Ambatumela Moyo
1Jakoba,1:1 Mat. 13:55; Mak. 6:3; Etsh. 15:13; Ngal. 1:19. ukambi a Unyashungu la Khumadiondjo Jesu Kristu, Le wauhu dikumi la ahendi wakahandjo: Moyo.
Nyolombiaki la Mbetawo
2Anyami, nyali ongenongeno tshe lamʼayunyutana wehu efula wʼehimba; 3nyeyi nyati: Ehimbelu ka mbetawo kanyu Katutungaka etetemalu. 4Etetemalu aluwanya ulimu ato, dia nyu nduwana la nkukiama, uku wane wahahumbi engo.
5Naka omotshi ambuhumba yimba, ndi alombe Unyashungu, katushaka antu tshe diango la lukahu, hahangwela, ku ndi ayuwushayo. 6Keli ndi alombe la mbetawo, aha la tamu, ne dia untu ladja tamu, eko uku sukhu diʼashi a wuki, diasukuyama la diasutshasutshama la loheledi. 7Untu uku takanaki ati: Layulungula engo uma le Khumadiondjo; 8untu uku eko la etema ehendi, atahahoka lu akambu andi tshe.
Wane Wukitshikitshi Wangenengene
9Unyasu lukitshikitshi, angenengene lamʼayuwuwumbiya, 10ndu kanga ongonyi angenengene lamʼukitshakitshawo, ne dia ndi ayushisho uku dembo diʼadiyu. 11Ne dia unya atandaka la luhaladi la wulu, atolengiyaka adiyu,1:11 Is. 40:6-7. ku alembo awo watokokaka la kete, dimena diawo diatushilaka. Osoku mbayuyala ndu kanga ongonyi lu akambu andi.
Ehimba Hawuyi Uma le Unyashungu
12Untu lakikitala lʼehimba eko la otshoko, ne dia lamʼayunduleka ehimba wulu, ndi ayulungula dembo dia kusu dia lumu, diakalaki Khumadiondjo wane wulanga. 13Untu tataki lamʼayunduhimbama ati: Dimi lambuhimbama uma le Unyashungu, ne dia Unyashungu hahimbama la akambu wa kolo, ku ndi hahimbi untu. 14Keli untu lʼuntu atuhimbamaka lamʼakutwamandi ndu lamʼahimbamandi la saki kandi ndame ka kolo. 15Ku saki kako, lamʼatshoto diemi, to kayuta kolo; ku kolo, lamʼulato, to kayuta nyoi.
16Anyami wa ngandji, tanyudimbiyamaki. 17Mboya tshe kʼololo la Kʼuluwanyi katuyakaka uma lʼulungu, Katuhuloka uma le Shi yanyi, lahakadimo, leli pupu pundju. 18Dia lulangu landi mbakandatutungi la diui diandi dia mete, dia shu ndjala elua wa ntundu wa ditungelu diandi tshe.
Nyuyali Atshi wa Diui, Aha Ambuki Atu
19Anyami wa ngandji, nyeyi akambu ane. Keli untu tshe uki esadi, la ati okoke. Tukaki kele esadi, 20ne dia kele Kʼantu heyi nkimanyia ololo a Unyashungu. 21Okone nyunya akambu wa sonyi la wa kolo tshe. Nyetawo diui diunewo lʼetema anyu la memakana; dio mbeya nshimbela nyumu yanyu.
22Keli nyuyali atshi wa diui, aha ambuki atu, watuyadimbiyaka. 23Naka untu eko umbuki a diui, la haditshi, ndi eko uku untu lenda elundji kandi lu lulindu. 24Ne dia lamʼayaendandi lu lulindu, ndi atumoka, kema edja ku ndi ambuhela didjidji diandi. 25Keli lenda elembe wʼololo wa ndjadjasela, ndu latetemala loko, aha umbuki a diui ladiuhela, keli utshi a diui mbendi. Untu ako ayotshokwama lu etsha andi.
