Aui amotshi uma le ufundji

 

Lam’emi lu nfunda aui ane shu tambushila nongosola akambu tshe ne dia lokendo lasu utsha le Zaïre, okone tambeya shati, shu tayuyala l’atei anyu lu Zaïre, kana Unyashungu alanga la ntundu nyu nyatalungula Numero kene, okone dimi hahumbi nfunda aui akina le nyu mbala kene.

 

Lu wekelu asu lu mukanda a Romo talanga mbala tshapita 10:1-13. Kema etali. Shu tayukalula lu esonwelu ka Unyashungu lokongodiku, keli kakiane talanga mbeka aui amotshi dikambu dia okende wa untu la untu dia nungula aui wa Unyashungu. Ukundi ayuteya nkuma lu yediku ya ololo a Unyashungu ?

 

Elembe wakatusha yediku ne dia nkundja lumu (5, enda ntu Akambu w’asi Lewi 18:5), keli enda aui weli lu Euhwelu k’Elembe: 30:11-14. Wetshelu w’aui ane wambutenya vati, shu hatuhumbi kibandelu dia nkuma le Kristu l’ulungu, kana ntsho la kete l’asi Isariyele dia ntshima dia nyanga udu wa Jesu lu kete. Ndi eko lasuki la su, okone shu mbeyaka mbushula uku Khumadiondjo la mbuetawo uku Ushimbedi asu a lumu.

 

Shu tambeya shati, Unyashungu ambutena ololo lu Kristu, okone shu kema la sonyi dia mbishula la ntundu ka Unyashungu ndu antu shati, Unyashungu ambutushimbela ; ne dia eku kene kambutukundja eli ushasha uma le Unyashungu aha uma l’ekambelu kasu shame. Undu ambadi asu amotshi watalimbitela dikambu ne dia mamba. Ala Romo 6:23.

 

Mpanda kene ka Unyashungu eko ne dia untu tshe ayuwekama, enda aui wambufundama lu Isaya 28:16 la Joele 2:32.

 

Diui dia nkanela. Saki keli kema la yimba — Munga ka Asi Isariyele uku enasu lu versa ka 3, ambenama lu nshi yasu nye ukundi na ?

 

 

 

 

 

Edjaselu la Ekikitshelu ka Nyuma k’Ololo

 

Embula

We akalungula Nyuma k’Ololo l’utema aye ?

Lu tshapita ya ntundu ya mukanda wa Etsha shu mbalaka uku akakalula Khumadiondjo kasu l’ulungu; uma lawo kakandayi lam’akandayuhulo la kete nye lu Luntu landi. Ndi akashula Unyashungu lane lu LOKENDO landi ; ku lu NYOI kandi ndi akakutsha ulimu andi a ntusumbula. Ndi akatukimwe dimba diandi di’ekila, akatutshule dikila diandi di’ushinga wa uki. Lam’akashidiyama ulimu andi tshe, ndi akatshiki kete nye dia ntukalula lu lunya la pami l’Unyashungu. Etsha 2:33. La ntundu ka ndi atangana l’ambeki andi, ndi akawatela ati, Lam’ayumutudjase lu lukala lene l’ulungu, l’ayunyutume Nyuma k’Ololo dia ndi ndjalemi la kete. La ntundu ka ndi atavu l’utamba, Jesu akawalaki ati, Layutuma Nyuma k’Ololo. Joani 15:26. Okone, lam’akandashidiya lutumu landi lu nyoi ka lu kuruse, lam’akandayangi ntsho utsha l’ulungu, ndi akanyumushikike daka diandi so le wo. Etsha 1:11. Laso menasu daka dia eyelu ka Nyuma k’Ololo.

Lu Etsha 2:l-4 menasu uku akakutshama daka so lu lushi la Pentekosta. Diui so la kitshimudi ati, Nshi akumi atanu. Shu mbalaka dia Khumadiondjo shati, Ndi akakendakenda l’atei w’ambeki l’okongo a eulwelu kandi nshi akumi anei. Etsha 1:3. Ku nshi kina dikumi l’okongo a elungwelu kandi l’ulungu shu nkumaka lu lushi loso la Pentekosta. Shu mbalaka diato lu buku di’Akambu w’asi Lewi, 23:16. Lu lushi loso Nyuma k’Ololo akawahulwela lu wulu andi, akaludia untu l’untu lu lusanganya lakiwo lu luudu la ladiku ; vo tshe, antu 120, wakaludiama. Etsha 1:15. Dikambu so dia uki aki etatelu ka nshi y’ekelezia la kete. Khumadiondjo akatalongosodi dikambu so lam’ekindi lane, la dio diakashikikema l’ehulwelu ka Nyuma kakayuludia untu l’untu l’ului uku.

Maka dikambu so, opostolo Petero l’akina waki la ndi, wakatemala l’andja, wakalaki antu lukumu l’ololo lu wulu a Nyuma k’Ololo, mbakawasengasenga antu vati, Nyukadimuli; etema le Unyashungu, nyetawo Khumadiondjo Jesu Kristu uku Ushimbedi. Vo wakawatela ntu vati, naka nyayutsha ukuku nyayulungula ushasha wa Nyuma k’Ololo. Etsha 2:38. «Petero akawatela ati : Nyukadimuli etema, nyubatizami nyu tshe untu l’untu lu lukumbu la Jesu Kristu ne dia edimanyelu ka kolo yanyu, ku nyu nyayulungula ushasha wa Nyuma k’Ololo». Uyelu w’akambu lu vesa kene eli okone ; ekadimwelu k’utema, edimanyelu k’akolo la elungwelu k’ushasha wa Nyuma k’Ololo. Ekadimwelu k’utema eli utsha le Unyashungu ; edimanyelu k’akolo ndjaka le su l’ulimu a Kristu, ku lu ndjelana kalungulasu ushasha wa Nyuma k’Ololo. Lu vesa kene shu menaka shati, nduku untu nkukaka nungula ushasha wa Nyuma k’ololo unyaki akolo andi wambudimanyema la ntundu. Ku Unyashungu ayudimanyia akolo w’untu paka lam’ekamandi le Khumadiondjo Jesu Kristu uku Ushimbedi andi, lu mbetawo kandi hita. Petero akakikitsha diui ne le antu ati, Unyashungu ambetawo nyimanyia antu tshe akolo awo, keli dieli lawo ndja la mbetawo. v. 39. Naka untu atalungula edimanyelu kene ndi heyi ntshumula Nzambi ne dia ndi ambeta antu tshe l’otshoko one. Dia shu nungula ushasha one wa mamba dieli la su mbôsa shame lu nkadimo le Khumadiondjo lu dihumbu diasu. Ufundji akafundi lu usambu ati,

Le ye layekama l’utem’ami tshe,

Kanga kolo kemi, unshimbela-li ;

We akayuvwela atshi w’akolo,

Dimi kanga kolo, we akamvwela.

Paka waku wakekama le Khumadiondjo ukuku uku Ushimbedi awo wambulungula edimanyelu k’akolo awo. Ku l’uyelu w’edimanyelu k’akolo kalungulasu ushasha wa Nyuma k’Ololo. Tshapita nye ntuhunweka akambu ane hwe hwe, ku naka we ayala okoke, we ayulimbite.

 

Umbula 2.

Nyuma k’Ololo mbidjaseka l’etema w’ambetawudi tshe ?

Shu tambusonola avesa uma lu mikanda ehendi dla nshikike kanyi nye ati, Nyuma k’Ololo ambudjase l’etema wa waku tshe wambetawo. Efundelu kasu ka ntundu eli lu Efeso 1:13. «Nyu nyakawetawo, nyakadjema djimbitelu ya Nyuma k’Olola ka daka». Lane keli lokewo latenya ati, waku wetawo dikambu dia mete dia lukumu l’ololo nungulaka ushasha wa Nyuma k’Ololo. Mvula efula l’okongo a lushi la Pentekosta, Paulu akatela ambetawudi ane w’asi Efeso ati’ Lam’akanyetawo mete ka lukumu l’ololo, nyakalungula ushasha a Nyuma.

