1Paulu, utumami a Kristu Jesu uma lu lulangu la Unyashungu, la Timote unyasu.
2Le ekilami la anyasu wa kolamelu le Kristu weli la Kolosai: Ngandji ka mamba kayali la nyu, ndu ki kʼuma le Unyashungu Shesu!
3Shu tatukaka Unyashungu, Shi Khumesu Jesu Kristu, lusaka, tatunyolombelaka nshi tshe. 4Shu takuki lukumu la mbetawo kanyu le Kristu Jesu, ndu dia ngandji kukanyu ekilami tshe, 5ne dia elungamelu kambuwunyukitshiya lʼulungu, kakanyuki lukumu lato ntundu lu diui dia mete dia lukumu lʼololo, 6lakayi le nyu. Lo leko ndu lu kete tshe — latotokaka elua, latufulaka — uku atshalo ndu lʼetema anyu uma lu lushi lakanyuki ndu lakanyeyi ngandji ka mamba ka Unyashungu lu mete; 7uku akanyeki uma le Epafara,1:7 Kol. 4:12; File. 23. unyasu ukambi wa ngandji, leli ukambi a Kristu a kolamelu dia dikambu diasu, 8ndu lakatutela dia ngandji kanyu le Nyuma.
9Dia dikambu ne, ndu shu, uma lu unya wakatuki lukumu lone, hatuheko nyolombela lu dombelo diasu, dia nyu ndudiama lu nimbitela lulangu landi, dia nyu ndjala la yimba ya nshihudia akambu tshe wa Nyuma, 10dia nyu nkendakenda ololo uku alanga Khumadiondjo, dia nyu nto elua lu elimu wʼololo tshe, la dia mbula lu nimbitela Unyashungu. 11Nyukikitshami la wulu tshe, uku wulu a lutumbu landi, dia nyu ndjala la etetemalu lu memakana, kame la ongenongeno. 12Nyuki Shesu, one lakatete ololo dia shu nkita ukito wʼekilami wa yanyi, lusaka. 13Ndi kakatutshungula uma lu wulu a udjima, kakatukadimula utsha lu diulelu dia Onʼandi la ngandji. 14Uma le ndi kesu lʼetshungwelu kasu, ndu la edimanyelu ka kolo yasu.1:14 Ef. 1:7.
15Ndi eli efanelu ka Unyashungu kahenama, enundu a diango tshe diakatungama. 16Ne dia le ndi, kakatungama diango tshe, lʼulungu ndu la kete, diango dienama ndu diango diahenama, kana kiti ya diulelu, kana ewandji, kana waulelu, kana embuledi. Ndame kakayatungela diango tshe. 17Ndi keli ladiku dia diango tshe, diango tshe diambukutshama le ndi. 18Ote a dimba mbendi, dieli ekelizia.1:18 Ef. 1:22-23. Ndi keli etatelu, keli enundu a wane wulo uma lu nyoi, dia ndi ndjala ladiku diʼakambu tshe. 19Ne dia Shesu akalangi dia elulelu kʼakambu tshe ndjala le ndi, 20la dia ndi mbekesanyia diango tshe la ndi, mbakandete ki lu dudla dia lʼutamba andi a mpeketanya, lʼatei a diango dia la kete ndu diango dia lʼulungu.1:20 Ef. 2:16.
21Nyu wane wakangana, ndu waki atunyi lu tukanyi tanyu ndu lʼetsha anyu wa kolo, 22keli kakiane ndi ambunyekesanyia la dimba diandi ne dia nyoi kandi, dia nyenya lu ashu andi uku ekilami waha la ekomo, waha la unungu, 23naka nyu nyayutetemala lu mbetawo, naka nyayuyashikike, naka hanyunganyiama uma lʼelungamelu ka lukumu lʼololo lakanyuki, lakasambishama lʼetungelu tshe la tshina diʼulungu, ndu lakamayala, dimi Paulu, usambisha alo.
