1 TESALONIKA

Chapitres

 1. 2  -   2. 2  -   3. 3  -   4. 4  -   5. 4

1 TESALONIKA 1

1Paulu, la Silivano, la Timote, Le ekelizia ka la Tesalonika,1:1 Etsh. 17:1. weli le Unyashungu Shesu la le Khumadiondjo Jesu Kristu:

Ngandji ka mamba la ki wayali la nyu!

 

2Shu tatukaka Unyashungu lusaka nshi tshe dikambu dianyu tshe, tatunyudimulaka lu alombelo asu. 3Tatuhoka ulimu anyu wa mbetawo, la ekambelu ka ngandji ndu eteti kʼelungamelu la ntundu ka Unyashungu le Khumesu Jesu Kristu. 4Anyasu, elangimi a Unyashungu, shu mbeyaka esonamelu kanyu, 5ne dia lukumu lʼololo lakayi le nyu, aha la diui tu, keli ndu lu wulu wa Nyuma kʼOlolo, ndu la mbetawo ka wulu. Nyu mbeyaka wuhu akona wʼantu wakatayaenyaka lʼatei anyu dia dikambu dianyu. 6Nyu nyakatukuyaka, nyakukuyaka ndu Khumadiondjo, nyaketawo diui la asui efula,1:6 Etsh. 17:5-9. ndu la ongenongeno a Nyuma kʼOlolo. 7Okone nyu nyakayala djimbitelu le wane tshe waketawo la Makedoniya ndu la Akaya. 8Ne dia diui dia Khumadiondjo diakadiangana uma le nyu, aha paka la Makedoniya la Akaya etu, keli mbetawo kanyu le Unyashungu kambeyama lu ahuli tshe. Okone shu hatuhumbi mvuta nduku diui. 9Ne dia vame watutelaka antu dikambu diasu, uku akatakumi le nyu, la uku akanyakadimo le Unyashungu uma le dikishi, dia ntemola Unyashungu a lumu, a mete; 10la dia nkungela Onʼandi uma lʼulungu, lakandulula uma lu nyoi, Jesu ndame, lambutushimbela uma lu kele kayayi.

1 TESALONIKA 2

1Anyasu, nyame mbeyaka nyati: Eotwelo kasu le nyu taki anyanya. 2Keli lamʼakawatusuya ntundu, ndu lamʼakawatutsha sonyi la Filipi,2:2 Etsh. 16:19-24. uku weyanyu, shu takakikitala le Unyashungu asu, dia nyutela lukumu lʼololo la Unyashungu lʼatei wʼasui efula.2:2 Etsh. 17:1-9. 3Ne dia daka diasu tadiaki munga, kuyanga kolo, kuyanga lukesu, 4keli uku akatetawoma le Unyashungu dia shu mbekama lukumu lʼololo, uku watasu. Shu hatuyangi ngenyangenya antu, keli tatuyangaka ngenyangenya Unyashungu latedikaka etema asu. 5Vo kuntutana tata aui wa diandu dia wandulandula, uku weyanyu, kuyanga la engo ka nkumba okomiya, Unyashungu keli omenyi. 6Shu kunyanga lutumbu uma le antu, kana uma le nyu, kuyanga uma le akina, keli takeyi nyulela uku atumami wa Kristu. 7Keli shu taki la memakana lʼatei anyu, uku atumbaka wali anʼandi. 8Shu takaleki nyulanga, taki la ongenongeno, aha dia nyusha lukumu lʼololo la Unyashungu lutu, keli takalangi ndu nyusha nyumu yasu, ne dia nyakayala elangimi asu a wulu.

 

9Anyasu, nyu mbuhoka ulimu asu la pa kasu; shu takakambaka utshu la yanyi, dia shu tatukunyuyalela wutshu. Okone takanyusambishaka lukumu lʼololo la Unyashungu. 10Nyu nyeko emenyi, ndu Unyashungu eko omenyi, uku akatatshaka akambu wʼekila, wʼololo ndu waha la unungu lʼatei anyu, nyu wane wetawo 11Nyu mbeyaka uku akatanvutshela untu lʼuntu, uku atutshelaka shi anʼandi. Shu takanyosengasengaka, takakikitshaka etema anyu, takanyutelaka diui, 12dia nyu nkendakenda uku alanga Unyashungu, latunyetaka lu diulelu diandi la lu lutumbu landi.

 

13Dia dikambu ne, mbatutukaka Unyashungu lusaka aha mpeko. Ne dia lamʼakanyalungula diui dia Unyashungu diakatanyutela, nyu kudietawo uku diui diʼantu, keli nyakadietawo uku diui dia mete, diatukambaka lʼetema anyu, nyu wane wetawo. 14Anyasu, nyu nyakukuya ekelizia wa Unyashungu wa la Judiya weli le Kristu Jesu, ne dia ndu nvu nyakasuyama pupu le asikanyu,2:14 Etsh. 17:5. uku akawasuyama le asi Juda. 15Vo wakadiaki Khumadiondjo Jesu ndu amvutshi, wakatutshanya,2:15 Etsh. 9:23, 29; 13:45, 50; 14:2, 5, 19; 17:5, 13; 18:12. hawongenyangenya Unyashungu; wambutshikitana la antu tshe. 16Vo wambutusike dia shu mvutela asi wedja dia vo nshimbamela — dia vo ndudia yediko ya kolo yawo nshi tshe. Keli kele ka wulu ka Unyashungu kayali le wo lʼekumelu!

