ETSHA WA ATUMAMI

 Chapitres

 1. 3  -   2. 4  -   3. 6  -   4. 7  -   5. 8  -   6. 10  -   7. 10  -   8. 13  -   9. 15  -   10. 16  -   11. 18  -   12. 19  -   13. 20  -   14. 23  -   15. 24  -   16. 25  -   17. 27  -   18. 28  -   19. 30  -   20. 31  -   21. 33  -   22. 34  -   23. 36  -   24. 37  -   25. 38  -   26. 39  -   27. 41  -   28. 42

 

ETSHA WA ATUMAMI 1

Diui Dia Ntundu

1Teofilo li, buku dia ntundua1:1 Luk. 1:1-4. diakamafundi diku, ne dia akambu tshe wakatatela Jesu ntsha ndu mbetsha, 2edja ndu lushi lakandosama lʼulungu, lʼokongo a lamʼakandashili mbidjangela atumami wakandasonola uma le Nyuma kʼOlolo. 3Le waku wakandayaenya la lumu lʼokongo wʼasui andi uma lu ahimbelu efula. Ndi akenama le wo yediko ya nshi akumi anei. Ndi akataka akambu wa diulelu dia Unyashungu. 4Lamʼakandasangana kame la wo, ndi akakokomiya ati: Tanyumoki uma la Jerusalema, keli nyukungi daka dia Papa,1:4 Luk. 24:49. diakanyuki uma le mi. 5Ne dia Joani akabatizaka lʼashi, keli nyu nyayubatizama la Nyuma kʼOlolo,1:5 Mat. 3:11; Mak. 1:8; Luk. 3:16; Joa. 1:33. aha nshi efula umaka kakiane.

Jesu Utambela Utsha lʼUlungu

6Okone lamʼakawasangana kame, vo wakawumbula vati: Khumadiondjo, undi, we ayulwela Isariyele diulelu lu etena kakona? 7Ndi akâkaluya diui ati: Aha dikambu dianyu dia mbeya tena kana enonyi wakashikike Papa lu wulu andi. 8Keli nyu nyayulungula wulu lamʼayuya Nyuma kʼOlolo le nyu. Nyu nyayuyala emenyi ami lu Jerusalema, lu Judiya tshe la Samariya edja ndu lʼekumelu ka kete.1:8 Mat. 28:19; Mak. 16:15; Luk. 24:47-48. 9Lamʼakandashili mvuta aui aso, lamʼakawawendaka, ndi akosama utsha lʼulungu. Dingi diakulungula uma lu ashu awo.1:9 Mak. 16:19; Luk. 24:50-51. 10Lʼetena kakawendaka utsha lʼulungu tee, lamʼakandatatshokaka, nyulungi, apami ahendi wolotshi ahondo wa wema, wakemala lasuki la wo. 11Vo wakati vati: Nyu asi Ngalili, dikambu kuna diemalanyu, ku mendaka lʼulungu? Jesu one, lambosama lʼulungu uma le nyu, ayuya wuhu ako, uku awenanyu atatshu utsha lʼulungu.

Lu Luudu la Ladiku

12Ku vo wakakalula utsha la Jerusalema uma lʼukungu, wetawo vati: Ukungu wʼEweli, weli lasuki la Jerusalema, uku lokendo la lushi otoi lʼekila. 13Ku lamʼakawakalula leko, vo wakambela lu luudu la ladiku, lene akawadjaseka, Petero, Joani, Jakoba, Andere, Filipo, Tomasi, Baratolomayo, Mateu, Jakoba, onʼa Alafayo, Simona Kanga-Saki, Judasi, onʼa Jakoba.1:13 Mat. 10:2-1; Mak. 3:16-19; Luk. 6:14-16. 14Vo tshe wakakolamela nomba lʼutema otoi, kame la amantu, ndu la Mariya nyangu Jesu la anangu.

Ekumelu ka Judasi; Wambosonola Matiyasi

15Lu nshi sho, Petero akemala lʼatei a anyandi (waki ului wʼantu kame uku lukama la akumi ahendi), akati ati: 16Analingu, diaki la afundelu nshidiyama kakati Nyuma kʼOlolo ntundu lʼunyo wa Davidi, ne dia Judasi laki olombodi a waku wakandi Jesu, 17ne dia ndi akalema la su. Ndi akalungula etenyi kandi lʼulimu one. 18(Untu one akakundja ekambo la difutu dia kolo kandi. Ndi akako ekhukhumadi, akate kʼatei; esohi andi tshe wakatumbi. 19Dikambu so diakeyama le asi Jerusalema tshe. Okone vo waketi ekambo kako lʼoteketa awo vati: Aleledama, nkadimula ati: Ekambo ka Dikila.)1:19 Mat. 27:3-8. 20Ne dia ambufundama lu buku diʼEsambu ati: Edjaselu kandi kayali hwe; Untu tadjaseki loko,1:20 Esam. 69:25. La ukina akiti ulimu andi.1:20 Esam. 109:8.

21Okone uma lʼatei wʼapami wakakendakendaka la su tena tshe diakotoka ndu diakatumbaka Khumadiondjo Jesu lʼatei asu, 22umaka batiza ka Joani1:22 Mat. 3:16; Mak. 1:9; Luk. 3:21. edja ndu lushi lakandosama utsha lʼulungu,1:22 Mat. 16:19; Luk. 24:51. dieli la omotshi ndjala omenyi kame la su lu eulwelu kandi. 23Vo wakeme ahendi, Josefu, letawo vati: Barasaba, letawo ntu vati: Justo, la Matiyasi. 24Ku vo wakalombe, wakati vati: We Khumadiondjo, leya etema wʼantu tshe, lʼatei wʼantu ane ahendi, utenya one lakayasonodi, 25dia ndi nkita dihuli la ulimu one ndu utumami diakatshiki Judasi, ne dia ndi ntsho lu dihuli diandi. 26Vo wakawaukela uwali. Uwali akandi Matiyasi. Ku ndi akalema kame la atumami dikumi la otoi.

ETSHA WA ATUMAMI 2

Lushi la Pentekosta

1Lamʼakayala lushi la Pentekosta,2:1 Lew. 23:15-21; Euh. 16:9-11. vo tshe waki kame lu dihuli otoi. 2Luhelu lakayi shashimuya uma lʼulungu uku atopepaka lopepe la wulu, ku lakaluli lu luudu tshe lene akawadjashi. 3Nimi yakenama le wo, yakate uku nimi ya dja, ku yakahema ladiku diawo vo tshe untu lʼuntu. 4Vo tshe wakaluli la Nyuma kʼOlolo, wakatatela nteketa eteketa ekina uku akateketsha Nyuma.

5La Jerusalema kakaladi asi Juda, antu wʼololo, wʼuma lu wedja tshe wa lʼesi ulungu. 6Lamʼakawuki luhelu lako, ului wʼantu wakamote kame, wakambi ne dia untu lʼuntu akawauki wateketa oteketa andi. 7Vo tshe wakakashimo, wakambi wata vati: Wane tshe wateketa, waha asi Ngalili uka? 8Ku ukundi wukasu untu lʼuntu ateketa oteketa asu wa luto? 9Asi Paratiya, asi Mediya, asi Elame, la wane wudjashi lu Mesopotamiya, lu Judiya la Kapadokiya, lu Poto la Asiya, 10lu Furungiya la Pamufuliya, lu Edjibitu la beke dia Libiya dieli lasuki la Kurene, ndu angendangenda wʼuma lu Romo, ndu asi Juda la ambetawudi awo, 11ndu asi Kerete, la asi Arabiya, shu mbaukaka wata etsha a wulu wa Unyashungu lu eteketa asu. 12Ku vo tshe wakuki woma, wakakanana; wakambwana vati: Na wuhu wa dikambu ne? 13Keli akina wakole, wakati vati: Vo wambudjo wanu wʼuyuyu.

Daku Dia Petero

14Keli Petero akemala ndi la atumami dikumi la otoi, akedia diui diandi; akawatela ati: Nyu asi Juda, ndu nyu wane wudjashi lu Jerusalema, nyeyi dikambu ne, nyuhuke atui lu aui ami! 15Ne dia antu ane hawudjwi wanu uku akananyu, ne dia unya eki paka eshidi divwa etu. 16Keli one eko dikambu diakati umvutshi Joele ati: 17Unyashungu kata ati: Lu nshi yʼekumelu, Dimi layutshulwela antu Nyuma kami, Anʼanyu wʼapami la anʼanyu wʼamantu wayuta akambu wahatayi. Elongo anyu wʼapami wayena waenelo, Esumbi anyu wayena alo. 18Ee, lu nshi yako dimi layutshulwela Ekambi ami wʼapami la wʼamantu Nyuma kami. Ku vo wayuta akambu wahatayi. 19Dimi layenya akambu wa mamba ladiku dia ulungu, La tulimbitelu lʼesi ka kete; Dikila la dja, ndu lungi la edinga. 20Unya ayukadimo udjima, Ngondo ayukadimo dikila, La ntundu ka lushi la  Khumadiondjo latayi, Lushi lako la wuki ndu la mamba.

21Ku lamʼayuyala dikambu so, untu tshe layeta lukumbu la Khumadiondjo, ayushimbamela.2:21 Joe. 2:28-32.

22Nyu asi Isariyele, nyuki aui ane: Jesu yʼusi Nazareta, untu lakanyulimbitshiya Unyashungu uma lu etsha a wulu la akambu wa mamba, ndu tulimbitelu takatshi Unyashungu uma le ndi lʼatei anyu uku wenanyu, 23akakimwama uma lʼesangweyu kakasanguyama la yimba yakakani Unyashungu ntundu. Nyu nyakuhane lu utamba a mpeketanya, nyakudiaki lu anya wʼantu wa kolo.2:23 Mat. 27:35; Mak. 15:24; Luk. 23:33; Joa. 19:18. 24Keli Unyashungu akawulula,2:24 Mat. 28:5-6; Mak. 16:6; Luk. 24:5. akukelekula uma lu shoko ya nyoi, ne dia nyoi kumbeya mtukimela pundju. 25Ne dia Davidi akati lu dikambu diandi ati: Dimi lakenaka Khumadiondjo nshi tshe la ntundu kami, Ne dia ndi eko lu lunya lami la pami. Dimi ntukusutshasutshama. 26Okone utema ami aki la ongenongeno, La lulimi lami lakangenangena. Dikambu dikina, dimba diami diayu tshikala la elungamelu; 27Ne dia we hutshika lumu lami lʼUdimu a Pengandu, We hakimo laye lʼEkila dia ndi mponda. 28We akamenya mbuka ka lumu; We ayundudia la ongenongeno uma lʼelundji kaye.2:28 Esam. 16:8-11. 29Analingu, dimi mbeyaka nyuhunwela dikambu dia tshesu Davidi nti: Ndi akavu, akakhundama; diumbu diandi dieko lʼatei asu edja ndu elo. 30Ndi aid umvutshi; akeyi ati: Unyashungu akutshibela ati: Dimi layudjasha kanula motshi yʼuma lʼutema aye lu kiti kaye ka diulelu. 2:30 Esam. 132:11; 2 Sam. 7:12-13. 31Ndi akenyi dikambu ne ntundu, akati dia eulwelu ka Kristu, ndi kuntshikama lʼUdimu a Pengandu, dimba diandi komponda. 32Unyashungu akulula Jesu ako. Shu tshe teko emenyi wa dikambu diako. 33Okone ndi akambiyama la lunya la pami la Unyashungu, ndu akalungula daka dia Nyuma kʼOlolo uma le Shi; ndi akaditshulula uku wenanyu la wukanyu. 34Ne dia Davidi kumumbela lʼulungu, keli ndi ndame akati ati: Khumadiondjo akatela Khumemi ati: Udjase lu lunya lami la pami, 35Edja ndu lambete atunyi aye kihuna kʼekulu aye.2:35 Esam. 110:1.

36Okone khumbu tshe ka Isariyele weyi mete vati: Unyashungu aketi Jesu ako, lakanyadiaki lu utamba a mpeketanya ati: Khumadiondjo la Kristu.

Eyelelu ka Daku Dia Petero

37Lamʼakawuki diui so, vo wakanyangi wulu lʼetema awo, ku wakambula Petero la atumami akina vati: Anengesu, kayututsha na? 38Petero akawatela ati: Nyukadimuli etema, nyubatizami nyu tshe untu lʼuntu lu lukumbu la Jesu Kristu, ne dia edimanyelu ka kolo yanyu, ku nyu nyayulungula ushasha wa Nyuma kʼOlolo. 39Ne dia daka dieko le nyu, le anʼanyu, ndu wa lʼetali tshe, wayeta Khumadiondjo Unyashungu asu le ndi. 40Ndi akawatela aui akina efula, akalaki ati: Nyuyashimbeli uma lu lolonga la kolo lone! 41Ku wane waketawo diui diandi, wakabatizama. Lushi lako, antu uku nunu satu wakasanganyema kame la wo. 42Vo wakakolamela lu wetshelu wa atumami, ndu lu ekesanelu kawo, ndu lu diatwelu dia ma, ndu lu dombelo.

Embetawudi Wambutsha Uku Antu wʼEtoi Utema

43Woma akawandi vo tshe. Atumami wakatshi akambu wa mamba efula ndu tulimbitelu. 44Wane tshe waketawo, waki kame, ndu wakasanganya diango tshe kame.2:44 Etsh. 4:32-35. 45Vo wakasundja dikambo diawo, ndu diango diawo, wakadikahanya le antu tshe uku akahumbi untu lʼuntu. 46Vo wakakolamelaka mbukana lushi la lushi lu etemwelo, wakatolaka ma lu mvudu yawo. Vo wakalekaka ma diawo la ongenongeno ndu lʼetema wa lukahu. 47Vo wakandula Unyashungu, wakalemiama le antu tshe. Ku la lushi la lushi, Khumadiondjo akasanganyaka wane wakashimbamelaka kame la wo.

ETSHA WA ATUMAMI 3

Kanga Ekhusi Ambokono la Suku Dia Dimena

1Petero la Joani wakatatshokaka utsha lʼetemwelo lʼushidi wa dombelo, aki lʼeshidi esatu. 2Untu lakuto eldiusi aki leko. Antu wakawembaka, wakukitshaka la lushi la lushi lu suku dia etemwelo, diakawetaka vati: Dimena, dia ndi nombaka wane watotoka lʼetemwelo diango. 3Lamʼakandenyi Petero la Joani wayanga mboto lʼetemwelo, ndi akalombe engo. 4Petero akawendi tee, ndu Joani, wakati vati: Utendi. 5Ndi akawaukela, alungamela ati: Dimi layulungula engo. 6Keli Petero akati ati: Dimi kema la fesa kuyanga paunyi, keli layukusha keli la mi. Lu lukumbu la Jesu Kristu yʼusi Nazareta, okendekende. 7Ku ndi akukimeia lu lunya la pami, akawunyia. Kemʼedja, akaka andi la tokolongonyo tandi wakakikitala. 8Ndi akunela esadi, akemala, akatatela nkendakenda. Ndi akoto la wo lu etemwelo atakendakenda, atalimbolimbo, atandula Unyashungu. 9Antu tshe wakawenyi akendakenda, andula Unyashungu, 10wakaweyi vati: Ndʼone lakadjaseka alomba diango la Suku dia Dimena dia etemwelo. Vo wakatamanya mamba dia akambu wakawutshela.

Daku Dia Petero

11Lamʼakamamema kanga ekhusi Petero la Joani, antu tshe wakakungutanela lu mbalasa, ketawo vati: Ka Solomona, wakambi efula. 12Lamʼakenyi Petero dikambu so, ndi akambula antu ati: Nyu asi Isariyele, okoko wana wambanyu dia dikambu ne? Okoko wana watendanyu tee okone, uku shu mbokendjikendjisha la wulu asu, kuyanga la ololo asu? 13Unyashungu wa Abarahama, wa Isaka, wa Jakoba, Unyashungu a watshesu,3:13 Etum. 3:15. ambutumbula ukambi andi Jesu; lakanyakimo, lakanyanguna lu ashu wa Pilata, lamʼakandasanguya mbutshungula. 14Keli nyu nyakatuni One lʼEkila la Ololo, nyakalombe undjakanyi dia vo nyushandi.3:14 Mat. 27:15-23; Mak. 15:6-14; Luk. 23:13-23; Joa. 19:12-15. 15Nyu nyakadiaki Uwandji a lumu. Unyashungu akawulula uma lu nyoi. Shu teko emenyi wa dikambu diako. 16Uma lu mbetawo lukumbu landi, lukumbu landi lambukikitsha untu one lendanyu ndu leyanyu. Mete, mbetawo kʼuma le ndi kambuwusha wulu one tshe lu ashu anyu, nyu tshe.

17Anyasu, kakiane dimi mbeyaka nti: Nyu nyakatshi dikambu so ne dia nyu kudieya, uku akatshi ndu embuledi anyu. 18Okone Unyashungu akashidiya akambu wakandati lʼenyo wʼamvutshi tshe ati: Kristu kami ayusuwa. 19Okone nyukadimuli etema, nyusikiso dia kolo yanyu nyimanyiama, dia deku dia nyodia ndja uma la ntundu ka Khumadiondjo. 20Ndi ayunyutumela Kristu lakandanyosonwela, Jesu ndame. 21Dieli la ndi dia ntshikala fulungu, edja ndu etena ka ekalwelu kʼakambu tshe wakati Unyashu ngu lʼenyo wʼamvutshi andi wʼekila waki umaka etatelu. 22Mete kakati Mose ati: Khumadiondjo Unyashungu anyu ayunyia umvutshi uma lʼatei wʼanyanyu uku dimi. Kanyuwukeli lu akambu tshe wayundunyutela.3:22 Euh. 18:15, 18. 23Dikambu so diayuyala, dia untu tshe lahetawo umvutshi ako ndjakema lʼatei wʼantu.3:23 Euh. 18:19. 24Mete, amvutshi tshe wakateketaka, uma le Samuele la wane wa! i lʼokongo andi, wakati dia nshi nye. 25Tukanula mvutshi mbenyu, la ta sheki yakadjela Unyashungu watshenyu, lamʼakandatela Abarahama ati: Wedja tshe wa la kete wayotshokwama uma le tukanula taye.3:25 Etat. 22:18. 26Unyashungu akulula ukambi andi, akanyutumelandi ntundu dia nyotshokola lamʼayundunyunya uma lu kolo yanyu.

ETSHA WA ATUMAMI 4

Wambunda Petero la Joani

1Lamʼakawatelaka antu diui so, elombedi a waki la olombodi wʼetemwelo la Asaduke wakayi le wo. 2Vo waki la kele ne dia vo Waketshaka antu, wakatelaka antu dikambu dia eulwelu kʼuma lu nyoi, ne dia Jesu akulo. 3Vo wakawandi, wakawadji lu lukanu edja ndu la wedi a pindju, ne dia aki dikolo. 4Keli antu efula wakuki diui, waketawo. Apami waki uku nunu tanu.

Wambutsho la Petero la Joani la Ntundu kʼEmbadi

5La wedi a pindju, embuledi la dikumanyi la afundji wakasangana la Jerusalema. 6Anasi, olombedi a ladiku, aki laawo, ndu Kayifasi, ndu Joani, ndu Alesandere, ndu wa lu khumbu kʼolombedi a ladiku. 7Lamʼakawawaeme lʼatei awo, vo wakawambula vati: Uma lu wulu akona, kana lu lukumbu lakona lakanyatshi dikambu ne? 8Ku Petero, lakaluli la Nyuma kʼOlolo, akawatela ati: Nyu embuledi wa wudja la dikumanyi, 9elo shu tambumbwana dia dikambu diʼololo diutshamedi kanga dimba wodu, dia okone wakakono untu one. 10Nyu tshe nyeyi, ndu asi Isariyele tshe, nyati: Lu lukumbu la Jesu Kristu yʼusi Nazareta, lakanyadiaki lu utamba a mpeketanya, lakulula Unyashungu uma lu nyoi, ne dia lukumbu lone mbemadi untu one la ntundu kanyu. 11Ndi keli dive diakanyatuni, nyu ambiki a luudu, diakayala ote a tshuku.4:11 Esam. 118:22. 12Panda kema le untu ukina. Nduku lukumbu lukina la tshina diʼulungu lamboyama le antu, leya ntushimbela.

Wambuhimba Nshimba Petero la Joani

13Lamʼakawenyi dihunga dia Petero la Joani, lamʼakaweyi vati: Haweyi mukanda, antu kʼantu mbewo, vo wakambi, wakawaeyi vati: Waki la Jesu. 14Lamʼakawenyi untu lakakono emadi la wo, vo kumbeya mvuta nduku diui. 15Keli lamʼakawawatela vati: Nyumo uma lʼelumbwelu, wakambwana 16vati: Ukundi atshelasu antu ane? Mete, tshe watuyalaka la Jerusalema, wambena vati: Dikambu dia mamba dieyama, mbakatshi antu ane. Shu hateyi dianguna. 17Keli dia dikambu ne tadiudianganaki lʼatei wʼantu, tuwaneli shati: Tanyutelaki untu dikambu lu lukumbu lone pundju. 18Vo wakawaeti, wakakokomiya diaha vo mvuta nduku diui, kuyanga mbetsha antu lu lukumbu la Jesu. 19Keli Petero la Joani wakâkaluya diui vati: Naka eko ololo lu ashu a Unyashungu dia nyukela uleki mbukela Unyashungu, nyusambuli nyame. 20Ne dia shu hateyi ntsha dikambu dikina, paka mvuta akambu wakatenyi la wakatuki. 21Lamʼakawawanela ntu, vo wakakimo, komena lama mbasuya, ne dia antu. Ne dia antu tshe wakatumbulaka Unyashungu dia dikambu diakatshama. 22Ne dia untu lakawatshela dikambu so dia mamba dia nkono, aki la deku akumi anei.

Ambeki Wambusangana Dia Mandula la Nomba Unyashungu

23Lamʼakawakimo, vo wakakalula le anyawo, wakasanya akambu tshe wakawatela elombedi a waki la dikumanyi. 24Lamʼakawuki dikambu so, vo waketiia aui awo kame le Unyashungu, wata vati: Khumadiondjo, we kakatungi ulungu la kete, la ashi a waki, la diango tshe dieli loko.4:24 Etum. 20:11; Neh. 9:6; Esam. 146:6. 25We kakati uma le Nyuma kʼOlolo lʼunyo wa tshesu Davidi, ukambi aye, wati: Okoko wana wakafunela asi wedja kete? Okoko wana wakakani antu akambu wʼanyanya? 26Khumi ya dikanga ya la kete wakashikikala, Embuledi wakasangana, Dia mbidjela Khumadiondjo sheki, ndu le Ukitami andi wʼiso.4:26 Esam. 2:1-2.

