Marqəs

1 Sănto n-ilənžil n-Ɣisa Ălmasex, Rure-s n-Măssinaɣ 2 s-əmmək wa-s iktab dăɣ-ilkətab wa n-annăbi Saya, ənta da : “Năkk, əzzozarăɣ dat-k, anămmazăl-in wa isəssəɣədăn zăbo-nak; 3 imisli n-wa isaɣăren dăɣ-taẓẓarăt : ăknnăt zăbo n-Imili, səssəɣədăt zăbotăn-nes. 4 Ossa-ddu Exya, isalmaɣ dăɣ-tăẓẓarăt, iɣattăm asəlmăɣ wa n-təttubt i-agăraw n-tăṣureft n-ibăkkaḍăn. 5 Kăl-akall kul wi n-Alyăhudəyyăt id wi əzdăɣnen Yărussălam tiddawan-ddu sər-s. Isalmăɣ-tăn dăɣ-egerew wa n-Ɣurdəni, safăkkarăn-ddu ibăkkaḍăn-năsăn. 6 Ilsa Exya asălso igan dăɣ-tăḍuft n-amnəs, otab s-tămməntəkka n-eɣeyt; iddar s-ižwalăn d-tarewăt n-taẓẓarăt 7 ixattăb , igănnu : ad-dd-assu dəfər-i wa di  ogărăn tărna, wər-ewwedăɣ wăla ad-ənnəẓăɣ i-ad araɣ təmərkest n- tăɣlăy erəz-nes. 8 Năkku, aman a dăɣ-kăwăn issəlmăɣăɣ, măšan ənta, Unfas Zəddiggăn a dăɣ-kăwăn za issəlmăɣ. 9 Ižilan win- dăɣ ad-ifăl Ɣisa taɣrəmt ta n- Naṣṣirat tăhat akall wa n-Galila, issəlmăɣ-ti Exya dăɣ-[egerew wa n] -Yurdəni 10 A-s dd-izgăr Ɣisa aman ɣas inăy ižənnawăn a-s əmmorăn, izzəbbăt-ddu făll-a-s Unfas zund tedăbert măllăt.

11 Iga iməsli dd-ifalăn ižənnawăn inna : kăyyu Rur-i wa əkneɣ tăra, kăyy a dăɣ-əgrəwăɣ gurruẓẓăt n-iman-in. 12 Assaɣăt wen dăɣ, iwwăy-ti Unfas dăɣ-tăẓẓarăt.

13 Iga əkkoẓăt timərwen n-izəl dăɣ-tăẓẓarăt itažžarăb-ti Iblis; a-s ig’a-wen, ihiirăg d-tawăqqas, ăxdamăn-as ăngălosăn.

14 Dəfər attərməs n-Exya, osa-ddu Ɣisa akall wa n-Galila; iɣattăm ilənžil n-Măššinăɣ, igannu :

15 taqqăn timda, təmmənəya n-Măššinăɣ  daɣ tohăẓ-ddu, utabăt, tamənăm s-ilənžil. 16 A-s iga a-wen, illil asilim n-tassahăɣt n-egărew wa n-Galila, inăy Simyon d-aŋŋa-s Idris, fatăwăn i-imănan făll- egărew, id əmoosăn imuhhəyya n-imănan. 17 Inn’-asăn Ɣisa, əlkəmăt i-ad-kăwăn ăgăɣ imuhhəyya n-ăgg-ăggadəm^[1]. 18 0yyăn assaɣăt wen-dăɣ isutag n-fatăwăn n-imănan əlkăman-as.19 izənkaz-in-den s-anḍarrăn, inăy Yaqub ăgg –Zabdi d-aŋŋa-s, Exya kannin isutag n-fatăwăn n-imănan-năsăn dăɣ-aɣlal n-aman. 20 Assăɣăt wen-dăɣ, iɣren Ɣisa, oyyăn šiš-săn , Zabdi d-imăššăɣlăn- dăɣ-aɣlal n-aman, əglăn, əlkăman-as.