Efundelu ka hendi kalangasu mbala eli lu 1 Koreto 12:13. Uho ati, ndu efundelu kene akafundama edja l’okongo a lushi la Pentekosta. «Shu tshe takabatizama lu Nyuma otoi dia shu ndjala dimba otoi — kana asi Juda kana asi Ngirika, kana fumbi kana wuyadjasedi — shu tshe takanoshama uma le Nyuma otoi». Shu hatuhumbi ntshikala l’ukandukandu lu tumba tasu ; waku tshe waketawo Kristu uku Ushimbedi awo, wakalungula edimanyelu k’akolo awo ndu wakalungula ushasha a Nyuma k’Ololo. Ndi ambuyudjase l’utema w’usi ka Kristu tshe ndu ndi ayutshikalako pnndju. Joani 14:16.

 

Umbula 3.

Eli djimbitelu ya Nyuma k’Ololo na ?

Djimbitelu eli tshapa yakuka menya untu kukanga engo. Lam’atudja Nyuma tshapa, aha ushidi omotshi kafundandi lu dimba dia untu ; ndame keli Tshapa sho ; ndame kudjashi l’utema w’untu l’untu letawo. Dikambu ne mbetshama hwe l’Efeso 1:13,14. «Nyu nyakawetawo, nyakadjama djimbitelu ya Nyuma k’Ololo ka daka, keli uku okole w’ukito asu, lu etshungwelu ka kene tshe keli ka Unyashungu». Ala ndu lu 2 Koreto 1:22. «Ndi ambutudja djimbitelu, ambutusha Nyuma okole l’etema asu». Lane tambeka shati, Nyuma kudjashi l’etema asu eli okole, Tshapa ya Nzambi ati, Shu teli antu andi.

 

Umbula 4.

Shu nkukaka mbunyangia kukeli ka ndi ntukale ?

Efundelu kakatenyi l’etinyi ka ntundu ntenyaka so mete ati, tambudjama tshapa sho edja ndu Nzambi ambushila nsumbula ukito andi kakandakundja. Dikambu so nkukaka ntulimbitshiya ati, tambudjama djimbitelu yandi kuma ndu lam’ayuya Kristu ya ndjukita ukito andi. Shu mbalaka ndu lu Joani 14:16, ati, «Ndi ayunyusha ukimanyidi ukina, one layuyala la nyu pundju». Naka Nyuma k’Ololo ambuyudjase l’utema w’untu, ndi ayutshikalako pundju. Afundelu ane ntetshaka shikaa vati, Nyuma k’Ololo heyi ntutshika la ntsho am’akina. Keli shu mbeyaka mbunyangia ; daku diakafundi Paulu diui ne lu Efeso 4:30 ati ; «Tanyunyangiaki Nyuma k’Ololo ka Unyashungu, nyu nyaka djama djimbitelu uma le ndi edja ndu lushi l’etshungwelu». Naka shu tayukanyia aui ane lu yediko y’avesa 25-32 shu tayena shati, akambu wakuka nyangia Nyuma weli kashi, kele k’anyanya, nembo l’ehimba wa Satana, uvi, oteketa w’akambu wa mindu, ululu w’utema, lundju la lotendo. Nyuma ambutudjase dia ntushimbela uma l’akambu wa wuhu uku. Shu menaka lu Etsha 5:4-9 shati, untu nkukaka mvutela Nyuma aui wa kashi. Uku enasu lu 1 Tesalonika 5:19 shati, untu nkukaka nyima Nyuma dihuli dia ndi nkamba ulimu andi, la uku enasu lu afundelu ane untu mbeyaka nyangia Nyuma ; keli kuyanga eli ngaso, ndi mbidjaseka pundju l’utema w’umbetawudi.

 

Umbula 5

Nkendakenda lu wulu a Nyuma eli na ?

Ololo asu manda avesa lu Romo tshapita 1:1-4. «Nduku dianyelu» v. 1. Otshoko one eli uyelu w’ulimu a Kristu. Lumu le Kristu (v.2) eli ulimu a Nyuma k’Ololo. Ulimu a mamia kolo lu dimba eli dikambu diakatshi Unyashungu ndame. (v. 3). «Tatokendakendaka lu Nyuma» (v. 4) eli okende asu shu ambetawudi. Osoku shu mbeyaka mena uku eli yediko y’akambu ane. 1. Ulimu akakambi Kristu ; 2. Lutumu la Nyuma k’Ololo ; 3. Kene kakatshi Unyashungu ndame ; 4. Okende asu. Lokendo lasu ndjelanaka l’ulimu a Nzambi Papa, ndu Ona ndu Nyuma k’Ololo dia ntukikitsha nkendakenda lu mbuka ka mete la kete nye. Lu v. 4 shu menaka shati, Tambukikitshama dia ntsha tshe kahumba elembe shu ntsha lu lokendo l’akambu w’ololo. Akambu ane wakasanganyema l’usi elembe, la ndu Khumadiondjo kasu aketawo mete k’akambu ane. Diell la su mbuka Unyashungu ngandji ndu mbuka usukanyi asu ngandji. Edika la Luka 10:26-28. Aui ane ntetshaka vati, shu l’okende wa ntsha kene keli ololo la ntundu k’Unyashungu ndu shu l’okende wa ntshela anyasu antu ololo. Shu mbeyaka nimbitela tukambukambu ta lokendo lone lu avesa efula l’afundelu, keli esanganyelu k’akambu aku eli ntsha akambu weli ololo lu ashu wa Nzambi la ntshela usukanyi asu ololo. Untu lakendakenda lu Nyuma ayutshaka ukuku.

 

Umbula 6

Nombwama le Nyuma eli na ?

Shu menaka lu Romo 8:14 dikambu dia nombwama le Nyuma. «Wane tshe watolombwamaka le Nyuma ka Unyashungu mbeli ana wa Unyashungu. Diui ne diakawakadimula «nombwama», la kitshimudi ati, «Nama ololo». Nyuma ntulamaka ; ndi ntolombolaka lu mbuka y’ololo. Lam’ayelasu Olombi one, ambeyama ati, teli «ana wa Unyashungu». Lam’eki ona a khum’ekanga dikenda ndi l’omendji leya akambu wahumba on’a khum’ekanga ntsha lu yediko yukuki on’a khum’ekanga. Okoso ku Nyuma mbidjaseka l’etem’asu la ndi ntetshaka akambu wukuki le su uku «ana wa Unyashungu». Shu la diui dia lumu dia Nyuma l’etema asu, la ndi ntolombolaka, ndu ndi ntetshaka dikambu dia teko «ana wa Unyashungu». Okoso katutolombwamaka le Nyuma.

 

Umbula 7

Ndudiama le Nyuma eli na ?