27Mete, lʼusumba one, Herode4:27 Luk. 23:7-11. la Potiyo Pilata,4:27 Mat. 27:1-2; Mak. 15:1; Luk. 23:1; Joa. 18:28-29. la asi wedja, la asi Isariyele wakasangana dia mbidjela ukambi aye wʼekila Jesu, lakayakiti iso, sheki, 28la dia ntsha akambu wakasonola lunya laye la utema aye ntundu wati: Wayuya. 29Khumadiondjo, kakiane, ulungi aui awo wa dianelu. Usha ekambi aye dia vo mvuta diui la dihunga tshe, 30lamʼasimbulaye lunya laye dia nkonoya antu, tulimbitelu la akambu wa mamba watshami lu lukumbu la ukambi aye wʼekila Jesu. 31Lamʼakawalombe, dihuli diakawasangana diakasutshasutshama. Vo tshe wakaludiama la Nyuma kʼOlolo, wakati diui dia Unyashungu la dihunga.

Embetawudi Wambusanganya Diango Kame; Ushasha wa Baranaba

32Embetawudi waki la utema otoi. Nduku untu lakati ati: Diango dieli la mi, diami mbedio. Keli vo wakasanganya diango diawo tshe kame.4:32 Etsh. 2:44-45. 33Atumami waki la wulu efula wa mvutela antu dia eulwelu ka Khumadiondjo Jesu. Ngandji ka mamba kaki le wo tshe. 34Nduku untu lʼatei awo akahumbi engo. Ne dia wane waki la kambo kana mvudu, wakasundja, wakela diango diakawalungula. 35Vo wakadikitsha la ntundu ka atumami. Vo wakadikaha le untu lʼuntu, uku aki ehumba awo. 36Untu omotshi, lukumbu landi Josefu, lakole atumami ntu vati: Baranaba (kitshimudi ati: Ona lʼekikitshelu), usi Lewi kakindi, akuto la Kupiro. 37Ndi aki la ekambo, akakisundja, akela falanga, akayikitsha la ntundu kʼatumami.

ETSHA WA ATUMAMI 5

Ananiya la Safira

1Keli pami kemotshi, lukumbu landi Ananiya la wadendi Safira wakasundja etshi ka kete. 2Ndi akashe etenyi kʼushinga, ndu wadendi akeyi dikambu diako. Ndi akela etenyi kemotshi, akakikitsha la ntundu kʼatumami. 3Keli Petero akawutela ati: Ananiya, ukundi ambulula uhimbanyi lʼutema aye, dia we nkesa Nyuma kʼOlolo, la dia we mbishe etenyi kʼushinga wʼekambo? 4Lamʼaki ekambo lʼanya aye, to taki ekambo kaye uka? Lamʼakayakisundja, ushinga ato tawaki ushinga aye? Ukundi akayakani yimba dia dikambu ne lʼutema aye na? We hakeshi antu, Unyashungu kukeshiye. 5Lamʼakuki Ananiya aui aso, ndi akako, akavu. Woma wa mamba akandi antu tshe wakuki diui diako. 6Elongo wʼapami wakunela, wakawombe la ahondo, wakatumbi la ndi, wakatukhunde.

7Lamʼaketi unya uku tenyi satu, wadendi akoto. Ndi kumbeya dikambu diakatshama. 8Petero akawutela ati: Umvuteli kana nyu nyakasundjisha ekambo lʼushinga one. Ndi akati ati: Elu, lʼushinga uku. 9Keli Petero akawumbula ati: Ukundi akanyasangi lulimi dia mpimba Nyuma ka Khumadiondjo? Enda, wanya a waku wakakhunde umeye weko la suku, vo wayutumba la ye. 10Kemʼedja, ndi akako la ntundu kandi, akavu. Elongo wʼapami wakoto, wakutani ambuvo, wakatumbi la ndi, wakatukhunde la le umendi. 11Ekelizia tshe wakuki woma efula, ndu wane tshe wakuki akambu aso.

Embetawudi Wambuyala Efula

12Atumami wakatshi tulimbitelu efula la akambu wa mamba lʼatei wʼantu. Vo wakasangana lʼutema otoi lu mbalasa ka Solomona. 13Antu akina kundjala la dihunga dia mboto lʼului awo. Keli antu wakalemia. 14Embetawudi, elui wʼapami la wʼamantu, wakatafulanelaka le Khumadiondjo. 15Dia dikambu so, vo wakela akanga a hemo lʼesese, wakakitsha lu tangi la poi, vati: Lamʼayeta Petero, didjidji diandi diayukumba omotshi. 16Antu efula wʼuma lu esumba waki lasuki la Jerusalema wakasangana, wakela akanga a hemo, ndu wane wakahenyahenyama la edienge. Vo tshe wakakono.

Wambudja Atumami lu Lukanu Ntu; Wambutumba Wambusambisha Antu Ntu

17Keli olombedi a ladiku akunela, ndu waki la ndi tshe waki lu leke la Asaduke, wakaluli la kandjema. 18Vo wakandi atumami, wakawadji lu lukanu. 19Keli ondjelo wa Khumadiondjo akadihula kuki ya luudu la lukanu lʼutshu, akatundja; akawatela ati: 20Nyutshu, nyutemali lʼetemwelo, nyututeli antu aui tshe wa Lumu lone. 21Lamʼakawuki diui so, vo wakoto lu etemwelo la lokese, waketsha antu.

Keli olombedi a ladiku, la wane waki la ndi, wakasanganya embadi, ndu ului tshe wa dikumanyi diʼasi Isariyele, akatumi diui lu luudu la lukanu dia ndja la wo. 22Keli lamʼakayi asi mbalasa vo kumbatana lu luudu. Vo wakakalula, wakati vati: 23Takatanyi luudu la lukanu ludihami ololo, la alami wemadi lu asuku. Keli lamʼakatadihudi, shu hatutanyi nduku untu loko. 24Lamʼakuki olombodi wʼetemwelo la elombedi a waki aui aso, vo wakakanana efula dikambu diawo, vati: Ukundi ayuyala dikambu so na? 25Untu omotshi akayi akayuwatela ati: Enda, antu wakanyadji lu lukanu ane wemadi lʼetemwelo, wetsha antu. 26Ku olombodi la asi mbalasa wakawaela aha la khudu, ne dia vo wakuki antu woma vati: Watukutuka ave.

27Lamʼakawawaela, vo wakawaeme la ntundu kʼembadi. Ku olombedi a ladiku akawatela ati: 28Shu takanyokokomiya shati: Tanyetshaki antu lu lukumbu lone. Enda, nyu nyambukutsha Jerusalema la wetshelu anyu, nyu nyangaka ntukitshiya dikila dia untu one lʼete asu.5:28 Mat. 27:25. 29Keli Petero la atumami wakâkaluya diui vati: Dieli la su dia nkitanyia aui wa Unyashungu, aha aui wʼantu atu. 30Unyashungu a watshesu akulula Jesu lakanyahane lʼutamba, lakanyadiaki. 31Unyashungu akawedia la lunya landi la pami, dia ndi ndjala Olombodi la Ushimbedi, dia mbisha asi Isariyele ekadimwelu kʼetema la edimanyelu ka kolo. 32Shu teko emenyi wa akambu aso. Ndu Nyuma kʼOlolo, kakasha Unyashungu waku watukitanyiaka, eko omenyi.

Ngamaliyele Ambulaka Antu

33Keli lamʼakawuki diui so, vo wakuki kele ka wulu, wakalangi mbadiaka. 34Keli Ufarise omotshi, lukumbu landi Ngamaliyele, akemala lʼatei wʼembadi. Ndi aki umbetsha wʼelembe, akalemiama le antu tshe; akati ati: Watukutumba yema. 35Ku ndi akawatela ati: Nyu asi Isariyele, nyutukukana yimba dia ntshela antu ane dikambu. 36Ne dia nshi ya ntundu, Tudasi akunela, akati ati: Dimi untu a wuki. Apami uku kama nyei wakumamema, ku ndi akadiakema. Tshe wakuyelaka, wakahandjo. Dikambu diawo diakayala anyanya. 37Lʼokongo andi, Judasi yʼusi Ngalili akunela lu nshi ya nfunda kumbu yʼantu, akakutula antu amotshi lʼokongo andi, ndu ndi akavu. Waku tshe wakukitanyia, wakahandjo. 38Kakiane, dimi lambunyutela nti: Nyangani uma le antu ane, nyuwaete. Naka dikambu ne kana ulimu one weko uma le antu, ayuyala anyanya. 39Keli naka dio dieli uma le Unyashungu, nyu hanyeyi mbalembia: nyutukuyala uku wane walosha Unyashungu ta.

40Vo waketawo diui diandi. Lamʼakaweti atumami, vo wakakomola; wakakokomiya vati: lanyutaki diui lu lukumbu la Jesu, ku wakakimo. 41Ku vo wakamo uma la ntundu kʼembadi, watangenangena ne dia vo wakakuki dia monywama dia lukumbu loso. 42La lushi la lushi lu etemwelo ndu la wakawo, vo kumpeko mbetsha antu la nsambisha Lukumu lʼOlolo vati: Jesu keli Kristu.

ETSHA WA ATUMAMI 6

Wambosonola Alami a Diango Esambeli

1Lu nshi sho, lamʼakafuli ambeki, asi Juda wa lu leke laki asi Ngirika wakangunangunela asi Heberu, ne dia vo wakakale wadi waki edu awo lu ekahelu ka diango ka la lushi la lushi. 2Atumami dikumi la ahendi waketi ului wʼambeki, wakati vati: Hasungana dia shu nkimo diui dia Unyashungu la ntsha ulimu a mesa. 3Anyasu, nyuyangi apami esambeli akanga a lukumu lʼololo uma lʼatei anyu, wane wuludiami la Nyuma kʼOlolo la yimba, tuwakitsha ladiku dia dikambu ne. 4Keli shu tayutetemala lʼulimu wa diui la lʼulimu wa dombelo. 5Diui diako diakangenyangenya vo tshe. Vo wakasonola Stefano, lakaluli la mbetawo la Nyuma kʼOlolo, la Filipo, la Porokoro, Nikanora, Timona, Paramena, la Nikolao ka lʼAtioka, laketawo dikambu dia Judasi. 6Vo wakawaeme la ntundu ka atumami, wakalombe Unyashungu, wakawahe anya.

Elombedi Efula Wambuyala Ambeki

7Diui dia Unyashungu diakafuli. Ambeki wakafuli la Jerusalema otekoya. Ndu elombedi efula waketawo.

Wambunda Stefano

8Stefano, lakaluli la ngandji ka mamba la wulu, akatshaka akambu wa mamba a waki la tulimbitelu lʼatei wʼantu. 9Keli amotshi uma lʼetemwelo kakawetaka vati: KʼAtshungwami, ndu asi Kurene, ndu asi Alesanderiya, ndu asi Kilikiya la Asiya, wakunela, wakadji la Stefano tamu. 10Vo kumbeya mbuleka yimba; la Nyuma mbakandateketaka. 11Ku vo waketawuya apami amotshi dia vo mvuta vati: Takawuki atenga Mose la Unyashungu. 12Ku vo wakatombosha antu ndu dikumanyi ndu afundji, wakayi le ndi, wakawundi, wakatshu la ndi le embadi. 13Vo wakeme emenyi wa kashi, wakati vati: Untu one haheko monyola dihuli diʼekila ne la elembe. 14Ne dia takawuki ata ati: Jesu usi Nazareta ayulanya dihuli ne, ayukadimula ditshelu diaketsha Mose. 15Waku tshe wakadjashi lʼului, wakawendi tee, wakenyi elundji kandi uku ka ondjelo.

ETSHA WA ATUMAMI 7

Stefano Ambuyateketela

1Olombedi a ladiku akawumbula ati: Akambu aso mete kewo? 2Ku ndi akati ati: Analingu la wapapa, nyuhukami! Unyashungu a lutumbu akene le tshesu Abarahama, lamʼakindi la Mesopotamiya, ntundu ndi atadjase la Harana. 3Ndi akawutela ati: Umo uma lu kete yaye, uma lʼatei wʼasikaye, utshu lu kete yayumukenya.7:3 Etat. 12:1. 4Ku ndi akunela uma lu kete ya Kaladiya, akayudjase la Harana.7:4 Etat. 11:31. Lamʼakavu shi, Unyashungu akawunya uma leko, akayukitsha lu kete yudjashinyu kakiane.7:4 Etat. 12:4. 5Ndi kumbusha ukito leko, kuyanga hyuli ya nkitsha dikaka diandi. Lamʼakindi atuti ona, Unyashungu akulaki ati: Dimi layukusha kete nye, we la tukanula taye.7:5 Etat. 12:7; 13:15; 15:18; 17:8. 6Unyashungu akati ati: Tukanula taye tayuyala lu kete ya kana. Vo wayuwalunga fumbi, wayatshela kolo deku kama nyei. 7Unyashungu akati ati: Dimi layulumbuya wudja wayuwuyala fumbi yawo. Lʼokongo diku, vo wayutumba, wayontemola lu dihuli ne.7:7 Etat. 15:13-14. 8Ndi akawasha sheki yʼahamelu kʼuhekeli.7:8 Etat. 17:10-14. Okone Abarahama akuti Isaka,7:8 Etat. 21:2-4. akawahemia uhekeli lushi lʼenanei. Isaka akuti Jakoba.7:8 Etat. 25:26. Jakoba akuti watshesu dikumi la ahendi.7:8 Etat. 29:31-35:18. 9Watshesu wakuki Josefu kandjema,7:9 Etat. 37:11. wakusundja utsha le Edjibitu.7:9 Etat. 37:28. Unyashungu aki la ndi.7:9 Etat. 39:2, 21. 10Ndi akushimbela uma lʼasui andi tshe, akawusha kenemo la yimba la ntundu ka Farayo, khumʼekanga ka Edjibitu, ako lakawete umbuledi wʼEdjibitu ndu wa lu luudu landi tshe.7:10 Etat. 41:39-41. 11Ndjala ka kasha kakayala lu kete ya Edjibitu tshe la ya Kanana, ndu asui a waki. Watshesu komena mbu ya nde.7:11 Etat. 42:1-2. 12Keli lamʼakuki Jakoba ati: LʼEdjibitu keli mbu ya nde, ndi akatumi watshesu etena ka ntundu. 13Lʼetena ka hendi, Josefu akayashula le anangu.7:13 Etat. 45:1. Farayo akenyi wudja wa Josefu.7:13 Etat. 45:16. 14Josefu akatumi diui, aketi Jakoba, shi,7:14 Etat. 45:9-10, 17-18. ndu asikandi tshe, waki antu akumi esambeli la atanu.7:14 Etat. 46:27. 15Jakoba akatshu lʼEdjibitu.7:15 Etat. 46:1-7. Ndi akatuvo7:15 Etat. 49:33. ndi la watshesu. 16Vo wakatole la Shekeme, wakakhunde lu diumbu diakasumbi Abarahama la Shekeme la fesa, uma le ana wa Hamora.7:16 Etat. 23:3-16; 33:19; 50:7-13; Jas. 24:32.

17Keli lamʼakasukana etena ka nshidiya daka diakalaki Unyashungu Abarahama, antu wakutana, wakafulanela lu Edjibitu; 18edja ndu lamʼakayala khumʼekanga kekina lʼEdjibitu, laki kumbeya Josefu.7:18 Etum. 1:7-8. 19Ndi akakesaka wudja asu;7:19 Etum. 1:10-11. wakatshelaka watshesu kolo, dia vo mbikadjaka anʼawo wʼashashi dia vo mvo.7:19 Etum. 1:22. 20Lʼeleku kako, kakawuti Mose. Ndi aki dimena diahangone la ntundu ka Unyashungu. Wakulesha ngondo shatu lu luudu la shi.7:20 Etum. 2:2. 21Lamʼakawawukadja, ona umuntu a Farayo akotongona, akawudia uku onʼandi.7:21 Etum. 2:3-10. 22Waketsha Mose yimba tshe yʼasi Edjibitu. Ndi aki wulu lu aui andi la lu etsha andi.

23Keli lamʼakandayala deku akumi anei, kanyi yakayala lʼutema andi dia ntsho dia ntenda anangu, asi Isariyele. 24Lamʼakandenyi usikandi asuwa, ndi akukimanyia; akasombweya one lakasuwaka, akadiaki usi Edjibitu. 25Ndi akakani ati: Asikami wambeya vati: Unyashungu ambashimbela lʼanya ami, keli vo kumbeya osoku. 26La wedi a pindju, ndi akatumbela wane wakalokaka, akahimbi mbashimba; akati ati: Wayone, tuku untu la onangu mbenyu; okoko wana watshanelanyu kolo? 27Keli one lakatshela usikandi kolo, akusukula ati: Akakete umbuledi la umbadi asu na? 28We nangaka ndjakami, uku akayadiaki usi Edjibitu lui? 29Lamʼakuki Mose diui so, ndi akalawo; akayala uku ongendangenda lu kete ya Midiyana,7:29 Etum. 2:11-15. akatuta ana apami ahendi leko.7:29 Etum. 18:3—4.

30Lamʼakakuki deku akumi anei, ondjelo akene le ndi lʼusui wa shenga wa lʼUkungu wa Sinai, lu lumbi la dja lu dikumbu. 31Lamʼakenyi Mose dikambu so, ndi akambi dia enelo kako. Lamʼakandasukana dia ntenda, diui diakayi le ndi ati: 32Dimi Unyashungu a watsheye, Unyashungu wa Abarahama, la Isaka la Jakoba. Ku Mose akadidima, kundjala la dihunga dia dienda. 33Khumadiondjo akawutela ati: Unya sabata uma lʼekulu aye, ne dia dihuli diemadiye dieko kete yʼekila. 34Mete, dimi lambena asui wʼantu ami weli lʼEdjibitu. Dimi lambuka akhumu awo. Dimi lambuhulo dia ndjashimbela. Yaka lindu, nkutumi lʼEdjibitu.7:34 Etum. 3:1-10.

35Mose, one lakawatuni vati: Ambukete umbuledi la umbadi na? Unyashungu akutumi dia ndi ndjala umbuledi la ushimbedi. Ndi akatshi dikambu ne la lunya lʼondjelo wakene le ndi lu dikumbu. 36Untu ako akatumbi la wo, lamʼakandatshaka akambu wa mamba la tulimbitelu lʼEdjibitu,7:36 Etum. 7:3. edja ndu lʼUduwa a Tilili,7:36 Etum. 14:21. ndu lʼusui wa shenga deku akumi anei.7:36 Wal. 14:33. 37Mose ako lakatela asi Isariyele ati: Unyashungu ayunyutundjiya umvutshi uma lʼatei wʼanyanyu uku dimi.7:37 Euh. 8:15, 18. 38Ndʼako kaki la ekelizia lʼusui, la ondjelo wakateketaka la ndi lʼUkungu wa Sinai,7:38 Etum. 19:1—20:17; Euh. 5:1-33. ndu la watshesu. Ndʼako kakalungula elembe wa lumu dia ntusha. 39Watshesu kunkitanyia aui andi, keli wakusukula. Etema awo wakakalula lʼEdjibitu. 40Vo wakatela Arona vati: Ututsheli ditemolatemola dia ntsho la ntundu kasu. Ne dia shu hateyi okone wambuyala Mose one7:40 Etum. 32:1. lakatutundja uma lu kete yʼEdjibitu. 41Lu nshi sho, vo wakatshi efanelu kʼosongo a ngombe, wakalambula ekishi kako elambu. Vo wakangenangena dia elimu wʼanya awo.7:41 Etum. 32:2-6. 42Keli Unyashungu akawaediya okongo, akakimo dia vo nkambela ului a diango dia lʼulungu ulimu. Uku akafundama lu abuku ati: Nyu khumbu ka Isariyele, Lamʼakinyu lʼusui deku akumi anei, Nyakanambula nyama ya ludiaka la elambu ekina uka? 43Nyakembe etumbu ka Moloka, Ndu yoto ya etemolatemola Refana, Dikishi diakanyatshi dia ditemola; Dimi layunyotola lʼokongo a Babilona.7:43 Am. 5:25-27.

44Watshesu waki la etumbu ka omenyi lʼusui, uku akadjanga one lakateketaka la Mose ati: Ukitshi uku efanelu kakayenyi.7:44 Etum. 25:9, 40. 45Lʼetena kawo, watshesu ndu Jashua wakakiela7:45 Jas. 3:14-17. lamʼakawakumi lu kete yʼasi wedja, wane wakanya Unyashungu uma lu ashu a watshesu, edja ndu lu nshi ya Davidi, 46ako lakalemiama lu ashu wa Unyashungu, akalombe dia ndi ntanela Unyashungu a Jakoba edjaselu.7:46 2 Sam. 7:1-16; 1 Ek. 17:1-14. 47Keli Solomona akuhikela luudu.7:47 1 Khum. 6:1-38; 2 Ek. 3:1-17. 48Keli KhumʼUlungu hatudjaseka lu mvudu yakawahiki lʼanya, uku akati umvutshi ati: 49Ulungu eli kiti kami ka diulelu, Kete yeli kihuna kʼekulu ami. Wuhu akona wa luudu wayunyumpikela? mbata Khumadiondjo. Kana dihuli diakona diatumuyalaka? 50Undi, lunya lami kuntsha diango ne tshe uka?7:50 Is. 66:1-2.

51Nyu akanga wʼete wulu, nyeli la etema la atui wuhedia. Nyu nyatutunaka Nyuma kʼOlolo nshi tshe. Nyatutshaka uku akatshaka watshenyu.7:51 Is. 63:10. 52Umvutshi akona waki watshenyu kumbusuya? Vo wakadiaki wane wakati ntundu vati: One leli Ololo, ayuya. Kakiane nyu nyambuyala afungi la andjaki andi. 53Nyu nyakalungula elembe uku akandjanga ondjelo, keli nyu kumbekitanyia.

Wambuka Stefano Ave

54Lamʼakawuki aui aso, etema awo wakaluli too la ududu, wakayalumata lu dikambu diandi. 55Keli ndi akaluli la Nyuma kʼOlolo, akendi lʼulungu tee, akenyi lutumbu la Unyashungu, la Jesu emadi lu lunya la pami la Unyashungu. 56Ndi akati ati: Enda, dimi lambena ulungu ambudiho la Onʼa untu emadi lu lunya la pami la Unyashungu. 57Keli vo wakahangohango, wakadihi atui, wakukhunguswela kame. 58Vo wakutundja uma lʼusumba, wakatuwuka ave. Emenyi a dikambu so wakakitsha ahondo awo lʼekulu wa olongo a pami, lukumbu landi Saulu. 59Lamʼakawuki Stefano ave, ndi akalombe ati: Khumadiondjo Jesu, ulunguli lumu lami. 60Ku ndi akakhuse adui, akati la diui dia wulu ati: Khumadiondjo, takitshiyaki kolo kene. Lamʼakandati diui so, ndi akavu.