24Kakiane, dimi lambongenangena lu asui ami wamumusuwa dikambu dianyu. Dimi lambukutsha asui wa Kristu wutshikadi lu dimba diami, ne dia dimba diandi dieko ekelizia, 25ako wakamayala usambisha uku ulimu wakambisha Unyashungu dia dikambu dianyu, dia nyushihudia diui dia Unyashungu. 26Dio mbeli dikambu dia usheshe diakashama enonyi lʼenonyi, ndu nonga la nonga. Keli kakiane, dio diambenama le ekilami andi, 27le wane wakalangi Unyashungu mbewuya dia ongonyi la lutumbu la dikambu ne diushami lʼatei wʼasi wedja, dieli Kristu lʼetema anyu, elungamelu ka lutumbu. 28Ndi kanyutelasu, tatewulaka untu tshe, ndu tatetshaka untu tshe la yimba tshe, ne dia shu nduwula untu tshe lʼuluwanyi le Kristu. 29Dia dikambu ne, mbatumutshaka ulimu wulu, mbatumuhimbaka ntsha ulimu andi la wulu ami tshe watundumbishaka.
1Ne dia dimi nangaka nyu mbeya okone anyukambelami, ndu wa la Laodikiya, ndu antu akina wahatamenyi la ashu, 2ne dia etema awo wakikitshami, la wakimameli lu ngandji la lu ongonyi wʼakambu tshe wa yimba, ne dia vo mbeya dikambu diushami dia Unshungu, dieli Kristu; 3ongonyi a yimba la bewu wambushama le ndi. 4Dimi lambunyutela dikambu ne, untu tanyunganyiaki la aui wʼamena. 5Kuyanga dimi kema lʼatei anyu, ku utema ami eko le nyu. Dimi la ongenongeno lamʼenami ndjalongosola kanyu, ndu ushikikalu a mbetawo kanyu le Kristu.
6Uku akanyalungula Khumadiondjo Kristu Jesu, okone nyokendakendaki la ndi. 7Nyuyakikitsha, nyuyaudia, nyuyashikike lu mbetawo kanyu le ndi, pupu uku akatanyetsha. Nyukaki lusaka efula.
8Nyewo, untu tanyunganyiaki la yimba yʼantu ndu la akambu wa kashi, uku ditshelu diʼantu, watuyelaka akambu wa la kete, wahayeli Kristu. 9Ne dia elulelu tshe ka Unyashungu keko lu dimba diandi, 10ku nyu nyambukuma lu elulelu ka lumu le ndi, ndʼako leli ote a diulelu tshe la wulu. 11Le ndi kakanyahema ehekeli waha lʼanya lamʼakanyanya utema a ntundu, lu diahamelu diʼuhekeli wa Kristu. 12Nyu nyakakhundama la ndi lu batiza, ndu nyakulwama la ndi ne dia mbetawo ka wulu a Unyashungu, lakawulula uma lu nyoi.2:12 Rom. 6:4. 13Nyu wane wakavu ne dia kolo yanyu, ndu waki kumbahema ehekeli wʼalimba, Unyashungu akanyusha lumu kame la ndi,2:13 Ef. 2:1-5. akatudimanyia kolo yasu tshe. 14Ndi akadimula mukanda wʼadjangu wakawatufundela, akawunya uma lʼatei asu, akokokome lʼutamba a mpeketanya.2:14 Ef. 2:15. 15Okone ndi akanya waulelu la embuledi, akawaenyanya lu seke, akaleki wulu lʼutamba a mpeketanya.
16Okone untu tanyulumbuyaki ne dia mbu ya nde, kana diango dia no, kana dia lushi lʼongenongeno, kana alelu ka ngondo, kana lushi lʼekila.2:16 Rom. 14:1-6. 17Akambu aso weko uku didjidji diʼakambu wayayi, keli dimba dieko dia Kristu. 18Tanyetawoki untu nyohotola ushasha anyu, ne dia ndi ambuyakitshakitsha anyanya, la atotemolaka andjelo, atukanaka yimba dia waenelo andi, atutakulaka ne dia tukanyi tandi ta akambu wa dimba. 19Ndi hamamema Kristu leli Ote a dimba; diango tshe dia dimba diambusangana ndu diambula uku akadilangi Unyashungu le ndi.2:19 Ef. 4:16.