 

21 Ǝglan har d-in ewăaḍăn Qăfărnaxum dăɣ- izəl n-issəbət n-tassaklot, assaɣăt wen-dăɣ-igăz Ɣisa, ehăn n-iddin wa n-kălalyăhud, ad-. isăssăɣru

 

22 Təgrăw-tăn takunt n-masnăt-net id isassăɣren s-timənnəya, wərgen s-immək wa n-imuṣănăn n-attăwrat.

 

23 Ehăn  n-iddin-en ih’-ee alis iyyăn iha alžăyn, as inay  Ɣisa ɣas Assaɣăt wen-dăɣ, ad-isaɣarat,

 

24 igannu ak, ma gere-năɣ illăn dar-k, ya Ɣisa wa n-Naṣṣira ? Egan, ahălak-nănăɣ a-s-dd tooseɣ? Ǝssanăɣ mi təmoosăɣ: kăyy a-s wa zəddiggăn n-Măššinăɣ . 25 Issamahaḍ făll-as Ɣisa hullen, inn’-as : naɣăf, izgər-ti. 26 Ižžăžakăḍkăḍ ălžăyn alis, issăqqarăt s- s-aṣṣahăt ɣas, izgăr-ti. 27 ta ărmaɣăn aytedăm kul-nasăn ad-dăɣ-făl tənəməsəstinăn, gannin : ma imoos a-wa ? Ma təmmoos teɣăre ta taynyăt tiṣṣohet ? Ila tudabăt wăla făll-ălžăynăn, tagən a-wa d-asăn inna. 28 S-assaɣăt -wen-dăɣ, əlsăn isălan-nes akall wa n-Galila kul-nes. 29 Assaɣăt-wen-dăɣ dd-əzgărăn ehăn n-iddin wa n-kăl-alyăhud, ossăn-ddu s-aɣiwăn wa n-Simyon d-Idris, əddewan d-Yaqub d-Exya; 30 a-s ig’a-wen, taḍăggalt n-Simyon tənsa, tənniid; əmalăn i-Ɣisa assăɣăt wen-dăɣ. 31 ihoẓ-tăt-ddu, obaẓ-tăt s-ufuss-nes, isəbdăd-tăt, toyy-eet tenade, ad-tăn-simgurut  32 S-tadwit, ɣur egăḍḍăl n-tufukt, əwăyăn- ddu s-Ɣisa imiranăn kul hakəd aytedăm wi əhăn alžăynăn; 33 kăl-aɣrəm kul addewăn-ddu dat-imi n-ehăn. 34 Izozay Ɣisa imiranăn ăggootnen əgrawnăt tiwərnawen wərən ola, ikkas alžăynăn ăggootnen dăɣ-aytedăm. Wər ikfa alžăynăn turagăt n-magrăd făl-a-s əzdayăn-ti. 35 S-aɣora,hărwa əganăt tiyyay, inkăr Ɣisa, izgăr s-taẓẓarăt ad-itimudu den-dăɣ. 36 Simyon d-wi dər-s əddewnen, ăhoren-ti 37 har t-əgrăwăn, ənnăn-as : Aytedăm kul tammaɣăn-ak. 38 Inn’-asăn : Năkket tiɣarmaten- ti dagma-năɣ , i-ad- asnăt axtəbăɣ əntănăated-dăɣ; id a-wen-dăɣ a-s dd-osseɣ. 39 Ixatăb dăɣ-inăn n-iddin wi n-kălalyăhud dăɣ-akall kul wa n-Galila itakkas alžăynăn dăɣ-aytedăm.

 

40 Oss’-ee-ddu amiran n-anăɣu wa măqqărăn, igăraffăt dat-s, idăl -ti, inn’-as : as tăreɣ a-wen, təddoobeɣ ad-i təzəzdəgăɣ. 41 Oḍăn-as Ɣisa tahanint hullen, iẓẓăl ufuss-nes, iḍaăs-ti, inn’-as : areɣ a-wen, əzdəg. 42 S-Assăɣăt wen-dăɣ, ifăl-ti n-anăɣu wa măqqărăn ? ɣas izdăg.

43 S-assăɣăt wen-dăɣ, issăgl'-e Ɣisa isămmătar-ti hullen, inn’-as :

44 – dăroɣ ad- tănnăɣ i-awedəm wăla iyyăn arăt măšan ăglu, saknu iman-năk i-aw-tikutawen, əkkə i-təzdəgge-năk s-immək wa-s-tăn isəbdăd annăbi Musa i-ad-asăn iqqăl a-wen, tiggiya. 45 Măšan, a-s izgăr ɣas, ad-ifatal isălan, igannu a-wa igăn.  Făl-təssəba n-a-wen-dăɣ afəl wər-t-illa aɣrəm s-iddoobăt Ɣisa iguz-net dăɣ-anifilal afəl a-wen- dăɣ iqqim-in dăɣ-taẓẓarăt; tass’-in ti-ddu aytedăm dd-əfalnen tisidagg kul.