ETSHA WA ATUMAMI 8

1Saulu aketawo dia vo mbudiaka.

Wambusuya, Wambuhandjula Ekelizia

Lushi lako wakatatela nsuya ekelizia wa la Jerusalema wulu. Vo wakahandjwama lu beke tshe dia Judiya la Samariya, tshikima atumami mbakatshikala. 2Antu wʼololo mbakakhunde Stefano. Vo wakuleli efula. 3Keli Saulu akalanya Ekelizia. Ndi akoto lu luudu la luudu, akakutula apami la amantu, akawadji lu lukanu.8:3 Etsh. 22:4-5; 26:9-11.

4Wane wakadiangana, wakakindula lu dihuli la dihuli, watasambisha diui dia lukumu lʼololo. 5Filipo akatshu lʼusumba wa Samariya, akawatela dikambu dia Kristu. 6Lamʼakuki, ndu lamʼakenyi antu tulimbitelu takatshaka Filipo, vo wakahukama aui wakandati lʼutema otoi, 7ne dia edienge waki lʼetema wʼantu efula, wakatumbi, wakahangohango wulu. Akanga a dikhunye efula la waki tshumbi, wakakono. 8Ku ongenongeno efula akayala lʼusumba ako.

Simona Kanga Aloho

9Keli pami kemotshi, lukumbu landi Simona, lakatshaka akambu wʼaloho la ntundu lʼusumba ako, akambiaka asi Samariya; akayati ati: Untu a wuki kemi. 10Vo tshe wakuhukama, ndu wa tshitshe ndu wa waki, wakati vati: Untu one eko wulu a Unyashungu, wetawo vati: Wuki. 11Vo wakuhukama, ne dia ndi akawambia la aloho andi edja. 12Keli lamʼakawetawo Filipo lakasambishaka dia lukumu lʼololo la diulelu dia Unyashungu la lukumbu la Jesu Kristu, apami la amantu wakabatizama. 13Ndu Simona ndame aketawo. Ndi akabatizama, akatshikala la Filipo. Ndi akambi lamʼakandenyi tulimbitelu la akambu wa mamba a waki wakatshama.

14Lamʼakuki atumami waki la Jerusalema vati: Asi Samariya wambetawo diui dia Unyashungu, vo wakatumela Petero la Joani. 15Lamʼakawakumi, vo wakalombela dia vo nungula Nyuma kʼOlolo. 16Ne dia laso, ku Nyuma kʼOlolo atahulo le wo, tshikima batizama tshu lu lukumbu la Knumadiondjo Jesu. 17Petero la Joani wakawahe anya, ku vo wakalungula Nyuma kʼOlolo. 18Lamʼakenyi Simona ati: Ahelu kʼanya ka atumami kambuwasha Nyuma kʼOlolo, ndi akawasha falanga, 19ati: Nyumbisha ndu dimi wulu one, dia untu tshe layumahe anya, ku ndi nungula Nyuma kʼOlolo. 20Keli Petero akawutela ati: Fesa yaye yavu la ye! ne dia we ambukana wati: Dimi layulungula ushasha a Unyashungu la falanga. 21We kema la etenyi kana leke lu dikambu ne, ne dia utema aye kema ololo lu ashu a Unyashungu. 22Okone ukadimuli utema uma lu kolo kene, olombe Khumadiondjo, kana ndi ayukudimanyia tukanyi ta utema aye. 23Ne dia dimi lambena nti: We eko la losongu lʼululu ndu lu dimama diʼakambu wa kolo. 24Simona akûkaluya diui ati: Nyonombele Khumadiondjo, akambu wutshinyu tawuyalaki le mi.

Petero la Joani Wambusambisha lu Ngelu Efula ya la Samariya

25Lamʼakawashili menya la mvutela antu diui dia Khumadiondjo, vo wakakalula la Jerusalema; wakasambisha lu ngelu efula yʼasi Samariya lukumu lʼololo.

Filipo la Usi Etiyopiya

26Keli ondjelo wa Khumadiondjo akatela Filipo ati: Unela, utshu utsha lu leke la diku dia kushi, lu mbuka kuyi uma la Jerusalema utsha la Ngaza. Dihuli diako dieko shenga. 27Ndi akunela, akatshu. Nyulungi, kanga olenga, usi Etiyopiya, aki untu a wuki lʼokongo a Kandake, khumʼekanga ka umuntu kʼasi Etiyopiya. Ndi kaki ulami a diango diandi tshe, akayi la Jerusalema dia ndjotemola. 28Ndi akatakalulaka udjashi lu pusupusu, atali buku dia umvutshi Isaya. 29Nyuma akatela Filipo ati: Usukani, utuhumani la pusupusu keku. 30Filipo akasamanya utsha le ndi, akawuki ala buku diʼumvutshi Isaya. Ndi akawumbula ati: We nimbitelaka kene kalaye? 31Ku ndi akûkaluya diui ati: Ukundi eyami nimbitela, aha paka untu konombodi? Ndi akasengasenga Filipo ati: Mbela, yudjase la mi. 32Etenyi kʼafundelu kakandalaka, kaki okone ati: Ndi akalombwama utsha lu dihuli diatuwudiakaka nyama uku okoko; Uku ona okoko ambolembohala la ntundu kʼuhimbudi a diosa. Okone ndi kunfula unyo andi. 33Uma lʼekitshakitshamelu kandi, wakanya elumbwelu kandi. Akona ayokondwela wa lu lolonga landi? Ne dia wakokosola lumu uma la kete.8:33 Is. 53:7-8.

34Kanga olenga akatela Filipo ati: Dimi lambukolomba nti: Umvuteli dia umvutshi akona watandi? Ndame, kana untu ukina? 35Filipo akafula unyo, akatatela uma lʼafundelu kako, akusambisha lukumu lʼololo la Jesu. 36Lamʼakawatatshokaka lu mbuka, kanga olenga akati ati: Enda, tuku ashi ane! Kakona kanshimba dimi mbatizama? 37Filipo akati ati:8:37 “8:37” nfundamaka paka la tshina, aha lʼatei, lu abuku amotshi. Naka we ambetawo lʼutema aye tshe, keti we ayubatizama. Ndi akûkaluya diui ati: Dimi lambetawo nti: Jesu Kristu eko Onʼa Unyashungu. 38Ndi akati ati: Eme pusupusu. Vo ahendi wakoto lu ashi, ndu Filipo ndu kanga olenga. Ndi akubatiza. 39Lamʼakawatumbi uma lʼashi, Nyuma ka Khumadiondjo akatole Filipo amʼakina. Kanga olenga kumbena ntu, ne dia ndi akatshu, atangenangena. 40Keli Filipo akenama la Azoto. Ndi aketi lu esumba tshe, edja ndu lamʼakandakumi la Kayisariya, atasambisha lukumu lʼololo.

ETSHA WA ATUMAMI 9

Ekadimwelu kʼUtema a Saulu

(Etsh. 22:6-16; 26:12-18)

1Saulu akanela ambeki wa Khumadiondjo dia mbadiaka. Ndi akatshu le olombedi a ladiku; 2akolombe mikanda wa ntsho lu temwelo dia la Damaseke, dia ndi mbela wayundutana wa lu Mbuka keso, kana apami kana amantu lu ekodi, uya la Jerusalema. 3Lamʼakandatatshokaka, ndi akakumi lasuki la Damaseke. Usasi wʼuma lʼulungu akohetela shashimuya. 4Ndi akako la kete. Ndi akuki diui diawutela ati: Saulu, Saulu, okoko wana wansuyaye? 5Ndi akati ati: Khumadiondjo, we na? Ndi akati ati: Dimi Jesu, kasuyaye. 6Keli, unela, utshu utsha lʼusumba, wayutukutela dikambu diahumbaye ntsha. 7Antu wakatatshokaka la ndi wakemala ki. Vo wakuki diui, keli komena untu. 8Saulu akunela uma la kete. Lamʼakadiho ashu andi, ndi komena nduku engo. Vo wakukimela lu lunya, wakolombola edja ndu la Damaseke. 9Akayala nshi shatu, ndi komena, konde, kono.

Ananiya Ambutsho la Ntenda Saulu

10La Damaseke kaki umbeki, lukumbu landi Ananiya. Khumadiondjo akaweti lʼenelo ati: Ananiya! Ndi aketawo ati: Khumadiondjo, dimʼone. 11Khumadiondjo akawutela ati: Unela, utshu lʼosese wetawo vati: wʼUsimbwi, lu luudu la Judasi, utumbuli untu, lukumbu landi Saulu, usi Taraso kendi. Ulungi, ndi eko lu nomba. 12Ndu Saulu akenyi Ananiya ayoto, awahe anya dia ndi mena. 13Keli Ananiya akâkaluya diui ati: Khumadiondjo, antu efula wambumvutela dia pami keso, ne dia akambu wa kolo efula wakandatshela ekilami aye wa la Jerusalema. 14Ndu lane, ndi la wulu uma le elombedi a waki dia nkeleka tshe watetaka lukumbu laye. 15Keli Khumadiondjo akawutela ati: Tshoka, ne dia ndi eko usi ulimu lambumusonola, dia ndi ntsho la lukumbu lami la ntundu kʼasi wedja la ka khumi ya dikanga, ndu le asi Isariyele, 16ne dia dimi layuwenya akambu efula wayundusuwa dia lukumbu lami. 17Ananiya akatshu, akoto lu luudu. Ndi akawahe anya, akati ati: Onalingu Saulu, Khumadiondjo Jesu ndame, lakene le ye lu mbuka lamʼakayayakaka, kuntumi dia we mena, la dia we ndudiama la Nyuma kʼOlolo. 18Kemʼedja, diango uku kaya diakamo uma lu ashu andi, ku ndi akenyi. Ndi akunela, akabatizama. 19Ndi akali, akakikitala.

Saulu Ambusambisha la Damaseke

Saulu akatshikala la ambeki waki la Damaseke nshi motshi. 20Kemʼedja ndi akasambisha dikambu dia Jesu lu temwelo ati: Onʼa Unyashungu kendi. 21Waku tshe wakuki diui diandi wakambi, wata vati: Aha lakamani wane waketaka lukumbu lone la Jerusalema one? Ndi ambuya lindu dia dikambu diako, dia ndi mbatola wukelekami la ntundu kʼelombedi a waki. 22Keli Saulu akaluli la wulu, akatewadia asi Juda wakaladi la Damaseke; akawatela hwe ati: Jesu keli Kristu.

Ambuhanda Uma le Asi Juda

23Lamʼaketi nshi efula, asi Juda wakadji sheki ya ndjaka Saulu. 24Keli Saulu akeyi sheki yawo. Vo wakalami asuku la yanyi ndu lʼutshu dia vo mbudiaka. 25Keli ambeki andi wakawose lʼutshu, wakawomoya lu ushu a lukumbu, wakuhuluya lu saka.9:25 2 Kor. 11:32-33.

Anyandi Wambutuma Utsha la Taraso

26Lamʼakakumi Saulu la Jerusalema, ndi akayangi mbekesanela la ambeki. Vo tshe wakawuki woma, kumbetawo vati: Umbeki mbendi. 27Keli Baranaba akawose, akatshu la ndi le atumami, akawatela uku akene Khumadiondjo le ndi lu mbuka, la uku akateketa Khumadiondjo la ndi; ndu uku akandasambisha la dihunga lu lukumbu la Jesu la Damaseke. 28Lamʼakindi la Jerusalema, ndi akotoka, akatumbaka la wo. 29Ndi akasambishaka la dihunga lu lukumbu la Khumadiondjo. Ndi akateketa la asi Juda wa lu leke la Ngirika, akadji la wo tamu. Keli vo wakayangaka mbudiaka. 30Lamʼakeyi anyandi dikambu so, vo wakutshindela utsha la Kayisariya, wakutumi utsha la Taraso.

31Okone ekelizia wa la Judiya tshe la wa la Nealili ndu wa la Samariya waki ki, wakuli; wakakendakendaka la woma a Khumadiondjo la lu ekikitshelu ka Nyuma kʼOlolo, wakafuli.

Petero Ambokonoya Ayinea

32Lamʼakakindula Petero lu beke tshe, ndi akayi ndu la ekilami wa la Luda. 33Ndi akenyi untu, lukumbu landi Ayinea, leko, laketama lu tangi deku enanei, ne dia ndi aki la ekhunye. 34Petero akawutela ati: Ayinea, Jesu Kristu ambukokonoya. Eto, olongosole tangi kaye. Kemʼedja ndi aketo. 35Asi Luda tshe la asi Sharona wakawenyi, wakakadimo le Khumadiondjo.

Ambulula Doroka Uma lu Nyoi

36La Jopa kaki umbeki a umuntu, lukumbu landi Tabita, nkadimula ati: Doroka, kana Lufumbo. Umuntu ako akatshaka akambu wʼololo efula ndu akambu wa ketshi. 37Lu nshi sho, ndi akuki kandji, akavu. Lamʼakawashidiya mbotsha, vo wakawetamia lu luudu la ladiku. 38Luda aki lasuki la Jopa. Ku lamʼakuki ambeki vati: Petero eko leko, vo wakatumi apami ahendi dia ntosengasenga vati: Tutshimbatshimbaki dia ndja le su. 39Petero akunela, akatshu la wo. Lamʼakandakumi, vo wakatshu la ndi lu luudu lako la ladiku. Wadi waki edu tshe wakemala la suki la ndi, walela; wakawenya akoti la ahondo wakatshi Doroka lamʼakindi la wo. 40Keli Petero akatundja tshe, akakhuse adui, akalombe, akingiso le udu; akati ati: Tabita, eto. Ku ndi akadihula ashu. Lamʼakandenyi Petero, ndi akasungukala. 41Petero akoleke lunya, akawunyia. Ndi aketi ekilami la wadi waki edu, akawaenyandi la lumu. 42Dikambu diako diakeyama la Jopa tshe. Antu efula waketawo Khumadiondjo. 43Petero aketama nshi kambi la Jopa laka Simona, olongosodi a dikuhu.

ETSHA WA ATUMAMI 10

Koneliyo, Olombodi wʼAlimbi

1La Kayisariya kaki pami kemotshi, lukumbu landi Koneliyo, laki olombodi wʼului wʼalimbi wakawetaka vati: Wʼasi Italiya. 2Ndi aki untu ololo, akukaka Unyashungu woma, ndi la wa lu luudu landi tshe. Ndi akashaka antu diango efula la ketshi, akalombaka Unyashungu nshi tshe. 3Lamʼaki unya lʼeshidi esatu la dikolo, ondjelo wa Unyashungu akawotwela; akaweti lʼenelo ati: Koneliyo! 4Ndi akawendi tee, akuki woma; akati ati: Khumadiondjo, nemʼeku? Ondjelo akawutela ati: Dombelo diaye la diango diatuyushanaka la ketshi diambumbela uku euhwelu lu ashu wa Unyashungu. 5Kakiane, utumi apami la Jopa, watuyi la Simona, lukumbu landi lukina Petero. 6Laka Simona, olongosodi a dikuhu, kuhangindi. Luudu landi leko lʼumamu wʼashi a waki. 7Lamʼakamo ondjelo wakateketaka la ndi, ndi aketi ekambi andi ehendi, ndu dimbi diʼololo, diakayalaka lasuki la ndi nshi tshe. 8Lamʼakandawatela akambu aso tshe, ndi akatumi utsha la Jopa.

Petero Ambena Enelo

9La wedi a pindju, vo wakatshu lu mbuka. Lamʼakawasukana lʼusumba, Petero akambela ladiku dia luudu dia ntolomba. Unya aki lʼatei wʼote. 10Ndi akuki ndjala, akalangi nde. Keli lamʼakawalongosolaka ma, ndi akako la yimbatshimba. 11Ndi akenyi ulungu ambudiho, la engo uku dihondo dia wuki diayahulo uya la kete, diukimamedi lu atshuku adio anei. 12Loko kaki wehu tshe wa nyama yʼekulu enei, la diango diayakutula la kete la fudu ya lʼulungu. 13Ndi akuki diui ati: Petero, eto! udiaki, uli. 14Keli Petero akati ati: Kema, Khumadiondjo, dimi halatolekaka engo kʼengo, ndu keli mindu. 15Diui diakayi le ndi etena ka hendi ati: Tetaki kene kakedia Unyashungu wati: Engo kʼengo. 16Wakatshi osoku tena satu. Kemʼedja, engo kako kakâkaluyama utsha lʼulungu.

Antu Wambuya le Petero Uma le Koneliyo

17Lamʼakakanana Petero lʼutema ati: Ukundi eli enelo kenyimi keku? Ku apami wakatumi Koneliyo, lamʼakawashili mumbula luudu la Simona, wakemala la suku; 18waketi, wakambula kana Simona letawo vati: Petero mpanga loko. 19Lamʼakakanaka Petero dia enelo keso, Nyuma akawutela ati: Enda, apami asatu wakuyanga. 20Keli unela, uhulo lʼesi. Utshu la wo, tukandakandaki, ne dia dimi lambatuma. 21Petero akahulo le apami ako, akati ati: Enda, dimi layanganyu one. Dikambu diakona diuyenyu? 22Vo wakati vati: Koneliyo, olombodi wʼalimbi, untu ololo, luka Unyashungu woma, lukumu landi leko ololo lu wudja tshe wʼasi Juda, ondjelo wʼekila akawutela dia nketa lakandi, la dia mbuka aui aye. 23Okone Petero akawaeti, akahangia.

Petero Ambukalula la Wo

La wedi a pindju, Petero akunela, akatshu la wo; ndu anyawo motshi uma la Jopa wakutshindela. 24La wedi a pindju, vo wakakumi la Kayisariya. Koneliyo akalungula, aketi wa lu khumbu kandi tshe la engenyi andi. 25Lamʼakuto Petero, Koneliyo akulungula, akayakosha lʼekulu andi, akotemola. 26Keli Petero akawunyiya ati: Unela, ndu dimi keli untu. 27Lamʼakandateketaka la ndi, ndi akoto, akatani antu efula loko. 28Ndi akawatela ati: Nyu mbeyaka nyati: Dikambu dia usi Juda mbekesanela la usi wudja ukina, kana mboto lu luudu landi, eko ekila. Keli Unyashungu ambomenya ati: Tetaki nduku untu wati: Untu kʼuntu, kana kanga mindu. 29Uma lu dikambu so, mbuyemi. Lamʼakawambetshi, dimi konseka. Okone lambunyumbula diumbetshinyu.

30Koneliyo akati ati: Nshi nyei yambeta, lamʼaki unya uku lʼushidi one, lamʼakamalombaka lu eshidi esatu lu luudu lami, nyulungi, pami kemotshi akemala la ntundu kami olotshi ahondo wa ngaingai. 31Ndi akati ati: Koneliyo, Unyashungu ambuka dombelo diaye. Ndi mbuhoka diango diatuyushanyaka la ketshi. 32Okone utumi diui la Jopa dia nteta Simona, letawo vati: Petero. Laka Simona, olongosodi a dikuhu, kuhangindi, lʼumamu wʼashi a wuki. 33Okone mbakamakutumela diui esadi. We akatshi ololo, ne dia we ambuya. Shu tshe teko lindu kakiane lu ashu wa Unyashungu, dia mbuka akambu tshe wakakutela Khumadiondjo.

34Petero akafula unyo, akati ati: Mete, dimi lambeya nti: Unyashungu kema la shonodi yʼantu.10:34 Euh. 10:17. 35Keli ndi mbetawoka wa lu wedja tshe, wane wawuka woma la watsha akambu wʼololo. 36Ndi kakatumela asi Isariyele diui, kakasambisha lukumu lʼololo la ki uma le Jesu Kristu (ndi keli uwandji wa kete tshe). 37Nyame mbeyaka diui ne, diakadiangana la Judiya tshe, akatatela uma la Ngalili, lʼokongo a batiza kakasambishaka Joani, 38dia Jesu yʼusi Nazareta, uku akuludia Unyashungu la Nyuma kʼOlolo ndu la wulu. Ndi akakindulaka atatshi akambu wʼololo, atakonoya wane tshe wakasuyamaka le uhimbanyi, ne dia Unyashungu aki la ndi. 39Shu teko emenyi wakambu tshe wakandatshi lu leke lʼasi Juda, ndu la Jerusalema. Vo wakudiaki, wakuhane lʼutamba. 40Unyashungu akawulula lushi la satu; aketawo dia ndi menama, 41aha le antu tshe, keli paka le su, shu wane wakasonwama le Unyashungu, uku emenyi; shu wane wakalekaka la ndi, wakanokaka la ndi lam akandulo uma lu nyoi. 42Ndi akatokokomiya ati: Nyusambisha antu, nyuwaenya nyati: Ndi akasonwama le Unyashungu, dia ndjala umbuledi a wasena la wakavu. 43Amvutshi tshe wambuwuta vati: Untu tshe lawetawo, ayulungula edimanyelu ka kolo lu lukumbu landi.

Ambuki wʼAui Andi Wambulungula Nyuma kʼOlolo

44Lamʼakati Petero aui aso, Nyuma kʼOlolo akahulwela tshe wakuki diui. 45Wane waketawo, waki ambahemi wa ehekeli, wakayi le Petero, wakambi, ne dia wakatshulwela ndu asi wedja ushasha a Nyuma kʼOlolo. 46Ne dia vo wakawauki wateketa lu eteketa ekina; watumbula Unyashungu. Ku Petero akâkaluya diui ati; 47Untu akona aki la wulu wa nshimba wane wakalungula Nyuma kʼOlolo uku shu, dia mbatizama lʼashi? 48Ndi akati ati: Wabatizami lu lukumbu la Jesu Kristu. Ku vo wakôlombe dia ndi ntshikala la wo nshi motshi.