Otemwelo wa Pudipudi Ndu Waha la Vadi
26Naka untu ambuyakana ati: Otemodi wʼololo mbendi, Keli hashimbi lulimi landi, ndi ambuyadimbiya lʼutema andi. Otemwelo andi eko anyanya. 27Otemwelo weli pudipudi, waha la vadi lu ashu a Unyashungu Shesu, weko okone: ntsho dia ntenda ana wa tshiki la wadi waki edu lu asui awo, la dia untu ndjalama diaha ndi ndjala la akambu wa kolo wa la kete.
Nyukani Ngandji Kaha la Shonodi
1Anyami, tanyukimelaki mbetawo ka Khumesu Jesu Kristu, Khumadiondjoko lutumbu, kame la shonodi le antu. 2Naka untu omotshi ayoto lʼetemwelo kanyu udji lohete la paunyi lu luhita la olotshi ahondo wʼololo, ku ndu kanga wula lolotshi ahondo wa kolo ayoto; 3lamʼayunyetawo untu lolotshi ahondo wʼololo nyati: Uyudjase lu eihuli diʼololo ne; ku lamʼayunyutela kanga wula nyati: Emala lene, kana udjase la tshina dia kihuna kʼekulu ami, 4laso nyu kema la shonodi lʼatei anyu uka? Nyu hanyuyala uku embadi weli la tukanyi ta kolo? 5Anyami wa ngandji, nyuhukami. Unyashungu konsonola akanga a weula la kete dia ndi mbangonya lu mbetawo, la dia vo ndjala ekito wa diulelu diakandalaki wane wulanga uka? 6Keli nyu nyambonyola kanga wula. Akanga wʼengonyi waha wane wanyahamela, ndu nyukutula lu dumbwelu uka? 7Vo waha wane watenga lukumbu lone la kenemo lanyetawo uka?
8Naka nyu nyambukitanyia olembe wuleki ekina wuki lu efundelu, ati: Ulangi unyaye uku ayalangaye,2:8 Lew. 19:18. laso nvu nyambutsha ololo. 9Naka nyu nyambuyala la shonodi le antu, nyu nyambutsha kolo, nyambamiama uku andjaki wʼelembe. 10Untu tshe lakitanyia elembe tshe, lamʼayundutakana lʼolembe otoi, wayuwamia uku undjaki wʼelembe tshe. 11Ne dia one lakati ati: Tunanaki,2:11 Etum. 20:14; Euh. 5:18. kakati ndu ati: Tudiakaki.2:11 Etum. 20:13; Euh. 5:17. Okone naka we hunanyi, keli ambudiaka untu, we ambuyala undjaki wʼelembe. 12Okone nyutaki ndu nyutshaki uku antu wayulumbuyama lu elembe wa ndjadjasela. 13Ne dia elumbwelu kaha la ketshi kayuyala le one lahukana ketshi; ketshi kambuleka elumbwelu wulu.
“Mbetawo Kaha la Etsha Mvokaka”
14Anyami, waho akona weli le untu naka ndi ambuta ati: Dimi la mbetawo, keli ndi kema la etsha? Mbetawo keso kayeya mbushimbela? 15Naka onengesu a pami kana kadiyesu eko utakataka, ndu la uhumba wa mbu ya nde la lushi la lushi, 16lamʼayuwatela omotshi ati: Nyutshu la ki, nyutuki dja, nyutuluti mbu ya nde; keli ndi hawasha ehumba wʼalimba awo, lendi eli waho na? 17Osoku mbetawo kaha la etsha ambuyavwela.