 

17Anyasu, lu alimba kakatangana la nyu etenyi ka tshitshe, keli aha lu etema. Shu takatetemala la saki ka wulu dia menana la nyu; 18ne dia shu takalangi ndja le nyu — keli dimi, Paulu, lakaleki nanga tena tshe — ku Satana akatushimbi. 19Kakona keli elungamelu kasu, kana ongenongeno asu, kana dembo diasu dia kusu dia lutumbu? Aha nyu nyame mbeli osoku la ntundu kʼenelo ka Khumesu Jesu lu eyelu kandi uka? 20ne dia nyu nyeko lutumbu lasu la ongenongeno asu.

1 TESALONIKA 3

1Okone lamʼakisu kumbeya mbikike ntu, shu takakani shati: Ndeka ololo shu ntshikala lʼAtena shame.3:1 Etsh. 17:15. 2Ku takatumi Timote, unyasu ukambi a Unyashungu lu lukumu lʼololo la Kristu, dia nyushikike, la dia nyukikitsha lu mbetawo kanyu. 3Untu takananaki dia asui ane; ne dia nyame mbeyaka nyati: Shu takasonama lu dikambu ne. 4Mete, lamʼakisu la nyu, shu takatanyutedi shati: Dieli la su dia nsuwa. Dikambu diako diakatshama uku weyanyu. 5Dia dikambu ne, ndu dimi, lamʼakimi kumbeya mbikike, lakatumi Timote dia mbeya mbetawo kanyu. Dimi lakuki woma nti: Kana uhimbanyi akanyuhimbi, ku ulimu asu akayala anyanya.

 

6Keli lamʼakakalula Timote uma le nyu,3:6 Etsh. 18:5. ndi akatela lukumu lʼololo la mbetawo kanyu la ngandji kanyu; ndu ad: Nyu nyatutuhoka, la nyakalangi ntena, uku akatalangi nyena. 7Anyasu, dia dikambu ne, mbakatakikitshama le nyu lu lunyangu ndu lu asui asu tshe uma lu mbetawo kanyu. 8Ne dia kakiane shu teko la lumu, naka nyu nyambushikimala le Khumadiondjo. 9Lusaka lakona lanyukelasu Unyashungu ne dia ongenongeno tshe weli la su le nyu la ntundu ka Unyashungu asu? 10Utshu la yanyi mbatutolombaka dia shu mena dundji dianyu, dia nduwanya akambu wutshikadi lu mbetawo kanyu.

 

 

11Unyashungu asu Shesu ndame, la Khumesu Jesu, watolombole lu mbuka kasu utsha le nyu. 12Khumadiondjo anyuhamia, ndu anyuludia la ngandji untu la unyandi untu la unyandi, ndu le antu tshe, uku anyulangasu. 13Okone ndi ashikike etema anyu waha la unungu lu akambu wʼekila la ntundu ka Unyashungu asu, Shesu, lu eyelu ka Khumesu Jesu la ekilami andi tshe.

1 TESALONIKA 4

1Anyasu, diui diasu dia ndjihelu ne shati: Tambunyosengasenga ndu tambunyokokomiya le Khumadiondjo Jesu shati: Uku akatanyetsha lama nkendakenda, ndu lama ngenyangenya Unyashungu, uku watunyokendakendaka, dia nyu ntetemala nkendakenda wuhu ako, 2ne dia nvu mbeyaka wuhu wʼokende wakatanyusha uma le Khumadiondjo Jesu. 3Ne dia dikambu ne, mbeli lulangu la Unyashungu, ekidiamelu kanyu: dia nyu ntuna munanyi. 4Dia untu lʼuntu mbeya ndjakimela lu akambu wʼekidiamelu la wa kenemo, 5aha la saki ka munanyi, uku asi wedja waheyi Unyashungu; 6dia untu tanganelaki, la tatshelaki unyandi kolo lu dikambu ne: ne dia Khumadiondjo eko osomboyishi lu akambu ane tshe, uku akatanyewula, ndu akatanyutela ntundu. 7Ne dia Unyashungu kunteta dia shu ntsha akambu wa mindu, keli dia shu ntsha akambu wʼekidiamelu. 8Osoku one latuna diui ne, hatuni diui diʼuntu, keli ambutuna diui dia Unyashungu, latunyushaka Nyuma kʼOlolo kandi.