20Naka nyu nyakavu kame la Kristu dia akambu wa la kete, okoko wana watshanyu uku atutshaka wa la kete? Dikambu kuna dietawonyu adjangu nyati: 21Tukimelaki! Toletaki! Tunandaki! 22(dikambu so ndialaka dia diango tshe diatulamaka lamʼambudiutshama ulimu), uku wata elembe la wetshelu wʼantu? 23Mete, akambu aso weko la yimba lu ashu wʼantu wayasonwela diango diatemolawo, wayakitshakitsha, ndu wasuya alimba. Akambu aso hawushimbi akambu wa kolo wʼalimba.
1Naka nyu nyakulwama kame la Kristu, nyuyangi diango dieli lʼulungu, lu dihuli diudjashi Kristu, lu lunya la pami la Unyashungu.3:1 Esam. 110:1. 2Nyukani yimba ya diango dia lʼulungu, aha dia la kete. 3Ne dia nyu nyakavu, ku lumu lanyu lambushama la Kristu le Unyashungu. 4Lamʼayenama Kristu lumu lasu, ku nyu nyayenama kame la ndi lu lutumbu.
5Okone nyudiaki akambu wa kolo wa la kete: munanyi, akambu wa mindu, saki ka dimba, lulangu la kolo, okomiya, weli otemwelo wa dikishi. 6Dia akambu ane, kele ka Unyashungu atuyakaka le akanga wʼuhedia. 7Ndu nyu nyakakendakendaka loko ntundu lamʼakanyakendakenda lu akambu ako. 8Keli kakiane, nyunya akambu ane tshe: kele, lutunu, somboki, lotengo, aui wa sonyi uma lʼenyo anyu. 9Tanyutaki kashi, ne dia nyu nyambukulula untu edjedja3:9 Ef. 4:22. la akambu andi, 10nyambolota untu uyuyu,3:10 Ef. 4:24. lufanyi la utungi andi3:10 Etat. 1:26. lu yewu yʼuyuyu. 11Loko, aha usi Ngirika kuyanga usi Juda, kuyanga umbahemi wʼuhekeli, kuyanga aha umbahemi wʼuhekeli kuyanga osendji, kuyanga usi Skutiya, kuyanga fumbi, kuyanga luyadjasedi, keli Kristu ambukuka tshe, eko lu akambu tshe.
12Ne dia nyu nyeko esonami wa Unyashungu, la ekilami wa ngandji, osoku nyolote etema wa ketshi, la wa memakana, la wa ndjakitshakitsha, la wa kenemo, la wa kolamelu. 13Nyukikaneli kolo.3:13 Ef. 4:2. Nyudimanyanyia kolo yanyu, naka untu eko la ukina dikambu. Uku akanyudimanyia Khumadiondjo kolo, dieli la nyu, ndu nyu dia nyimanyiana kolo.3:13 Ef. 4:32. 14Ladiku dia akambu ane tshe, nyolote ngandji; to keli dimama dia uluwanyi. 15Ki ka Kristu kuleli lʼetema anyu, dia dikambu ne mbakanyetama lu dimba otoi. Nyukaki lusaka. 16Diui dia Kristu diadjase, diangone lʼetema anyu. Nyetshanya lu yimba tshe, nyewani la kimbu la esambu wʼololo la wa Nyuma. Nyimbeli Unyashungu esambu la ngandji ka mamba lʼetema anyu. 17Akambu tshe watanyu la watshanyu, nyutshi tshe lu lukumbu la Khumadiondjo Jesu. Nyuki Unyashungu Shesu lusaka dia dikambu diandi.3:17 Ef. 5:19-20.