 

2

Arăt n-ižilan dəfər-a-wen, olăs iguz n- Qăfărnaxum, itawăsl’-a-s illa ɣur ehăn. 2 Ǝddewăn-du s-assăɣăt-wen-dăɣ aytedăm aggootnen har abas-t-ill’edăgg wăla dăɣ dat imi n-ehăn; ad-asăn itaggu isălan n-Măššinăɣ . 3 Osan ti-du ewayăn anăbdon, misawăyăn ukkoẓ dăɣ-săn.

4Zamad wər əddooben ad-ti-d əhaẓin făl-igət n-aytedăm, əgan tafăwt dăɣ-afălla-n-ehăn tənnimawalăt d-da d-illa Ɣisa, səttărăgen asəftăɣ wa făll-insa anăbdon. 5A-s inăy Ɣisa tafləst -năsăn, inna i-anăbdon : - bărar-in, ibăkkaḍăn-nak ătiiwănzăn-ak.

6 A-s ig’a-wen, ăqqimăn imuṣănăn n-attăwrat iyyăḍ den-dăɣ zinəzgumăn dăɣ-iman-năsăn : 7 mafel itamăgrad s-immək-wa ? A-wa, isăkkafăr ! Mi ăddoben tenăzze n-ibăkkaḍăn ar Măššinăɣ  ɣas ? 8 Assaɣăt wen-dăɣ ilmăd Ɣisa dăɣ-iman-nes inəzgumăn-năsăn, inn’-asăn : Mafel əhan inəzgumăn-wi iwăllăn-năwăn.

 9 Ma ogărăn tərɣəse, ad-tănnăɣ i-anăbdon : ătwănzăn-ak ibăkkaḍăn-năk, meɣ ad-tănnăɣ: əbdəd, əḍkəl asəftăɣ năk, žəwənkət ?

10 i-ad-təṣṣənăm  a-s Ăgg-ăgg-adəm ilă tudabit n-tenăzze n-ibăkkăḍăn dăɣ-addunya

Inna i-anăbdon : 11 ənneɣ-ăk, əbdəd, ədkəl asəftăɣ -nak, tăkkăɣ ehăn-năk.

12 Ibdăd assaɣăt wen-dăɣ, iḍkăl asəftăɣ izgăr dat-săn kul-năsăn; təgrăw-tăn takunt n-a-wen, ad-əmmalăn Măššinăɣ, gannən : kăla wər nənnăy arăt zund wa.

 

13 Olăs-ddu daɣ azăgor, illil asilim n-tassahăɣt n-egărew, ad-ti  - ddu təttaku tamətte, isasăɣr’-et. 14 igla dăɣ-awen-dăɣ a-s inăy Lewi, ăgg-Alfa iqqimăn dăɣ-birăw n-atiwəẓẓəl n-baya, ɣas inn’-as :-əlkəm-i. Ibdăd, ilkăm-as.

15 Dəffər a-wen, isămmăggarăt Lewi Ɣisa dăɣ-ehăn-nes, əllan-ti imməẓẓuẓal n-baya ăggotnen d-inăsbăkkaḍăn ăggotnen d-inəṭṭulab n-Ɣisa, id əgətăn wi d-as əlkamnen.

16 Zamad ənăyăn imuṣănăn[i] n-attăwrat n-taggayt ta n--kăl-Faris Ɣisa idrawăn amənṣi d-imməẓẓuẓal n-baya d-inăsbăkkaḍăn, ənnăn i- inəṭṭulab-nes : mafəl idarăw d-imməẓẓuẓal n-baya d- inăsbăkkaḍăn ?

17 Isl’-asăn Ɣisa, inn’-asăn : wərgen aytedăm wi ăṣṣoxătnen a ăḍḍărărnen s-lăxtur, mašan imirănăn; wər dd-oseɣ i-ad-dd-ăɣrăɣ wi oɣădnen, mašan inăsbăkkaḍăn .

 

18 Inəṭṭulab n-Exya d-kăl-Faris tuẓamăn, osăn-ti-ddu, ənnăn’-as : mafăl tuẓamăn inəṭṭulab n-Exya d-wi n-kăl-Faris a-s ig’-a-wen, wi-năk wər tuẓamăn ?