18Untu omotshi ayuta ati: We la mbetawo, dimi la etsha. Omenya mbetawo kaye kaha la etsha, ku dimi layukenya mbetawo kami la etsha ami. 19We ambetawo wati: Unyashungu eko otoi; we ambutsha ololo. Ndu edienge mbatetawoka pupu — watudidimaka. 20Keli we untu kʼuntu, we heyi wati: Mbetawo kaha la etsha keli anyanya? 21Tshesu Abarahama kunyindjama lu etsha andi lamʼakandakimo onʼandi Isaka lʼediakelu uka?2:21 Etat. 22:1-14. 22We menaka wati: Mbetawo kandi kakakimanyiama la etsha andi, ndu mbetawo kandi kakaluwanyema ne dia etsha andi. 23Ku efundelu kakashidiyama ati: Abarahama aketawo Unyashungu. Wakawadiya mbetawo kandi uku ololo andi;2:23 Etat. 15:6. wakaweti vati: Ongenyi a Unyashiungu.2:23 2 Ek. 20:7; Is. 41:8. 24Okone nyu nyambena nyati: Untu nyindjamaka dia etsha andi, keli hayindjama dia mbetawo ketu. 25Okone ndu Rahaba, kanga munanyi, kunyindjama pupu lu etsha andi lamʼakandalungula akendji, ku akatumi lu mbuka kekina?2:25 Jas. 2:1-21. 26Uku atuvokaka dimba diaha la lumu, okone ndu mbetawo kaha la etsha mvokaka.
Antu Washimbi Nimi: “Lulimi Leko Uku Shasi ya Dja”
1Anyami, tanyuyalaki embetsha efula; nyeyi: Shu tayuyala la elumbwelu kuleki wuki, 2ne dia shu tshe tatutakanaka lu akambu efula. Naka untu hatakana lu diui diandi, keti ndi ambuluwana, ndi mbeyaka nshimba dimba diandi tshe. 3Shu tatudjaka ashingu lu enyo wa falasa ne dia yo nkitanyia diui diasu, okone tambusikisula alimba ayo tshe. 4Nyendi ndu mashua wʼashi, kuyanga mbewo waki, vo watokendjakendjamaka la pepe ya wulu, keli watusikiswamaka la djenda ya tshitshe, uku alanga kanga djenda. 5Okone ndu lulimi leko leke la tshitshe la dimba, ku lo latosemaka lu akambu a waki. Nyendi uku atohetshamaka kunyi efula la shasi ya dja!
6Lulimi leko uku dja. Lulimi leli utundu wʼakambu wa kolo lʼatei a beke diʼalimba asu. Lo latulanyaka dimba tshe, latohetshaka nyumu tshe la dja yakahetshama uma lu Luwinga la dja. 7Ne dia wehu tshe wa nyama, la wa fudu, la wa diango diayakutula ndu wa diango dia lʼashi a wuki diatekiyamaka, ndu diakekiyama le antu, 8keli nduku untu leya mbekiya lulimi! Lo leko engo ka kolo, katuhasahasaka, lambulula too la lolengo la nyoi. 9La lulimi mbatutotemolaka Khumesu Shesu; la lo mbatutudjaka antu wakatungama lu efanelu ka Unyashungu3:9 Etat. 1:26. mananu. 10Diui diʼotshoko la dia mananu diatutumbaka lʼunyo otoi. Anyami, kema ololo akambu aso ndjala osoku. 11Eteko kʼashi mbeyaka ntundja ashi wʼololo la ashi wʼululu lu ushu otoi kame uka? 12Anyami, undi, utamba a fingu mbeyaka nto mbeli, kana okodi wa vinyo nto fingu? Okone ashi wa leho heyi ntundja ashi wʼololo.
Yimba yʼUma lʼUlungu
13Untu akona eli la ewu la yimba lʼatei anyu? Ndi enya antu akambu andi wʼololo la etsha andi wʼololo la memakana ka yimba yandi. 14Keli naka nyambuyala la kandjema la tamu lʼetema anyu, tanyuyatumbulaki, tanyutaki kashi lu akambu weli mete. 15Yimba nye kumpulo uma lʼulungu, keli yo yeko ya la kete, yeko ya dimba, yeko ya Uhimbanyi. 16Ne dia lamʼeli kandjema la tamu, laawo keli ufutanu la akambu wa kolo tshe. 17Keli yimba yakahulo uma lʼulungu, ntundu yeko pudipudi, lʼokongo yeli ki, la memakana, la osengosengo. Yo yambulula too la ketshi la elua wʼololo, yaha la tamu, yaha la lukesu. 18Elua wʼakambu wʼololo wambunema lu ki le antu watuyangaka ki.