Lu Efeso 5:18-21 mbalasu dia eludiamelu ka Nyuma. Tanyudjoki wanu weli la somboki loko, keli nyuludiama la Nyuma». v. 18. Lam’aludiama untu la wanu ndi ntshaka akambu wahandatshi lam’endi atano. Lam’awukime wanu lu wulu awo, ndi ndjalaka untu a wuhu ukina. Osoku, untu lambuludiama la Nyuma k’Ololo menyamaka la wuhu wutshikitanyi la wuhu andi la ntundu ka ndi atalungula Nyuma. Lam’ambuludiama untu la Nyuma ndi ayoteketa dia akambu wa Unyashungu l’aui watetsha afundelu. Enda Efeso 5:19. «Nyutaneli kimbu la esambu w’ololo la wa Nyuma. Nyimbeli Khumadiondjo esambu wa mbandula l’etema anyu». Ndi ayokendakenda lu mbuka ka Kristu l’ongenongeno la kimbu l’utema. Utema andi ayuyala lu kame la Khumadiondjo v. 19. Ndi ayukaka Unyashungu lusaka lam’alungulandi ngresa ndu ketshi uma le ndi. v. 20. «Nyukaki Unyashungu Shesu lusaka tena tshe». Ndi ayuyala la ndjakitshakitsha, aha untu layanga akambu andi tena tshe. Enda v. 21. «Nyuyakitshakitsha la tshina di’anyanyu lu woma wa Kristu». Akambu ane mbeli tulimbitelu tomotshi t’usi ka Kristu lambuludiama la Nyuma.

 

Umbula 8

Kolo kahakuki nyimanyema eli na ?

Lu Mateu 12:24-30 shu mbeyaka mbala wuhu wa kolo keso. Antu wakakani vati, Belezebulu (v. 24) eli khumadiondjo k’edienge w’akolo, la Afarise wakati vati, ndi kakasha Khumadiondjo Jesu wulu andi a ntsha akambu wa mamba wakandatshi. Mbala hyendi wakutshumula ukuku. (Enda lu Mateu 9:34 ndu 12:24) Khumadiondjo akakonoya kanga tshungu ku Afarise wakati vati, Ulimu one w’ololo akatshama lu wulu w’odienge a kolo. Ukundi ayuyala antu watedimiaka etsha w’ololo wa Nzambi l’etsha w’akolo wa Satana ? Elumbwelu kene kakati Khumadiondjo akakumi le wo lu lushi lakawuki Stefano ave. Stefano akawamamiya ati, «Nyu nyatutunaka Nyuma k’Ololo nshi tshe». Etsha 7:51. Kolo kene eli kolo kame kahakuki nyimanyema. «Diako mbanyutelami nti, Wayudimanyia antu kolo tshe la tengo tshe, keli hawadimanyia lotengo la le Nyuma k’Ololo».

 

Umbula 9

Usi ka Kristu mbeyaka ntenga Nyuma k’Ololo, uka ?

Nduku yema ! Lam’ambuyudjase Nyuma k’Ololo l’etema asu, hatukala wali wa nkita lu kolo keso. Asi ka Kristu efula wakatakana lu ekambelu kawo wambusuyama l’etema awo lu dikambu ne uma le Satana. Ndi ambuwatela ati, «we heyi nyimanyema ntu ; we akatshi kolo kahakuki nyimanyema». Kuku, kolo kame kekokahakuki nyimanyema pundju la to kema ekwelo k’usi ka Kristu. To keli lotengo la Nyuma k’Ololo ndu wulu andi, uma le edienge w’akolo la waku weli andjedi awo. Nduku umbetawudi nkukaka ntsha dikambu ne. Khumadiondjo akati ati, «Kolo keso hakuki nyimanyema». Okoso, eli kolo keso ketu katandi. Naka usi ka Kristu ambukana ati, Dimi kakatshi kolo kahakuki nyimanyema, la shu mbumbula shati, «We akatengi Nyuma l’ulimu andi ? We akati ati : Ulimu one eli lu wulu a Diabulu ?» Untu a Nzambi tshe ayanguna ati, Kema. Ukundi akuka untu lambulungula Nyuma l’utema andi ntenga Nyuma keku? Khumadiondjo akati dia Afarise ati, «Ana wa uhimbanyi shenyu mbenyu». Joani 8:44. Atunyi aku wakatshi kolo keso, aha ambetawudi.

Esanganyelu k’akambu ane eli okone. Ambetawudi tshe wambulungula Nyuma la ndi ambuyudjase l’etema awo pundju. Lu wulu andi utu mbakukasu nkambela Unyashungu lu wuhu w’ukuki ; la Nyuma ayutshikala la su edja ndu eyelu ka Khumadiondjo.

Unyashungu atukimanyia nkendakenda lu wulu a Nyuma la dia shu munga l’ase lu wuhu wakuka ngenyangenya Nzambi kasu.

 

Rédigé en langue Otetela. Ufundji Yone G. Davison. J. Barnes (Kitoko) akakadimula l’Otetela.

 

 

 

 

Jashua 7 la 8 suite

 

Shu takenyi uku akatshanya asi Ai asalayi w’asi Isariyele. Jashua akanyangi efula lam’akanduki lukumu luku, akatshatsha ahondo andi, akakwela Latuyalaka l’utema a wutshu efula. Asi Isariyele waki lu kete ya nkana, wakadingama l’atunyi wa wulu efula, ku Jashua aki la woma ati, Lam’ayuka atunyi asu dikambu ne, vo wayukikitshama lu ta dialowo lasu. Okoso kakandakwela Latuyalaka, akaleli la ntundu kandi. Kuku, Unyashungu akawutela ati, Emala ! Eli ololo mete shu nkwela Unyashungu lam’esu lu akambu wa wulu, ku hakuki shu mbetama akhukhumeki la ntundu kandi lam’esu la lutumu la shu ntsha. Kolo akene l’atei awo ; la diaki la wo mbediama dia vo nungula otshoko wa Latuyalaka. Ndi kumbeya mbatshokola lam’akiwo l’akolo l’atai awo. Ndi akadji la wo sheki lu dikambu dia ngelu ka Jeriko ati, antu wayudiakema ku diango dia fesa la paunyi diayuyala diami la dio diayudjama l’eumbelu kami. Ku shu mbeyaka shati, Akana akose dimotshi, akadidji l’eumbelu kandi hita.

 

Undu untu omotshi ayuta ati, Ku aha vo tshe wakatshi kolo ; untu otoi utu aki la kolo. Diui so mete, kuku uhukane dikambu ne. Ukundi akafunde Paulu asi Koreto mukanda andi a ntundu a wulu ? Antu angana l’atei awo waki asi luseka : vo tshe ? Kema ; untu otoi utu aki lu kolo keso ; keli kolo kakandatshi akasanya utundu w’ekelezia la mindu kandi. Vo waketawo ndi munga l’atei awo, ku akambu awo tshe wakakitakita, la etshoko awo tshe wakasuwo, la tediko tawo tshe takengama. Akambu awo tshe wakalana uma l’etawelu kawo ka dikambu so diakatshama l’atei awo. Ekelezia eli dimba otoi le Kristu. Lam’emi la nkandji lu lukulu, dimba diami tshe ayusuwa. Tuho shati, dipopo diame dia lolengo mbeyaka nanya dikoho di’ashi. Untu wame latetemala lu kolo mbeyaka nsuwula otshoko w’ekelezia. Okone, dieli la su nkanela dikambu ne ololo. Dieli la mi ndawo akolo dime, ntukusuwula otshoko w’anyami asi ka Kristu ; dieli la su minya akolo uma l’atei asu tutukulanyema lu akambu asu l’ekelezia k’utundu.

 

Unyashungu akeyi utshi wa kolo l’atei w’asi Isariyele. Akana akeyi mbishe unungu andi uma le asi wudja andi, keli untu akona mbeyaka mbishama uma le One latosenaka ndu la yanyi ndu l’utshu ? Latuyalaka akatela Jashua lama ntsha. Jashua ndame kunkanela elongoswelo ne ; Latuyalaka akulaki. Diaki la wo ndja la ntundu kandi ku Unyashungu aki la wulu wa mbashwela kanga unungu. Ndi kumbeya mbishama lu wudja andi kuyanga lu diuhu diandi. Unyashungu nteyaka shu tshe, untu l’untu. Diaki la Jashua mbela asi Isariyele la ntundu ka Nzambi, wudja la wudja, khumbu la khumbu, diuhu la diuhu, ndu untu l’untu ; la ndi aketawo mbaenya untu lakatshi kolo. Ndi akawutela ati, diango so diakankidiyame tadiutshikali l’atei anyu. Lam’atshikaladio l’atei anyu nyu hanyuteya lama memala la ntundu k’atunyi anyu.