 

19 Inn’-asăn Ɣisa : ak imidawăn n-amaẓlăy iwar-tăn ad-uẓamăn iket iket illa gere-săn ? Iket iket illa ɣur-săn amaẓlăy ,wər tăn iwer uẓum .

 

20 Măšen ilkam izəl wa za itiwətkəl amaẓlăy gere-săn, izəl -wen, ad- uẓamăn.

 

21 Wər igget awedăm tikəst tăynayăt făll-tabḍoɣt wăššarăt; afəl iga a-wen, tikəst ta n-tabḍoɣt ta tăynayăt ad-dd-təzzizzarăt tabḍoɣt ta wăššarăt , imɣar azzaru.

22 Wər itəggu daɣ, awedăm aman n-lăɣnăb ăynaynen, əslăynen dăɣ-igidad; afəl iga a-wen, aman n-lăɣnăb-en ad-səbbăqqen igidad, əbəṭlaxăn aman-en d-igidad; măšen aman n-lăɣnăb wi ăynaynen, əslăynen, ibiyaɣ ad-dăɣ-tăn itagg awedăm .

 

23 Izəl iyyăn n-issəbət n-tasăklot, illil Ɣisa tiwigas, iddew d-inəṭṭulab-nes ɣatăsnen tibolasen.

24 Ǝnnăn-as kăl-Faris, əswəḍ a-di, mafăl taggin a-wa wərən itiwăggu dăɣ-izəl n-issəbət n-tasăklot ?

 

25 inn’-asăn : “ egănn kăwăneḍ kăla wər tăɣrem a-wa iga Dawəd a-s imăɣatăr, illuẓ ənta d-imidawăn-nes

 

26 s-azzăman wa n-Abyatăr wa n-anuššăm n-kăl-tikutawen ? Igəz ehăn n-Măššinăɣ, itša tigəlwen ti n-takute s-wər-t-ill’-i ilan turagăt n-tettey-năsnăt kundăba kăl-tikutawen, ikfa daɣ imidăwăn-nes.

27

Inn’-asăn Ɣisa : wərgen  ăgg-adəm a dd-ixlăkăn i-issəbət n-tasăklot^[2] ănn-ak issəbət n-tasăklot a dd-ixlăkăn i-tinaflit n-ăgg-adəm.

28 făl-a-s s Ăgg- ăgg-adəm innihăḍ daɣ i-izəl n-issəbət n-tasăklot

 

 

 

Marqəs 3

1

Dəfer a-wen, iggăz Ɣisa tolăss ehăn n-iddin^[3] ihă aləs s-immut ufuss-nes.

2 Ǝmmyăzzăn-ti kunta ad-ti izzuzəy dăɣ-izəl n-issəbət n-tasăklot id gamăyyăn ad-ti əssuwărăn taḍləmt.

 

3 Inna Ɣisa i-aləs wa s-immut ufuss-nes : əbdəd da, gere-săn.

4

Inn’-asăn Ɣisa : ak ma ofăn, igi n-olaɣăn meɣ a labasăn dăɣ-izəl n- issəbət n-tasăklot; aggaẓ n-iman meɣ igi n-iman ? Măššan əffəstăn.

5

Isăɣlăy-tăn-ddu Ɣisa s-asawaḍ n-alham, ăɣšădăn iman-nes făll-taɣart n-iwăllăn-năsăn, inna i-aləs : əẓẓəl ufuss-năk ». Iẓẓăl-ti, izzăy ufuss-năk

 

6 Assaɣăt wen dăɣ , əzgărăn kăl-faris, namănnăkăn d-taggayt ta n- kăl-Harudəs i-ad-i-ad-agin iman n-Ɣisa .

 

7 Ikka Ɣisa d-inəṭṭulab-nes  egărew wa n-Galila,

 təlkam-as tamətte  təgget dd-təffalăt Galila d-Alyăhudəyyăt

 

8 d- Yărussălam d-akall wa n-Iduma, d-iɣərman wi n-efey-wen n-Ɣurdəni d-iɣərman wi n-dăgman n-akall wa n-Tir d-Săyda. Təsla tamətte măqqarăt igităn-nes, təddew-ddu sər-s.

