisha mudimu wende.

 

Ngasa wa Mukelenge Yesu Kilisto ikale ne nyuma wenu. 4:23

    Ngasa wa Mukelenge wetu Yesu Kilisto udi mukumbane bua kutukuatshisha ne bintu bionso bitudi nabi bualu, ku luseke lua nyuma, anyi ku luseke lua mubidi. Ngasa udi muaku munene be, udi wamba bualu bua buimpe buonso, ne dinanga dionso, ne luse luonso bia Mukelenge wetu. Mukelenge Yesu udi wela meji bua bualu buetu, bu muakasangana Paulo. Yeye wakafundila Bena Kolinto ne, "Bua meme tshitambi kuanyishibua bua bunene bua kubuluibua kua malu kundi, nakapebua tshintu bu dieba mu mubidi wanyi bu muanjelo wa Satana bua kunkengeshakengesha, bua meme tshitambi kuanyishibua. Bua tshintu etshi nakalomba Mukelenge misangu isatu ne, Tshiumuke kundi. Ne yeye wakangambila ne, Ngasa wanyi udi ukukumbana, bua bukole buanyi budi bukumbajibua tshishiki mu butekete buebe. Nunku ndi ne disanka pa kuditumbisha mu matekete anyi, bua bukole bua Kilisto buikale munda muanyi" (2 Kolinto 12:7-9).

 

“Nudi bamanye ngasa wa Mukelenge wetu Yesu Kilisto ne, Yeye wakadi mubanji, kadi wakalua mupele bua bualu buenu, bua nuenu nulue babanji ku bupele buende” (2 Kolinto 8:9)

Ngasa wa Mukelenge wetu Yesu Kilisto ikale nenu.