 

Osoku, esonwelo ka Latuyalaka akose wudja w’asi Juda, ku khumbu ka Zera, ku diuhu la diuhu dia khumbu keso ku untu l’untu ; la Akana akashwama uku kanga unungu. Lam’akandashwama ndi aketawo ati, lakose diango dimotshi uma lu ngelu ka Jeriko. Dio diaki dihondo dia dimena di’uma lu Shinare, wombo wa fesa ndu ukama a paunyi Akana aketawo unungu andi la Jashua akatumi antu lu luudu landi la dihema len’akandashe diango so la vo wakaditshimula, wakayi la dio la ntundu ka Latuyalaka, dienyanyu dia mete dia unungu wa utshi a kolo. Utukukana yimba a dikambu so. Dihondo, fesa ndu ukama a paunyi akasumbula wudja w’asi Isariyele tshe, akawukadia tshe wali. Asi Ai wakawatshumbi lu ta ndu asi Isariyele akumi asatu la samalu wakavu ; l’asi kete wakakikitala vati, antu ane kema la wulu wutuleki uku akatuki. Asi Isariyele waki ndu la nsonyi la ntundu k’atunyi awo ndu la ntundu ka Unyashungu. Ushinga wa diango so kombedima l’ushishwi one wa uki. Ololo asu nkana yimba ya dikambu ne ololo. Ayangasu na la kete nye. Tangango ta la kete mbedimaka l’ushinga w’akambu wa l’ulungu, uka ? Lam’ayangonyasu l’akambu wa kakiane, tayuyahumbia akambu wa pundju. Akana akashisha ndu diango diakandalangi, ndu asi kandi ndu lumu landi. Jashua l’asi Isariyele wakayi la ndi l’ukidi w’Akora, wakawuki ave ndu wa lu diuhu diandi, ne dia vo waki la ndi lu lokesu lone, la wakawatshumbi la dja, okoso wakanya kolo ka dikambu so uma l’atei awo.

 

Dimi nangaka mbahe aui akina ahendi lu dikambu dia dihondo la ukundji. Dihuli so, Shinare, aki lu leke la Babylona. Dihuli so eli djimbitelu y’akambu watuyelaka antu wahalangi Unyashungu mbahamela. Vo ndjalotshaka ahondo w’amena lu ashu awo, ku vo kema ololo lu ashu wa Latuyalaka. Lu mukanda w’Enyelo shu mbalaka dia umuntu kanga munanyi efula. (Enyelo 17). Ndi akalote ahondo wa belaa la wa tilili, akalengama la diango dia paunyi la mboko y’ushinga a wulu la mboko y’akeso. Keli lam’alasu dia ekelezia ka mete, wadi a Ona-Okoko, shu menaka shati, Ndi akalote dihondo dia linene dia pesopeso. Dio diakahumama l’etsha w’ololo w’ekilami wakawatshaka la kete. Talanga ndota dihondo diakona, anyami ? Ku lu dikambu dia fesa. Tuho shati, Judasi akalungula tinyi dia fesa akumi asatu lam’akandafungi Khumadiondjo Jesu le atunyi andi. Waho akandalungula uma lu efungelu keso ka kolo kolo na ? Nduku ema ! Ambuleka ololo manguna akambu wa la kete nye la mamema l’akambu wayutshikala edja ndu pundju.

a suivre

Rédigé en langue Otetela par J. Barnes (Kitoko).

 

Quelle sera la fin de ceux qui n’obéissent pas (ou :ne croient pas) à l’évangile de Dieu ? ... Où paraîtra l’impie et le pécheur ? 1 Pierre 4:17,18.

 

Vous donc, bien-aimés, sachant ces choses à l’avance, prenez garde, de peur ... que vous ne veniez à déchoir de votre propre fermeté. 2 Pierre 3:17.

 

 

 

 

AUI AMOTSHI UMA LE UFUNDJI

 

Lam’emi lu nfunda aui ane lu ngondo ka enanei lu ononyi a 1990, dimi latakono tshe uma la hemo kambunsuya utundu a ononyi one. Pindju kene lakatshu lu hopital lu ngelu ka Carlisle, kilometres 48 uma la ngelu kasu ka Keswick. Wa munganga ahendi wakamendi, la vo vati, ololo we nkalula le su ntu l’ekumelu ka ngondo, dia shu menda ntu.

Talanga ntetemala la wekelu asu lu mukanda a Heberu. Okone ala Tshapita 3:1-19. Shu mbeyaka mbisha etinyi kene lukumbu. Ewo kolo ka ntuna ka mbula lu akambu wa Unyashungu. Antu amotshi wambusha mukanda wa Heberu lukumbu lukina «Mukanda wa l’ulungu hwe». La untu akona enasu leko ? Khumadiondjo Jesu, la shu tambena Ndi eko la nkumbu hyendi - «Utumami»(kedikedi umvutshi a Unyashungu le antu) la «Olombedi a ladiku»(kedikedi umvutshi w’antu le Unyasungu). Ufundji a mukanda one ambutenya uku Jesu ambuleka Mose lu lutumbu (Tshapita 3), Jashua (Tshapita 4) Arona (Tshapita 5). Keli shu hateyi mbeya Jesu ololo edja ndu shu tambeka kolo k’etema asu. Enda versa 12, «utema wa kolo waha la mbetawo». Enda ntu versa 10, «Vo watunganelaka nshi tshe l’etema awo». Lu dikambu ne ufundji ambututela ati: «Untu ambuka diui diandi tatukikitshaki utema andi». Diui ne ambenama mbala shatu, (V 7 ; V 15 ; 4:7) Diui ne kema diui paka le wane watetawo Kristu, keli ndu le su shu embetawudi, lam’esu lu mbala diui dia Unyashungu la lushi la lushi.

 

 

 

 

LAYEKAMA LE YE

Usambu 56:3

 

Davidi akafundi usambu one l’etena kakandukala wali le asi Filisti l’usumba awo Ngata. (Enda 1 Samwele 27) Ndi akati ati : «Lam’emi la woma layekama le ye». Ololo asu nkanela uku akandati, ne dia ndu shu mbukalaka wali tena dimotshi. Ukundi akukasu ntsha ? La ntundu, Davidi akakanela efula k’atunyi andi. Khum’ekanga Saulu akutuni la ndi akalangi mbudiaka, mbakalawo Davidi l’atei a ngelu ka asi Filisti. Kuku, ndu leko akambu wa wulu wakiko. Vo wakuho vati, Davidi kakatudiakela dihuka diasu Ngoliata : laso, ndu vo wakutuni (Enda 29:5). Lam’ambudingama untu l’atunyi ukuku, lu dihuli dia pika kendi mete. Okone, le na kakukandi mbekama ?

Davidi kumvuta ati : Layekama le engenyi ami. Wadendi Mikale taki ukimanyidi andi a mete. Ndi aki on’a umuntu a Saulu la ndi akaleki mbekama le shi, undu. Ndu asi Isariyele akina efula wakuhela uku akatuwalwela Davidi la Ngoliata ta dia wulu, akawashimbela. Efula kawo kunanga mbukimanyia, unyaki ului a tshitshe. Okone engenyi andi kunkuka mbushimbela uma le Saulu l’ului andi w’asalayi.