 9 Inna i-inəṭṭulab-nes ad-as səmməgnunen aɣlal^[4] n-aman i-ad-wər-ti təṣṣes tamətte.

10 Id izzozăy a ageen dăɣ-săn har făll'-as-tuḍin wi ofrăynen, gamayăn^[5] i-ad-ti əḍəsăn.

11 A-s ti-ənnəyăn alžăynăn ɣas, tifəttaqqen dat-s, saɣăren, gannin : Kăyyu, təmoosăɣ rore-s n-Măššinăɣ.

 

12 issămmăhăḍ hullen făll'-asăn i-ad-wər sinnəfiləllăn a-wa iqqăl

 

13 Dəffər a-wen iwăn Ɣisa esawăl    iɣră-du s-iman-nes wi ira, əkkăn-ti-du.

14 Isănnăfrăn mărăw d-əššin, i-ad-dər-s idawăn, i-ad-tăn izəmmizəl i-axăttab

 

15 i-ad-əgrəwăn Ikf’-en tărna n-ukəss alžăynăn.

 

 16 Ǝntăneḍ da wi n-mărăw d-əššin isănnafrăn : Simyon wa isuwăr isəm Bəṭrus

 

17 Yaqub Ăgg Zăbdi d-Exya aŋŋa-s n-Yaqub iga-săn isəm Boyărnažəs, a-wen almăɣna-nes : dăgg-eggag;

18 Idris d-Fəlibb d-Bărtălămma d-Mătti d-Tomi d-Yaqub wa n-ăgg Ălfa d-Tade d-Simyon wa n-aššažeɣ 19 d-Yăhudəs Isxaryut wa ti-iɣdărăn.

 

 20 Iqqăl-ddu ehăn ɣas, təddew-ddu tolăs sər-s tamətte tăggeet făl-d-asăn ăba əmmək s-əmənsăwăn .

 

21A-s əslăn iššăqqaɣăn-nes i-a-wen, əzgăran-ddu i-ad-ti-abəẓẓăn, făl-a-s gannən, təfăl-ti ənniyăt-nes.

 

22 Imuṣănăn n-attăwrat wi dd-əfălnen Yărussălam gannən Bəlzəbul wa n-amănokal n-alžăynăn a-t'-ihăn, ənta as itakkăs alžăynăn.

 

 23 Iɣr-en-ddu inn'-asăn s-tangalen : əndek əmmək wa s-iddoobăt Iblis ad-izzəg Iblis ?

 

24 Afăl-dd- əqqălăn kăl- Iddəwəl əknasăn gər-iman-năsăn   adiz, Iddəwəl-en, wər za ăhaggu ibdad.

 

25 Afăl-dd-əqqălăn kăl-ehăn əknasăn gər-iman-năsăn adiz ehăn-en, wər za ăhaggu ibdad 26 A-s dd-iqqăl Iblis izəngăt iman-net har dd-iqqăl iẓun, wər za ăhaggu ibdad, sămdo-nes[6] ɣas a ikka.

27 Wər t-illa awedəm iddoben iguz n-ehăn n-aləs n-anăkfor, irkəb təla-nes kul kundăba[7] ad-ti ikrəd təzzar, dəfər a-wen, irkəb təla-n-ehăn-nes kul.
28 iddittăt, inneɣ a-wăn ibăkkăḍăn iga Ăgg-adəm[8] kul, təla-s-ti tusureft; asəkkufər daɣ, təla-s-ti tusureft.

 29Măššen ăgg-adəm wa ibodarăn Unfas Zəddiggăn wər d-as-ti təlla tusureft, ănnak oḍa făll'-as aššăreɣa n-abăkăḍ iɣlalăn.

30 Id gannən ih'-e alžăyn.

31 Tosa-ddu anna-nes d- ayətma-s, əbdădăn dăɣ-asilim,  əssăɣrăn-ti-ddu,

32 A-s itagg a-wen, tăqqim tamətte ɣur-s, tăɣilăyɣălăy-ti; itawănna-s təbdad anna-năk, ayətma-k [d-šătma-k] dăɣ-asilim, tamăɣăn-ak

33  Inn'-asăn : əndek anna-nin, əndek -ayətma-nin [d-šătma-nin]

34 Təzzar, isəllăl asawăḍ-nes tamətte ta ɣur-s tăqqimăt, inna : anna-nin da, ayətma-nin [d-šătma-nin] da;

35 i-itaggən kul tăra n-Măššinăɣ, ənt'-as aŋŋa-nin [d-wăllăt-ma-nin] d-anna-nin.