ETSHA WA ATUMAMI 11

Petero Ambuyateketela Dia Akambu Wakandatshi

1Atumami la anyawo waki la Judiya wakuki vati: Ndu asi wedja wambulungula diui dia Unyashungu. 2Lamʼakayi Petero la Jerusalema, ambahemi wʼehekeli wakadji la ndi tamu, 3wata vati: Okoko wana wakayatshu le wane wahatahema ehekeli, ndu wakayali la wo ma? 4Keli Petero akatatela mbatela dikambu diako ati: 5Dimi laki lʼusumba wa Jopa lalomba. Lamʼakimi la yimbatshimba, dimi lakenyi enelo: engo kakahulo uku dihondo uma lʼulungu, diukimamedi lu atshuku anei; diakampulwela. 6Lamʼakamadiendi tee, dimi lakadilimbitela, lakenyi nyama yʼekulu enei ya la kete, la nyama ya lʼukunda, la diango diayakutula, la fudu ya lʼulungu. 7Dimi lakuki ndu diui diamvutela ati: Petero, eto! udiaki, uli. 8Keli dimi lakati nti: Kema, Khumadiondjo, nduku engo kʼengo, kana ka mindu, kakoto lʼunyo ami. 9Keli diui diakayi uma lʼulungu etena ka hendi ati: Tetaki kene kakedia Unyashungu wati: Engo kʼengo. 10Dikambu so diakatshama tena satu. Diango tshe diakakutwama utsha lʼulungu ntu. 11Nyulungi, kemʼedja, apami wakawatumi le mi uma la Kayisariya wakemala la ntundu ka luudu lone akisu. 12Nyuma akamvutela ati: Tshoka la wo, tuyalaki la shonodi. Ndu anyasu ane asamalu wakatshindela; takoto lu luudu la pami kako. 13Ndi akatutela uku ak ndenyi ondjelo emadi lu luudu landi, ndu uku akandawutela ati: Utumi antu la Jopa watuyi la Simona, lukumbu landi lukina Petero. 14Ndi ayukutela aui wa nkushimbela, we la wa lu luudu laye tshe. 15Lamʼakamatatela nteketa, Nyuma kʼOlolo akahulwela, uku akandatuhulwela ma lʼetatelu. 16Ku dimi lakuho diui dia Khumadiondjo, diakandati ati: Mete, Joani akabatizaka lʼashi, keli nyu nyayubatizama la Nyuma kʼOlolo.11:16 Etsh. 1:5. 17Okone naka Unyashungu akawasha ushasha uku akandatusha, lamʼakatetawo Khumadiondjo Jesu Kristu, dimi laki na, dia nsemanela la Unyashungu? 18Lamʼakawuki akambu aso, vo wakalembohala, wakatumbula Unyashungu; wakati vati: Unyashungu ambusha ndu asi wedja ekadimwelu kʼetema utsha lu lumu.

Wakatatela Mbeta Ambeki Vati: “Asika Kristu”, lʼAtiyoka

19Wane wakahandjo ne dia asui wakayala dia nyoi ka Stefano,11:19 Etsh. 8:1-4. wakatshu la Fonikiya la Kupiro la Atiyoka. Vo kumvutela nduku untu diui, tshikima asi Juda atu. 20Keli amotshi awo waki asi Kupiro la asi Kurene wakayi lʼAtiyoka, wakasambisha ndu asi Ngirika lukumu lʼololo la Knumadiondjo Jesu. 21Lunya la Khumadiondjo laki la wo. Antu efula waketawo, wakakadimo le Khumadiondjo. 22Lukumu la dikambu diawo lakakumi lʼatui wʼekelizia waki la Jerusalema, ku vo wakatumi Baranaba pulu ndu lʼAtiyoka. 23Lamʼakandakumi, lamʼakandenyi ngandji ka mamba ka Unyashungu, ndi akangenangena, akakokomiya vo tshe ati: Nyumamemi Khumadiondjo la esangwelu lʼetema. 24Ne dia ndi aki untu ololo, lakaluli la Nyuma kʼOlolo ndu la mbetawo, ku antu efula wakasanganyema le Khumadiondjo. 25Okone Baranaba akatshu la Taraso dia ntuyanga Saulu. 26Lamʼakandatuwushula, ndi akayi la ndi lʼAtiyoka. Vo wakasanganaka la ekelizia utundu wʼeleku. Vo waketsha antu efula, wakatatela mbeta ambeki vati: Asika Kristu lu Atiyoka.

27Lu nshi sho, amvutshi amotshi wʼuma la Jerusalema wakayi lʼAtiyoka. 28Omotshi, lukumbu landi Angabo,11:28 Etsh. 21:10. akemala. Nyuma akawenya ati: Ndjala ka kasha ka wulu kayuyala lu kete tshe. Mete, to kakayi lu nshi ya Kolodiyo. 29Ambeki tshe, untu la untu uku wulu andi, wakasanguya dia ntumela anyawo wakaladi la Judiya diango dia mbakimanyia. 30Vo wakatshi okone: wakatumela dikumanyi diango lʼanya wa Baranaba la Saulu.

ETSHA WA ATUMAMI 12

Herode Ambudiaka Jakoba, Ambudja Petero lu Lukanu, Ondjelo Ambutshungula Petero

1Lu nshi sho, khumʼekanga Herode akandi asi Ekelizia amotshi dia mbasuya. 2Ndi akadiaki Jakoba, onangu Joani, la yombo. 3Lamʼakandenyi ati: Dikambu ne diambongenyangenya asi Juda, ndi akandi ndu Petero. Nshi yako, yaki nshi ya Ma Diaha la Edya. 4Lamʼakandawundi, ndi akukimo le enongo enei wʼalimbi dia mbulama. Ndi akalangi dia mbela le antu lʼokongo wʼElekanelu.12:4 Etum. 12:1-27. 5Dia dikambu so, mbakalamema Petero lu lukanu, keli ekelizia kumpeko mbolombela Unyashungu.

6Lʼutshu a lushi lakalangi Herode ntundja Petero, Petero aketami lʼatei wʼalimbi ahendi, ukelekami molola ehendi. La suku kaki alami wakalamaka luudu la lukanu. 7Nyulungi, ondjelo wa Khumadiondjo akemala la le ndi, ku usasi akahete lu luudu. Ondjelo akahumela Petero lu luhandju, akawemula; akati ati: Unela esadi! Ku molola wakamo uma lu anya. 8Ondjelo akawutela ati: Olote uya, udji tupapa. Ndi akatshi osoku. Ku ndi akawutela ati: Udji koti diaye, undjeli. 9Ndi akatumbi, akuyeli. Ndi kumbeya ati: Kene katsha ondjelo mete keto; keli ndi akakani ati: Enelo kenami. 10Lamʼakawalekana elamelu ka ntundu la ka hendi, vo wakakumi lu lukuki la luwulu ladihulawo utsha lʼusumba; lo lakadiho. Ku vo wakatumbi, waketi lʼosese wame. Kemʼedja, ondjelo akutshiki. 11Lamʼakeyi Petero dikambu diako ololo, ndi akati ati: Kakiane, dimi lambeya mete nti: Khumadiondjo ambutuma ondjelo andi, ambuntshungula uma lʼanya wa Herode.

12Lamʼakandatakanaka yimba dia dikambu diako, ndi akakumi lu luudu la Mariya, nyangu Joani, laki la lukumbu landi lukina Mako. Loko kakasangana antu efula wakalombaka. 13Lamʼakandakokola lu lukuki, ukambi a umuntu, lukumbu landi Roda, akatshu, aketawo. 14Lamʼakanduki diui dia Petero, ndi kundjihula lukuki ne dia ongenongeno, keli akalawo utsha lu luudu; akati ati: Petero one emadi la suku! 15Vo wakawutela vati: We ambudjo. Keli ndi akakokomiya ati: Mete. Vo wakati vati: Ondjelo andi oso! 16Keli Petero akatetemala nkokola. Lamʼakawadihula, vo wakawenyi, wakambi. 17Keli ndi akahahiya lunya dia vo nembohala. Ndi akawatela uku akutshungudi Khumadiondjo uma lu luudu la lukanu. Ndi akati ati: Nyuteli Jakoba la anyasu akambu ane. Ku ndi akamo, akatshu lu dihuli dikina.

18La pindju, alimbi wakahalaka dia mbeya wuhu wambuyala Petero. 19Herode akuyangi, keli ndi kumbena. Ndi akambula alami, akati dia mbadiaka. Ku ndi akamo uma la Judiya, akatshu utsha la Kayisariya, akatudjase leko.

Nyoi ka Herode

20Asi Tura la asi Sidona wakanyangia Herode wulu. Ku vo wakekesanela la Balasto, ulami a diango dia Khumʼekanga. Vo wakayi le Herode la utema otoi, wakalombe dia ndjala ki, ne dia leke la khumʼekanga lakaleshaka leke lawo. 21Lamʼakakuki lushi lakawasonola, Herode akalote ahondo wa diulelu, akadiase lu kiti ka diulelu, akahangohangwela. 22Antu wakadji dielu vati: Diui dia etemolatemola kemotshi, aha dia untu! 23Kemʼedja, ondjelo wa Khumadiondjo akokomola, ne dia ndi kuntumbula Unyashungu. Dikusu diakawoto lu dimba, ndi akavu.

24Keli diui dia Unyashungu diakuli, diakafuli.

25Baranaba la Saulu wakakalula uma la Jerusalema lamʼakawashidiya nkimo diango. Vo wakayi la Joani, lukumbu landi lukina Mako.

ETSHA WA ATUMAMI 13

Nyuma kʼOlolo Ambeta Saulu la Baranaba

1Lʼekelizia wa lʼAtiyoka kaki amvutshi la embetsha, kumbu yawo Baranaba, la Simeyona, lakawetaka vati: Ningere, la Lukiyo, usi Kurene, la Manaena, lakuli la khumʼekanga Herode, la Saulu. 2Lamʼakawakambela Khumadiondjo ulimu, ndu lamʼakawakili mbu ya nde, Nyuma kʼOlolo akati ati: Nyonsonwele Baranaba la Saulu dia ulimu wakamawaeti. 3Lamʼakawakili mbu ya nde, vo wakalombe, wakawahe anya, ku wakatumi.

La Kupiro, Elimasi Ambuyala Tshungu; Serengiyo Paulu Ambukadimula Utema.

4Okone Baranaba la Saulu wakatshu la Selukiya. Vo wakamo uma leko, wakateho la Kupiro. 5Lamʼakiwo la Salami, vo wakatela antu diui dia Unyashungu lu temwelo diʼasi Juda. Ndu Joani akatshindela. 6Lamʼakawakindula lu kete sho tshe edja ndu la Pafo, vo wakatani usi Juda omotshi leko, kanga aloho, umvutshi a kashi, lukumbu landi Bara-Jesu. 7Ndi akayalaka la umbuledi, lukumbu landi Serengiyo Paulu, kanga yimba. Serengiyo Paulu aketi Baranaba la Saulu, akayangi mbuka diui dia Unyashungu. 8Keli Elimasi (nkadimula ati: Kanga aloho) akasike, akayangi munganyia umbuledi uma lu mbetawo. 9Ku Saulu, letawo ntu vati: Paulu, lakaludiama la Nyuma kʼOlolo, akawendi tee; 10akati ati: We ambulula la kashi la uhukusanu, we onʼa uhimbanyi, utunyi wʼakambu tshe wʼololo, we haheko munganyia antu uma lu mbuka yʼololo ya Khumadiondjo? 11Ulungi, lunya la Khumadiondjo leko le ye, we ayutukuyala tshungu, henyi unya. Kemʼedja lungi la udjima akuhutamela. Ku ndi akakendakenda atayangi wane wa mbolombola la lunya. 12Lamʼakenyi umbuledi dikambu diakatshama, ndi aketawo, akambi dia wetshelu wa Khumadiondjo.

Joani Mako Ambutshika Paulu

13Paulu la wane wakatatshokaka la ndi wakamo uma la Pafo, wakateho la Perenga ka la Pamufuliya. Joani akatshiki, akakalula la Jerusalema. 14Keli vo waketi uma la Perenga, wakakumi la Atiyoka wa la Pisidiya. Vo wakoto lʼetemwelo lushi lʼekila, wakadjase. 15Lamʼakawashili mbala elembe la aui wʼamvutshi, embuledi wʼetemwelo wakatu mela diui vati: Anyasu, naka nyu la diui dia ndaka antu, nyalaki 16Paulu akemala, akahahiya lunya; akati ati:

Aui wa Paulu lʼAtiyoka wa la Pisidiya

Nyu asi Isariyele la nyu wane wuka Unyashungu woma, nyuhukami. 17Unyashungu a wudja one wa Isariyele wakasonola watshesu, akawaunyiya lamʼakiwo lʼEdjibitu,13:17 Etum. 1:7. akawanya uma lu kete sho la lunya la wulu.13:17 Etum. 12:51. 18Uku deku akumi anei mbakandatawaembaka lʼusui uku wali.13:18 Wal. 14:34; Euh. 1:31. 19Lamʼakandamani wedja esambeli lu kete ya Kanana,13:19 Euh. 7:1. ndi akawasha kete yawo ukito13:19 Jas. 14:1. uku deku kama nyei la akumi atanu. 20Lʼokongo diku, ndi akawasha embadi13:20 Emb. 2:16. edja ndu le umvutshi Samuele.13:20 1 Sam. 3:20. 21Lʼokongo diku, vo wakalombe khumʼekanga.13:21 1 Sam. 8:5. Unyashungu akawasha Saulu, onʼa Kisha, uma lu diuhu dia Bendjamina,13:21 1 Sam. 10:21. yediko ya deku akumi anei. 22Lamʼakandawunya,13:22 1 Sam. 13:14. ndi akunyia Davidi dia ndjala khumʼekanga, one lakandati ati: Dimi lambutana Davidi, onʼa Jese, one lalangami; ndi ayutsha akambu tshe uku lulangu lami.13:22 1 Sam. 16:12; Esam. 89:20. 23Uma le tukanula tandi mbakela Unyashungu Ushimbedi Jesu le asi Isariyele, uku daka diandi. 24Jesu atayi, Joani akasambishaka asi Isariyele tshe dikambu dia batiza ka ekadimwelu kʼetema.13:24 Mak. 1:4; Luk. 3:3. 25Lamʼakayangi Joani nshidiya ulimu andi, ndi akati ati: Ukundi akananyu? Dimi laha ndi.13:25 Joa. 1:20. One layayi lʼokongo ami, dimi kema ololo wukukimi nkelekula okodi a sabata yandi.13:25 Mat. 3:11; Mak. 1:7; Luk. 3:16; Joa. 1:27.

26Anyasu, tukanula tʼAbarahama, la nyu wane wuka Unyashungu woma lʼatei anyu, le su kakatumama diui ne dia panda. 27Ne dia wane wudjashi la Jerusalema la embuledi awo, kumbeya kuyanga aui wa amvutshi watalemaka nshi yʼekila tshe. Vo wakashidiya aui ako lamʼakawawamia. 28Kuyanga vo kumbutana la dikambu dia ndi mvo, vo wakalombe Pilata dia mbudiaka.13:28 Mat. 27:22-23; Mak. 15:13-14; Luk. 23:21-23; Joa. 19:15. 29Lamʼakawashidiya akambu tshe wakafundama lu dikambu diandi, vo wakunanula uma lʼutamba, wakawetamia lu diumbu.13:29 Mat. 27:57-61; Mak. 15:42-47; Luk. 23:50-56; Joa. 19:38-42. 30Keli Unyashungu akawulula uma lʼatei wʼedu. 31Wane wakayi la ndi uma la Ngalili utsha la Jerusalema, wakawenyi nshi efula.13:31 Etsh. 1:3. Kakiane vo weko emenyi andi le antu. 32Tambunyela lukumu lʼololo la daka diakawalaki watshesu, 33ati: Unyashungu akashidiya daka ne le anʼasu, ne dia ndi akulula Jesu, ndu uku ufundami lʼusambu a hendi ati: Onʼami keye, Elo kukutshimi.13:33 Esam. 2:7.

34Ne dia ndi akawulula uma lu nyoi, hakalula ntu lʼehondelo. Ndi akati ati: Dimi layunyusha etshoko wʼekila, Ndu wa mete, wakamalaki Davidi.13:34 Is. 55:3.

35Ne dia ndi akati ndu lʼusambu ukina ati: We hakimo lʼEkila dia ndi mponda.13:35 Esam. 16:10.

36Lamʼakashidiya Davidi ntsha akambu wakalangi Unyashungu lu lolonga landi, ndi akavu, akakhundama kame la watshendi, akahonde. 37Keli one lakulula Unyashungu komponda. 38Anyasu, nyeyi nyati: Wambunyutela dikambu dia edimanyelu ka kolo yanyu uma le untu one. 39Ndi ambuyindja untu tshe lawetawo lu akambu tshe, waki elembe wa Mose kumbuyindja. 40Okone nyewo, dikambu diakawati lu aui wʼamvutshi diatukuyala le nyu, ati: 41Nyendi, nyu amonyodi, nyambi, nyuvu; Ne dia dimi lambutsha ulimu lu nshi yanyu, Ulimu wahanyakuki mbetawo, naka untu ayunyutela.13:41 Hab. 1:5.

Wambolomba Paulu Dia Ndi Mvuta Diui Ntu Lushi lʼEkila

42Lamʼakawatumbi, vo wakasengasenga Paulu vati: Kumututela aui aso lushi lʼekila layayi. 43Lamʼakahandjo antu, asi Juda efula la embetawudi wa dikambu diʼasi Juda wakayi le Paulu la Baranaba, wakakokomiya vati: Nyutshikali lu ngandji ka mamba ka Unyashungu.

Paulu la Baranaba Wambutunama; Wambuta Vati: “Tayutsho le Asi Wedja”

44Lushi lʼekila lukina, asi usumba efula wakasangana dia ndjuka diui dia Unyashungu. 45Keli lamʼakenyi asi Juda elui wʼantu, vo wakuki kandjema. Wakadji tamu tʼakambu wakati Paulu, wakotenge. 46Paulu la Baranaba wakatela antu diui la dihunga, vati: Diaki la su dia ntanyutedi diui dia Unyashungu ntundu, ne dia nyu nyakadituni; nyame nyambuyalumbuya nyati: Hatukuki nungula lumu la pundju. Nyulungi, shu tambukadimo le asi wedja. 47Ne dia Khumadiondjo akatosengola okone ati: Dimi lambukukitsha usasi wʼasi wedja, Dia we ndjala panda le antu, Edja ndu la kuma ka kete.13:47 Is. 42:6; 49:6.

48Lamʼakuki asi wedja diui so, vo wakangenangena. Vo wakatumbula diui dia Unyashungu. Wane wakasonwama lu lumu la pundju, waketawo. 49Diui dia Khumadiondjo diakadiangana lu leke lako tshe. 50Keli asi Juda wakatombosha amantu wʼololo waki la lukumu, ndu dihangamendi dia lʼusumba, wakatombosha antu dia nsuya Paulu la Baranaba, la dia mbatshanya uma lu leke lawo. 51Keli vo wakahumela ditshu diʼuma lu akaka awo,13:51 Mat. 10:14; Mak. 6:11; Luk. 9:5; 10:11. wakatshu la Ikoniyo. 52Ambeki wakaluli la ongenongeno ndu la Nyuma kʼOlolo.


 

ETSHA WA ATUMAMI 14

Paulu la Baranaba lʼIkoniyo

1Lamʼaki Paulu la Baranaba lʼIkoniyo, vo wakoto lʼetemwelo kʼasi Juda, ku vo wakati diui wuhu wakeyi ului a wuki wʼasi Juda la asi Ngirika mbetawo. 2Keli asi Juda, wane waki kumbetawo, wakatombosha etema wʼasi wedja dia vo mpetsha anyasu. 3Ku vo wakatshikala leko edja, wateketa la dihunga lu wulu wa Khumadiondjo, ako lakati diui dia ngandji kandi ka mamba, laketawo dia tulimbitelu la akambu wa mamba ntshama lʼanya awo. 4Keli asi usumba wakatana: amotshi lu leke lʼasi Juda, akina lu leke la atumami. 5Lamʼakasangana asi wedja la asi Juda la embuledi awo, dia mbatshela kolo, la dia mbauka ave, 6Paulu la Baranaba wakeyi dikambu diako. Ku vo wakalawo utsha la Lustera la Derebe, esumba wa Lukaoniya, la lʼutshimba a leke lako. 7Vo wakasambisha lukumu lʼololo leko.

Antu Wakalangi Mbadiakela Nyama la Lustera

8La Lustera kaki pami kemotshi, kanga ekulu wodu, nyangu akawuti ekhusi, konkendakendaka. 9Ndi akuki Paulu ateketa. Paulu akawendi tee. Lamʼakandenyi ati: Ndi ambetawo dia nkono, 10ndi akati la diui dia wulu ati: Emala too lʼekulu aye. Ku ndi akunela esadi, akakendakenda. 11Lamʼa-kenyi antu akambu wakatshi Paulu, vo wakahangohango la diui dia wulu lʼoteketa wa Lukaoniya vati: Ditemolatemola diambutuhulwela lu difanelu diʼantu! 12Vo waketi Baranaba vati: Zeu;14:12 Zeu” lu ngirika, eli “Jubite.” ku Paulu vati: Hereme,14:12 “Hereme” lu ngirika, eli “Merekuriyo” (Mekuriyo). ne dia ndi aki oteketshi a wuki. 13Etemwelo ka Zeu kaki lʼeotwelo kʼusumba. Olombedi wa Zeu akela ngombe la alembo lu asuku; ndi la antu wakalangi mbadiakela nyama yako. 14Keli lamʼakuki atumami Bara naba la Paulu dikambu diako, vo wakati ahondo awo, wakalawo lʼatei wʼului wʼantu, watahangohangovati: 15Wayone, okoko wana wambunyutsha okone? Ndu shu mbeli antu, wakatungama uku nyu. Shu tambunyela lukumu lʼololo, dia nyu nkadimo uma lʼakambu ane wʼanyanya utsha le Unyashungu a lumu, lakatungi ulungu la kete ndu ashi a wuki la diango tshe dieli loko. 16Lu nshi yaketi, ndi akakimo wedja tshe dia Vo nkendakenda lu mbuka yawo. 17Keli ndi kundjatshika aha la djimbitelu, ne dia ndi akatshela ololo; akanyoloshiya mvula uma lʼulungu, la deku dia nludia mbu ya nde, akalutsha etema anyu la mbu ya nde la ongenongeno. 18Lʼaui aso mbakawahimbi uhimbahimba dia nshimba antu, diaha vo mbadiakela nyama.