“Ongenyi wʼAkambu wa la Kete Ambuyaete Utunyi a Unyashungu”
1Lundju la ta lʼatei antu, uma lendi uyewo na? Hawuyi uma lu okomiya anyu watolokaka lʼetema anyu uka? 2Nyu la saki ka diango diaha la nyu, nyu nyatudiakanaka, nyatokomiyaka diango diahanyeyi nkundja. Nyu nyatokotanaka, nyatoloka ta. Nyu nyaha la ema, ne dia nyu hanyolombe. 3Nyu nyatolombaka, ku hanyulungula, ne dia nyu nyatolombaka olombalomba, dia nyu ndjangenyangenya. 4Nyu akanga a munanyi, nyu hanyeyi nyati: Ongenyi wʼakambu wa la kete eko utunyi a Unyashungu? Okone untu tshe lalanga ndjala ongenyi wʼakambu wa la kete, ambuyaete utunyi a Unyashungu. 5Nyu nkanaka nyati: Efundelu mvutaka utata uka? Nyuma katudjaseka lʼetema asu, ntukumbulaka la kandjema? 6Keli ndi atutushaka ngandji ka mamba ladiku dia ngandji ka mamba. Okone efundelu kambuta ati: Unyashungu atutunaka kanga utaku, keli atushaka one layakitshakitsha ngandji ka mamba.4:6 Tuk. 3:34. 7Okone nyukitanyiaki aui wa Unyashungu. Nyosemaneli le uhimbanyi, ku ndi ayunyulawo. 8Nyusukani le Unyashungu, ku ndi ayusukana le nyu. Nyu antu wa kolo, nyotsha anya anyu; nyedia etema anyu, nyu akanga wʼetema ehendi. 9Nyuyatshumuya, nyunyangi, nyuleli. Tola tanyu takadimo lunyangu, ongenongeno anyu akadimo okei. 10Nyuyakitshakitsha lu ashu wa Khumediandjo, ku ndi ayunyumbiya.
11Anyasu, tanyosongwanelaki. One lasongwela unyandi kuyanga lalumbuya unyandi, ndi ambosongwela elembe, ndu ambulumbuya elembe. Keli lamʼayuyulumbuya elembe, ku we kema utshi wʼelembe, we eko usambudi. 12Otoi keli umbidji wʼelembe la usambudi, ndi keli la wulu wa mamela la wa ndjaka. Keli we na, lalumbuya unyaye?
Nyutaki Nyati: “Naka Khumadiondjo Alanga”
13Nyuyi nyu wane watutaka nyati Elo kana lui tayutsho lʼusumba a wuhu one la wuhu one, tayutshikala leko eleku tshe, tayetetaka ukanda, tayukundja waho. 14Keli nyu hanyeyi akambu wayuyala lui.4:14 Tuk. 27:1. Lumu lanyu leli na? Nyu nyeko uku lungi, lateneka etenyi ka tshitshe, ku latushishoka. 15Dieli la nyu dia mvuta nyati: Naka Khumediandjo alanga, tayuyala la lumu, ku tayutsha okone kana osoku. 16Keli kakiane, nyu nyambutakula lu ndjatumbula kanyu. Utaku one tshe, eko kolo. 17Okone untu leya ntsha dikambu diʼololo, keli haditshi, dikambu diako dieko kolo le ndi.
