Wambatumela Moyo
1Paulu, la Silivano, la Timote, Le ekelizia ka la Tesalonika1:1 Etsh. 17:1. keli le Unyashungu Shesu la le Khumadiondjo Jesu Kristu:
2Ngandji ka mamba kayali la nyu, ndu ki kʼuma le Unyashungu Shesu, la uma le Khumadiondjo Jesu Kristu!
Ehamelu ka Mbetawo la Kolamelu yʼAsi Tesalonika lʼAtei wʼAsui
3Anyasu, dieli la su dia mbuka Unyashungu lusaka nshi tshe dikambu dianyu. Dikambu diako dieko ololo, ne dia mbetawo kanyu katulaka otekoya, la ngandji kukananyu kambuyala efula. 4Okone shame tambuyatumbula dikambu dianyu lʼekelizia wa Unyashungu, dia etetemalu kanyu la mbetawo lu asui anyu tshe la lu fono kambunyukike.
5Akambu aku mbeli djimbitelu yʼelumbwelu kʼololo ka Unyashungu, ne dia nyu mbalema ololo wakuka mboto lu diulelu dia Unyashungu, diako diasuwanyu — 6naka dieko ololo dia Unyashungu nsuya wane watunyusuyaka, 7la dia nyu wane wasuyama wumuya la su lu enelo ka Khumadiondjo Jesu uma lʼulungu la andjelo andi a wulu lu lumbi la dja, 8ndi ayosomboya wane waheyi Unyashungu, la wahakitanyia lukumu lʼololo la Khumesu Jesu. 9Vo wayusuwa, wayunyema pundju uma lʼelundji ka Khumadiondjo la uma lu lutumbu la wulu andi 10lamʼayunduya dia ndjutumbwama le ekilami andi, la dia ndjambiya le wane tshe wakawetawo, ne dia ndjutumbwama le ekilami andi, la dia ndjambiya le wane tshe wakawetawo, ne dia nyu nyaketawo diui diasu lushi lako. 11Dia dikambu ne, mbatutunyolombelaka nshi tshe shati: Unyashungu asu anyali ololo wedimi la leta lanyu, ndu anyuludia la saki tshe kʼololo la ulimu a mbetawo, la wulu 12dia lukumbu la Khumesu Jesu ntumbwama lʼetema anyu; la dia nyu ntumbwama lʼutema andi, uku eli ngandji ka mamba ka Unyashungu asu la ka Khumadiondjo Jesu Kristu.
Onʼa Eshishwelu Ayushwama Ntundu kʼEyelu ka Khumadiondjo
1Anyasu, shu tambunyosengasenga dia eyelu ka Khumesu Jesu Kristu, la dia esanganelu kasu la ndi;2:1 1 Tes. 4:15-17. 2shati: Tanyohenyahenyamaki esadi lu tukanyi, tanyutshamaki kele lu nyuma, lu diui, kuyanga lu mukanda wambufana uku uma le su, ati: Lushi la Khumadiondjo lambuyakaka. 3Untu tanyudimbiyaki nduku yema, ne dia dikambu nc hadiuyala, tshikima antu efula wambutatunyi dikambu dia Unyashungu ntundu, la kanga ufutanu, onʼa eshishwelu ambushwama, 4one latuna, ndu layambiya la ntundu ka diango tshe dietawo vati: Ditemolatemola, kana diango tshe diatemolawo.2:4 Dan. 11:36; Ezek. 28:2. Okone ndi atudjaseka lu etemwelo ka Unyashungu, ayata ati: Dimi Unyashungu. 5Nyu hanyuho nyati: Lamʼakimi la nyu, dimi lakanyutelaka akambu aso? 6Kakiane nyu mbeyaka one latushimbanaka, ne dia ndi ayenama lʼetena kandi. 7Dikambu ne diʼuhedia diakashami, diatutshaka ulimu adio kakiane. Keli ushimbi eko kakiane, ayushimba, edja ndu lamʼayuwuwunya. 8Ku kanga uhedia ayenyama, ayudiakemi le Khumadiondjo Jesu la luwi lʼuma lʼunyo anai.2:8 Is. 11:4. Ndi ayuwete uku anyanya lʼeyelu kandi. 9Eyelu kandi kambedima lʼelimu wa Satana la wulu tshe, ndu la tulimbitelu, ndu la akambu wa mamba2:9 Mat. 24:24. wa kashi, 10la kesu tshe ya kolo ya wane wambushisho, ne dia vo kumbetawo ngandji kʼakambu wa mete, dia vo nshimbamela. 11Dia dikambu ne, mbatatumelaka Unyashungu ulimu wa munga, dia vo mbetawo akambu wa kashi, 12dia vo tshe waki kumbetawo akambu wa mete, keli wakangenangena lu akambu wa kolo, walumbuyami.