Asi Juda Amotshi Wambetawuya Antu Dia Mbuka Paulu Ave

19Asi Juda amotshi wakayi uma lʼAtiyoka la Ikoniyo, waketawuya antu, wakuki Paulu ave, wakukutula uma lʼusumba, wakana vati: Ndi ambuvo. 20Keli lamʼakudingi ambeki, ndi aketo, akatshu lʼusumba. La wedi a pindju, ndi akatshu la Baranaba utsha la Derebe. 21Lamʼakawasambisha lukumu lʼololo lʼusumba ako, ndu lamʼakawete antu efula ambeki, vo wakakalula la Lustera, lʼIkoniyo ndu lʼAtiyoka. 22Vo wakakikitsha etema wʼambeki, wakakokomiya dia ntshikala lu mbetawo, vati: Lʼatei wʼasui, kahumbasu mboto lu diulelu dia Unyashungu. 23Lamʼakawasonwela dikumanyi lu ekelizia tshe, lamʼakawalombe ndu lamʼakawakili mbu ya nde, vo wakatshiki le Khumadiondjo, lakawetawo.

24Vo waketi la Pisidiya, wakakumi la Pamufuliya. 25Lamʼakawati diui la Perenga, vo wakatshu lʼAtaliya. 26Uma leko, vo wakateho utsha lʼAtiyoka, lene akawakimwama lu ngandji ka mamba ka Unyashungu dia ulimu wakawashidiya. 27Lamʼakawakumi, vo wakasanganya ekelizia, wakasanyia akambu tshe wakatshela Unyashungu, ndu okone akandadihwela asi wedja lukuki la mbetawo. 28Ku vo wakatshikala la ambeki edja.

ETSHA WA ATUMAMI 15

Wambutuma Paulu la baranaba la Akina Utsha la Jerusalema

1Antu amotshi wakayi uma la Judiya; waketsha anyasu vati: Naka hanyahema ehekeli uku etshelu ka Mose,15:1 Lew. 12:3. nyu hanyeyi nshimbamela. 2Lamʼakawadji la Paulu la Baranaba tamu, la mumbwana la wo embula, vo wakasonola Paulu la Baranaba la akina, dia vo ntsho la Jerusalema le atumami la dikumanyi lu dikambu diako. 3Ekelizia wakatshindela, waketi la Fonikiya la Samariya, wakatatelaka antu dia ekadimwelu kʼetema kʼasi wedja. Vo wakatamanya ngenyangenya anyawo tshe. 4Lamʼakawakumi la Jerusalema, ekelizia ndu atumami la dikumanyi wakalungula. Ku vo wakasanyia akambu tshe wakatshela Unyashungu. 5Keli amotshi wa lu leke lʼAfarise wako waketawo, wakunela, wakati vati: Eko uhumba wa mbahemia ehekeli, la mbatela dia vo nkitanyia elembe a Mose.

Wambumbwana DiʼAsi Wedja Mbahema Ehekeli

6Atumami la dikumanyi wakasangana name dia mumbwana dikambu diako. 7Lamʼakawambwana efula, Petero akemala, akawatela ati:

Anyasu, nyu mbeyaka nyati: Unyashungu ambutshaka esonwelo edja lʼatei anyu, dia asi wedja wuki lukumu lʼololo uma lʼunyo ami, wetawo.15:7 Etsh. 10:1-43. 8Unyashungu, leya etema, akayala omenyi awo, akawasha Nyuma kʼOlolo15:8 Etsh. 10:44. uku akandatusha.15:8 Etsh. 2:4. 9Ndi kuntutshikitanya la wo, akedia etema awo dia mbetawo kawo. 10Ya ukundi ahimbanyu Unyashungu, dia nyu mbidja lokoho lu kingu yʼambeki, laki watshesu kumbeya memba kuyanga shu? 11Keli shu tambetawo shati: Shu tayushimbamela uma lu ngandji ka mamba ka Khumadiondjo Jesu uku vo.

Jakoba Ambuwatela Dieli Ololo Vo Ntsha

12Antu tshe wakalembohala ki, wakahukamaka uku akataka Baranaba la Paulu, dia tulimbitelu la akambu wa mamba wakatshi Unyashungu lʼatei wʼasi wedja uma le wo. 13Lamʼakawalembohala, Jakoba akahula diui ati: Anyasu, nyumpukami! 14Simeyona akasanya okone akakendela Unyashungu asi wedja ntundu, dia nsonola antu amotshi uma lʼatei awo dia lukumbu landi. 15Dikambu ne dieko pupu la aui wʼamvutshi, uku ufundami ati: 16Lʼokongo wʼakambu aso, dimi layukalula. Dimi layuhika etumbu ka Davidi ntu, kakanyuko. Layolongosola diango diato diakalana, layukieme. 17Ne dia antu wutshikadi, wayangi Khumadiondjo, Ndu asi wedja tshe wetama lukumbu lami, 18Mbata Khumadiondjo, Lakalimbitshiya akambu ako umaka nshi yʼedjedja.15:18 Am. 9:11-12.

19Okone dimi nkanaka nti: Tatohenyahenyaki asi wedja wambukadimo le Unyashungu. 20Keli tuwafundeli dia vo nkimo ndjalanya la dikishi,15:20 Etum. 34:15-17. munanyi,15:20 Lew. 18:6-23. nyama yakawahini lu kingu ndu la dikila.15:20 Lew. 17:10-16. 21Ne dia lu nonga yaketi, Mose akayalaka la antu wakasambishaka akambu andi lʼusumba la usumba. Aui andi watalemaka lu temwelo nshi yʼekila tshe.

Wambutuma Antu Kame la Paulu la Baranaba la Mukanda lʼAtiyoka

22Atumami la dikumanyi ndu ekelizia tshe wakakani vati: Ndeka ololo shu nsonola anyasu amotshi, tatumi kame la Paulu la Baranaba utsha lʼAtiyoka. Vo wakasonola Judasi, lakawetaka vati: Barasaba, la Silasi, waki antu a waki lʼatei anyawo. 23Vo wakafundela mukanda okone vati: Atumami, dikumanyi la anyawo wambutumela anyanyu wʼasi wedja weli lʼAtiyoka ka la Sudiya la Kilikiya moyo. 24Takuki vati: Amotshi wakamo uma le su, wambunyohenyahenya lʼaui, wambulanya etema anyu. Shu kumbatela aui aso. 25Lamʼakatadji sheki, shu takakani shati: Ndeka ololo shu nsonola apami wanyutumela kame la elangimi asu, Baranaba la Paulu, 26antu waketawo nkimo nyumu yawo ne dia lukumbu la Khumesu Jesu Kristu. 27Okone tambutuma Judasi la Silasi, ndu vo wayunyutela aui pupu lʼenyo. 28Ne dia ndu Nyuma kʼOlolo ndu shu takakani shati: Kema ololo shu nyukitshiya wutshu a wuki, wuleki akambu weli uhumba. 29Nyoseke diango diakawalambula dikishi, dikila, nyama yakawahini lu kingu, la munanyi. Naka nyambuyakimela lu akambu aso, nyu nyayutsha ololo. Moyo.

Asi Atiyoka Wambulungula Mukanda lʼOngenongeno

30Lamʼakawalakana la wo, vo wakatshu lʼAtiyoka, wakatusanganya ului wʼantu, wakawasha mukanda. 31Lamʼakawawali, vo wakangenangena, ne dia esambelu kakawasambi. 32Judasi la Silasi vame waki ndu amvutshi, okone vo wakalaki anyawo aui efula, wakakikitsha. 33Lamʼakawatshikala nshi motshi leko, vo wakalakina la anyawo ki, wakakalula le wane wakatumi. 15:33 “15:34” — nfundamaka paka la tshina dia page, aha lʼatei lu abuku amotshi. 34Keli Silasi akakani ati: Ndeka ololo dimi ntshikali lane. 35Ku Paulu la Baranaba wakatshikala lʼAtiyoka, wetsha la wasambisha antu lukumu lʼololo la diui dia Khumadiondjo, ndu antu akina efula.

Paulu la Baranaba Wambudja Tanui Dia Mako

36Lamʼaketi nshi motshi, Paulu akatela Baranaba ati: Tutshu kakiane dia ntenda anyasu lʼusumba tshe wakatati diui dia Khumadiondjo, tutendi kana vo la wulu. 37Baranaba akalangi ntsho ndu la Joani lakawetaka vati: Mako. 38Keli Paulu akakani ati: Kema ololo shu ntsho la untu lakatutshiki lamʼakisu la Pamufuliya,15:38 Etsh. 13:13. ndi kuntsho la su lʼulimu. 39Tamu ta wulu takayala, ku vo wakatana: Baranaba akose Mako, akateho la ndi utsha la Kupiro; 40ku Paulu akose Silasi, lamʼakukitsha anyawo lu ngandji ka mamba ka Khumadiondjo, ndi akatshu. 41Ndi aketi la Suriya ndu la Kilikiya, akakikitsha ekelizia.

ETSHA WA ATUMAMI 16

Paulu Ambosonola Timote

1Paulu akakumi ndu la Derebe, ndu la Lustera. Nyulungi, umbeki omotshi aki leko, lukumbu landi Timote, onʼa usi Juda a umuntu, laketawo, keli shi aki usi Ngirika. 2Ndi aki la lukumu lʼololo le anyasu waki la Lustera la Ikoniyo. 3Paulu akalangi ntsho la ndi. Ndi akawose, akawahemia uhekeli, ne dia asi Juda waki lu beke diako, ndu ne dia vo tshe wakeyi vati: Shi aki usi Ngirika. 4Lamʼakawakindula lu esumba, vo wakawatela elembe wakadji atumami la dikumanyi diaki la Jerusalema, dia vo mbekitanyia. 5Okone ekelizia wakakikitshama lu mbetawo, wakafulanelaka la lushi la lushi.

6Lamʼakashimbi Nyuma kʼOlolo Paulu la Timote mvuta diui la Asiya, vo waketi lu leke la Firungiya la Ngalatiya. 7Lamʼakawakumi lu welelo wa Musiya, vo wakayangi ntsho utsha la Bituniya, keli Nyuma ka Jesu akashimbi. 8Ku vo waketi uma la Musiya, wakakumi la Toroa. 9Paulu akenyi enelo lʼutshu. Pami kemotshi kʼusi Makedoniya akemala osengasenga ati: Yaka la Makedoniya, uyutukimanyia. 10Lamʼakandenyi enelo, kemʼedja shu takayangi ntsho utsha la Makedoniya. Shu takakani shad: Unyashungu kambuteta leko dia ntasambisha lukumu lʼololo.

Paulu la Filipi; Ludiya Ambetawo

11Lamʼakatunela la watu uma la Toroa, takasimbo utsha la Samotarake. La wedi a pindju, shu takakumi la Neapoli. 12Uma leko, shu takakumi la Filipi, usumba wuleki wuki lu leke la Makedoniya, ndu malu wʼasi Romo. Shu takahangi nshi motshi loko. 13Lushi lʼekila, shu takatumbi lʼandja a lukumbu, takatshu lʼumamu wʼokedi, lene akatakani shati: Leko keli dihuli dia dombelo. Shu takadjase, takateketa la amantu wakasangana leko. 14Umuntu omotshi, lukumbu landi Ludiya, usundjishi wʼahondo wa tilili, usi usumba wa Tuyadra, laki otemodi a Unyashungu, akuki aui asu. Khumadiondjo akadihula utema andi dia ndi mpukana akambu wakad Paulu. 15Lamʼakandashili mbatizama, ndi la wa lu luudu landi, ndi akatosengasenga ati: Naka nyu nkanakami nyati: Dimi leko la kolamelu le Khumadiondjo, nyuyi lakami, nyuyuhangi. Ku ndi akatetawuya.

Nyuma ka Doho Ambutumba Uma le Usekaseka a Umuntu

16Lamʼakatatatshokaka utsha lu dihuli dia dombelo, shu takasangana la fumbi kʼusekaseka, laki la nyuma ka doho, lakakundjiyaka akhumendi diango efula uma lʼaloho andi. 17Ndi akatuyeli, shu la Paulu, ayahangohango ati: Antu ane weko ekambi wa Unyashungu KhumʼUlungu, wambunyutela dia mbuka ka panda. 18Ndi akatshaka osoku nshi efula. Keli Paulu akanyangi wulu, akasikiso, akatela nyuma kako ati: Dimi lambukutela lu lukumbu la Jesu Kristu nd: Utumbi uma le ndi. Lʼushidi oso, nyuma kako akatumbi.

Wambokomola Paulu la Silasi, Wambuwadja lu Lukanu; Ulami a Lukanu Ambuyala Umbetawudi

19Keli lamʼakenyi akhumendi one lakawashaka waho ambutumba, vo wakandi Paulu la Silasi, wakakutula utsha la kituka lu ashu wʼembuledi. 20Lamʼakawawaela le embadi, vo wakati vati: Antu ane wʼasi Juda wambutamanya ntombosha usumba asu. 21Vo wambutetsha ditshelu dieli olembe dia shu nungula kana dikitanyia, shu asi Romo. 22Ului wʼantu wakakungutanela. Embadi wakati ahondo awo, wakati vati: Wakomole eshingo. 23Lamʼakawakomola ekomola efula, vo wakawadji lu lukanu. Vo wakakokomiya ulami a lukanu wulu vati: Alami ololo! 24Lamʼakanduki uku akawawutela, ndi akawadji lu luudu la lʼetei, akawadji ekulu lu mbeti.

25Keli lʼasa ndeki, Paulu la Silasi wakalombaka, wakimbelaka Unyashungu esambu. Asi lukanu wakahukamaka. 26Shashimuya, kete yakadidima wulu; ku tshina dia luudu la lukanu diakasukasuka. Kemʼedja kuki tshe yakadiho. Ekodi wʼuntu la untu wakakeleko. 27Ulami akemo. Lamʼakandenyi kuki ya lukanu hwe, ndi akasomola yombo, akayangi ndjadiaka; akakani ati: Asi lukanu wambulawo. 28Paulu akahangohango ati: Tuyatshelaki kolo! shu tshe teko. 29Ndi akati ati: Nyela ewa. Ndi akoto lu luudu adidima la woma, akayakosha la ntundu ka Paulu la Silasi. 30Ndi akatundja; akati ati: Wayone, kahumbami ntsha dia dimi nshimbamela? 31Vo wakati vati: Etawo Khumadiondjo Jesu, ku we ayushimbamela, ndu wa lu luudu laye. 32Vo wakawutela diui dia Khumadiondjo, ndi la wane waki lu luudu landi tshe. 33Ndi akawaose lʼushidi ako wʼutshu, akotsha wimbo awo wʼeshingo. Kemʼedja ndi akabatizama, ndu antu andi tshe. 34Ndi akatshu la wo lakandi, akawasha ma. Ndi akangenangena efula, ndi la wa lu luudu landi tshe ne dia ndi ambetawo Unyashungu.

Embadi Wambuka Woma

35Lamʼakahuto unya, embadi wakatumi tusangema vati: Watundja antu aku. 36Ulami a lukanu akatutela Paulu ati: Embadi wambutuma diui vati: Wanyukimo. Nyutumbi, nyutshu la ki. 37Keli Paulu akawatela ati: Vo wakatokomola, shu asi Romo, lu ashu wʼantu tshe, watatulumbuya, wakatudjisha lu lukanu. Ya ukundi ayangawo ntutundja lu usheshe? Aha osoku! Wayi vame la ndjututundja. 38Tusangema wakatutela embadi aui aso. Lamʼakawuki vati: Asi Romo mbewo, vo wakuki woma. 39Ku vo wakayi, wakasengasenga. Lamʼakawatundja, vo wakalombe dia ntumba uma lʼusumba. 40Lamʼakawatumbi uma lu lukanu, vo wakoto lu luudu la Ludiya. Lamʼakawenyi anyawo, vo wakakikitsha etema, wakatshu.

ETSHA WA ATUMAMI 17

Paulu la Silasi la Tesalonika

1Lamʼaketi Paulu la Silasi lʼAfipoli la Apoloniya, vo wakakumi la Tesalonika, lene aki etemwelo kʼasi Juda. 2Paulu akoto la wo loko, uku aki etshelu kandi. Ndi akateketa la wo akambu wʼuma lu afundelu nshi yʼekila shatu. 3Ndi akalimbitshiyawo, akati ati: Diaki ia Kristu dia nsuwa, la dia ndi mbulo uma lu nyoi; Jesu one lanyutelami, ndi keli Kristu. 4Amotshi waketawo, wakasangana la Paulu la Silasi; ndu ului a wuki wʼasi Ngirika wʼololo, ndu amantu wa lukumu la wuki. 5Keli asi Juda wakuki kandjema, wakose antu wa kolo amotshi uma lʼatei wʼantu kʼantu, wakasanganya ului, wakatombosha usumba. Vo wakoto lu luudu la Jasona la wulu, wakayangi mbatundja le antu. 6Lamʼakiwo kumbatana, vo wakakutula Jasona la anyawo amotshi, wakatundja la ntundu ka ewandji wʼusumba. Vo wakahangohango vati: Antu ane wambungayula wa la kete tshe wambukuma ndu lindu! 7Keli Jasona ambalungula. Vo tshe hawukitanyia elembe wa Kayisa, ndu watutaka vati: Khumʼekanga kekina keko, Jesu. 8Okone vo wakahindja etema wʼantu la wa ewandji wʼusumba lamʼakawuki akambu aso. 9Lamʼakawalungula okole uma le Jasona la akina, vo wakakimo.

Paulu la Silasi la Beroya

10Kemʼedja anyawo wakatumi Paulu la Silasi utsha la Beroya lʼutshu. Lamʼakawakumi, vo wakoto lʼetemwelo kʼasi Juda. 11Antu aso wakaleki wa la Tesalonika ololo, ne dia vo waketawo diui lʼuhetu: wakayangiayangia la lushi la lushi lu afundelu, kana akambu ane mete kewo. 12Ku efula waketawo, ndu amantu wʼasi Ngirika akanga a lukumu, ndu apami efula. 13Keli lamʼakeyi asi Juda wa la Tesalonika vati: Paulu ambusambisha diui dia Unyashungu ndu la Beroya, vo wakatshu ndu leko. Vo wakatombosha la wakangayula antu. 14Kemʼedja anyawo wakatumi Paulu, dia ndi ntsho lʼashi a wuki. Silasi la Timote wakatshikala leko. 15Keli atshindedi wa Paulu wakakumi la ndi pulu ndu lʼAtena. Lamʼakawalungula diui ati: Silasi la Timote wayi le mi esadi, vo wakatshu.

Paulu lʼAtena; Daku Dia Paulu

16Lamʼakawakungaka Paulu lʼAtena, utema andi akahindi efula lamʼakandenyi usumba ambulula too la dikishi. 17Lu temwelo, ndi akateketa lʼasi Juda la antu wʼololo, ndu la lushi la lushi, le wane wakasanganaka la ndi la kituka. 18Anangi a yimba wʼasika Epikuro la wʼasika Stoa amotshi wakayudja la ndi tamu. Amotshi wakati vati: Eyokayoka kene, katandi na? Akina vati: Ndi nfanaka la umvutshi a ditemolatemola diʼangendangenda, ne dia ndi akasambisha Jesu la eulwelu. 19Vo wakukimela, wakatshu la ndi lʼAreopango. Vo wakawumbula vati: Shu nkukaka mbeya wetshelu one wʼuyuyu wasambishaye? 20ne dia we ambuya la akambu amotshi wʼeyuyu, wukasu. Ku shu nangaka mbeya akambu ako okone wewo. 21Asi Atena tshe la angendangenda waki loko, kuntsha nduku dikambu dikina, paka mvuta la mbuka dikambu diʼuyuyu.

22Paulu akemala lʼAreopango, akati ati: Nyu asi Atena, lu akambu tshe, dimi lambena nti: Nyu nyeko atemodi wa wulu. 23Ne dia lamʼakamatetaka, dimi lakenyi diango diatemolanyu, lakenyi ndu ediakelu kaki la efundelu kene ati: “Le Etemolatemola Kahaweyi.” Kene katemolanyu kahanyeyi, dimi layunyulimbitshiyato. 24Unyashungu kakatungi kete la diango tshe dieli loko, ne dia ndi keli Uwandji wʼulungu la kete. Ndi hatudjaseka lu temwelo diakatshama lʼanya, 25kana anya wʼantu mbukimanyia kuyanga ndi mpumbaka engo, ne dia ndame katushaka tshe lumu, luwi, la diango tshe.17:25 1 Khum. 8:27; Is. 42:5; Etsh. 8:47. 26Uma le untu otoi kakandatungi wedja tshe, dia vo mbidjase ladiku dia kete tshe. Ndi akakahanya deku diawo diakandalongosola, ndu elelu wʼedjaselu kawo; 27dia vo wayangi Unyashungu, watawamamba dia vo mbena, keli ndi kema etali uma le untu la untu. 28Le ndi kesu la lumu. Shu tambokendakenda, tambuyala; Uku akafundi ndu afundji anyu vati: Ndu shu mbeli anʼandi. 29Ne dia shu teko ana wa Unyashungu, kema ololo shu nkana shati: Unyashungu uku paunyi mbendi, kana fesa, kana dive diakawasele lu yimba la tukanyi ta untu. 30Unyashungu akendjula tena diʼakanga a dinginya. Keli kakiane, ndi ambutela antu tshe lu ahuli tshe ati: Nyukadimuli etema. 31Ne dia ndi akasonola lushi la numbuya wa la kete, uku elumbwelu kʼololo lʼanya wʼuntu lakandasonola. Ndi akenya antu tshe dikambu ne, ne dia ndi akawulula uma lu nyoi.

Eyelelu ka Daku Diandi

32Lamʼakawuki dia eulwelu ka wane wakavu, amotshi wakole. Keli akina wakati vati: Katudiuki ntu. 33Ku Paulu akamo uma la le wo. 34Keli amotshi wakumamema, waketawo. Omotshi Diyonusiyo, usi Areopango, la umuntu lukumbu landi Damari, ndu akina kame la wo.

ETSHA WA ATUMAMI 18

Paulu la Koreto; Ambusambisha lʼEtemwelo

1Lʼokongo wʼakambu aso, Paulu akamo lʼAtena, akayi la Koreto. 2Ndi akatani usi Juda omotshi, lukumbu landi Akula, wakawuti lu leke la Poto, akayi tshinyi tshitshe uma lʼItaliya, la wadendi Piriskila, ne dia Kolodiyo akadji olembe ati: Asi Juda tshe wamo uma lu Romo. Paulu akatshu le wo. 3Ndi akadjase la wo, ne dia o wakatshaka wuhu wame wʼulimu. Vo wakatshaka ulimu, ne dia vo waki atshi wa mvudu yʼapema. 4Ndi akateketa lu etemwelo nshi yʼekila tshe, akayangi mbetawuya asi Juda la asi Ngirika.