Ambewula Akanga wʼEngonyi la Akanga a Ndjalanga
1Keli nyu, akanga wʼengonyi, nyuyi, nyuleli, nyawani, ne dia asui waya ka ndjate nyu! 2Ekundji anyu wambohonda, ahondo anyu wambolema la tumumbu. 3Paunyi yanyu la fesa yanyu yambahema alalu. Alalu ayo wayuyala uku omenyi a dikambu le nyu, wayole alimba anyu uku dja. Nyu nyambuyaumbela diango lu nshi nye yʼekumelu.5:3 Mat. 6:19. 4Nyulungi, difutu dia asi ulimu wakanyukambela dikambo dianyu diakanyakimela la lukesu, diambawana! Ndu alelu wa amunyi wa diango dianyu wambukuma lʼatui wa Khumadiandja Kanga lulimbilimbi.5:4 Euh. 24:14—15. 5Nyu nyakenaka olo la kete, nyakayangenyangenyaka; nyakalutsha etema anyu lu lushi lʼediakanelu. 6Nyu nyakamia, nyakadiaki untu ololo, laki kunyolosha.
7Anyasu, nyutetemali, edja ndu lamʼayuya Khumadiondjo. Enda, ukambi ekambo atukungelaka dinela diʼololo dia diango diakandune lu kete. Ndi atutetemalaka edja ndu lamʼayolo mvula ka ntundu la ka lʼokongo. 8Ndu nyu nyutetemali, nyushikike etema anyu, ne dia eyelu ka Khumadiondjo aya suki. 9Anyasu, tanyungunangunanelaki, ne dia nyu nyatukulumbuyama. Enda, Unumbushi ambemala lu asuku! 10Anyasu, nyendi amvutshi wakataka diui lu lukumbu la Khumadiondjo, vo wayali djimbitelu ya fono la ya etetemalu. 11Nyulungi, shu mvutaka dia antu wakayakikitsha shati: Weko la otshoko. Nyu nyakuki lukumu la etetemalu ka Jobo,5:11 Job. 1:21-22; 2:10. nyakenyi ekumelu ka Khumadiondjo, ndu uku uludi Khumadiondjo la memakana la ketshi.5:11 Esam. 103:8.
Nyewo Tshibelu
12Anyasu, ladiku diʼakambu tshe, tanyutshibaki ulungu, kana kete, kana etshibelu kekina. Keli elu kanyu, kayali elu; kema kanyu, kayali kema, ne dia nyatukuyala la dianyelu.5:12 Mat. 5:34-37.
Akambu Watutumbaka Uma lu Dombelo
13Untu eko la asui lʼatei anyu? Ndi alombe. Untu eko la ongenongeno? Ndi imbi esambu. 14Untu eko la hemo lʼatei anyu? Ndi eti dikumanyi dia ekelizia, vo wolombele, wukiti iso5:14 Mak. 6:13. lu lukumbu la Khumadiondjo. 15Dombelo dia mbetawo diayushimbela kanga hemo, ku Khumadiondjo ayuwulula. Naka ndi akatshi kolo, kolo yandi yayudimanyema. 16Okone nyushwaneli kolo yanyu, nyolombaneli Unyashungu, dia nyu nkono. Elombelo kʼuntu ololo mbeyaka ntsha akambu a waki. 17Elidja aki untu uku shu; ndi akatetemala nomba Unyashungu, ati: Toloshaki mvula, ku mvula kondo la kete deku satu la ngondo shamalu.5:17 1 Khum. 17:1; 18:1. 18Ndi akalombe ntu, ku ulungu akalosha mvida,5:18 1 Khum. 18:42-45. kete yakatumbia tumbatumba.
“Ayushimbela Lumu lʼUntu Uma lu Nyoi”
19Anyasu, naka untu lʼatei anyu ambunganela uma lu mbuka ka mete, la omotshi ayuwungula; 20ndi eyi ati: Untu layungula untu a kolo uma lu mbuka kakandanganela, ayushimbela lumu lʼuntu ako uma lu nyoi, ndu ayukumba efula kʼakambu wa kolo.