Unyashungu Akanyosonola Dia Nyusha Panda: “Nyukimeli Akambu Wakanyetshama”
13Anyasu, elangimi wa Khumadiondjodieli la su dia mbuka Unyashungu lusaka nshi tshe dia dikambu dianyu, ne dia Unyashungu akanyosonola umaka etatelu dia nyusha panda, lu ekidiamelu ka Nyuma la ka mbetawo kʼakambu wa mete. 14Lu akambu ane, mbakandanyeti lu lukumu lʼololo lasu, dia nyu nungula lutumbu la Khumesu Jesu Kristu. 15Okone nyu anyasu, nyushikimali; nyukimeli akambu wakanyetshama, kuyanga lu diui, kuyanga lu mukanda wakatanyufundela.
Ambalombela Unyashungu
16Khumesu Jesu Kristu ndame, la Unyashungu Shesu, lakatulangi ndu lakatusha ekikitshelu ka pundju la elungamelu kʼololo uma lu ngandji ka mamba, 17akikitsha etema anyu, ndu anyushikike lu elimu wʼololo tshe la lu aui!
Alaku Amotshi
1Anyasu, diui diami dia ndjihelu ne nti: Nyutolombelaki, dia diui dia Khumadiondjo diadiangani ndu diatumbwami, uku atumbwamadio lʼatei anyu; 2la dia shu ntshungwama uma lʼanya wa akanga a djawudi la antu wa kolo, ne dia aha antu tshe mbeli la mbetawo. 3Keli Khumadiondjo eko la kolamelu. Ndi ayunyushikike, ayunyulama uma le kanga kolo. 4Shu teko la elungamelu le Khumadiondjo dikambu dianyu, shati: Nyu nyatutshaka ndu nyayutshaka akambu wanyutelasu. 5Khumadiondjo alombole etema anyu lu ngandji ka Unyashungu, la lu eteti ka Kristu.
Paulu Ambuhangwela Akanga a Nende
6Anyasu, tambunyosengasenga lu lukumbu la Khumesu Jesu Kristu, dia nyu mumo uma le anyanyu tshe, akanga a nende, ndu wahayeli dietshelu diakatawaetsha. 7Ne dia nyame mbeyaka wuhu wahumbanyu ntukuya; ne dia shu kundjala la nende lʼatei anyu. 8Shu konde ma diʼuntu olele, aha nfuta. Shu takakambaka ulimu wulu ndu la utshu ndu la yanyi, dia shu tatuyalelaki nduku untu wutshu lʼatei anyu. 9Aha ati: Shu kundjala la wulu wa ntsha osoku, keli takalangi ndjala djimbitelu le nyu, dia nyu ntukuya. 10Ne dia ndu lamʼakisu lakanyu, shu takanyutela shati: Naka untu halangi nkamba ulimu, ndi talekaki. 11Ne dia shu tambuka lukumu ati: Akanga a nende weko lʼatei anyu, wahakambi nduku djimulimu, keli weko la saku lu akambu wa kana. 12Kakiane, shu tambosengasenga antu wa wuhu oso, ndu tambasengasenga le Khumadiondjo Jesu Kristu, dia vo nkamba ulimu la ki, ndu dia ndjayangela ma diawo. 13Keli nyu, anyasu, tanyuhekoki ntsha ololo.
14Naka untu hakitanyia diui diasu lu mukanda one, nyendi untu ako, tanyosohanaki la ndi, dia ndi mbutshama sonyi. 15Ku tanyalaki untu ako uku utunyi, keli nyulaki uku unyanyu.
16Kakiane Khumadiondjo ka ki, ndame anyusha ki tena tshe, lu wehu tshe. Khumadiondjo ayali la nyu tshe!
Ambatumela Moyo; Ambatshokola
17Diui ne dia moyo mbufundjimi, dimi Paulu, la lunya lami. Dio dieko djimbitelu lu mikanda tshe wanyufundelami. Wuhu ako mbufundjimi. 18Ngandji ka mamba ka Khumesu Jesu Kristu kayali la nyu tshe!