Paulu Ambangana Uma le Asi Juda

5Lamʼakakumi Silasi la Timote uma la Makedoniya, Paulu akayakimo tshe lʼulimu wa nsambisha, etsha asi Juda ati: Jesu keli Kristu. 6Lamʼakawahangakala, lamʼakawotenge, ndi akanyinginya ahondo andi; akawatela ati: Dikila dianyu diayali lʼete anyu! Dimi kema la dikambu. Umaka kakiane, dimi layutsho le asi wedja. 7Ndi akamo uma leko, akatoto lu luudu lʼuntu, lukumbu landi Titiyo Justo, otemodi a Unyashungu; luudu landi laki lasuki la etemwelo. 8Kirispo, uwandji wʼetemwelo, aketawo Khumadiondjo, ndu wa lu luudu landi tshe. Lamʼakuki asi Koreto efula aui wa Paulu, vo waketawo, wakabatizama. 9Khumadiondjo akatela Paulu lu enelo lʼutshu ati: Tukaki woma, otekete, tolembohalaki; 10ne dia dimi leko la ye, nduku untu layukahe lunya dia nkutshela kolo: ne dia dimi la antu efula lʼusumba one. 11Ndi akadjase leko utundu wʼeleku la ngondo shamalu, aketshaka antu diui dia Unyashungu.

Wambutsho la Paulu la Ntundu ka Ngaliyo

12Keli lamʼaki Ngaliyo, umbuledi a wuki wa lʼAkaya, asi Juda wakahangakaela Paulu, wakatshu la ndi la ntundu kʼelumbwelu. 13Vo wakati vati: Untu one ambetawuya antu dia ntemola Unyashungu utshikitanyi lʼelembe. 14Lamʼakayangi Paulu nfula unyo, Ngaliyoakatela asi Juda ati: Nyu asi Juda, utunduyala dikambu dia kolo kana dia fumbosonyi mbedio, tshiki lutuka diui dianyu. 15Keli naka akambu aso weko paka diʼaui, kumbu la elembe anyu, eko dikambu dianyu. Dimi halangi ndjala umbadi wʼakambu a wuhu oso. 16Ku ndi akawatshanya uma lʼelumbwelu. 17Ku vo tshe wakandi Sostene, umbuledi wʼetemwelo, wakokomola lʼelumbwelu. Keli Ngaliyo akatewala lu akambu aso tshe.

Paulu Ambutsho Utsha la Suriya

18Paulu akatshikala leko nshi efula lʼokongo wa dikambu so. Ndi akalakana la anangu, ku ndi la Piriskila la Akula wakatshu lu watu utsha la Suriya. Ndi akatanyisha divu la Kenekerea, ne, dia ndi akatadji dokoloko.18:18 Wal. 6:18 19Vo wakayi lʼEfeso, ku ndi akatshiki leko. Keli ndame akoto lʼetemwelo, akateketa lʼasi Juda. 20Lamʼakawolombe vati: Umudjase la su yema, ndi kumbetawo. 21Keli ndi akalakana la wo; akawatela ati: Naka Unyashungu alanga, dimi layukalula le nyu ntu. Ndi akamo uma lʼEfeso, akoto lu watu. 22Lamʼakandakumi la Kayisariya, ndi akatshu, akatasha ekelizia moyo, ku ndi akatshu lʼAtiyoka. 23Lamʼakandadjase leko yema, ndi akunela, akakindula lu leke la Ngalatiya, la Firungiya, atakikitsha etema wʼambeki tshe.

Apolo

24Usi Juda omotshi, lukumbu landi Apolo, lakuto lʼAlesanderiya, akayi lʼEfeso. Ndi akesaka efula lʼunyo, akeyaka afundelu ololo. 25Untu ako aketshaka dia mbuka ka Khumadiondjo. Ndi aki la saki lʼutema, akataka, aketshaka akambu wa Jesu ololo, kuyanga ndi akeyi paka batiza ka Joani. 26Ndi akatatela mvuta diui la dihunga lʼetemwelo. Keli lamʼakuki Piriskila la Akula aui wakandataka, vo wakawose, wakulimbitshiya mbuka ka Unyashungu ololo. 27Lamʼakandayangi ntsho lʼAkaya, anyandi wakakikitsha utema andi, wakafundela ambeki dia vo mbulungula. Lamʼakandakumi, ndi akaleki nkimanyia wane waketawo uma lu ngandji ka mamba, 28ne dia ndi akâkaluya asi Juda aui la wulu lu seke, awaenya lu afundelu ati: Jesu keli Kristu.

ETSHA WA ATUMAMI 19

Paulu lʼEfeso; Ambeki wa Joani Wambetawo Jesu

1Lamʼaki Apolo la Koreto, Paulu akayi lʼEfeso. Lamʼakandeti lu beke diʼakuna, ndi akatani ambeki amotshi leko. 2Ndi akawambula ati: Lamʼakanyetawo, nyu nyakalungula Nyuma kʼOlolo? Vo wakawutela vati: Kema; shu tatuki dia Nyuma kʼOlolo. 3Ndi akawambula ntu ati: Lu na akanyambatizama? Vo wakati vati: Lu batiza ka Joani. 4Paulu akati ati: Joani akabatizaka antu la batiza kʼekadimwelu kʼetema. Ndi akatekika antu ati: Nyetawo one layayi lʼokongo ami, Jesu ndame.19:4 Mat. 3:11; Mak. 1:4, 7-8; Luk. 3:4, 16; Joa. 1:26-27. 5Lamʼakawuki diui so, vo wakabatizama lu lukumbu la Khumadiondjo Jesu. 6Lamʼakawahe Paulu anya, vo wakalungula Nyuma kʼOlolo. Vo wakateketa lʼeteketa ekina, wakati akambu wahatayi. 7Vo tshe waki uku apami dikumi la ahendi.

Paulu lu Wekelu wa Turano

8Paulu akoto lʼetemwelo, akatelaka antu diui la dihunga ngondo shatu. Ndi akateketaka la wo dia mbaetawuya akambu wa diulelu dia Unyashungu. 9Keli lamʼakakikitala amotshi, lamʼakawayala la ehedia, lamʼakawonyola Mbuka lu ashu wʼantu, ndi akamo uma lʼatei awo, akanya ndu ambeki, akateketa la wo la lushi la lushi lu wekelu a Turano. 10Ndi akatshaka osoku deku pendi, okone antu tshe wa lʼAsiya wakuki diui dia Khumadiondjo, ndu asi Juda ndu asi Ngirika.

Wambuleka Atundjishi wʼEdienge Wulu; Akanga wʼAloho Wambutshumba Abuku Awo

11Unyashungu akatshi akambu wa mamba wuleki lʼanya wa Paulu. 12Okone vo wakatshu la tambala la ahondo waki la ndi lu dimba le akanga a hemo. Ku hemo yakashili, edienge wakatumbi. 13Keli asi Juda amotshi, atundjishi wʼedienge, waketetaka, wakahimbi mbeta lukumbu la Khumadiondjo Jesu le akanga wʼedienge; wata vati: Dimi lambunyutshibela lu lukumbu la Jesu latusambishaka Paulu. 14Ana esambeli wʼusi Juda, lukumbu landi Skeva, olombedi a wuki, mbakatshaka osoku. 15Odienge akâkaluya diui ati: Dimi mbeyaka Jesu; dimi mbeyaka Paulu, keli nyu wa na? 16Ku kanga odienge akawamamela, akaleki wulu vo ahendi, akalembia, ku vo wakalawo uma lu luudu lako etakataka la puta lu alimba. 17Dikambu so diakeyama le asi Juda la asi Ngirika tshe wakadjashi lʼEfeso. Vo tshe wakuki woma, ku lukumbu la Khumadiondjo Jesu lakatumbwama. 18Ndu wane waketawo ntundu, wakayi, wakashula kolo, wakati akambu wakawatshaka. 19Akanga wʼaloho efula wakasanganya abuku awo, wakatshumbi lu ashu wʼantu tshe. Lamʼakawali ushinga awo, vo wakedika uku tenyi dia fesa nunu akumi atanu. 20Okone diui dia Khumadiondjo diakaleki nfula wulu.

21Lʼokongo wʼakambu aso, Paulu akasanguya dia mbeta la Makedoniya lʼAkaya utsha la Jerusalema. Ndi akati ati: Lamʼayumuyala leko, dieli la mi dia mena ndu la Romo. 22Lamʼakandatumi wane wakukimanyiaka ahendi, Timote la Erasto, la Makedoniya, ndame akatshikala lʼAsiya yema.

Demetriyo la Etshudi wa Fesa Wambotombosha Antu

23Lu nshi sho, aki lundju efula, ne dia Mbuka keso. 24Ne dia untu omotshi lukumbu landi Demeteriyo, utshudi a fesa, lakatshaka tundju tufanyi la etemwelo kʼAratemi,19:24 “Aratemi” lu ngirika, eli “Diana.” akashaka asi ulimu ulimu efula. 25Ndi akasanganya la wane waki la wo ulimu pupu; akawatela ati: Wayone, nyu mbeyaka nyati: Ulimu one mbeli ongonyi asu. 26Nyu menaka ndu nyu mbukaka nyati: Aha lane la Efeso atu, keli lasuki la Asiya tshe, untu one Paulu ambetawuya antu efula, ambakadimula etema; ambuta ati: Dite-molatemola diakawatshi lʼanya, kema ditemolatemola. 27Aha ne dia ulimu asu utu mbayanga ndjala kolo, keli ndu ne dia etemwelo ka etemolatemola ka wuki ka umuntu Aratemi kuyanga ndjala anyanya. Wambuyanga mbunya lu lutumbu landi latotemolaka Asiya tshe, la wa la kete tshe.

28Lamʼakawuki diui so, vo wakadanganela la kele, wakahangohango wata vati: Aratemi wʼasi Efeso keli wuki! 29Okone usumba tshe wakaluli too lʼufutanu. Lamʼakawandi Ngayo la Aristarako, asi Makedoniya, atshindedi wa Paulu lu lokendo, vo wakamote lʼutema otoi lu dihuli diʼendelu kʼakambu. 30Lamʼakayangi Paulu mboto lene aki antu ako, ambeki wakusike. 31Antu a waki imotshi wa lʼAsiya, engenyi andi, wa-kutumela diui; wakosengasenga vati: Totoki lu dihuli diku diʼendelu. 32Wakahangohango amotshi okone, akina okone, ne dia ului tshe aki ufutanu utu. Leke lʼantu lakaleki wuki, kumbeya kene kakawamote. 33Vo wakatundja Alesandere uma lʼului wʼantu, ku asi Juda wakaweme la ntundu kʼantu. Alesandere akahahiya lunya, akalangi nteketa le wudja. 34Keli lamʼakaweyi vati: Usi Juda kendi, vo tshe wakahangohango pupu uku eshidi ehendi vati: Aratemi wʼasi Efeso keli wuki! 35Lamʼakalembohaya ufundji a lʼusumba ului wʼantu, ndi akawatela ati: Nyu asi Efeso, untu akona aheyi ati: Usumba wʼasi Efeso mbeli ulami wʼetemwelo kʼAratemi a wuki, ndu wa dive diʼekila diakako uma lʼulungu? 36Ne dia antu haweyi manguna dikambu ne, okone ndeka ololo nyu mbidjase ki. Tanyutshaki dikambu esadi. 37Nyu nyakayi la apami ane lindu, waha apotodi a diango uma lu etemwelo, kuyanga atengi wa etemolatemola kasu ka umuntu. 38Okone naka Demeteriyo la asi ulimu andi weko la untu dikambu, nshi ya numbula yeko, ndu embuledi weko. Vo watufundanaki. 39Keli lamʼayunyuyala la dikambu dikina, wayudishidiya lu lusanganya latutusanganaka uku etshelu kasu. 40Mete, shu tambuyanga nsongwamela ne dia lundju lʼelo, ne dia nduku diui diakayadi, diukukisu mvuta lu dikambu diakamotshi ului one. 41Lamʼakandashili mvuta aui aso, ndi akadianganya.

ETSHA WA ATUMAMI 20

Paulu Ambunela Uma lʼEfeso, Ambutsho la Makedoniya, ndu la Ngirika

1Lamʼakashili lundju, Paulu aketi ambeki, akakokomiya, ku ndi akalakana la wo, akunela utsha la Makedoniya. 2Lamʼakandakindula lu beke so, lamʼakandakokomiya, ndi akakumi la Ngirika. 3Ndi akadjase leko ngondo shatu. Lamʼakandalangi nteho utsha la Suriya, asi Juda wakutshwela sheki. Lu dikambu diako, mbakandasanguya dia nkalula, la mbeta uma la Makedoniya. 4Wane wakutshindela utsha lʼAsiya, waki Sopatere, usi Beroya, onʼa Purusi; Aristarako, la Sekundo, asi Tesalonika; Ngayo, usi Derebe, la Timote; Tukiko la Torofimo, asi Asiya. 5Keli antu aso wakatatela ntsho ntundu, wakatutukunga la Toroa. 6Lamʼaketi nshi ya Ma Diaha la Edya, shu takunela uma la Filipi, takoto lu watu, lu nshi tshanu takakumi la Toroa, lene akiwo; takahangi nshi esambeli leko.

La Toroa, Paulu Ambulula Eutuko

7Lushi la ntundu la lubingu, shu takasangana dia mbatula ma. Paulu akasanguya munela lamʼayuhuto unya, ndi akateketa la wo. Ndi akatetemala nteketa edja ndu lʼasa ndeki. 8Lu luudu la ladiku lakawasangana, aki atala efula. 9Olongo a pami omotshi, lukumbu landi Eutuko, akadjashi lu didishi, anyingonyingo la djo ya wulu. Lamʼakatetemala Paulu nteketa, djo yakawundi. Ndi akako uma lu luudu la satu la ladiku, wakotongona ambuvo. 10Ku Paulu akahulo, akasembemala ladiku diandi, akukhumbatela; akati ati: Tanyudjaki lufungusu, ndi eki la lumu. 11Lamʼakandambela ntu, ndi akatula ma, akali. Ndi akateketa la wo etenyi kʼutali, edja ndu lamʼakahuto unya, ku ndi akunela. 12Vo wakayi la olongo a pami la lumu, wakasalangana efula.

Paulu la Mileto

13Shu takatatela ntsho lu watu, takateho utsha lʼAsose. Shu takakani shati: Tayutakudi Paulu leko, uku akandati. Ndi akalangi mbeta uma leko lʼekulu. 14Lamʼakandatutani lʼAsose, shu takawotshiya lu watu, takakumi la Mitulene. 15Shu takunela uma leko lu watu. Lamʼakahuto unya, shu takakumi lasuki la Kiyo. La wedi a pindju ntu, shu takakumi la Samose. Lomo unya, shu takakumi la Mileto. 16Paulu akasanguya ndekana Efeso lu watu. Ndi kunanga nshisha etena lʼAsiya, ne dia ndi akasamanya dia nkuma la Jerusalema lushi la Pentekosta, naka nkukaka.

La Mileto, Paulu Ambulakana la Dikumanyi Dia Uma lʼEfeso

17Lamʼaki Paulu la Mileto, ndi akatumi diui lʼEfeso, aketi dikumanyi diʼekelizia. 18Lamʼakawayi le ndi, ndi akawatela ati:

Nyame mbeyaka wuhu wakimi lʼatei anyu umaka lushi lakamakamela lʼAsiya, edja ndu kakiane. 19Dimi lakatshelaka Khumadiondjo ulimu la ndjakitshakitsha, la asoi lu ashu, ndu lʼehimba wakayi le mi, ne dia tuseki tʼasi Juda. 20Dimi kumbuka woma wa nyutela akambu tshe wʼololo, lakanyetshaka lʼatei wʼantu, ndu lu luudu la luudu, 21latela asi Juda ndu asi Ngirika dia nkadimula etema le Unyashungu, la dia mbetawo khumesu Jesu Kristu. 22Nyendi, kakiane dimi lambutsho utsha la Jerusalema lʼutema ukelekami: haleyi akambu wayutuyala la mi leko. 23Tshikima Nyuma kʼOlolo kamenya ati: Kanu la asui mbakukungela lʼusumba la usumba. 24Keli dimi halali lumu lami nti: Ushinga a wulu mbelo, dia nshidiya esakelu kami ka luwangu,20:24 2 Tim. 4:7. la ulimu wakamalungula uma le Khumadiondjo Jesu, dia mvuta lukumu lʼololo la ngandji ka mamba ka Unyashungu. 25Nyulungi, kakiane dimi mbeyaka nti: Nyu tshe wakamakindula lʼatei anyu, lanyusambisha lukumu lʼololo la diulelu dia Unyashungu, hanyuyena elundji kami ntu. 26Okone dimi lambunyutela elo nti: Dimi laha la unungu wa dikila dianyu, nyu tshe, 27ne dia dimi kumbuka woma wa nyutela yimba tshe ya Unyashungu. 28Nyuyalami ololo, ndu nyulami limba tshe ololo, wako wakanyukitsha Nyuma kʼOlolo alami, dia nyu ndesha ekelizia wa Khumadiondjo, wakandasumbi la dikila diandi. 29Dimi mbeyaka nti: Lamʼayumutsho, ndjaundu ya pangu yayoto lʼatei anyu, yayumana limba tshe. 30Antu wayunela uma lʼatei anyu nyame, wayutela antu akambu waha mete, dia nkutula ambeki lʼokongo awo. 31Okone nyewo, nyuho lamʼakimi la nyu deku satu. Dimi kunkimo dia nyokokomiya ndu lʼutshu ndu la yanyi la asoi lu ashu. 32Kakiane, dimi lambunyukimo lʼanya a Unyashungu, la lu diui dia ngandji kandi ka mamba, dieya nyudia, la nyusha ukito kame la wane tshe wambukidiama. 33Dimi konkomiya fesa ya untu, paunyi kana ahondo. 34Nyame mbeyaka nyati: Anya ane wakankimanyia, ndu wakakimanyia wane waki la mi la diango diakamahumbi. 35Dimi lambunyenya djimbitelu lu akambu tshe. Dieli la nyu dia nkamba okone dia nkimanyia akanga a weodu, la dia nyu mbuho aui wa Khumadiondjo Jesu, wakandati ndame ati: Mbisha, ambuleka nungula otshoko. 36Lamʼakandashili mvuta osoku, ndi akakhuse adui, akalombe la wo tshe. 37Vo tshe wakaleli wulu, wakakhumbatela Paulu lu kingu, wakanonana la ndi. 38Vo wakaleki nyanga, ne dia diui diakandawatela ati: Hanyuyena elundji kami ntu. Vo wakutshindela lu watu.

ETSHA WA ATUMAMI 21

Paulu Ambunela Ntu, Ambukuma la Tura

1Lamʼakatatshiki, shu takatshu lu watu, takasimbo utsha la Kose. La wedi a pindju, shu takakumi la Rodo, takunela uma leko utsha la Patara. 2Lamʼakatatani watu watateho utsha la Fonikiya, shu takoto loko, takatshu. 3Lamʼakatenyi Kupiro, shu takatshiki lu lunya la lomoso, takatshu utsha la Suriya, takakumi la Tura, ne dia wakalangi ntundja diango leko. 4Shu takatani ambeki, ku taketama leko nshi esambeli. Vo wakatela Paulu uma le Nyuma, diaha ndi mbikamela la Jerusalema. 5Lamʼaketi nshi sho, shu takunela, takatshu. Vo tshe, ndu amantu ndu anʼawo, wakatutshindela, edja ndu lamʼakatatumbi uma lʼusumba. Shu takakhuse adui lʼumamu wʼashi, takalombe, takalakana. 6Shu takoto lu watu, ku vo wakakalula.

Paulu la Kayisariya; Angabo Ambuwutela Ati: Asi Juda Wayukukeleka

7Lamʼakatashidiya lokendo lasu uma la Tura, shu takakumi la Potolemai. Shu takasha anyasu moyo; taketama la wo lushi otoi. 8La wedi a pindju, shu takunela, takayi la Kayisariya. Shu takoto lu luudu lʼusambisha Filipo,21:8 Etsh. 6:5; 8:5. laki omotshi a lʼesambeli, takahangi lakandi. 9Untu ako aki la ana amantu anei wa dimuma, wakataka akambu wahatayi. 10Lamʼakatahangi leko nshi motshi, umvutshi omotshi, lukumbu landi Angabo,21:10 Etsh. 11:28. akayi uma la Judiya. 11Lamʼakandayi le su, ndi akose uya wa Paulu, akayakelekawo lʼekulu ndu lʼanya. Ndi akati ati: Nyuma kʼOlolo kata ati: Asi Juda wa la Jerusalema way ikeleka kanga uya one wuhu one, wayukimo lʼanya wʼasi wedja. 12Lamʼakatuki akambu aso, shu la akanga a dihuli diako takasengasenga Paulu diaha ndi ntsho la Jerusalema. 13Paulu akâkaluya diui ati: Ukundi atshanyu okone, walelanyu, wambatanyu asulu? Dimi hayalongosola dia ntukelekama tshu, keli ndu dia dimi ntuvo la Jerusalema lu lukumbu la Khumadiondjo Jesu. 14Lamʼakandaseke mbetawo, shu takalembohala; takati shati: Lulangu la Khumadiondjo latshami!

Paulu Ambunela Uma la Kayisariya Utsha la Jerusalema

15Lʼokongo a nshi sho, shu takalongosola diango diasu, takatshu utsha la Jerusalema. 16Ambeki amotshi wʼuma la Kayisariya wakatshu la su, wakayi la usi Kupiro, lukumbu landi Manasona, umbeki wʼedjedja, dia shu ntuhanga lakandi.

Paulu la Jerusalema

17Lamʼakatakumi la Jerusalema, anyasu wakatulungula la ongenongeno. 18La wedi a pindju, Paulu akatshu la su le Jakoba. Dikumanyi tshe diaki laawo. 19Lamʼakandashili mbasha moyo, ndi akasanyia akambu tshe wakutshela Unyashungu lʼulimu andi lʼatei wʼasi wedja. 20Lamʼakawuki dikambu so, vo wakatumbula Unyashungu. Vo wakawutela vati: Unyasu, we ambena asi Juda nunu efula waketawo. Vo tshe weko la saki kʼelembe. 21Vo wambuka vati: We atetshaka asi Juda tshe wa lʼatei wʼasi wedja dia nseka Mose; ambuwatela wati: Tanyahemiaki anʼanyu ehekeli. Tanyuyelaki ditshelu dia ntundu. 22Katshasu na? mete vo wayusangana lamʼayuwuka vati: We ambuya. 23Okone utshi uku ayangasu nkutela. Shu teko la apami anei weli la dokoloko. 24Uwaose, uyaedia la wo, uwafuteli, keli wanya divu lʼete awo.21:24 Wal. 6:13-21. Okone antu tshe wayeya vati: Lukumu laye lakawuki, laha mete. Ku vo wayeya vati: We atusimboka, atukitanyiaka elembe. 25Keli ne dia asi wedja waketawo, takatumeia mukanda. Shu takawatela shati: Nyukili diango diadiakelawo dikishi, nyukili ndu dikila, la nyama yakawahini lu kingu, la munanyi.21:25 Etsh. 15:29. 26Ku Paulu akose apami ako. La wedi a pindju, ndi akayedia kame la wo, akoto lu etemwelo, akatela embadi dia ekukelu ka nshi ya ndjaedia. Ndi akatshikala edja ndu untu lʼuntu akashidiya elambu wakawakimoka le Unyashungu.