 

9Keli lu dikambu dia mbukana la anyanyu ngandji, nyu hanyuhumbi untu nyufundela, ne dia nyu nyame nyaketshama uma le Unyashungu dia mbukana ngandji. 10Mete, nyu nyatutshelaka anyanyu wa la Makedoniya tshe wuhu ako. Anyasu, tambunyokokomiya dia nyu ntetemala mbukana ngandji; 11la dia nyu nyanga ndjala la ki, la dia untu lʼuntu ndjatshela akambu andi, la dia nkamba lʼanya andi, uku akatanyutela. 12Okone nyu nyayeya nkendakenda ololo lu ashu wʼantu wahatetawo, ndu hanyeya mpumba engo.

 

13Anyasu, shu nangaka nyu mbeya dikambu dia wane wakavu, diaha nyu ndjala la lunyangu uku akina, wane waha la elungamelu. 14Naka shu tambetawo shati: Jesu akavu ndu akulo, okone ndu wane wakavu kame la Jesu, Unyashungu ayuwaela kame la ndi. 15Shu tambunyutela dia diui dia Khumadiondjo shati Shu wane weli la lumu, tayutshikala edja ndu lamʼayuya Khumadiondjo, hatutsho la ntundu ka wane wakavu. 16Ne dia Khumadiondjo ndame ayuhulo uma lʼulungu, la dielu, la diui dia ondjelo a wuki, kame la pungi ka Unyashungu. Wane wakavu le Kristu, wayulo ntundu. 17Ku shu wane weli la lumu, wutshikadi, tayosama kame la wo lu wangi, la ntusangana la Khumadiondjo lʼulungu. Osoku tayuyala pundju le Khumadiondjo.4:17 1 Kor. 15:51-52. 18Okone nyukikitshanya la aui ane.

1 TESALONIKA 5

1Anyasu, lu dikambu dia tena la deku, nyu hanyuhumbi untu nyufundela. 2Ne dia nyame nyambushihudia ololo nyati: Lushi la Khumadiondjo layuya uku atuyakaka uvi lʼutshu.5:2 Mat. 24:43; Luk. 12:39; 2 Pet. 3:10. 3Lamʼata antu vati: Eko ki la lutui tshitshi, ku elanyelu ka shashimuya kayuya le wo, uku atuyakaka lono le umuntu leli la diemi; vo hawuhanda nduku yema. 4Keli nyu, anyasu, nyaha lu udjima, okone lushi lako halunyutana uku uvi. 5Ne dia nyu tshe nyeko ana wa usasi, la wa yanyi. Shu taha wa utshu, kuyanga wa udjima. 6Okone tatulalaki djo uku akina, keli tosene, tuyali ki. 7Ne dia wane walala djo, watulalaka lʼutshu; la wane watudjoka, watudjoka lʼutshu. 8Keli shu, lamʼesu wa yanyi, tuyali ki, tolote engawo ka mbetawo la ngandji; tulimbe dembo dia kusu la elungamelu ka panda.5:8 Is. 59:17; Ef. 6:13-17. 9Ne dia Unyashungu kuntosonola dia ntusuya la kele, keli dia ntusha panda le Khumesu Jesu Kristu, 10lakatuvwela, ne dia shu ndjala kame la ndi, lamʼesu lu nsena, kana lamʼesu lu djo. 11Okone nyukikitshanya, ndu nyudianya, uku watshanyu.

 

12Anyasu, tambunyosengasenga dia nyu mbeya wane watutshaka ulimu lʼatei anyu, weli ladiku dianyu le Khumadiondjo, watunyewulaka. 13Nyalemia otekoya la ngandji, dia ulimu watshawo. Nyuyali la ki, lʼatei anyu. 14Anyasu, tambunyosengasenga ntu shati: Nyewuli akanga wʼefutanu, nyukikitsha akanga wʼetema a weodu, nyusukeli wane weli weodu, nyuyali la memakana le antu tshe. 15Nyewo, untu tasomboyaki akina kolo kandi, keli nyuyelaki akambu wʼololo nshi tshe, untu la unyandi untu la unyandi. Nyutshelaki antu tshe ololo. 16Nyongenangenaki nshi tshe; 17nyutetemalaki nomba; 18nyukaki lusaka lu akambu tshe, ne dia osoku mbeli lulangu la Unyashungu le nyu le Kristu Jesu. 19Tanyudimaki Nyuma; 20tanyonyolaki aui wʼamvutshi. 21Nyedikaki akambu tshe: nyukimeli weli ololo; 22nyukimo wehu tshe wʼakambu wa kolo.

 

23Unyashungu wa ki ndameanyukidia tshe! Nyumu yanyu, la etema anyu ndu alimba anyu walamami ololo ndu aha la unungu lʼeyelu ka Khumesu Jesu Kristu! 24One lanyeta, eko la kolamelu, ndi ayutsha wuhu ako.

25Anyasu, nyutolombelaki.

 

26Nyusha anyasu tshe moyo la ononanelu wʼekila.

27Dimi lambunyutshibia le Khumadiondjo dia nyu mbalela anyasu tshe mukanda one.

 

28Ngandji ka mamba ka Khumesu Jesu Kristu, kayali la nyu!