18Wadi, nyuyali lʼokongo a waumenyu,3:18 Ef. 5:19-20; Ef. 5:22; 1 Pet. 3:1. uku alanga Khumadiondjo. 19Waumi, nyulangi wadienyu,3:19 Ef. 5:25; 1 Pet. 3:7. tanyahetshaki. 20Ana, nyukitanyia ambutshi anyu lu akambu tshe; dikambu so mbatongenyangenyaka Khumadiondjo.3:20 Ef. 6:1. 21Nyu washi, tanyutshaki anʼanyu kele,3:21 Ef. 6:4. ne dia vo watukuheko. 22Ehombo, nyukitanyia aui wʼakhumenyu wa la kete, aha paka lu ashu awo, uku wane walanga ngenyangenya antu, keli nyutshi ulimu lʼutema otoi, uku antu wuka Khumadiondjo woma. 23Akambu tshe watshanyu, nyatshi lʼutema otoi, uku le Unyashungu, aha le antu. 24Nyeyi nyati: Nyu nyayulungula difutu dia sangu uma le Khumadiondjo. Nyu nyatukambelaka Khumadiondjo Kristu ulimu. 25Ne dia one latutshaka kolo, ayulungula uku kolo kakandatshi,3:25 Ef. 6:5-8. dikambu so hayala shonodi.
1Akhumi, lyutsheli fumbi yanyu akambu wʼulolo. Nyu mbeyaka nyati: Ndu nyu nyeko la Uwandji lʼulungu.4:1 Ef. 6:9.
2Nyutetemali nomba, nyosenaki la eukelu ka lusaka. 3Nyutolombelaki ndu shu, dia Unyashungu ntudihwela lukuki, ne dia diui dia mvuta dikambu diushami dia Kristu, dia dikambu ne mbemi lu lukanu, 4dia dimi mpunula dikambu diako uku ahumbami mvuta.
5Nyokendekende la yewu le antu wahatetawo, tanyushishaki etena.4:5 Ef. 5:16. 6Nyutaki paka aui wa ngandji ka mamba tena tshe, wosohanyimi la leho dia nyu mbeya wuhu wa nkaluya untu tshe diui.
7Tukiko,4:7 Ef. 5:16; Etsh. 20:4; 2 Tim. 4:12. unyasu la ngandji la ukambi a kolamelu ndu unyasu ukambi le Khumadiondjo, ayunyutela akambu tshe. 8Dia dikambu ne, mbakamutumi le nyu, dia nyu mbeya okone wesu, la dia ndi nkikitsha etema anyu.4:8 Ef. 6:21-22. 9Ndu Onesimo,4:9 File. 10-12. unyasu la ngandji la kolamelu, usikanyu kendi. Vo wayunyewuya akambu tshe weli lindu.
10Aristarako,4:10 Etsh. 19:29; 27:2; File. 24. unyami usi lukanu, ambunyutumela moyo, ndu Mako,4:10 Etsh. 12:12, 25; 13:13; 15:37-39. onangu Baranab; (lakanyutela dikambu diandi — naka ndi ambuya le nyu, kanyulunguli), 11la Jesu, latuwetaka vati: Justo. Vo atu mbeli antu wakahema uhekeli lʼatei wa anyami ekambi wʼulimu wa diulelu dia Unyashungu Vo mbakankikitsha. 12Epafara,4:12 Kol. 1:7; File. 23. usikanyu, ukambi a Kristu, ambunyutumela moyo. Ndi atunyolombelaka, dia nyu nduwana la ndjala la elungamelu ka wulu lu lulangu tshe la Unyashungu. 13Ne dia omenyi a dikambu diandi mbemi, nti: Ndi akakambi ulimu efula dikambu dianyu ndu asi Laodikiya, ndu asi Hiyerapoli. 14Luka,4:14 2 Tim. 4:11; File. 24. wetshi walangema, la Demasi,4:14 2 Tim. 4:10; File. 24. wambunyutumela moyo. 15Nyusha anyasu wa la Laodikiya ndu Numafasi, ndu ekelizia weli lu luudu landi, moyo. 16Lamʼayunyala mukanda one lʼatei anyu, nyuwaleli ndu ekelizia wʼasi Laodikiya. Kanyali ndu mukanda uma la Laodikiya. 17Nyuteli Arakipo4:17 File. 2. nyati: Ulamaki ulimu wakakusha Khumadiondjo, ushidiya.
18Dimi Paulu lambunyufundela moyo la lunya lami. Nyuho kanu yami. Ngandji ka mamba kayali la nyu!