Asi Juda Wambunda Paulu lu Etemwelo; Olombodi wʼAlimbi Ambuwamela

27Lamʼakayangi nshi esambeli nshila, asi Juda wʼuma lʼAsiya, lamʼakawenyi Paulu lʼetemwelo, wakatombosha ului wʼantu, ku vo wakawundi. 28Vo wakahangohango vati: Apami wʼasi Isariyele, nyutukimanyia! Ndʼone latetshaka antu tshe lu ahuli tshe. Ndi atonyolaka wudja asu, la elembe ndu dihuli ne. Ndi akayi la asi Ngirika lu etemwelo, ambulanya dihuli ne diʼekila ladiku diʼakambu aso, 29ne dia vo wakatawenyi la Torofimo,21:29 Etsh. 20:4. usi Efeso, lʼusumba, ku wakakani vati: Paulu akawotshiya lu etemwelo. 30Lundju lakayala lʼusumba wʼutundu, antu wakamote. Vo wakandi Paulu, wakukutula uma lʼetemwelo; kemʼedja, kuki yakadihama. 31Lamʼakawayangi mbudiaka, lundju laki lʼusumba wʼutundu wa Jerusalema lakukema le olombodi wʼalimbi. 32Kemʼedja, ndi akose alimbi la alami, akatshu le wo esadi. Lamʼakawenyi olombodi la alimbi vo wakakimo nkomola Paulu. 33Ku olombodi akasukana, akawundi. Ndi akati dia vo mbukeleka la molola ehendi. Ndiakambula ati: One na? Utshindi na? 34Lʼatei wʼului wʼantu, amotshi wakahangohango wuhu one, akina wuhu one. Lamʼakindi kumbeya dikambu ololo ne dia lundju, ndi akatidia vo mbela lu luudu lʼalimbi. 35Lamʼakandakumi lu kibandelu, alimbi wakawembe ne dia ngala kʼantu, 36ne dia ului wʼantu wakayayakaka lʼokongo, wayahangohango vati: Wudiaki!

37Lamʼakawayangi mboto la Paulu lu luudu lʼalimbi, ndi akambula olombodi ati: Dimi la wulu wa nkutela diui? Olombodi akawumbula ati: We mbeyaka oteketa wʼasi Ngirika? 38Aha usi Edjibitu keye, lakatombosha antu ntundu, ndu lakatshu lʼantu nunu nei, wetawo vati: Atomboki, lʼusui? 39Paulu akati ati: Usi Juda kemi, usi Taraso ka la Kilikiya, laha usi usumba wʼanyanya. Dimi lambukosengasenga nti: Mvuteli antu ane diui. 40Lamʼakandetawo, Paulu akemala lu kibandelu, akahahiya antu lunya. Lamʼakawalembohala tshe, ndi akawatela lʼoteketa wʼasi Heberu ati:

ETSHA WA ATUMAMI 22

1Analingu la wapapa, nyuki aui ami, walangami nyutela kakiane!

Paulu Ambutela Antu Okone Akandakadimula Utema

2Lamʼakawuki Paulu awatela lʼoteketa wʼasi Heberu, vo wakaleki nembohala. Ku ndi akati ati:

3Usi Tuda kemi, lakuto la Taraso ka la Kilikiya. Dimi lakuli lʼusumba one lʼekulu wa Ngamaliyeli;22:3 Etsh. 5:34-39. wakambetsha elembe a watshesu wulu. Dimi laki la saki lu dikambu dia Unyashungu, uku wenyu la to, nyu tshe elo. 4Dimi lakasuya antu wa lu Mbuka kene pulu ndu lu nyoi. Dimi lakakeleka apami la amantu, lakawadji lu kanu. 5Ndu olombedi a ladiku eko omenyi, ndu dikumanyi tshe. Dimi lakalungula mikanda uma le wo utsha le anyasu, lakatshu utsha la Damaseke dia mbela ndu waku waki leko lʼekodi uya la Jerusalema, dia ndjasuya.22:5 Etsh. 8:3; 26:9-11.

6Lamʼakamatatshokaka osoku, lamʼakamakumi lasuki la Damaseke, unya aki lʼatei wʼote; usasi a wulu uma lʼulungu akampetela shashimuya. 7Dimi lakako la kete, lakuki diui diamvutela ati: Saulu, Saulu, ukundi ansuyaye na? 8Dimi lakûkaluya diui nti: Khumadiondjo, we na? Ndi akamvutela ati: Dimi Jesu yʼusi Nazareta kasuyaye. 9Wane waki la mi, wakenyi usasi mete, keli vo kumbuka diui dia one lakateketaka la mi. 10Dimi lakawumbula nti: Khumadiondjo, kayumutsha na? Khumadiondjo akamvutela ati: Unela, utshu utsha la Damaseke. Vo wayukutela akambu tshe leko, wakawakosonwela dia we ntsha. 11Dimi kumbeya mena ne dia usasi ako a wulu. Wane waki la mi, wakanombola la lunya. Okone dimi lakakumi la Damaseke.

12Pami kemotshi aki leko, lukumbu landi Ananiya, lakakitanyiaka elembe, laki la lukumu lʼololo lʼatei wʼasi Juda tshe waki leko. 13Ndi akayi le mi, akemala lasuki la mi; akamvutela ati: Onalingu Saulu, nsena. Ku lʼushidi ako, dimi lakasene, lakawenyi. 14Ndi akati ati: Unyashungu a watshesu kambukosonola, dia we mbeya lulangu landi, la dia we mena One lʼOlolo, la dia we mbuka diui uma lʼunyo andi. 15We ayenya antu tshe akambu wakayenyi la wakayuki. 16Akayakungi na? Unela, ubatizami, uyaotsha kolo yaye, eti lukumbu la Khumadiondjo.

17Lamʼakamakalula la Jerusalema, lamʼakamalumbaka lʼetemwelo, dimi lakako la yimbatshimba. 18Dimi lakawenyi amvutela ati: Usamanya, umo esadi uma la Jerusalema, ne dia vo hawetawo diui diamvutaye. 19Dimi lakati nti: Khumadiondjo, vame mbeyaka okone akamadjaka waku waketawoka lu kanu, la okone akamakomolaka lu temwelo tshe. 20Lamʼakawadiaki Stefano, undakanyi a dikambu diaye, dimi lakemala lasuki, laketawo dikambu diako; lakalami ahondo a wane wakuaiaki.22:20 Etsh. 7:58. 21Ndi akamvutela ati: Umo. Dimi layukutuma etali le asi wedja.

Antu Wambuhangohango Dia Ndjaka Paulu

22Vo wakuhukama edja ndu lu diui so, ku wakahangohango vati: Nyunya untu one la kete! Kema ololo ndi ndjala la lumu. 23Vo wakahangohango, wakakulula ahondo awo; wakafumbula ditshu lʼulungu. 24Lamʼakawatshi osoku, olombodi a wuki wʼalimbi akati dia vo ndja la ndi lu luudu lʼalimbi, la dia mbokomola eshingo, dia ndi mbeya okone wakawahangohangoki lu dikambu diandi. 25Lamʼakawukeleka ekodi, Paulu akambula olombodi wʼalimbi, lakemadi lasuki la ndi, ati: Nyu la wulu wa nkomola untu leli usi Romo eshingo, la ntundu watawamia? 26Lamʼakuki olombodi wʼalimbi diui diako, ndi akatshu le olombodi a wuki wʼalimbi; akawutela ati: Ayangaye ntsha na? ne dia untu one eko usi Romo. 27Olombodi a wuki akayi, akawumbula ati: Umvuteli, usi Romo keye? Ndi akati ati: Elu. 28Olombodi a wuki akâkaluya diui ati: Dimi lakasumbi wulu wa ndjala usi Romo la falanga efula. Paulu akawutela ati: Dimi leko usi Romo umaka eutwelu. 29Kemʼeuja, wane wakalangi mbumbula, wakutshiki. Ndu olombodi a wuki aki la woma lamʼakandeyi ati: Usi Romo kendi, ne dia ndi akukeleka.

Paulu Ambuhanda Ne Dia Usi Romo Kendi

30La wedi a pindju, olombodi a wuki wʼalimbi akalangi nshihudia dikambu diakosongwela asi Juda, akukelekula. Ndi akati dia elombedi a waki la embadi tshe nsangana. Ndi akayi la Paulu, akaweme la ntundu kawo.


 

ETSHA WA ATUMAMI 23

Paulu la Ntundu kʼEmbadi

1Paulu akendi embadi tee, akati ati: Anyasu, dimi lakayala la khumʼutema kʼololo lu ashu wa Unyashungu edja ndu elo. 2Ananiya, olombedi a ladiku, akatela wane wakemala lasuki la ndi dia vo mbokomola lʼunyo. 3Ku Paulu akawutela ati: We eheli kukitami pembe,23:3 Mat. 23:27-28. Unyashungu ayukokomola! We ambudjase ne dia numbuyami uku elembe, keli ukundi awatelaye dia vo nkomolami, aha uku elembe? 4Wane wakemadi lasuki, wakawumbula vati: We ambotenga olombedi a ladiku wa Unyashungu? 5Paulu akati ati: Anyasu, dimi kumbeya nti: Olombedi a ladiku mbendi; ne dia ambufundama ati: Toteketaki diui dia kolo lu dikambu dia umbuledi a wudja aye.23:5 Etum. 22:28.

6Keli lamʼakeyi Paulu ati: Amotshi waki Asaduke, la akina waki Afarise, ndi akahangohango lʼelumbwelu ati: Anyasu, dimi leli Ufarise,23:6 Etsh. 26:5; Fil. 3:5. onʼa Afarise, ne dia elungamelu la eulwelu kʼuma lu nyoi mbanumbuyanyu. 7Lamʼakandati osoku, tamu takayala lʼasa Afarise la Asaduke. Ului akatana. 8Ne dia Asaduke watutaka vati: Kema eulwelu,23:8 Mat. 22:23; Mak. 12:18; Luk. 20:27. kema ondjelo kuyanga edimu. Keli Afarise watetawoka akambu ako ahendi. 9Lundju efula lakayala. Afundji amotshi wa lu leke lʼAfarise wakemala, wakadji tamu vati: Shu hatenyi untu one la dikambu dia kolo. Naka edimu kana ondjelo akateketa la ndi, ku ngandi? 10Lamʼakayala lundju efula osoku, olombodi a wuki wʼalimbi akuki woma, ati: Wayatshatsha Paulu. Ndi akatela alimbi dia vo ntsho, la ntuwunya uma lʼatei awo, la dia vo ndja la ndi lu luudu lʼalimbi. 11Khumadiondjo akemala lasuki la ndi lʼutshu, akati ati: Ongenengene. Uku akayati dikambu diami la Jerusalema, okone dieli la ye dia dita ndu la Romo.

“Hatuli, Hatono, Tshikima Tambudiaka Paulu”

12Lamʼakahuto unya, asi Juda wakasangana, wakasangi lulimi; wakatshiki etunyi vati: Shu hatuli, hatono, tshikima tambudiaka Paulu. 13Wakaleki akumi anei, mbakasangi lulimi osoku. 14Vo wakayi le elombedi a waki la dikumanyi, wakati vati: Tambusanga lulimi lasu; tambutshika etunyi wulu shati: Hatunganela engo, tshikima tambudiaka Paulu. 15Kakiane nyu la embadi, nyuteli olombodi a wuki wʼalimbi dia ndi ndja la ndi le nyu, uku wane wayanga mumbula dikambu okoke. La ntundu ndi atayi lasuki, shu tayuyalongosola dia mbudiaka.

Onʼa Kadiya Paulu Ambushula Sheki ya Ndjaka Paulu

16Keli onʼa kadiya Paulu akuki dikambu diʼehulamelu kawo, akayoto lu luudu lʼalimbi, akatela Paulu. 17Paulu aketi olombodi omotshi wʼalimbi, akawutela ati: Tshoka la olongo one le olombodi a wuki, ne dia ndi la diui dia mbutela. 18Ku ndi akawose, akayi la ndi le olombodi a wuki wʼalimbi; akawutela ati: Paulu, usi lukanu, kumbetshi. Ndi konombi dia ndja la olongo one le ye; ndi la diui dia nkutela. 19Olombodi a wuki akukimela lu lunya, akatshu la ndi sheki. Ndi akawumbula lu usheshe ati: Diui diakona diayangaye mvutelami? 20Ndi akati ati: Asi Juda wambusanga lulimi dia nkolomba dia we ndja la Paulu lui lʼelumbwelu, uku wati: Mbumbuli dikambu diandi okoke ntu. 21Okone tetawoki diui diawo. Ne dia apami wuleki akumi anei wa lʼului awo wambuhulamela, wakasangi lulimi; wakatshiki etunyi vati: Hatuli, hatono, tshikima tambudiaka. Kakiane vo wa-mbuyalongosola, wambukunga diui uma le ye. 22Ku olombodi a wuki akatumi olongo ako, akokokomiya ati: Tutelaki nduku untu akambu aso wumvutediye.

Wambulawuya Paulu Utsha la Kayisariya

23Ku olombodi a wuki wʼalimbi aketi elombodi ehendi, akawatela ati: Nyolonge alimbi kama hyendi dia ntsho la Kayisariya, ndu alimbi watahemaka lu falasa akumi esambeli, la akanga wʼakonga kama hyendi, kawuneli lʼutshu one lʼeshidi divwa. 24Ndi akawatela ndu diambosa falasa ya mbahemia Paulu, la dia mbukumia ololo le umbuledi Felika. 25Ndi akafundi mukanda ati:

Mukanda wa Kolodiyo Lusiya le Felika

26Kolodiyo Lusiya ambutumela shakasaka, umbuledi Felika, raoyo. 27Asi Juda wakandi pami kene, wakayangi mbudiaka. Keli dimi lakayi le wo la alimbi, lakushimbela lamʼakameyi nti: Usi Romo kendi. 28Ne dia lakalangi mbeya dikambu diakawosongwela, lakayi la ndi lʼelumbwelu kawo. 29Dimi lakutani wakosongwela dia akambu wʼelembe awo, keli aha la dikambu dia ndi mvo, kana dia mbidjama lu lukanu. 30Lamʼakameyi nti: Wambutshwela pami kene sheki, diako mbamumutuma le ye esadi. Dimi lakatela asongwedi andi dia vo ndja la ndjosongwela la ntundu kaye.

Wambulama Paulu lu Luudu la Herode

31Okone alimbi wakose Paulu, uku akawawatela, wakatshu la ndi lʼutshu utsha lʼAtipatiri. 32Keli la wedi a pindju, vo wakatshiki wane waki lu falasa dia ntsho la ndi, wakakalula lu luudu lʼalimbi. 33Lamʼakawakumi la ndi la Kayisariya, vo wakasha umbuledi mukanda, wakeme Paulu la ntundu kandi. 34Lamʼakandali mukanda, ndi akambula leke landi. Lamʼakandeyi ati: Uma lu leke la Kilikiya kendi, 35ndi akawutela ati: Dimi layuka dikambu diaye ololo lamʼayuya asongwedi aye. Ndi akati dia vo mbulama lu luudu la wuki la Herode.

ETSHA WA ATUMAMI 24

Wambeta Paulu; Teretulo Ambosongwela

1Lamʼaketi nshi tshanu, olombedi a ladiku Ananiya akayi la dikumanyi dimotshi, ndu la oteketshi, lukumbu landi Teretulo. Vo wakasongwela Paulu le umbuledi. 2Lamʼakaweti Paulu, Teretulo akatatela mbosongwela ati:

Shu la ongenongeno ne dia ki keli la su uma le ye, we shakasaka Felika, ne dia akambu wa kolo a wudja one wambuluwana uma lʼewu kaye. 3Shu tambetawo dikambu ne lu wehu tshe ndu ahuli tshe; tambukuka lusaka otekoya. 4Ne dia halangi nkuhekuya la aui efula, dimi lambukosengasenga dia we mbetawo ntukela aui tshitshe. 5Ne dia takatani pami kene, kanga ngala, ambotombosha asi Juda tshe wa lu kete tshe; ndi keli dihuka dia leke lʼasi Nazareta. 6Dikambu dikina, ndi akahimbi nsuwula etemwelo, ku shu takawundi, takayangi mbulumbuya uku elembe asu. 24:6 “24:7-8a” = Keli olombodi … ntundukaye.” = nfundamaka la tshina dia page, aha lʼatei lu abuku amotshi. 7Keli olombodi a wuki wʼalimbi, Lusiya akayi, akatohotolandi la wulu, 8akatela wane wakosongwela, dia vo ndja la ntundu kaye. Lamʼayuyuwumbula, we ayeya akambu tshe wakatosongwela.

9Ndu asi Juda wakosongwela, wakati vati: Akambu aso mete kewo.

Paulu Ambuyateketela

10Umbuledi akenya Paulu la lunya ati: Utaka. Ku Paulu akati ati:

Dimi mbeyaka nti: We aya umbadi a wudja one deku efula, dimi layuyateketela lʼongenongeno. 11Dieli la ye dia mbeya wati: Nshi yakamatshu la Jerusalema dia ntotemola Unyashungu, kundeka dikumi la hyendi. 12Vo kuntanami ladja lʼuntu tamu, kana latombosha ului wʼantu lu etemwelo, kuyanga lu temwelo, kuyanga lʼusumba. 13Vo haweyi nshikike akambu wansongwelawo kakiane. 14Keli dimi lambukushwela dikambu ne nti: Dimi latotemolaka Unyashungu a watshesu lu yediko ya Mbuka, ketawo vati: Otemwelo. Latetawoka akambu tshe weli lu elembe, ndu wakafundi amvutshi. 15Dimi lambulungamela Unyashungu, uku ambulungamela antu ane vati: Eulwelu kʼantu wʼololo la antu wa kolo uma lu nyoi kayuyala. 16Dimi lambuyasutshasutsha nshi tshe dia ndjala la khumʼutema kʼololo le Unyashungu ndu le antu. 17Lamʼaketi deku dimotshi, dimi lakayi la diango dia ketshi dia mbisha wudja asu, la dia ndjulambula ulambu. 18Lamʼakamatshaka osoku, asi Juda wakantani lu etemwelo lakashidi mbediama; dimi taki lʼului wʼantu, kuyanga la lundju.24:18 Etsh. 21:17-28. Keli asi Juda amotshi wʼuma lʼAsiya waki leko — 19diaki la antu aso dia ndia le ye, dia nsongwelami, naka vo la mi dikambu. 20Naka aha osoku, antu aso wati dikambu dia kolo, diakawantani la dio lamʼakamemala la ntundu kʼembadi. 21Paka diui diame mbakamahangohango lamʼakamemala lʼatei awo nti: Wambunumbuya lu ashu anyu elo dia eulwelu ka wavo.24:21 Etsh. 23:6.

Felika Ambutshika lu Lukanu

22Keli Felika, lakaleki mbeya dikambu dia Mbuka keku, akakungia ati: Lamʼayuya olombodi a wuki wʼalimbi Lusiya, dimi layusambula dikambu dianyu. 23Ndi akatela olombodi dia mbulama, keli aha mbusha ulimu kuyanga nshimba engenyi andi mbukimanyia.

24Lamʼaketi nshi motshi, Felika akayi la wadendi Dusila, laki usi Juda, aketi Paulu dia vo mbuka dia mbetawo kandi le Kristu Jesu. 25Lamʼakandataka ne dia akambu wʼololo, la ndjakimela, la elumbwelu kayayi, Felika akuki woma. Ndi akati ati: Tukutsho. Lamʼayumutana etena kʼololo, dimi layuketa. 26Ndi akalungamela ati: Paulu ayumbisha falanga. Dia dikambu so, mbakandawetaka tena la tena dia nsawula la ndi. 27Keli lamʼaketi deku pendi, Porokiyo Festo akakiti Felika. Felika akatshiki Paulu lu lukanu, ne dia ndi akalangi nemiama le asi Juda.

ETSHA WA ATUMAMI 25

Paulu la Ntundu ka Festo

1Lamʼakakumi Festo lu leke landi la kete, lʼokongo a nshi shatu, ndi akunela uma la Kayisariya, akatshu utsha la Jerusalema. 2Elombedi a waki la antu a waki wʼasi Juda wakasongwela Paulu le ndi. Vo wakesengasenga, 3wakôlombe dia ndi mbatshela ololo dia ntuma Paulu uya la Jerusalema. Vo wakasanguya ntuhulamela lu mbuka dia mbudiaka. 4Keli Festo akâkaluya diui ati: Paulu ayulamema la Kayisariya: ndu ati: Dime lutsha ntsho leko. 5Wane weli la wulu lʼatei anyu, kawutshu la mi. Naka pami kene eko la munga, kawutosongwele.

Paulu Ambukungela Kayisa

6Lamʼakadjase Festo lʼatei awo, kumbeta nshi enanei kana dikumi, ndi akatshu utsha la Kayisariya. La wedi a pindju, ndi akadjase lʼelumbwelu, akati dia vo ndja la Paulu. 7Lamʼakandayi, asi Juda waki uma la Jerusalema wakemala wudingi, wakosongwela akambu wa wulu efula, wakiwo kumbeya nshikike. 8Paulu akayangunela ati: Dimi komonyola elembe wʼasi Juda, kuyanga etemwelo, kuyanga Kayisa. 9Keli Festo akalangi nduwana le asi Juda, akâkaluya Paulu diui ati: We ayetawo ntsho la Jerusalema dia ntulumbuyama akambu ane lu ashu ami? 10Keli Paulu akati ati: Dimi lambemala la ntundu kʼelumbwelu ka Kayisa, dihuli diahimbami numbuyama. Dimi kuntshela asi Juda kolo, weme mbeyaka dikambu so. 11Naka utshi wa kolo mbemi, naka lakatshi dikambu diukukimi mvo, dimi halaseke mvo. Keli lamʼayuyala akambu ane wansongwelawo waha mete, untu heyi nkimomi le wo ne dia mbangenyangenya. Dimi lambukungela Kayisa. 12Festo akambwana la embadi; akawutela ati: We ambukungela elumbwelu ka Kayisa; we ayutsho le Kayisa.