Ndi kumvuta ati : Layekama lu yimba yami hita. Davidi aki kanga yimba efula, keli lam’eli untu lu dihuli dia woma, tena dimotshi yimba yandi mbeyaka mboseka, la ndi nkukaka nkanana mete. Lam’eli akambu aye paka ki, we mbeyaka nkana yimba okone, keli naka ohenyohenyo ambukuma, yimba ye mbeyaka nkitakita, undu.

Davidi kumvuta ati : Layekama lu wulu ami. Ndi taki olongolongo a wodu. Lumu landi tshe aki l’esui ndu l’ekunda, lu nama ekoko, ku l’okongo diku, lu ndo ata l’asi Filisti l’atunyi akina. Ndi aki pami ka wulu efula, ndu ndi aki kanga dihunga; keli lu pa kandi ndi kombekama lu wulu andi wa dimba, ati: Layuleka atunyi ami lu kudu kami.

Davidi akati ati: Lam’ukami woma layekama le ye; keti, le Latuyalaka. Atunyi andi kumbutshika ki nduku lushi, (enda v.1, 2), ndu vo waki ului w’apami efula (v.2). Amotshi wakosongwela le Saulu la lushi la lushi (v.5). Vo wakawuyeli lu ahuli tshe wakandalawo, wakahemahema ahuli wakandashama uma le Saulu, wakotokiya leko dia vo mbeya mbohenyahenya la mbutshela kolo. Mete ndi aki lu ahuli wa woma efula. Keli Davidi akuho Latuyalaka, Unyashungu andi, ati : Kuyanga leko la woma, layekama paka le ndi. Ndi akuho lushi lakandalo la tambwe ta l’usui lam’akandalami ekoko wa shi, la Unyashungu akukimanyia. Ndu lam’akandasusana la laundu pupu. Ku lu lushi lakandalo la Ngoliata, ndi kuntsho lu ta lu wulu andi, paka lu wulu wa Latuyalaka Ndi akangenangena lu akambu aso la ekimanyelu ka Unyashungu andi, akakikitala l’utema, ati : Paka le ndi kayumekama. Atunyi andi wakudingi, keli vo kondeka Latuyalaka lu wulu kana lu yimba, okone Davidi akayala la ki k’utema lu mbuho wulu w’Ongenyi andi la yimba yandi. Vo waki l’akonga ndu akuwa ndu tombo ta diesa, keli diango dia Unyashungu dia ta ndekaka diango di’antu wulu.

Ku shu asi ka Kristu wa elo ngandi ? Utunyi asu eli kanga wulu wuleki wulu asu shu antu, ndu ndi l’ekimanyidi andi efula. Vo kema uku antu, hateyi mbaena, keli shu mbeyaka shati : Wambutudinga la elui awo w’asalayi wa ta. Vo kema l’akuwa wa mbulu uku antu, keli vo l’akuwa wa dja. (Edika l’Efeso 6:16) Shame kema la wulu la yimba ya ndo la wo ta ne dia wulu la mbaena kemako. Lam’ambenama utunyi aye, we mbeyaka mbedika lama ndo la ndi, keli naka ndi henama, ukundi ayuyutsha ? Kuku, uku Davidi, shu mbeyaka mbekama le Unyashungu asu. Kuyanga shu hatukuki mena Satana l’asalayi andi, Unyashungu mbaenaka hwe. Teko tshitshe la Satana eko uki, ku ndi kema lu yediko ya Unyashungu asu. Ndi la mayele efula, keli ndi kema la yimba uku Unyashungu asu. Naka shu la mbetawo ka mbekama le Ukimanyidi asu a pundju, shu tayeya ndeka utunyi asu la ndo ta di’ololo uku akadilo asi ka Kristu aso w’edjedja. Okone, tukikitali le ndi ndu lu wulu andi.

 

Rédigé en langue Otetela. Par J. Barnes (Kitoko).

 

 

 

 

 

WELA WA UMBUKI A WUHU

Mateu 13:1-23

 

Wela one mbeyamaka ololo l’atei asu ku dimi nangaka shu nkanela wehu ene enei wa kete wenasu lu wela. Dieli la su nkime kanyi nye wulu wulu l’etatelu, shati : Wuhu wakuki umbuki kuntshikitana. Wuhu la wuhu aki paka ololo utu. Lu wehu ene enei wa kete, wuhu wakuki umbuki aki wuhu ako wame. Dikambu diakatshikitana diaki kete yame. Kete sho yaki wehu enei; 1. Kete ya mbuka. 2. Kete la diku dia dive. 3. Kete yaki l’atende loko. 4. Kete yaki ololo. Okone tukaneli wehu ene wa kete.

 

1        Kete ya mbuka

Umbuki a wuhu akatuki wehu andi l’ekambo kandi, ku vuka motshi yaketi l’atei a ekambo, la lam’akandadianganya wehu andi, wehu emotshi wakako lu vuka sho. Kete ya mbuka yeli wulu efula dikambu dia yo yambotetama l’ekulu w’ambetshetshi, ku wehu wakako lawo KUMBEYA MBOTO LU KETE dikambu dia yo yakakakatala wulu. Wuhu wakuki umbuki aki wuhu w’ololo, wakakuki ngona, keli dia wuhu ngona ololo, dieli la kete mbulungula loko. Kete ya mbuka heyi nungula wuhu w’umbuki la okone ambetshetshi wa lu mbuka mbeyaka mbikamela wehu, kuyanga fudu yatufumboka lu leke luku mbeyaka mbekomola.

Khumadiondjo Jesu akalimbitshiya ambeki andi ati: Kete sho ya lu wela andi yeli tulimbitelu ta wehu la wehu wa etema w’antu. Ku wuhu one wa kete lu mbuka eli djimbitelu ya wuhu akona w’utema ? Tukane dikambu ne dia kete yakakamela antu l’ekulu awo. Utema ami eli dihuli diami di’usheshe, aha dihuli dia antu mbeteta loko uku alangawo; eli dihuli dia dimi nama la wulu ami tshe. Khum’ekanga Solomona akafundi diui lu mukanda andi a tukedi ati: «Okolamelaki nama utema aye l’eteti, ne dia uma loko katumbaka teko dia lumu» (Tukedi 4:23). Shu hatetawo teko diasu dia ashi nanyema l’ekulu wa antu kuyanga wa nyama; okone ukundi etawosu teko diasu dia lumu mpindjama mindu ? Kema ololo shu mbetawo antu mbeteta l’atei a tukanyi tasu la mbotshiya aui awo wa kolo loko. Adama la Eva waketawo Satana nkendakenda lu dihuli di’usheshe di’etema awo l’aui andi wa kashi, la vo wakako lu kolo. Naka shu tayetawo akanga a kashi, ndu akanga w’okomiya, akanga wa mindu la sonyi mbeteta uku alangawo, etema asu wayuyala uku etema awo, wayuyala wulu, la wuhu w’Umbuki hatutana eotwelo loko. Wuhu eli usatu wa diui dia Unyashungu. Dio nkukaka nto elua w’ololo l’etema asu, kuku dikambu dia ntundu, dieli la dio ntana eotwelo l’etema asu. Diui dia Unyashungu eli diui dia lumu. Wuhu eli engo keli la lumu loko, la naka vo wayutana eotwelo lu kete, vo nkukaka nfula efula. Diui dia Unyashungu eli diui dia lumu; lam’adilungula untu l’utema andi la mbetawo, ndi ayukundja lumu, ayukimanyema l’ekimanyelu ka mete. Tatuyalaki l’etema wa nkeka wahalungula diui dia lumu.

 

2        Kete la diku dia dive

Kete ya wuhu one kema kete yeli la mboko motshi loko ; eli yema ya kete djewelewe la diku dia dive dia wuki dieli l’atei a kete sho. Okone kuyanga wehu mbeyaka mboto lu kete sho, EDU AWO HAWUKUKI NONGOME lu dive dikambu dia wulu adio. Dia lunune ngona, lo mpumbaka ntotome lu kete dia edu awo ntutana ashi weli loko. Lam’eli kete kema efula, dihuli kemako dia edu ntana ahuli wa mboto ndu edu kema la anyu wa mpemo wakuka ntundula dive. Ndu wuhu one wa kete eli usatu w’etema w’antu amotshi watukaka esambishelu ka diui dia Unyashungu. Vo nkukaka nungula diui diukawo esadi, keli vo dilungulaka ulungulalungula. Antu amotshi wa wuhu one hawokohe la mbetawo diui wetawetawo, keli dikambu dia dihuli kemako dia udu nkikitala, lam’ayukuma akambu wa wulu, vo hawukuki memala la wulu, la ulimu l’etama awo ayutshila.

 

3        Kete y’atende

Kete yeko l’atende loko eli wuhu a satu wa kete. Lam’akamba kanga ekambo kete yandi ya mune diango, lam’afusandi kete ndi minyaka adiyu wa kolo ndu wehu la wehu w’atende l’ahangula koi uma loko dia mbisha tumbatumba dihuli. Lu kete yambukuka la diango dikina, dihuli kemako dia tumbatumba MBULA UTSHA LA DIKU. Tumbatumba l’ekambo mpumbaka ashi weli la kete dia dio ngona, ndu dihuli dia edu nuna, ku vo mpumbaka ndu dihuli dia mbula utsha la diku len’eli yanyi ndu luwi. Lam’ambukuka kete la diango dikina diatulaka la wulu efula, uku atende, dinune dia wodu hadiukuki ndjakandjwela dihuli dia ntumba uma lu ka ka k’atende la nkikitala. Dikambu ne eli ndu usatu w’etema w’antu efula. Etema awo wambushila ndula l’akambu akina wa la kete, kema dihuli dia diui dia Unyashungu ntana etawelu k’ololo. Vo nfanaka mbetawo, keli ngandji k’akambu akina ndu ukananu ntshidiaka diula dia etumbatumba la to hangona.

 

4        Kete y’ololo

Wuhu ukina a kete eko, wuhu w’ololo. Ukundi atshikitana kete nye la wehu eku ekina esatu ? Yo yakatshikitana la wehu ekina lu akambu asatu. 1. Wehu wakatani EOTWELO lu kete sho. Lam’akuki umbuki a wuhu lawo, wehu kuntshikala lu hwe, kumbukala wali wa fudu mbekomola kana dia antu mbekamela l’ekulu awo. 2. Wehu wakayala la diasu dia ntuma edu awo etali l’atei a kete, dive tadiaki lawo la tshina dia NSHIMBA WEHU NTOTOME LU KETE. 3. Kete ya wuhu one kunkuka l’atende l’adiyu wa kolo, la tukatshikatshi t’anyanya kundjala lawo dia NSHIMBA TUMBATUMBA MBULA UTALI. Wuhu one wa kete eli usatu w’etema wa waku wuka diui dia Unyashungu la mbetawo ; wakikitala la lushi la lushi lu akambu andi, ndi watulaka lu yimba la wulu lu akambu wa Khumadiondjo. Lu ehunwelu ka Khumadiondjo lu mukanda a Luka (8:15), ndi nfanyaka kete nye la utema wa mete ndu w’ololo. Eli utema a mete na ? Utema a mete eli utema wetawo dikambu dia mete. Untu a mete hakani ati: Dimi ololo wakuka Unyashungu mbetawomi lu ololo ami dime. Ndi hakani ati: Dimi ndeka asi kami l’ololo. Untu l’utema a mete ayetawo ati: Leko kolo; halakuki ndjashimbela; halakuki memala la ntundu ka Unyashungu la nyindjama lu ashu andi. Uku ulungudi w’elambu lu Luka 10, ndi ayolomba unyashungu ati: «Umbuki ketshi, dimi untu a kolo!» Endaka utema a mete. Utema a wuhu one ayulungula diui dia Unyashungu, ayudilama, la dio diayufula, diayongona, diayoto elua wa ngenyangenya Unyashungu.

 

édigé en langue Otetela. Par J. Barnes (Kitoko).

 

 

 

 

 

TUKANYI LU MUKANDA WA, EZERA

MBEKA; NTSHA; MBETSHA

 

Lakakundja tukanyi tone lu walelu wa mukanda wa Ezera dia shu nkimanyiana, uku alasu lu 2 Timote 2:1, 2 ; «We on’ami, ukikitshami lu ngandji ka mamba keli le Kristu Jesu. Akambu WAKAYUKI le mi l’atei emenyi efula, uwakimo le akanga a kolamelu, weya lama MBETSHA ndu akina. « Shu mbalaka ndu lu Luka shati : «Antu efula wambutatela nkondola okondo wa akambu wakatshama l’atei asu... ndu dimi lakakani yimba nti : Ololo dimi nkufundela aui ane, we Teofilo». Ku elo aha untu otoi uku Teofilo, keli ambetawudi tshe wahumba mbetshama.

Dimi lambena aui ane asatu loko wakuka shu nimbitela, diui la diui, uku wewo.

 

5        MBEKA

Lu kete nye naka we ateki diui we halimbitela ololo a diui so. Dia mbeya ulimu a nfunda mikanda; untu mbotoka lu kalasa dia mbeka lama nfunda ukuku. Ndu akambu akina pupu. Untu ayeya dikambu ne dia ndi akadieki uma le umbetsha andi. Okone lam’akayi Khumadiondjo la kete nye ndi akasonola ambeki wa diui diandi, ku ambeki wakeki akambu uma le ndi, la vo wakawalimbitela. Ku ndu lu esonamelu ka Paulu (lam’akindi Saulu), Khumadiondjo akaweti dia ndi mbetsha akambu andi. Paulu akeki, akalimbitela, akashihudia Khumadiondjo Jesu ololo, ati: Ndi keli On’a Unyashungu a lumu.

Aki kalasa k’ololo efula. Ala lu Etsha 9:1-19. Ndi aki uku untu lakeki ku akalimbitela ololo. Ndi akafundi lu buku dia 1 Koreto 13 ati: «Lam’akimi dikenda, dimi lakateketaka uku dikenda, lakukaka uku dikenda, lakakanaka uku dikenda. Ku, kakiane kam’ambumuyala ekumanyi, lambukimo akambu wa dikenda.» (v.11) La ntundu ashu andi wakadiho la lungi, ku ndi kumbeya nimbitela dikambu ne, keli ndi akadieki le Khumesu Jesu Kristu. One eli wuhu w’ololo mete wahumbasu dia shu mbeka la nimbitela dikambu dia Kristu.

 

6        MBETSHA

Lane tutukoto lu dikambu ne dia MBETSHA. Untu heyi ndjala umbetsha wa akina naka ndame ateki. Paka lam’ambeka untu, ambushihudia dikambu ndame keyandi mbetsha antu akina. Khumadiondjo Jesu akati ati : «Nyeki akambu uma le mi, ne dia dimi la memakana la ndjakitshakitsha l’utema» mateu 11:29. Ndu lu Mateu 10: 25 ndi akati ati : «Ambukuka dia umbeki ndjala uku umbetsha andi». Dieli la ye ndjala uku ndi lu dionyo, lu asui, lu lotengo, ne dia we ambuyala lu dihuli dia Umbetsha aye. UMBETSHA asu tshe aki la ndjakitshakitsha ; hakuki shu ndjala l’utaku ; ndi aki la memakana ; hakuki shu ndjala la djawudi. Naka we akeki ukuku, we ambukuka ndjala umbetsha. Antu weli lu mbeka akambu wa Kristu uma le ye wayenda wuhu aye, yediko ya lumu laye, la vo wayukedika okone; la vo wayeka uma le ye paka uku eye undjedi a Kristu.