Festo Ambutela Angiripa Dikambu Dia Paulu

13Lamʼaketi nshi motshi, khumʼekanga Angiripa la Berenika wakayi la Kayisariya, dia ndjemula Festo. 14Lamʼakawayala leko nshi efula, Festo akatela khumʼekanga dikambu dia Paulu ati: Untu omotshi eko lindu, lakatshiki Felika. 15Lamʼakimi la Jerusalema, elombedi a waki la dikumanyi diʼasi Juda wakamvutela dikambu diandi, wakanombe dia dimi mbamia. 16Dimi lakâkaluya diui nti: Asi Romo kema la etshelu ka nkimo untu ntundu one losongwediwo atayala la ntundu ka wane wosongwedi, ndu atayateketela dikambu diakawosongwela. 17Lamʼakawasangana lindu, dimi kuntshimbatshimba. Keli la wedi a pindju, dimi lakadjase lʼelumbwelu, lakati dia pami kako ndja. 18Lamʼakemala wane wakosongwela, vo kumbosongwela akambu wa kolo uku akamakanaka. 19Keli vo wakambwana diʼakambu wʼotemwelo awo, la dia untu omotshi Jesu lakavu; keli Paulu mvutaka ati: Ndi eko la lumu. 20Dimi lakakanana lama nsambula akambu ako. Lakawumbula nti: We ayetawo ntsho la Jerusalema la ntulumbuyama akambu ane leko? 21Keli Paulu akalangi dikambu diandi nsambwama paka le khumʼekanga ka wuki Angusta. Ku dimi lakati nti: Wutshunge, edja ndu lamʼayumutuma le Kayisa. 22Angiripa akatela Festo ati: Ndu dimi nangaka mbuka diui dia untu oso. Festo akati ati: We ayuka diui diandi lui.

23La wedi a pindju, Angiripa la Berenika wakayi eyelu ka lukumu. Vo wakoto lʼelumbwelu kame la elombodi a waki wʼalimbi ndu la dihangamendi dia lʼusumba. Festo akati diui, ku wakayi la Paulu. 24Festo akati ati: Khumʼekanga Angiripa, la apami tshe weli la su lone, nyu menaka untu one, asi Juda tshe wakosongwela la ntundu kami la Jerusalema ndu lindu. Vo wakati vati: Kema ololo ndi ntshikila la lumu ntu. 25Keli dimi kumbutana la dikambu dia ndi mvo. Lamʼakandakungela elumbwelu ka khumʼekanga ka wuki Angusta, dimi lakasanguya dia mbutuma le ndi. 26Dimi kema la diui dia shikaa dia nfundela khumemi dikambu diandi. Dia dikambu ne mbuyemi la ndi la ntundu kanyu, ndjekaleka la ntundu ka khumʼekanga Angiripa. Lamʼayundulumbuya, dimi layuyala la diui dia nfunda. 27Ne dia lambukana nti: Kema ololo ntuma usi lukanu, ku aha mvuta akambu wakawosongwela.

ETSHA WA ATUMAMI 26

Paulu Ambuyateketela la Ntundu kʼAngiripa

1Angiripa akatela Paulu ati: We la wulu wa mvuta dikambu diaye. Ku Paulu akahahiya lunya, akayateketela ati:

2Khumʼekanga Angiripa, dimi la ongenongeno elo dia ndjateketela la ntundu kaye, diʼakambu tshe wakansongwela asi Juda. 3Dimi lambongenangena utamanya, ne dia we mbeyaka ditshelu diawo la tamu tawo ololo. Okone lambukosengasenga dia we mpukama diui diami okoke.

4Asi Juda tshe mbeyaka ditshelu diami umaka dikenda, diaki la mi uma lʼetatelu lʼatei a wudja asu, ndu la Jerusalema. 5Lamʼalangawo mvuta diui, vo wambumbeyaka edja vati: Ufarise26:5 Etsh. 23:6; Fil. 3:5. mbendi, lakaleki ndjela akambu wʼotemwelo asu wulu. 6Kakiane, dimi lambemala lane dia numbuyama ne dia elungamelu ka daka diakalaki Unyashungu tshesu. 7Wedja asu dikumi la ehendi watukambelaka Unyashungu ulimu wulu ndu lʼutshu ndu la yanyi. Vo watulungamelaka vati: Tayulungula daka diako. Khumʼekanga, asi Juda wambonsongwela ne dia elungamelu kene! 8Ukundi akananyu nyati: Dio dieko dikambu diaheyana mbetawoma ati: Unyashungu atululaka wane wakavu?

9Mete, ndu dimi lakakani nti: Dieli la mi dia ntshela lukumbu la Jesu yʼusi Nazareta akambu wa kolo efula. 10Dimi lakatshaka okone ndu la Jerusalema. Lamʼakamalungula wulu uma le elombedi a waki, dimi lakadji ekilami efula lu mvudu ya kanu. Lamʼakawayangaka mbadiaka, dimi laketawoka. 11Tena efula mbakamasuyaka lu temwelo tshe. Dimi lakahimbi dia mbatengia Unyashungu, lakatamanya mbahetsha, lakasuya edja ndu lʼesumba wa lu wedja ekina.26:11 Etsh. 8:3; 22:4-5.

12Okone dimi lakatatshokaka utsha la Damaseke lu dikambu ne, la wulu uma le elombedi a waki la diui diawo. 13Lamʼakakumi unya lʼatei ote, we khumʼekanga, dimi lakenyi usasi uma lʼulungu, wuleki usasi a unya. Vo wakampetela dimi la wane wakatatshokaka la mi. 14Shu tshe takako la kete. Ku dimilakuki diui diamvutela lʼoteketa wʼasi Heberu ati: Saulu! Saulu! ukundi ansuyaye na? We ayuhumo dia nsukuya lukulu lʼetamba wa sodi. 15Dimi lakati nti: Khumadondjo, we na? Ndi akati ati: Dimi Jesu, kasuyaye. 16Keli unela, emali. Dimi lambenama le ye, dia nkosonola uku ukambi la omenyi wʼakambu wakayamenyi, ndu wayumukenya. 17Dimi layukushimbela uma le asikaye, ndu uma le asi wedja — wakutumami le wo; 18dia we nsenya ashu awo, dia vo nkadimo uma lu udjima utsha lu usasi, la uma lu wulu a Satana utsha le Unyashungu; dia vo nungula edimanyelu ka kolo la ukito lʼatei a wane wambukidiama uma lu mbetawo ka dikambu diami.

19Uma lu akambu aso, we khumʼekanga Angiripa, mbakimi kuntuna nkitanyia enelo kʼuma lʼulungu. 20Ntundu, dimi lakatela wa la Damaseke,26:20 Etsh. 9:20. ndu wa la Jerusalema,26:20 Etsh. 9:28-29. ndu wa lu leke la Judiya tshe, ndu asi wedja nti: Nyukadimuli etema le Unyashungu. Nyutshaki akambu uku ukadimudinyu etema. 21Dia dikambu ne, mbakamundi asi Juda lu etemwelo, wakayangi ndjakami. 22Ne dia Unyashungu akankimanyia, mbemadimi edja ndu elo, latela wa tshitshe ndu wa waki paka akambu wakati amvutshi la Mose vati: Wayuya. 23Diaki la Kristu dia nsuwa, ku ndi akulo uma lu nyoi.26:23 1 Kor. 15:20. Okone ndi akenya ndu asikandi ndu asi wedja yanyi.26:23 Is. 42:6; 49:6.

Festo Ambutela Paulu Ati: “We Ambudjo”

24Lamʼakandayateketela osoku, Festo akati diui dia wulu ati: Paulu, we ambudjo! Ewu kaye kʼutamanya kambukudjuya. 25Keli Paulu akati ati: Shakasaka Festo, dimi kema umbidjoki. Dimi lambuta aui wa mete la yimba. 26Khumʼekanga mbeyaka akambu aso, haluki woma dia mbutelawo. Lambukana nti: Akambu ako hawuwushama, ne dia dikambu ne kuntshama lu usheshe. 27Khumʼekanga Angiripa, we mbetawoka aui wʼamvutshi? Dimi mbeyaka nti: We mbetawoka. 28Angiripa akatela Paulu ati: Lʼetena ka tshitshe, we nkanaka dia mbetemi usika Kristu! 29Paulu akati ati: Kuna etena ka tshitshe kana kʼutali, dimi lambolomba Unyashungu dia we la wane tshe wambuka aui ami elo, wayali uku dimi, paka molola ene etu watshikali.

Utunduyala Paulu Kunkungela Kayisa, Tshiki Ndi Ambukimwama

30Khumʼekanga akunela, ndu umbuledi, ndu Berenika, ndu wane wakadjashi kame la wo. 31Lamʼakawamo, vo wakatanela vati: Untu one kuntsha dikambu dia ndi mvo, kuyanga dia mundama lu lukanu. 32Angiripa akatela Festo ati: Utunduyala untu one kunkungela elumbwelu ka Kayisa, tshiki ndi ambukimwama.

ETSHA WA ATUMAMI 27

Paulu Ambutsho lu Watu Utsha Vitaliya

1Lamʼakawasanguya dia shu ntsho lu watu utsha lʼItaliya, vo wakakimo Paulu la asi lukanu amotshi le Juliyo, olombodi wʼalimbi wakawetaka vati: Ului wʼAngusta. 2Lamʼakatoto lu watu wa lʼAdaramutiyo, wakatatshokaka lu ahuli waki lʼumamu wʼashi lu leke lʼAsiya, shu takatshu, ndu la Aristarako, usi Makedoniya, uma la Tesalonika. 3La wedi a pindju, shu takakumi la Sidona. Juliyo akatshela Paulu la ketshi, akawusha wulu wa ndi ntsho la ntenda engenyi andi, dia ntukimanyiama le wo. 4Lamʼakatamo uma leko, shu taketi lʼokongo a Kupiro, ne dia lopepe lakatukaluyaka. 5Lamʼakatateho ashi waki lasuki la Kilikiya la Pamufuliya, shu takakumi la Mura ka la Lukiya. 6Olombodi wʼalimbi akatani watu wa lʼAlesanderiya leko, wakatatshokaka utsha lʼItaliya, ku ndi akatotshiya loko. 7Shu takatshu osoku nshi efula, takakumi lasuki la Kinido, taketi lʼokongo a Kerete, lasuki la Salamona, ne dia lopepe lakatuhekuya. 8Lama mbeta leko, aki dikambu dia wulu. Shu takakumi lu dihuli dietawo vati: Abungu wʼAmena, lasuki lʼusumba wa Lasea.

Lokendo lu Watu Lambuyala Wulu

9Lamʼaketi nshi efula, lokendo lakayala wulu, ne dia nshi yʼekilelu ka mbu ya nde yaketi, Paulu akawaewula. 10Ndi akawatela ati: Wayone, lambeya nti: Elanyelu ka watu la eshishwelu ka diango efula ayuyala lu lokendo lone. Keli aha dikambu dia watu la diango tu, keli ndu dia nyumu yasu. 11Keli olombodi wʼalimbi aketawo aui wʼusi yenda la wa kanga watu, uleki aui wa Paulu. 12Ne dia dibungu so tadiaki ololo dia antu ntshikala leko lu ngondo ya tshitshi, ku wane wakaleki efula wakati vati: Tumo lindu, kana tayeya nkuma la Finiki la ntushidiya ngondo ya tshitshi. Leko keli dibungu dimotshi dia la Kerete, dieledi lʼasa ngelʼa kushi la ehutwelu, ndu lʼasa diku dia kushi la ehutwelu ka unya.

13Lamʼakapepe lopepe uma ladiku dia kushi okoke okoke, vo wakakani vati: Tambukundja kalangasu. Vo wakunyia lungu, waketi lasuki la Kerete. 14Lamʼaketi etenyi ka tshitshe, lopepe la wulu lakawetaka vati: “Asa ngelʼa kushi lʼehutwelu” lakayi uma la kete. 15Lamʼakalapepe uya lu watu, ku watu kumbeya nsimbo utsha lene akayakaka lopepe. Shu takalembohala, ku lopepe lakatokendjakendja. 16Taketi lʼokongo a kete ya tshitshe, yakawetaka vati: Kauda, taki la dikambu dia wulu dia memba watu a tshitshe. 17Lamʼakawawunyia, vo wakatshunge watu a wuki ekodi lʼokongo dia mbumamanya. Lamʼakawuki woma vati: Lopepe layutukumia ndu la Suriti, vo wakahanula apema, ku lopepe lakatokendjakendja. 18Lopepe lakatohenyahenya wulu. La wedi a pindju, wakatatela ntambiya diango diaki lu watu lu ashi. 19Lamʼakakuki lushi la satu, vo wakatambiya diango dia nkendjakendja watu lu ashi lʼanya awo. 20Unya la toto kuntohetela nshi efula: lopepe lakaleki wulu; shu kunungamela ntu shati: Tayuhanda. 21Lamʼakawakili ma etenyi kʼutali, Paulu akemala lʼatei awo, akati ati: Wayone, utunyuka diui diami, tshiki nyu kumunela uma la Kerete, ndu tshiki nyu kundjala la elanyelu ndu la eshishelu ka diango okone. 22Keli kakiane, nyongenengene. Lumu lʼuntu hashisho, paka watu utu. 23Ne dia lʼutshu one, ondjelo wa Unyashungu, one lemi untu andi ndu lakambelami ulimu akayemala lasuki la mi; 24akamvutela ati: Paulu, tukaki woma; dieli la ye dia memala la ntundu ka Kayisa. Enda, Unyashungu ambukusha tshe watatshu la ye lu watu. 25Okone, nyu wayone, nyongenengene! Dimi la mbetawo le Unyashungu nti: Dikambu diakandamvutedi, diayutshama. 26Keli dieli la su dia nkuma lu kete ya tshitshe motshi.

Watu Ambuhandjo, Wambuhanda

27Lamʼakakuki utshu a dikumi lʼanei, lopepe lakatutadiatadia lʼashi a wuki wʼAdariya. Lʼasa ndeki, asi watu wakakani vati: Taya lʼumamu a kete motshi. 28Vo wakedika dingunda diʼashi, diaki aboko akumi ahendi. Lamʼakawatshu etenyi, vo wakedika ntu, aki aboko dikumi la atanu. 29Lamʼakawuki woma vati: Tayukuma lʼave, vo wakatambiya kungu nyei lʼashi uma lʼokongo a watu, vo wakalombe dia unya mputo. 30Asi watu wakayangi ndawo, wakahuluya watu a tshitshe lʼashi. Wakadimbiya vati: Shu nangaka mbidja kungu kina lʼote a watu. 31Ku Paulu akatela olombodi wʼalimbi ndu alimbi ati: Naka antu aku hawutshikala lu watu, ku hanyeyi nshimbamela. 32Ku alimbi wakahimbula ekodi wa watu a tshitshe, ku vo wakako lʼashi.

33Lamʼakayangi unya mputo, Paulu akasengasenga vo tshe ati: Nyose ema ka nde, nyuli, ne dia elo eli nshi dikumi la nyei yambunyukila mbu ya nde, nyatali engo. 34Okone dimi lambunyosengasenga dia nyu nde ema. Dikambu ne dieko dia nyushimbela. Nduku wondji a divu wʼuntu wayushisho. 35Lamʼakandati osoku, ndi akose ukama a ma, akuki Unyashungu lusaka lu ashu awo tshe, akawatula, akatatela nde. 36Ku vo tshe wakangenangena, wakali. 37(Shu tshe lu watu taki kama hyendi la akumi esambeli la asamalu.) 38Lamʼakawaluti, vo wakatambiya epunga lu ashi, ne dia minya wutshu lu watu.

39Lamʼakahuto unya, vo kumbeya kete yako. Keli vo wakenyi okedi waki la umamu a bamubamu, ku wakasanganya diui vati: Tayeya ntola watu utsha leko. 40Vo wakahimbula ekodi wa kungu, waketshiki lu ashi, wakakelekula ekodi wa tenda wakakelekami. Vo wakahane dipema dia lʼote a watu, wakatshu utsha lʼumamu. 41Vo wakayi lu dihuli diakasangana kushi hyendi, ku watu akakama lu lokongo. Ote a watu wakakama lu lokongo, akashikikala, keli kuma kawo akatatela mpandjo, ne dia asukhu a wulu. 42Tukanyi tʼalimbi taki vati: Tudiaki asi lukanu, watukutsho usali, ku walawo. 43Keli olombodi wʼalimbi akalangi nshimbela Paulu, akashimbi diaha vo ntsha uku akawasanguya. Ndi akati ati: Wane weya ntsho usali, watambeli lu ashi, wakumi lʼusui. 44Akina wose abaya, kana diango dikina uma lu watu. Okone vo tshe wakahandi, wakakuini lʼusui la wulu.

ETSHA WA ATUMAMI 28

Lu Kete ya Malata

1Lamʼakatahandi, shu takeyi shati: Disenga ne mbetawo vati: Malata. 2Asendji wa leko wakatuki ngandji efula. Vo wakatohetshiya dja, wakatulungula shu tshe, ne dia mvula akatatela ndo ndu akayala tshitshi. 3Keli lamʼakasanganya Paulu ekanda ka kunyi ka munga lu dja, ului akatumbi uma loko ne dia luhaladi la dja, akulumata lu lunya. 4Lamʼakenyi asendji ului a kolo alendalenda lu lunya landi, vo wakatanela vati: Mete, untu one undjakanyi mbendi. Ndi ambuhanda ashi a wuki, keli sambu kʼololo hetawo dia ndi ntshikala la lumu. 5Keli vo wakalungamela vati: Ndi ayuda, kana ayoko la kete shashimuya, ayuvo. 6Keli lamʼakawalungamela edja, komena nduku dikambu diakayala le ndi, vo wakakadimula tukanyi; wakati vati: Unyashungu mbendi.

Pubiliyo Ambuhangia Paulu

7Lasuki la lamʼakiwo, kaki kete yʼuntu a wuki a lu kete sho, lukumbu landi Pubiliyo; ndi akatulungula, akatuhangia nshi shatu la kenemo. 8Shi Pubiliyo aketama la hemo ka dungi la sawu ka dikila. Paulu akoto lene akindi, akalombe, akawahe anya, akokonya. 9Lamʼakandatshi osoku, akina waki la hemo lu kete sho, wakayi, wakakono. 10Vo wakaleki ntolemia; lamʼakatatshu, vo wakotshiya diango diakatahumbi lu watu.

Wambutsho la Watu Ukina; Wambukuma la Romo

11Lamʼaketi ngondo shatu, shu takoto lu watu wa la Alesanderiya waketema lu kete sho lu ngondo ya tshitshi, djimbitelu yawo yaki Ana wa Diasa. 12Shu takakumi la Sirakuse, takatshikala leko nshi shatu. 13Takatshimbi uma leko, takakumi la Rengiyo. Lamʼaketi lushi otoi, lopepe lʼuma ladiku dia kushi lakapepe. Lu lushi la hendi, takakumi la Puteoli. 14Shu takatani anyasu leko. Vo wakatosengasenga dia shu ntshikala la wo nshi esambeli. Okone shu takakumi la Romo. 15Lamʼakuki anyasu wa la Romo lukumu lasu, vo wakayi la ndjutusangela lu Kituka kʼApiyo la lu Pangu Shatu. Lamʼakawaenyi Paulu, ndi akuki Unyashungu lusaka, akakikitala. 16Lamʼakawakumi la Romo, waketawo dia Paulu mbidjase ndame, ndi la dimbi diakiilamaka.

Paulu Ambutela Asi Juda a Waki Diui

17Lamʼaketi nshi shatu, Paulu aketi dihangamendi diʼasi Juda. Lamʼakawayi, ndi akawatela ati: Anyasu, kuyanga dimi kuntshela antu kolo, kundjaka ditshelu dia watshesu, keli lakakimwama lʼanya wʼasi Romo, lakayala usi lukanu umaka Jerusalema. 18Lamʼakawamumbula, vo wakalangi ntshungulami, ne dia dimi taki la dikambu dia mvo. 19Keli lamʼakatuni asi Juda dikambu so, diaki la mi dia nkungela elumbwelu ka Kayisa,28:19 Etsh. 25:11. keli dimi taki la dikambu dia nsongwela wudja asu. 20Dia dikambu ne mbakamanyetshi, dia dimi nyena ndu dia nteketa la nyu; dimi lambukelekama la molola one, ne dia elungamelu ka Isariyele. 21Vo wakawutela vati: Shu kunungula mikanda uma la Judiya dia dikambu diaye. Nduku unyasu akayi lindu dia nkudimula kana nteketa diui dia kolo lu dikambu diaye. 22Keli shu nangaka mbuka uku akanaye dia otemwelo one. Shu mbeyaka shati: Lu ahuli tshe, antu mvutaka aui wa kolo lu dikambu diawo.

23Lamʼakawusunwela lushi, efula wakayi lakandi. Ndi akalimbitshiya dikambu umaka pindju edja ndu la dikolo; akawatela dia diulelu dia Unyashungu; akawaenya dikambu dia Jesu, uma lʼelembe a Mose ndu uma lʼaui wʼamvutshi. 24Amotshi waketawo akambu wakandati, amotshi wakatuni. 25Vo kombedimia aui kame, wakamo lamʼakawatela Paulu diui diame ati: Nyuma kʼOlolo akatela watshenyu dikambu dia mete lʼunyo wʼumvutshi Isaya ati: 26Tshoka le antu ane, uwateli wati: Mbuka nyayuka, ku hanyushihudia; Mena nyayena, ku hanyenyi: 27Etema wʼantu ane wambuyala wetshu, Atui awo wambuyala puki, Vo wambudiha ashu awo, Ne dia vo watukena la ashu awo, Watukuka lʼatui awo, Watukushihudia lʼetema awo, Watukukadimo, dia dimi mbakonoya.28:27 Ms. 6:9-10.

28Okone nyeyi nyati: Panda kene ka Unyashungu kambutumama le asi wedja ndu vo wayukiuka. 28:28 “28:29” nfundamaka paka la tshina dia page, aha lʼatei lu abuku amotshi. 29Lamʼakandati aui aso, asi Juda wakamo, wakadjana tamu efula.

Paulu Ambusambisha la Romo Deku Pendi

30Paulu akadjase deku pendi etundu lu luudu lone lakandafutaka, akalungula antu tshe wakayakaka le ndi. 31Ndi akasambisha dia diulelu dia Unyashungu; akawaetshaka akambu wa Khumadiondjo Jesu Kristu la dihunga tshe. Nduku untu akushimbi.