 

7        NTSHA

Tambukuma lu diui ne dia uki ndu dia wulu. Shu mbalaka lu Heberu 10:36, shati : «Dieli la nyu dia ntetemala, dia nyu NTSHA lulangu la Unyashungu, ku nyu nyayulungula daka diakandanyulaki». Lam’aki Afarise la elombedi w’asi Juda lu mbeya aui wa Unyashungu ndu elembe andi, Khumadiondjo, leya etema w’antu, akawaenyi lu lukesu lawo, ne dia vo kunanga NTSHA lulangu la Unyashungu. Shu mbalaka shati : «Untu tshe latukaka aui ami ane ndu LATUWATSHAKA. ayufana la kanga yimba lakahiki luudu landi ladiku dia dive» Mateu 7:24. Lu Jakoba 1:22 mbalasu shati : «Nyuyali ATSHI wa diui, aha ambuki atu, watukuyadimbiyaka». We keyaka dikambu diakayeki, we kuyalaka umbetsha w’akina, naka we HATSHI uku aki umbetsha aye, eli anyanya. Paulu ambuta ati : «Nyumbukuyaki uku wukuyami Kristu» 1 Koreto 11:1. Ndu lu dihuli dikina ndi akafundi ati : «Nyu nyeli mukanda wa Kristu wakatatumi» 2 Koreto 3:3. Okone antu nangaka ntala uku yaka mukanda wa Kristu mbesu. Paulu akafundi ndu aui ane ati : «Utaki akambu ane, uwaetshaki » 1 Timote 4:11 ; ndu diui dikina ne, ati : « Uyalamaki, ulamaki ndu wetshelu aye. Utetemalaki lu akambu aso, ne dia lam’ayuyutsha osoku, we ayuyashimbela, ndu we ndu wane wuka aui aye» v.16.

Teyi shati : One latekaka la leli ndu umbetsha, ndu latutshaka akambu ane ambutsha kawo, ne dia ndi akeki ndu akalimbitela lene alanga Nyuma k’Ololo mbolombola. Nyuma heyi ntolombola lu akambu wa umunyi kana lu lulangu lawo. Lu Ngalatiya 5:16 shu mbalaka aui ane, shati : «Nyuyelaki Nyuma MBAHANYUTSHA uku saki ka dimba». Laso tukuya Khumadiondjo Jesu. Ndi akalombe ati : «Papa, naka we alanga, uminyia dikoho ne», keli lulangu la Unyashungu aki dia ndi dino. «Okone, usasi anyu ahete la ntundu ka antu, dia vo kaweyi etsha anyu w’ololo, kawutumbuli Shenyu le l’ulungu». Amen.

 

Rédigé en langue Otetela. Par Entoto Ekoka. Kole.

 

 

 

NSHI Y’EDJEDJA

 

«Tambuka lukumu l’atui asu, we Unyashungu ; washesu wakatutela ulimu akayakambi lu nshi yawo y’edjedja» Usambu 44:1.

 

Lam’alasu l’okondo w’ekelezia akambu wakatshama lu nshi y’etatelu, shu nkashimoka shati : Ukundi ahatuki lukumu l’akambu wa ngane lu nshi yasu nye ? Ku dieli la su mbidja yimba yasu, mete lu dikambu ne dia shu dilimbitela ololo. Umbula a ntundu w’etema asu, vo one, shati : «ku, Unyashungu asu, ndi ambukadimo, uka ?» Dieli la su mbeya shati : Ndi atakadimo ; ndi eko elo uku akindi ntundu uku ayunduyala pundju. Diui diandi diaambushikike dikambu so shikaa, ati : «We atutshikalaka pupu, deku diaye kema la akumelu» Usambu 102:27. Ku, Khumesu Jesu ambukadimo ? Kema ! Ndu ndi eko pupu. Shu mbalaka diui ne dia Khumesu shati : Jesu Kristu eko pupu lui, ndu elo, ndu pundju» Heberu 13:8. Okoso ku Ukimanyidi asu Nyuma k’Ololo, ndi ngandi ? Ndi ambolemba ; wulu andi ambukitakita ? Kema ! Shu mbalaka diandi shati : Ndi eli « Nyuma ka pundju» Heberu 9:14. Ndu Khumadiondjo Jesu akalaki ambeki andi dikambu dia eyelu ka Nyuma ati : «Papa...ayunyusha Ukimanyidi ukina, one layuyala la nyu pundju» Joani 14:16. Kuku, diui dia Unyashungu ngandi ? Lam’akalakana Paulu la dikumanyi dia ekelezia k’asi Efeso, ndi akawatela ati : «Kakiane dimi lambunyukimo l’anya wa Unyashungu, la lu diui dia ngandji kandi ka mamba, dieya nyudia la nyusha ukito kame la wane tshe wambukidiama» Etsha 20:32. Diui dia Unyashungu mbeyaka nemba kana nkadimo ? Naka Paulu akakimo ekilami l’anya wa Shesu dia ndi mbaudia lu wulu a diui diandi, ndi taki l’ukandukandu lu dikambu ne. Diui dia Unyashungu dieli diui diatutshikalaka, diahakadimo. Ufundji w’usambu akafundi ati: «Latuyalaka li, pundju pundju, diui diaye diatutshikalaka l’ulungu» Usambu 119:89. Diui so hadiolombo, hadiukaso. Dio la wulu adio uku lu nshi ya ntundu, hadiolemba.

Okone naka Unyashungu hakadimo, naka Khumadiondjo hahilo wuhu ukina, naka Nyuma k’Ololo eko pupu uku akindi la ntundu, naka diui dia Unyashungu dieko la su lu wulu adio wahakadimo, ukundi ambutuhumba wulu uku waki le washesu wa l’ekelizia ? Ukundi ahumbasu ongenongeno wakaludia ului w’asi ka Kristu wa ntundu lu nshi sho y’apostolo ? Ukundi ahenasu efudielu ka dikelizia l’ambetawudi w’eyuyu nshi nye ? Mete, dikambu dia SHU TAMBUKADIMO. Naka shu tambuyekama, tambuyela tukanyi tasu shame, tambukimo mbekama lu wulu wa Nyuma ; naka tambunya ashu asu uma le Kristu lu dihuli diandi dia lutumbu, tambunga lu mbukitanyia, shu tayuhumba akambu wa mamba wakangenyangenya asi kasu lu nshi y’edjedja. Vo wakaludiama la Nyuma dikambu dia vo kundudiama la tukanyi tawo; wakalombwama le Nyuma ne dia vo kundjela mbuka ka yimba ya etema awo; vo wakatshikala lu kame ka ekelizia dikambu dia vame kunanga nombola antu lu wulu awo ndu vo kunanga ndjela elombodi ekina, unyaki Kristu. Vo kunkale walelu wa diui dia Unyashungu ne dia vo kombekama lu wulu wa diui diawo kana lu wulu wa diui di’antu akina.

Nshi ya Khumadiondjo Jesu nkalula uma l’ulungu la ndjutulungula lakandi yambusukana. Kema edja la ndi ayuya ntu. Tuyali l’etema wa mbongenyangenya lu akambu asu, tekami le ndi ndu le Nyuma k’Ololo kakandatumi dia ndjala Ukimanyidi asu a wulu, tatuhekoki lu walelu la wekelu wa diui dia Unyashungu, tuyali la ukitanyia wa ndjela akambu wekasu loko, la shu tayulungula etshoko wa mete, ndu shu, ne dia NDI EKO PUPU PUNDJU.

 

Rédigé en langue Otetela. Par J. Barnes (Kitoko).

 

 

 

 

OKONDO WA UTSHIMI WA AVE

 

Usi ulimu omotshi lakatshimaka ave lu wuku l’atei a kete, akatshu lu lusanganya len’akasambisha usambisha lukumu l’ololo la Kristu. Kuyanga ndi akahukama esambishelu l’atui hwe ndi kumbidja nshihudia diui. L’okongo a daku ndi akambula undaki embula emotshi lu dikambu dia esambishelu kandi. Wakasawula ti, ti ti, keli yimba yandi konsena. Usambisha akatatela nyingonyingo, ne dia unya aketi efula la ndi akalombi pami keso ati : Utukutshika dikambu edja ndu lui la dikolo ku laysawula la ye ntu. Ku pami keso kumbetawo ; ndi akati ati : Kema; halangi nkunga edja ndu lui. Dimi nangaka mbeya utsh’one so mete nti: Akolo ami wambudimanyema. Okone wakasawula ntu, la usambisha akawuhunwela akambu okoke, okoke, edja ndu usasi a Nyuma k’Ololo akahutuya utema andi, la ndi aketawo Ushimbedi, akashimbamela, akatshu lakandi l’ongenongeno.

Lam’akandatshu l’ulimu andi la pindju, ndi akakambi ndi l’anyandi asi ulimu l’atei a kete. Utsha la dikolo ekungwelu ka uki ka kete l’atei a wuku akayala ndu ave wa waki wakakungo l’atei a wuku, la pami keso akakundama la tshina dia wutshu a wuki wa ave. Asi kandi wakatshimi la wulu awo tshe dia mbukundula, ku wakutshimula, wakawembe lu lupitadi, las’eku la nyoi. Enya emotshi l’okongo ndi akakitshiya keli la ntundu ndi atavu Ndi akati ati : Lusaka le Unyashungu ; lusaka le Unyashungu. Utuyala laketawo nkunga edja ndu dikolo di’elo dia nkundja edimanyelu k’akolo ami tshiki lakashisho pundju.

Undu, we umbadi wa mukanda one, we akuki esambishelu ka lukumu l’ololo ku we atetawo Kristu. Tuladiyaki unya a mbetawo Jesu Kristu la nkundja edimanyelu k’akolo aye, we utukukala wali wa nshisha diasu dia ntshokwama. Tuhelaki esekaseka w’amantu dikumi. Esekaseka etanu komboto lu dambu dia diwala, aha dikambu dia vo wakaleki asi kawo kolo ; paka dikambu dia vo wakatshimbatshimba, kundjalongosola ololo dia nkunga eyelu k’utshuki a wadi. Uyali uku utshimi one wa ave; tetawoki mbiviya unya wa mbetawo ; etawo Ushimbedi Jesu Kristu elo ku we ayushimbamela pundju.

 

Traduit de l’Espagnol par J. Barnes (Kitoko).

 

 

Diui uma le Ufundji. Dimi lambolomba edimanyelu ne dia munga ka ntshika akatshi ahendi w’ekumelu ka ushimu one lu Vol. 18. No. 1. Okone tambufunda utundu a ushimu one lu Vol. kene.

 

 

 

AUI AMOTSHI UMA LE UFUNDJI

 

Takangenangena efula dia nungula lukumu shati, cartons 5 ya mikanda yakatatumi la Zaire l’etatelu ka ononyi one yakakumi la Kananga esadi, l’atei a mingu shatu uma la seki di’avion la Newcastle la seki d’avion la Kananga.

 

Wekelu asu trimestre kene eli Heberu 9:16-28. «Lam’aha ekwelo ka dikila, keti edimanyelo ka kolo kema laawo» v.22. Elambu tshe wa Daku di’edjedja, la diui diakalimbitela Abele, (Heberu 11:4) Wambukikitshama le su la diui ne dia wulu. Ne dia «difutu dia akambu wa kolo eli nyoi», la dikila diakatshula Jesu Kristu lu utamba a peketanya ambutenya difutu diambufutama. Dikila dia Kristu «diambutshulwama dia nyimanyia antu efula kolo» (Mateu 26:28) Antu efula ane weli antu akona ? Antu tshe wambetawo Jesu Kristu uku Ushimbedi awo. Dikila dia Jesu Kristu dieko l’ashu wa Unyashungu pundju, la dikila ne diambushimbela ambetawudi uma la kele kayayi. Antu watetawo weko la akambu ahendi la ntundu kawo — Nyoi la Elumbwelu. Keli wane wambutshungwama weli la akambu ahendi w’ololo, edimanyelu k’akolo awo la ekalwelu ka Jesu Kristu ne dia vo nungula panda ka pundju(Panda ka dimba).

(v.28).

 

Diui dia nkanela. We umbadi a mukanda one, we eko l’atei a wane watûkungelaka» ekalwelu kandi ?

 

 

 

ETEMWELO

(Dihuli dia ntemola)

 

Antu efula nkanaka vati; ETEMWELO eli luudu lahikawo l’esanganelu ; okone talanga nkimanyianya dia shu nimbitela ololo uku eli ETEMWELO ka Unyashungu.

Lu Joani 4:20 shu menaka shati ; Umuntu usi Samariya ambutela Khumesu Jesu dia ukungu, DIHULI len’akatemolaka watshewo. Ku Jesu akawutela ati ; Etena kambukuka ndu keko kakiane dia atemodi wa Nzambi Papa wotemole lu Nyuma ndu lu mete. Antu wa wuhu oso mbatuyangaka Papa dia vo ndjala atemodi andi. Khumadiondjo akatela ambeki ati ; «Len’ambusanganyema ahendi kana asatu lu lukumbu lami, DIMI NDJALAKA l’atei awo» (Enda Mateu 18:20).

Asi Isariyele waki la luudu la dipema dia ntemolaka Unyashungu, keli lu luudu lone tinyi pindi diakiko diutshikitanyi ; 1) etinyi kemotshi k’ekila ; 2) etinyi kekina k’ekila kuleki ekila. Lu dihuli di’ekila k’uleki kakadjaseka Latuyalaka, Kanga lumu, l’atei awo. Elo kene tambena shati ; Asi ka Kristu mbeli DIHULI dia Unyashungu mbidjaseka, edjaselu kandi k’ekila. Lu mukanda wakafundela Paulu asi Koreto, (lu 1 Koreto 6:15) opostolo akafundi ati ; «Nyu hanyeyi nyati ; uku ETEMWELO K’UNYASHUNGU MBENYU, la Nyuma k’Unyashungu atudjaseka l’etema anyu ?» Lu 1 Koreto 6:15 ndi ambenya asi Koreto ati ; Alimba anyu weli beke dia Kristu. Okone Unyashungu hatudjaseka lu mvudu yahika antu dia mbotemolaka, keli ndame katuhikaka luudu landi. Lo leko luudu lahahikama l’anya wa antu, kali lo leko luudu lahikama lave wa lumu. Vo mbeli alimba w’antu andi, asi ka Kristu.

Tuyali atemodi wa mete, aha paka lu ashu w’antu. Unyashungu eko len’eli asi ka Kristu wa mete lu mbotemola. Ndi ndjalaka lawo l’atei awo.

Okone alimba asu kema uku alimba ku alimba ; weko alimba w’ekila. Hakuki shu mbakimo lu akambu w’akolo uku luseka, ne dia weko etemwelo ka Unyashungu. Kristu akavu, aketama nshi shati lu diumbu, akulo lushi la satu dia nkundja waku wayotemola Shi lu mete, la ndi akatumi Nyuma k’Ololo, ushasha wa Papa, dia ndi ndjukutsha ulimu one la kete.

 

Rédigé en langue Otetela, par Entoto Ekoka, Kole.